Marc 6

Azo ti Nazaret ake ti ma na be na Jésus

(Matt 13.53-58; Luc 4.16-30)

1Jésus alondo na ndo so si lo kiri na gbata so lo kono daa. Adisiple ti lo amu peko ti lo. 2Na *lango ti wungo tere, lo to nda ti fango ye na ya ti da ti sambelango Nzapa. Azo so abongbi mingi ti ma fango ye ti lo, li ti ala kue akpe. Ala hunda tere ti ala, atene: “Lo wara ye so kue na ndo wa? So mara ti ndara ti nyen laa lo yeke na ni so? Lo yeke sara aye ti kpene so na lege ti nyen? 3 Sarapande so laa pepe? So molenge ti Marie laa pepe? Ita ti Jacques, na Yozes, na Jude na Simon so laa pepe? A-ita ti lo ti wali ayeke na popo ti e ge pepe?” Ye so asara si azo ni ake ti ma na be na lo. 4 Jésus atene na ala: “Na ndo kue azo ayeke ne awayanga-Nzapa, me na gbata so a du lo daa, wala na ya ti sewa ti lo, wala na ya ti da ti lo, azo ayeke ne lo pepe.” 5Jésus alingbi ti sara mbeni ye ti kpene oko na ndo so pepe. Me lo zia gi maboko ti lo na ndö ti ambeni zo ti kobela si kobela ti ala akai. 6Li ti lo akpe ngbanga ti so azo ni ake ti ma na be.

Jésus atokua adisiple baleoko na use

(Matt 10.5-15; Luc 9.1-6)

Na pekoni, Jésus ague ti fa ye na azo na ya ti akete kodro so ayeke na tere ti Nazaret. 7Lo iri adisiple ti lo baleoko na use si lo tokua ala use use. Lo mu na ala ngangu ti tumba asioni yingo 8 si lo mu na ala yanga, lo tene: “Na guengo ti ala, ala mu mbeni ye pepe, ala mu gi mbeni keke; ala mu kobe wala bozo ti lege wala nginza na ya ti bozo pepe. 9Ala yu poro, me ala mu bongo use pepe.”

10Lo kiri lo tene na ala: “Tongana ala si na ya ti mbeni kodro, ala duti gi na ya ti da so wa ni ayamba ala daa, ngbii asi na ngoi so ala ye ti londo ti gue. 11 Tongana azo ti mbeni kodro ake ti yamba ala, wala aye ti ma tënë ti ala pepe, ala londo na ndo ni so ahon. Ala pika sese ti gbe ti gere ti ala ti fa na azo ni so ala sara sioni awe.” 12Tongaso adisiple ague ti fa tënë na azo, atene: “Ala zia ngbene lege ti sarango ye ti ala!” 13 Ala tumba asioni yingo mingi si ala kai kobela ti azo mingi na sarango mafuta na tere ti azo ni.

Tënë ti kuâ ti Jean-Baptiste

(Matt 14.1-12; Luc 9.7-9)

14Gbia Herode ama tënë ti Jésus, ngbanga ti so iri ti lo awu amu ndo kue. Ambeni zo atene: “Jean-Baptiste azingo na kuâ awe! Ndani laa, lo yeke na ngangu ti sara na aye ti kpene so.” 15 Me ambeni atene: “So Élie laa.” Ambeni akiri atene: “So mbeni wayanga-Nzapa tongana ambeni wayanga-Nzapa ti ando laa.” 16So Herode ama tënë so, lo tene: “So taa Jean-Baptiste laa! Mbi fâ go ti lo lani, me lo zingo na kuâ awe!”

17Biani, Herode amu ando yanga lo wani titene a gbu Jean, a kanga lo na zingiri si a bi lo na da ti kanga. Herode asara ye so ndali ti Herodiade, wali ti ita ti lo Philippe; Herode akiri amu Herodiade ti ga wali ti lo. 18 Jean atene lani na Herode, atene: “*Ndia amu lege na mo pepe titene mo mu wali ti ita ti mo!” 19Be ti Herodiade ake Jean mingi si lo ye titene a fâ lo, me lo wara lege ni pepe. 20Biani, Herode ayeke kpe mbeto ti Jean, ngbanga ti so lo hinga, lo tene, Jean ayeke zo ti mbirimbiri, lo yeke nga zo so Nzapa azia lo nde ndali ti lo. Herode ayeke bata lo titene azo asara sioni na lo pepe. Lo yeke na nzara mingi ti ma Jean-Baptiste; me tongana lo ma lo, lo hinga ye so lo lingbi ti sara ni pepe. 21Mbeni nzoni lege azi na Herodiade na lango ti matanga ti dungo Herode. Na lango ni so, Herode asara kota matanga ndali ti anene zo so ayeke sara kua na yangbo ti lo, aturugu ti lo ti kota kamba nga na akota zo ti Galile kue. 22Molenge ti Herodiade ti wali ali na ya ti da ni si lo to nda ti dodo. Lo zia ngia na be ti Herode nga na azo so lo tisa ala. Tongaso gbia atene na molenge-wali ni, atene: “Hunda na mbi ye ti be ti mo, fade mbi yeke mu ni na mo.” 23Lo deba yanga ti lo na molenge-wali ni, lo tene: “Mbi yeda na be ti mbi kue ti mu na mo ye so fade mo yeke hunda na mbi, ataa ndambo ti kodro-gbia ti mbi.” 24Molenge-wali ni asigigi si ague, ahunda mama ti lo, atene: “Nyen laa mo ye mbi hunda?” Mama ti lo atene na lo: “Hunda gi li ti Jean-Baptiste!” 25Molenge-wali ni akiri hio na tere ti gbia si lo tene na lo: “Mbi ye mo mu na mbi fafadeso li ti Jean-Baptiste na ya ti mbeni kpangbara sembe!” 26Vundu agbu be ti gbia ni mingi; me ngbanga ti dengo ba so lo de na le ti azo so kue lo tisa ala na matanga ni, lege ti ke tënë ti lo ni ayeke daa pepe. 27Nilaa lo tokua mbeni turugu hio; lo mu yanga na lo ti ga na li ti Jean-Baptiste. Turugu ni ague si lo fâ go ti Jean na da ti kanga. 28Lo zia li ti lo ni na ya ti kpangbara sembe, lo ga na ni si lo mu na molenge-wali ni; molenge-wali ni amu na mama ti lo. 29So adisiple ti Jean ama tënë ni, ala ga amu kuâ ti lo si ala gue, alu ni.

Jésus amu kobe na azo saki oku

(Matt 14.13-21; Luc 9.10-17; Jean 6.1-14)

30 *Awatokua akiri na tere ti Jésus si ala fa na lo peko ti aye so kue ala sara nga na aye so kue ala fa ni. 31Gba ti azo ayeke ga, ayeke gue, ayeke ga, ayeke gue; ye so asara si Jésus na awatokua awara lege ti te kobe pepe. Ndani laa lo tene na ala: “Ala ga, e gue na mbeni ndo so zo ayeke daa pepe titene e wu tere ti e kete si.” 32Tongaso ala mu mbeni ngo, ala gue na mbeni ndo so zo ayeke daa pepe ti duti kâ kpoo. 33Me azo mingi abaa ala na guengo ni si ahinga ala. Azo alondo na ya ti agbata nde nde, ala mu lege na gere si asi kozo na ndo so Jésus na awatokua ni ayeke gue daa.

34 So Jésus asigigi na ya ti ngo ni, lo baa gba ti azo; mawa ti ala agbu lo, ngbanga ti so ala yeke tongana ataba so zo ti batango ala ayeke daa pepe. Tongaso lo fa aye mingi na ala. 35So ndo aga nduru ti vuko, adisiple ti Jésus aga nduru na tere ti lo si ala tene na lo: “Ngbonga ahon awe si na ndo so, zo ayeke daa pepe. 36Mo zia lege na azo so ti gue na akete kodro ti yanga ti yaka nga na akete kodro so ayeke nduru ge si ala vo kobe ti te.” 37Jésus akiri tënë na ala: “Ala wani amu kobe na azo ni ti te!” Me ala hunda lo, atene: “Mo ye e gue, e vo mapa alingbi na ale ti nginza ngbangbo use si e mu na ala ti te?” 38Jésus ahunda ala: “Ala yeke na mapa oke? Ala gue, abaa si.” Ala gue, abaa si ala ga atene na lo: “E yeke na mapa oku na asusu use.” 39Tongaso Jésus amu yanga na adisiple ti lo ti tene na azo ni kue ti bongbi li ti ala ti duti nde nde na ndö ti fini pere. 40Azo ni aduti, ambeni ngbangbo oko ngbangbo oko, ambeni baleoku baleoku. 41Jésus amu mapa oku na asusu use so, lo yo le ti lo na nduzu, lo mu singila na Nzapa. Na pekoni, lo fâ ya ti amapa ni, lo mu na adisiple ti lo ti kangbi ni na azo ni kue. Lo kangbi nga asusu use so na azo kue. 42Zo oko oko ate ya ti lo asi. 43 Adisiple aro tanga ti anduru mapa ni na asusu ni so angba asi sakpa baleoko na use. 44Azo so kue ate mapa ni, akoli ayeke saki oku.

Jésus atambula na le ti ngu

(Matt 14.22-33; Jean 6.15-21)

45Gi hio na pekoni, Jésus amu yanga na adisiple ti lo titene ala ko na ya ti ngo ti gue kozo ti lo na mbage ti ngu, na mbage ti gbata ti Betsaida si lo wani, lo ngba ti lo na peko ti mu lege na gba ti azo so ti kiri na ndo ti ala. 46So lo zia lege na ala si ala gue awe, lo gue na li ti mbeni hoto ti sambela. 47So ndo avuko awe, ngo ni ayeke kâ na le ti ngu si Jésus angba gi lo oko na sese. 48Lo baa adisiple ti lo ayeke baa pasi mingi ti hon na li ni ngbanga ti pupu ayeke kiri ala kiringo na peko. Ye so asi na ala nduru na yanga ti ndaperere. Tongaso Jésus atambula na gere na le ti ngu ti gue na mbage ti ala. Lo ye ti hon ala hongo. 49So ala baa lo na tambulango na le ti ngu ni, ala baa ti ala atene, so toro laa si ala to nda ti dekongo. 50Na bango lo, mbeto asara ala kue. Me hio tongaso, Jésus atene na ala: “Ala de be ti ala, so mbi laa! Mbeto asara ala pepe!” 51Na pekoni, lo ko na ya ti ngo na tere ti ala si pupu ni akai. Li ti adisiple ti lo kue akpe, 52ngbanga ti so ala hinga nda ti ye ti kpene ti amapa so pepe. Ala ngba ti kpengba be ti ala.

Jésus akai kobela na tere ti azo ti Genezaret

(Matt 14.34-36)

53So ala fâ ngu awe, ala si na sese ti Genezaret si ala kanga ngo ti ala na yanga ti ngu ni. 54Gi so ala sigigi na ya ti ngo ni, azo ahinga Jésus hio. 55Ala mu loro ague na sese ni kue, ala mu azo ti kobela na ndö ti akelekpa ti ga na ala na lo, na ndo so kue ala ma a tene, Jésus ayeke daa. 56Na ndo so kue Jésus ayeke hon daa, wala na ya ti agbata, wala na ya ti akete kodro, wala na ya ti akete kodro so ayeke na yanga ti yaka kue, azo ayeke mu azo ti kobela, azia ala na ndö ti abalabala; ala hunda na lo titene lo zia ala ti ndu gi yanga ti kota bongo ti lo. Azo so kue andu lo, tere ti ala aga nzoni.

Currently Selected:

Marc 6: MNF2010

Highlight

Copy