Luka 19

Zaka kishi ku utafu

1Yesu u yawai e Jeriko, a̱yi a kuwala punu a̱ likuci ya. 2Vuma vi yoku punu, kula ku ni ku ɗa Zaka. A̱yi ɗa vuzagbayin vi ishi a utafu, wi ta̱ kpamu n uciyi. 3U cigai we kene ko yayi Yesu, amma adama a na wi megejere, u fuɗa we ene yi ba, adama a̱ ka̱bunda̱i ka uma kpamu. 4Ɗaɗa u sumai kelime u banai u kumbai ma̱biri, u ciya̱ we ene yi an Yesu wi lo a kuwala a uye u nan lo wa.

5Ana Yesu u yawai a magaba ma derere, ɗa wi indai gaɗi, ɗa ta na u danai ni, “Zaka, cipa̱ gogo. Anana n kucipa̱ ta̱ a kpaꞋa ku nu.” 6Ɗa Zaka u cipa̱i gogo, ɗa u rabasai ni m ma̱za̱nga̱.

7Uma a na e enei nannai ra̱ka̱, ɗa a̱ ka̱na̱i mololo, “U bana ta̱ kuyaꞋan limoci a kpaꞋa ku vuza vu unushi.”

8Amma Zaka u ɗenga̱i kashani ɗa u danai ni, “La̱na̱, Vuzagbayin. Gogo na punu na mi ta̱ e kuneke kagimi ku uciyi ka̱ va̱ wa aza a unambi. N lyaꞋa baci kpamu vuza yoku, n kutsupa yi ta̱ n ili i va̱ ali kuna̱shi tsu nan lo tsa.”

9Yesu u danai ni, “Anana wishi† u Ka̱shile u ta̱wa̱ ta̱ a kpaꞋa ku nam pa, adama a na vuma vu nam pa feu maku mi Ibrahim maꞋa mayun. 10Adama a na mpa Maku ma Vuma n ta̱wa̱ ta̱ kula̱nsa̱, ka̱ta̱ mi isa aza a na a̱ puwa̱nka̱i.”

Agisana a agbashi kupa

(Mat. 25:14-30)

11Ana i lo a kupana ili i nan lo, ɗa u lyaꞋi kelime n kudana le agisana ciya̱ u lapula kusheshe ku le. Adama a na uma kpamu e sheshe ta̱ tsugono tsu Ka̱shile ci ta̱ a̱ kuta̱wa̱shi lo gogo an wi ɗevu n Urishelima. 12U danai, “Vuma vu kpaꞋa ku tsugono vi yoku ɗa wi a kubana a̱ likuci i yoku daꞋin. U banai adama a na a zuwa yi mogono, ka̱ta̱ kpamu u bono. 13Kafu u laza a kubana nwalu ma, ɗa u ɗekei agbashi a̱ ni kupa, ɗa u nekei le ikebe ya azurufa#19:13 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Mina” a̱ Ubuta̱ wi ili i Kuyeve. vi te vi te. Ɗa u danai, ‘YaꞋankai i ɗa tsulaga, sai m bono.’ ”

14“Amma uma a̱ ni a iwain ni, ɗa a̱ suki uma o yoku a bana a dana azagbi o ngono a, ‘Tsa kuciga yi u yaꞋan mogono ma̱ tsu ba.’

15“Sai an ta na a zuwai ni tsugono tsa, ɗa u bonoi a kpaꞋa. Ɗa u la̱nsa̱i agbashi a na u nekei ikebe ya, adama a na u yeve ariba a na a̱ ciya̱i.

16“Vuza iyain u ta̱wa̱i ɗa u danai, ‘Vuzagbayin, vikebe vi te vu nu vi ciya̱ ta̱ ikebe kupa kpamu.’

17“Vuzagbayin vi ni u danai, ‘Kya̱sa̱ wu, kagbashi ka singai ka̱ va̱. Adama a na vi yaꞋan ta̱ kasingai n ili i kenu dem, okpo vuza vi kelime vi likuci kupa.’

18“Vuza ire u ta̱wa̱i, ɗa kpamu u danai, ‘Vuzagbayin, ikebe i nu i ciya̱ ta̱ kpamu iyum i tawun i yoku.’

19“Ɗaɗa vuzagbayin vi ni wu ushuki ni, ‘Avu lyaꞋa tsugono ci likuci i tawun.’

20“Ɗa kagbashi ko yoku ka̱ ta̱wa̱i kpamu, ɗa u danai, ‘Vuzagbayin, ikebe i nu i ɗa na, mi ishi ta̱ n ka̱ta̱la̱ i ɗa a kakashi, ɗa n sokongi. 21Mi ta̱ a kupana wovon u nu, adama a na avu vi cana ba. Vi ta̱ a kuɗika ili i na vu zuwai ba, ka̱ta̱ kpamu vi kyaꞋa a̱ ubuta̱ u na vi ca̱Ꞌi ba.’

22“Vuzagbayin vi ni wu ushuki, ‘N kuyaꞋanka wu ta̱ afada n ili i na yu uta̱i a̱ una̱ u nu, avu kagbashi ka gbani-gbani. Vi yevei ana mpa m kpa̱ɗa̱i kucana. Ɗa mi a kuɗikasa a̱ ubuta̱ u na n kpa̱ɗa̱i kuzuwa, ni n kyaꞋi i na m kpa̱ɗa̱i kuca̱Ꞌa̱. 23Yi ɗa̱i vu kpa̱ɗa̱i kuzuwaka mu ikebe i va̱ a kpakikebe? Ayin a na m bonoi va, mi ishi mi isa i ɗa wana ɗai n ciya̱ punu mini.’

24“Ɗaɗa u danai aza a na i lo kashani, ‘Isai ikebe i ni ya, ka̱ta̱ i neke vuza na wi n iyum kupa va.’

25“Ɗa a danai, ‘Vuzagbayin, wi ta̱ ɗe biꞋi n kupa!’

26“Ɗa u danai le, ‘N dana ɗa̱, vuza na baci wi n i ɗa, i ta̱ o kudoku yi kpamu, amma vuza na wi n i ɗa ba, ko i kenu i na wi n i ɗa, i ta̱ o kukotso a kisa yi i ɗa. 27Irala i va̱ i nan lo ya, aza a na a cigai n lyaꞋa tsugono tsa ba va, tuka̱i mu n ele na, ka̱ta̱ yu una le kelime ka̱ va̱.’ ”

Uma a Urishelima a rabasai Yesu

(Mat. 21:1-11; Mar. 11:1-11; Yah. 12:12-19)

28Ayin a na Yesu u kotsoi kudansa ili i nam pa, ɗa u lyaꞋi kelime a kubana a Urishelima. 29Ana a yawai ɗevu m Bataji m Bataniya a Kusan ku Zaitun, u ɗekei mukumitoni n ni n re, ɗa u danai le, 30“Banai a̱ likuci i yoku e kelime ka̱ ɗa̱. N kuꞋuwa ku ɗa̱, yi ta̱ e kene maku ma majaki ushiyi lo, ma na ka̱ta̱ vuza u saꞋwai kukumba ba. I shikpa maꞋa ka̱ta̱ i tuka̱ mu. 31Vuza na baci we ecei ɗa̱, ‘Yi ɗa̱i ya kushikpa maꞋa?’ danai ni, ‘Vuzagbayin wi ta̱ a kuciga maꞋa.’ ”

32Aza a na u suki va, a banai a cinai ta na derere tsu na u danai le va. 33Ana i a kushikpa maꞋa, ɗa vuza vi ili va we ecei le, “Yi ɗa̱i ya kushikpa majaki ma?”

34Ɗaɗa a̱ ushuki, “Vuzagbayin wi ta̱ a kuciga maꞋa.”

35A̱ tuka̱i m maꞋa u Yesu. O poloi aminya e le gaɗi tsa̱ a̱kuma̱ri, ɗa a kumbakai Yesu ɗe. 36Ana wi a nwalu, ɗa uma a̱ ka̱na̱i kupolo aminya e le a uye wa.

37U yawai ɗevu n ubuta̱ u na uye u gida̱la̱i a Kusan ku Zaitun. Ɗa ka̱bunda̱i ka uma ka̱ mukumitoni ma ra̱ka̱, a̱ ka̱na̱i ma̱za̱nga̱ n a cikpai Ka̱shile n a̱la̱ka̱tsu ka̱u, adama a ili i mereve i na e enei ɗe dem:

38“Una̱singai a kubana u mogono ma na ma̱ ta̱wa̱i n kula ku Vuzavaguɗu.”#Ishp. 118:26.

“Ma̱ta̱na̱ na ɗe gaɗi, n tsugbayin zuva dem.”

39Afarishi† o yoku punu a̱ ka̱tsuma̱ ka uma ka, a danai Yesu, “Malum, dansuka mukumitoni n nu.”

40Ɗa wu ushuki, “N dana ɗa̱, ko a paɗa baci bini, atali i ta̱ o korukpo m ma̱za̱nga̱ nannai.”

41Ana wi a kuyawa a Urishelima ɗa we enei ubirini wa, ɗa u shika̱i adama u ɗa. 42Ɗa u danai, “Yi ishi i ciya̱ de i yeve ko yayi u kutuka̱ ɗa̱ m ma̱ta̱na̱ anana. Amma o sokongu ta̱ maꞋa a̱ a̱shi a̱ ɗa̱ gogo na. 43Kanna ki ta̱ lo a̱ kuta̱wa̱ ka na irala i ɗa̱ i kumaꞋaka ɗa̱ idasakpatsu i kukumba mashilya mu ubirini. A kanza ɗa̱ punu e mere, ka̱ta̱ a kpada utsutsu. 44Ka̱ta̱ a uwa a minjarangu ɗa̱, a̱ɗa̱ m muku n ɗa̱ punu e mere mu ubirini ma. Ko katali a̱ kuka̱sa̱kpa̱ kaꞋa a umatyangi o toku ba, adama a na i kpa̱ɗa̱i kuyeve kanna ka̱ kuta̱wa̱ ka̱ Ka̱shile wa̱ ɗa̱.”

Yesu u lokoi aza a tsulaga a̱ A̱Ꞌisa̱ a Gbayin

(Mat. 21:12-17; Mar. 11:15-19; Yah. 2:13-22)

45Ɗaɗa u uwai a̱ A̱Ꞌisa̱ a Gbayin, ɗa u ka̱na̱i kuloko aza a na Ꞌya kuyaꞋan tsulaga punu. 46U danai le, “Wi ta̱ uɗani, ‘KpaꞋa ku va̱ ki ta̱ o kokpo kpaꞋa ka avasa,’#Ish. 56:7; Ir. 7:11. amma a̱ɗa̱ i bonokoi ku ɗa ‘kpaꞋa ko oboki.’ ”

47Kanna dem sai u yaꞋan kuyotsongusu a̱ A̱Ꞌisa̱ a Gbayin. Amma anan ganu vu gbagbaꞋin, nu nlum n Wila̱, koɓolo n aza e kelime a uma a cigai kuna yi. 48Ali n gogo na, a̱ ciya̱ uye u na o kutono ba, adama a na uma ra̱ka̱ i ta̱ a kuciga a pana kadanshi ka̱ ni.

Currently Selected:

Luka 19: asgNT

Highlight

Copy