Marc 2

Koli so mbeni mbage ti tere ti lo abuba

(Matt 9.1-8; Luc 5.17-26)

1Lango kete na pekoni, Jésus akiri na Kapernaum. So azo ama a tene, lo yeke na yanga-da, 2ala ga, abongbi tere ti ala gbani gbani. Ndo ayeke daa mbeni pepe, ataa na yanga ti da ni kue. Jésus ayeke fa tënë ti Nzapa na ala. 3Azo aga na lo mbeni zo so mbage ti tere ti lo abuba; akoli osio laa ayo zo ni. 4Lege ti gue na lo na Jésus ayeke daa pepe, ngbanga ti so azo ayeke gbani gbani. Tongaso ala gue na li ti da ni, ala zi mbage ti li ti da ni taa na ndö ti Jésus si ala yoro koli so na kelekpa ti lo kue na Jésus. 5Jésus abaa mabe ti azo ni si lo tene na zo so mbage ti tere ti lo abuba so, lo tene: “Molenge ti mbi, a zi asiokpari ti mo awe.” 6Ambeni wafango-ndia ayeke duti kâ; ala yeke tene na be ti ala: 7“Ngbanga ti nyen si koli so ayeke zonga Nzapa tongaso? Zo wa laa alingbi ti zi asiokpari ti azo? Gi Nzapa oko!” 8Gi hio tongaso, Jésus ahinga tënë ti be ti ala si lo hunda ala, lo tene: “Ala yeke tene mara ti atënë tongaso na be ti ala ngbanga ti nyen? 9Ti tene na zo so mbage ti tere ti lo abuba so, atene: ‘A zi asiokpari ti mo awe’, wala ti tene: ‘Londo, mo mu kelekpa ti mo, mo tambula’, so wa laa ayeke ngangu pepe?” 10Me ti sara si ala hinga atene, *Molenge ti Zo ayeke na ngangu ti zi asiokpari na ndö ti sese so, Jésus atene na zo so mbage ti tere ti lo abuba so, atene: 11“Londo, mo mu kelekpa ti mo, mo gue na da ti mo!” 12Gi hio tongaso, koli ni alondo na le ti azo kue, lo mu kelekpa ti lo si lo gue. Azo so ayeke kâ si abaa lo, li ti ala kue akpe; ala gonda Nzapa, atene: “E de ti baa mara ti ye tongaso laoko pepe!”

Jésus airi Lévi

(Matt 9.9-13; Luc 5.27-32)

13Jésus akiri ague na yanga ti ngu ti Galile; gba ti azo aga na tere ti lo si lo yeke fa ye na ala. 14So lo yeke hon, lo baa Lévi, molenge ti Alfe, lo yeke duti na ndo so azo ayeke futa lapo daa. Jésus atene na lo: “Mu peko ti mbi!” Lévi alondo si lo mu peko ti Jésus. 15Na pekoni, Jésus ague ti te kobe na da ti Lévi. Azo ti rongo nginza ti lapo na azo ti siokpari mingi aduti na tere ti lo na adisiple ti lo. Amara ti azo mingi tongaso laa ayeke mu peko ti Jésus. 16So Jésus na azo ti rongo nginza ti lapo na azo ti siokpari ayeke te kobe, ambeni *farizien so ayeke awafango-ndia abaa lo si ala hunda adisiple ti lo, atene: “Ngbanga ti nyen si lo yeke te kobe na azo ti rongo nginza ti lapo na azo ti siokpari?” 17Jésus ama ala si lo tene na ala: “Azo so ayeke na nzoni tere ayeke na nzara ti gue ti baa wanganga pepe; me gi azo ti kobela laa ayeke na nzara ti gue ti baa wanganga. Mbi ga ti iri azo so ayeke mbirimbiri pepe, me mbi ga ti iri azo ti siokpari.”

Tënë na ndö ti kengo kobe ti sambela

(Matt 9.14-17; Luc 5.33-39)

18Mbeni lâ, adisiple ti Jean-Baptiste na *afarizien ake kobe ti sambela. Ambeni zo aga, ahunda Jésus, atene: “Ngbanga ti nyen si adisiple ti Jean na adisiple ti afarizien ake kobe si adisiple ti mo ayeke ke kobe pepe so?” 19Jésus atene na ala: “Azo so a tisa ala na matanga ti mungo tere ti koli na wali, fade ala lingbi ti ke kobe ti sambela na ndembe so koli ni ade na popo ti ala? Oko pepe! Tongana koli ti wali ni ade na popo ti ala, ala lingbi ti ke kobe pepe. 20Me ambeni lango ayeke ga so fade a yeke mu koli ni na popo ti ala, a hon na lo. Tongaso, na lango so laa fade ala yeke ke kobe.”

21“Zo alingbi ti mu fini yanga ti bongo ti fu na le ti ka ti ngbene bongo pepe, ngbanga ti so fade fini yanga ti bongo ni ayeke suru ngbene bongo ni si le ti ka ni aga kota. 22Zo alingbi nga ti tuku fini vin na ya ti ngbene bozo ti poro pepe, ngbanga ti so fade vin ni ayeke sungba ya ti bozo ni si vin ni na bozo ni kue abuba. Zo ayeke zia fini vin gi na ya ti fini bozo ti poro.”

Jésus na tënë ti lango ti wungo tere

(Matt 12.1-8; Luc 6.1-5)

23 Na mbeni *lango ti wungo tere, Jésus ayeke hon na ya ti ayaka ti *ble. Na hongo ti ala, adisiple ti lo ayeke fâ ambeni le ti ble ni. 24 Tongaso *afarizien atene na Jésus: “Ngbanga ti nyen si adisiple ti mo ayeke sara ye so *Ndia ake titene zo asara ni na lango ti wungo tere?” 25Jésus akiri tënë na ala: “Ye so David asara ando na ndembe so nzara asara lo, lo na azo so amu peko ti lo si ala yeke na ye ti tengo ni pepe, ala diko tënë ni pepe? 26 David ali na ya ti da ti Nzapa, lo mu mapa so a mu na *sandaga na Nzapa, lo te ni si lo mu mbeni na azo so amu peko ti lo. Na ngoi ni so, Abiatar laa ayeke kota wayango-sandaga. Andaa a mu lege gi na awayango-sandaga ti te mapa ni!” 27Jésus akiri atene na ala: “A sara lango ti wungo tere ndali ti zo, me a sara zo ndali ti lango ti wungo tere pepe. 28Ndani laa *Molenge ti Zo ayeke nga makonzi ti lango ti wungo tere.”

Currently Selected:

Marc 2: MNF2010

Highlight

Copy