Luka 13

Shika̱ unushi ko vu kuwa̱

1Ayin a nan lo, aza o yoku i ta̱ lo a banai a danai Yesu ukuna wa aza a̱ Ga̱lili a na Bilatu wu unai punu a̱ A̱Ꞌisa̱ a Gbayin, ali mpasa n le n satarai a̱ ubuta̱ u kuyaꞋanka alyuka e le. 2Ɗa Yesu wu ushuki, “Vi sheshe ta̱ aza a̱ Ga̱lili a nam pa i ta̱ n unushi a laꞋi aza a̱ Ga̱lili a na a buwai, adama a na o soꞋi atakaci tsu nam pa? 3N dana wu, ta nannai ba. Amma sai i shika̱ unushi u ɗa̱ ka̱ta̱ i ka̱sa̱kpa̱, ko kpamu i kuwa̱ ci le.” 4Ɗa u danai le kpamu, “Uma kupa n kunla̱i a na a̱ kuwa̱i ana mashilya ma gaɗi ma Suluwamu ma varai le ta na. I ta̱ n unushi a laꞋi aza a Urishelima a na a buwai? 5A̱Ꞌa̱, n dana ɗa̱ kpamu, sai i shika̱ unushi† u ɗa̱, ko kpamu i kuwa̱ ci le.”

6Ɗa u danai le agisana a nam pa: “Vuza u ca̱Ꞌi ma̱biri a kashina ka̱ ni, ɗa u ka̱na̱i kuta̱wa̱ n u kondoi ko ma matsa, amma ta na wo okpo ta̱ n wono. 7A ukocishi, ɗa u danai aza a kinda kashina ka, ‘N vana ta̱ ali a̱ya̱ a tatsu, amma ma matsa ili ba. Kapai maꞋa, mi ta̱ a kukpada tsu ubuta̱ u na tsa kuyaꞋan ili i yoku.’

8“Vuza kinda kashina wu ushuki, ‘Vuzagbayin, doku vu ka̱sa̱kpa̱ biꞋi maꞋa ka̱ya̱ ke te ko yoku, mi ta̱ o kudoku ma lapula maꞋa mayin, ka̱ta̱ kpamu n tsunki muta̱. 9U matsa baci a kubana ka̱ya̱, to. U matsa ta na ba, to, yeve vu kapa maꞋa.’ ”

O potsokpoi ma̱kutsuma̱ ma vuka n Ashibi

10Kanna ka Ashibi, Yesu a kuyaꞋan kuyotsongusu a̱ kunu ka avasa ku yoku. 11Vuka vi yoku lo, vuza na wunla̱i u gbani-gbani u bonokoi ma̱kutsuma̱, ali a̱ya̱ kupa n kunla̱i. U ka̱nza̱i u bonoi uka̱liki, u doku u wala mejege kpamu ba. 12Ana Yesu we enei ni, ɗa u ɗekei ni sai kelime. Ɗa u danai ni, “Vuka, o potsokpo wu ta̱ mɓa̱la̱ n nu.” 13Ɗa u zuwakai ni ekiye. Ɗa ta na gogo lo u ba̱ra̱kpa̱i kashani, ɗa u ka̱na̱i kucikpa Ka̱shile.

14Vuzagbayin vu kunu ka avasa u yaꞋin wupa a na Yesu u potsokpoi vuka va a kanna ka Ashibi. Ɗa u danai uma, “Ayin a̱ ta̱li i ta̱ lo a ulinga. Ta̱wa̱i ayin a nan lo o potsokpo ɗa̱, amma n Ashibi ba.”

15Ɗa Vuzagbayin Yesu wu ushuki, “A̱ɗa̱ aza a kapalaka̱shi! I ci shikpa kobomburon, ko majaki a kaguta ka̱ ni, ka̱ta̱ i banka yi u soꞋo mini a kanna ka Ashibi ba? 16Gogo na, vuka vu nam pa mekere mi Ibrahim maꞋa, vuza na MalyaꞋi ma̱ ka̱na̱i ali a̱ya̱ kupa n kunla̱i. Ɗa a isai ni e ekiye a MalyaꞋi n Ashibi. U gaꞋan ba?”

17Ana u danai nannai, ɗa wono u ka̱na̱i irala i ni ya, ɗa uma a na a buwai a panai ma̱za̱nga̱ n ili i mereve i na wi a kuyaꞋansa.

Agisana a̱ vicuꞋu vu musta

(Mat. 13:31-33; Mar. 4:30-32)

18Ɗa Yesu we ecei, “Nini ɗai tamkpamu tsugono tsu Ka̱shile ci yotsoi? N iya̱n i ɗai n kugisangu tsu ɗa? 19Ci ta̱ ci vicuꞋu vu musta vu na vuza u ci ɗika, ka̱ta̱ u ca̱Ꞌa̱ a kashina ka̱ ni. Vu tsu gbonguro ta̱, ka̱ta̱ vi yaꞋan maɗanga ali nnu n yikpa̱ ɗe a acaka a̱ ni.”

20U doku u danai kpamu, “N iya̱n i ɗai n kugisanku tsugono tsu Ka̱shile? 21Ci ta̱ tsu kusasu ku na vuka vi ci ɗika ka̱ta̱ u satara n kiya ka̱ a̱bunda̱i, sai ayin a na ku gasai dem.”

Utsutsu wu uɓori

(Mat. 7:13-23)

22Yesu u walai a̱ likuci i gbagbaꞋin n i wawa dem n u yaꞋin kuyotsongusu a kubana ta na a Urishelima. 23Vuza yoku we ecei ni, “Vuzagbayin, uma kenu ɗa a kuyaꞋan wishi?”

Ɗa u danai le, 24“YaꞋin kataci ciya̱ i uwa a̱ utsutsu u kenu wa. N dana ɗa̱ uma n a̱bunda̱i i ta̱ a kuciga kuꞋuwa n u ɗa, amma a kufuɗa ba. 25Vuza vu kpaꞋa u ɗenga̱ baci ɗa u ɓa̱ya̱ngi utsutsu, yi ta̱ a kushamgba pulai a̱ kuka̱la̱ n ufolu, ‘Vuzagbayin, ɓa̱yuwa̱ka̱ tsu utsutsu.’

“Amma a̱yi wi ta̱ a̱ kushuku, ‘N yeve ɗa̱ ba, ko ubuta̱ u na yu uta̱i.’

26“Ka̱ta̱ ta na i dana, ‘Ci lyaꞋa ta̱ ɗa kpamu tsu soꞋi koɓolo. Ɗa vi yotsongushi kpamu a nsanji n likuci n tsu.’

27“Amma a̱yi wi ta̱ a̱ kushuku, ‘N yeve ɗa̱, ko ubuta̱ u na yu uta̱i ba. Walakai mu na ɗe, a̱ɗa̱ aza a gbani-gbani!’

28“Ayin a nan lo, yi ta̱ e kene Ibrahim, n Ishaku, n Yakubu koɓolo n eneki ra̱ka̱ o tsugono tsu Ka̱shile, amma a̱ɗa̱ uvakangi pulai, yi ta̱ a kuyaꞋan ma̱shi n kutakuma ku ngan. 29Uma i ta̱ a̱ kuta̱ a kasana n ka̱livi, koɓolo kpamu n gaɗi n ɗaka, ka̱ta̱ a ɗika ubuta̱ u le a̱ ka̱ɗiva̱ o tsugono tsu Ka̱shile. 30Mayun, uma i ta̱ lo aza a na i ka̱ca̱pa̱, ka̱ta̱ o bono aza e kelime. Ka̱ta̱ kpamu aza e kelime o bono ka̱ca̱pa̱.”

Yesu u na̱mgba̱i ka̱tsuma̱ n Urishelima

(Mat. 23:37-39)

31A ayin a nan lo, ɗa Afarishi o yoku a̱ ta̱wa̱i u Yesu ɗa a danai ni, “Ka̱sa̱kpa̱ ubuta̱ u nam pa wa vu bana a̱ ubuta̱ u yoku, adama a na Hiridu Antiba u ciga ta̱ wa kuna wu.”

32Ɗa wu ushuki, “Banai i dana kanama ka, ‘Anana nu mkpaꞋa, mi ta̱ a̱ kuta̱ka̱ wunla̱i u gbani-gbani, ka̱ta̱ n potsokpo uma, ka̱ta̱ kanna ka tatsu n kotso ili i na n cigai.’ 33Ko n nini, n kubansa ta̱ anana nu mkpaꞋa n nalyaꞋa. Mayun, ko keneki ke te ka̱ kukuwa̱ a̱ likuci i yoku ba, sai a Urishelima.†

34“Ka̱ya! Aza a Urishelima, a̱ɗa̱ na yu unai eneki, ɗa i varai aza a na a̱ suki ɗe! Ayin n a̱bunda̱i n ci ciga ta̱ kuɓolongu ɗa̱ uteku u na motoku mo tsu sokongu muku n ni e evelyu, amma i ka̱sa̱kpa̱ mu ba. 35Inda biꞋi, gogo na a̱ ka̱sa̱kpa̱ka̱ wu ta̱ kpaꞋa ku nu agali. Vo kudoku ve kene mu ba, sai ayin a na vu danai, ‘Una̱singai u ɗa u vuza na u kuta̱wa̱ n kula ku Vuzavaguɗu.’ ”

Currently Selected:

Luka 13: asgNT

Highlight

Copy