Matthieu Kete tënë na ndö ti Nzoni Tënë so Matthieu asu na mbeti
Kete tënë na ndö ti Nzoni Tënë so Matthieu asu na mbeti
Nzoni Tënë so Matthieu asu na mbeti ayeke ndali ti azuife so ama na be na Jésus. Ala hinga atënë ti ya ti Kozo Mbuki nzoni. Matthieu afa Jésus tongana zo so aga ti sara si aye so a tene ando tënë ni na ya ti Kozo Mbuki aga taa-tënë. Lakue, Jésus wani ayeke mu atënë ti ya ti Kozo Mbuki si lo yeke tene na atënë ti lo.
Na ngoi so Matthieu asu mbeti so, azuife so ayeke azo ti Christ pepe atumba azuife so aga azo ti Christ na ya ti ada ti sambelango Nzapa ti ala. Azuife so ama na be na Christ asara abongbi ti ala si ala yeke yamba na ya ti abongbi ni azo ti amara nde so ama na be na Jésus.
Ti Matthieu, Jésus ayeke taa Wafango-ye, lo yeke fa ye ni tongana zo ti komandema. Ye so Jésus afa ayeke ye so Nzapa ahunda na azo ti Christ ti sara laa. Andia so a su tënë ni na ya ti Kozo Mbuki, Jésus afa taa kode ti mango ya ni nzoni. Jésus ayeke nga *Mesii so azuife ayeke ku lo. Tongana Jésus ayeke tene tënë ti *Kodro-gbia ti Nzapa, lo yeke tene: Nzapa ayeke Gbia, azo abaa ngangu ti lo na ndö ti sese so awe.
Akota ye so ayeke na ya ti mbeti so:
Amolongo ti mbeti ti Matthieu ague legeoko na ti Anzoni Tënë ota, so ti tene: Matthieu, Marc na Luc. Na lege ti amolongo ni, Matthieu abongbi akota tënë ti Jésus kue oku:
Oko ni: ti londo na kota gere 5 asi na 7: mo yeke wara atënë so Jésus afa na li ti hoto. Atënë ni ayeke tongana ndia so ayeke fa na adisiple ti Jésus lege so ala lingbi ti duti na ni. Ndia ni ayeke fa tënë ti songo so alingbi ti duti na popo ti zo na mba ti lo nga na songo na popo ti zo na Nzapa.
Use ni: kota gere 10: atënë ti ya ni amu yanga si amu nga awango na azo so aye ti gue ti fa Nzoni Tënë na azo.
Ota ni: kota gere 13: atënë ti ya ni ayeke atoli nde nde so Jésus atene. Lo tene atoli ni titene azo ama ya ti tënë ti Kodro-gbia ti Nzapa nzoni.
Osio ni: Kota gere 18: atënë ti ya ni ayeke fa lege so azo ti Christ alingbi ti duti na ya ti *Eglize.
Oku ni: kota gere 24 asi na 25: atënë ti ya ni ayeke fa na adisiple ti Jésus lege so ala lingbi ti ku ngoi so Nzapa ayeke so benda na ndö ti dunia so biani biani.
Atënë so aga kozo ti akota tënë oku so nga na atënë so aga na peko ni ayeke tene tënë na ndö ti lege so Jésus akai kobela na tere ti azo, lege so lo mu kobe na gba ti azo si ala te, nga na lege so lo na awafango-ndia ti azuife ayeke *bingbi tënë.
Na tongo nda ti tënë ti lo, Matthieu atene tënë ti dungo Jésus nga na ngoi so Jésus ade molenge (kota gere 1 – 2).
Ti hunzi na tënë ti lo, Matthieu ayeke fa ye so asi na Jésus, gbia ti azuife; lege so a fâ ngbanga ti kuâ na li ti lo, lege so a fâ lo na ndö ti keke ti kroa si a lu lo (kota gere 27); me Nzapa azingo lo na kuâ. Jésus asi na adisiple ti lo si ala baa lo. Lo hunda na ala ti fa Nzoni Tënë na azo ti dunia kue (kota gere 28).
Kozo titene a du Jésus, Mbeti ti Nzapa afa iri ti lo atene, Emmanuel, so ti tene “Nzapa ayeke na e” (1.23). Nzoni Tënë so Matthieu asu na mbeti ahunzi na ndö ti zendo ti Jésus so atene: “Baa, mbi yeke na ala lakue ngbii asi na ngoi ti ndani.” (28.20). Nzapa ayeke na popo ti azo na lege ti Jésus.
Currently Selected:
Matthieu Kete tënë na ndö ti Nzoni Tënë so Matthieu asu na mbeti: MNF2010
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© La Société Biblique de Centrafrique 2010