Luka 14

Yesu u potsokpoi vuza yoku

1Kanna ka Ashibi ko yoku, Yesu u banai adama a na u lyaꞋa ilikulyaꞋa a kpaꞋa ku Kafarishi ka gbayin ko yoku. Ɗa uma a̱ ka̱na̱i kusaka yi mayin. 2Kelime ka̱ ni, vuma vi yoku vi ta̱ lo vuza na ikyamba i ni yi ushiti. 3Ɗa Yesu we ecei eyevi a̱ Wila̱ n Afarishi a, “Wila̱ u tsu u ka̱sa̱kpa̱ tsu ta̱ tsu potsokpo kanna ka Ashibi, ko u ka̱sa̱kpa̱ ba?” 4Amma ele a dana ili ba. Ɗa Yesu u zuwakai vuma va kukiye ɗa u potsokpoi ni, ɗa u ka̱sa̱kpa̱i ni u laza. 5Ɗa u danai le, “Vuza wi baci m maku ko majaki,#14:5 Iɗani i kuku i yoku i danai “makparagi ko majaki” adama a na n kelentsu ke Helene, udani “makparagi ko majaki” m “maku” o yotsonsonoi ta̱. ɗa ma̱ yikpa̱i a kayinva n Ashibi, ya̱ kuta̱ka̱ yi gogo lo ba?” 6Amma a fuɗa a̱ ushuku yi ba.

Ka̱ta̱ vi cikpa ka̱ci ka̱ nu ba

7Ana Yesu u la̱na̱i ɗa we enei uteku u na omoci o yoku i a kuzagba ki ida̱shi i singai i singai, ɗa u yaꞋankai le agisana a nam pa: 8“Kanna ka na baci a banuki nu a̱ ubuta̱ u ka̱ɗiva̱ ko yolo, ka̱ta̱ vu kanzaka ka̱ci ka̱ nu ida̱shi i singai ba. Adama a na vuza gba̱ra̱ vi yoku u kuyaꞋan ta lo vuza na a banuki. 9Vuza na u ɗekei nu va, wi ta̱ a kubana wa̱ nu, ka̱ta̱ u dana wu, ‘Ka̱sa̱kpa̱ka̱ vuza vu nam pa va ida̱shi i nu.’ Avu vi ta̱ o kokpo n wono, ka̱ta̱ vu bono vu da̱sa̱ngu a kakuba ke kenu. 10Ili i na vu kuyaꞋan, vuza u banuku wu baci, bana vu da̱sa̱ngu a kakuba ke kenu. Ta̱wa̱ baci, vuza na u banuki nu va u yawa ka̱ta̱ u dana wu, ‘Vuza va̱, ɗenga̱ vu bono na a̱ ubuta̱ u na u laꞋi n kugaꞋan.’ Nannai ɗa uma dem a kucikpa wu. 11Adama a na aza a̱ a̱ra̱ɗi dem i ta̱ o kubonoko le ili ba. Aza a na kpamu a cikpai ka̱ci ke le ba, i ta̱ a kucikpa le.”

12Ɗa Yesu u danai Kafarishi ka na ka banuki ni va, “Kanna ka na baci de dem vi a kubanuku uma adama a na a lyaꞋa ilikulyaꞋa, ka̱ta̱ vu banuku aza a̱ nu, ko amgbu a̱ nu, ko a̱ja̱Ꞌa̱ a̱ nu, ko otovu aza a uciyi ba. Adama a na ele feu i ta̱ a kubanuku wu kanna ko yoku adama a na a tsupa wu. 13Kanna ka na baci vi a kubanuku vuza ka̱ɗiva̱, banuku aza a unambi, nu nkutsuma̱, n aza a̱ iwa̱nda̱, koɓolo n a̱yimba̱. 14A̱ɗa̱ yi ta̱ a̱ kuciya̱ una̱singai, adama a na aza a nan lo a kufuɗa a tsupa ɗa̱ ba. Ka̱shile ki ta̱ a kutsupa ɗa̱ kanna ka na aza a usuɓi a̱ kuɗenga̱ a̱ ukpisa̱.”

Agisana a̱ ka̱ɗiva̱ ka gbayin

(Mat. 22:1-10)

15Ana vuza yoku u panai nannai, ɗa u danai Yesu, “Una̱singai u ɗa wa aza a na a̱ kuda̱sa̱ngu a̱ ka̱ɗiva̱ na ɗe gaɗi a̱ ubuta̱ u tsugono tsu Ka̱shile.”

16Ɗa Yesu u danai ni, “Vuma vi yoku ɗa vuza na wi o kufoɓuso ka̱ɗiva̱, ɗa u banuki uma n a̱bunda̱i. 17Ana ayin a̱ ka̱ɗiva̱ a a yawai, ɗa u suki kagbashi ka̱ ni ka dana omoci a, ‘Ta̱wa̱i gogo na, n kotso ta̱ ofoɓuso.’

18“Ɗa dem vi le a̱ ka̱na̱i kutuka̱ n ogoɗi. Vuza na a̱ gita̱i kubana wa̱ ni, ɗa u danai kagbashi ka, ‘N tsula ta̱ ubuta̱ u vicimba. Mi ta̱ a kubana mo kondo u ɗa. YaꞋanka mu ahankuri.’

19“Ɗa vuza yoku u danai, ‘N tsula ta̱ obomburon a vicimba ugboku u tawun. Mi ta̱ a kuciga ma bana mo kondo le. YaꞋanka mu ahankuri.’

20“Ɗa vuza yoku u danai, ‘N yaꞋin yolo ka̱ta̱ n geshe ba, adama a nannai mi a̱ kuciya̱ ma̱ ta̱wa̱ ba.’

21“Ɗa kagbashi ka ko bonoi, ɗa ka danai vuzakpaꞋa vi ni. Ana u panai nannai, ɗa u danai kagbashi ka̱ ni, ‘Bana a uye dem nu nsanji n likuci, vu tuka̱ n aza a unambi, nu nkutsuma̱, n aza a̱ iwa̱nda̱, koɓolo n a̱yimba̱.’

22“U yaꞋin nannai, ɗa u danai, ‘N yaꞋan ta̱ ili i na vu danai mu. Amma ubuta̱ u buwa ta̱ a̱ ubuta̱ u ka̱ɗiva̱ wa.’

23“Ɗa vuzakpaꞋa vi ni vu danai ni, ‘Bana a uye u daꞋin dem nu nsongolimo, ka̱ta̱ vu leꞋeshe le a̱ ta̱wa̱, adama a na mi ta̱ a kuciga kpaꞋa ku va̱ ku shana n uma. 24YaꞋan n dana ɗa̱, babu vuza na m banuki biꞋi u kusaꞋwa ilikulyaꞋa i nan lo.’ ”

Atakaci o kokpo mukumitoni n Yesu

(Mat. 10:37-38)

25Koɓolo ka uma lo n a̱bunda̱i o kutono Yesu. U kpatalai ɗa u danai le, 26“Vuza na u tonoi mu ka̱ta̱ u kokpo makumitoni ma̱ va̱ ba, sai ucigi u ni wa̱ va̱ u laꞋa uteku u na u cigai aza a na a buwai ko n esheku a̱ ni, n a̱na̱ku, koɓolo n vuka vi ni, m muku n ni, koɓolo kpamu nu nkoshi n ni, n amgbu a̱ ni, n itaku i ni, ali n wuma u ni dem. 27Vuza na u ɗikai maɗanga ma atakaci ma̱ ni ɗa u tonoi mu ba, u kokpo makumitoni ma̱ va̱ ba.

28“A̱ ka̱tsuma̱ ka̱ ɗa̱, vuza u sheshe baci kumaꞋa kpaꞋa ku gaɗi, u da̱sa̱ngu biꞋi u kece ko yain ɗai ku ɗa ka kulyaꞋa. Ka̱ta̱ u la̱na̱ ko ikebe i ni yi ta̱ a kufuɗa yo kotso ku ɗa. 29U yaꞋan baci nannai ba, wa kufuɗa wo kotso kpaꞋa ka ba. Aza a na i e kene ku ɗa i ta̱ o kuzoꞋoso yi, a danai, 30‘Vuma vu nam pa u gita̱i kumaꞋa, amma u ciya̱ ikebe i na u kukotso ku ɗa ba.’

31“Mogono kpamu ma bana baci kuvon, ɗa wi n osoji a̱kpa̱n kupa (10,000), ka̱ta̱ u lyaꞋa mogono mo yoku ma na mi n osoji a̱kpa̱n kamanga (20,000). Sai u da̱sa̱ngu ka̱ta̱ u la̱na̱ ko wi ta̱ n utsura u na u kushilika̱ m mogono ma nan lo ma. 32Wi baci a kufuɗa ba, a̱yi biꞋi daꞋin a kinda le, wi ta̱ a̱ kusuꞋuku mogono ma nan ɗe ma uma, adama a na una̱ wo okpo le u te.” 33Ɗa Yesu u kotsoi kadanshi ka, “A̱ ka̱tsuma̱ ka̱ ɗa̱ babu vuza na u kokpo makumitoni ma̱ va̱, sai vuza na u nekei ili i na wi n i ɗa ra̱ka̱.

Mkpaɗi m gbani-gbani

(Mat. 5:13; Mar. 9:50)

34“Mkpaɗi mi ta̱ n ugaꞋin, amma n ɗa n na̱mgba̱ baci, yi ɗa̱i va kulapulaka n ɗa, ka̱ta̱ n ɗa n yokpo kpamu? 35N ɗa mi n ugaꞋin ba, ko adama a̱ kutsungu a kashina ko a satara m muta̱, sai kuva̱ma̱.

“Vuza na baci de dem wi n atsuvu a kupana, u pana.”

Currently Selected:

Luka 14: asgNT

Highlight

Copy