Malashii 3

1Tënë so *KOTA GBIA so ayeke na ndö ti dunia kue atene laa: “Baa, mbi yeke tokua zo ti mbi; lo yeke leke lege na dawa ti mbi. Gi hio tongaso, kota zo so ala yeke gi lo so, fade lo yeke si na ya ti kota da ti lo. Zo ti tokua so ala sara nzara ti lo so ayeke ga ti fa tënë ti *mbuki ti mbi na ala. 2 Zo wa laa alingbi ande ti kanga be ti lo na lango ti gango ti lo, zo wa? Zo wa laa alingbi ti ngba na nduzu na ndembe ti singo ti lo, zo wa? Biani, lo yeke tongana wâ ti matawa wala tongana mokpakpa ti zo ti sukulango bongo. 3Fade lo yeke duti tongana matawa so ayeke kporo wen ti nginza ti zi azende na tere ni. Fade lo yeke sara si azo ti mara ti Lévi aga *nzoni tongana ti so a yeke zi azende na tere ti lôro nga na wen ti nginza. Tongaso ala lingbi ti mu *sandaga na KOTA GBIA alingbi na tënë ti ndia. 4Tongaso, aye so azo ti Juda na azo ti Jérusalem ayeke mu na KOTA GBIA ayeke nzere na be ti lo tongana ti giriri, tongana ti angu so ahon ando so. 5Biani, fade mbi yeke ga nduru na tere ti ala ti fâ ngbanga na li ti ala. Mbi yeke ga hio ti bi tënë na li ti azo ti mazi, azo ti gingo wali wala koli ti amba ti ala, azo so ayeke bi atënë ti mvene na li ti amba ti ala na azo so ayeke futa azo ti kua ti ala na legeni pepe; azo so ayeke sara ngangu na awali-mua nga na anyindu, azo so ayeke sara mbana na awande nga na azo so ayeke kpe mbeto ti mbi pepe. Tënë so KOTA GBIA so ayeke na ndö ti dunia kue atene laa.”

Ala kiri na KOTA GBIA

6“Mbi *KOTA GBIA, mbi sanze pepe. Me ti ala, ala ngba lakue azo ti mara ti Jacob. 7Tongana ti so akotara ti ala asara ando, ala nga, ala zia lege ti aye so mbi fa na ala; ala sara ye alingbi na ni pepe. Ala kiri na mbage ti mbi si fade mbi kiri na mbage ti ala. Tënë so KOTA GBIA so ayeke na ndö ti dunia kue atene laa. Ala hunda ndo, atene: ‘E yeke sara tongana nyen ti kiri na mbage ti mo?’ 8 Mbi kiri tënë na ala, mbi tene: Zo alingbi ti nzi Nzapa? Me ti ala, ala yeke nzi mbi! Ala hunda ndo, atene: ‘E nzi mo na nyen?’ Ala nzi mbi na ya ti *adime nga na ya ti aye nde nde so ala yeke mu na mbi. 9Deba ayeke na li ti ala, ngbanga ti so ala, amara kue, ala nzi mbi. 10 Adime ti aye so ala wara, ala ga na ni kue na ya ti kubu ti batango mosoro ti da ti mbi titene kobe aduti lakue na ya ti da ti mbi. Ala sara tongaso ti tara mbi, ala baa tongana mbi zi fenetere ti yayu ti tuku anzoni ye ti mbi gbani gbani na ndö ti ala pepe si. Tënë so KOTA GBIA so ayeke na ndö ti dunia kue atene laa. 11Fade mbi yeke kanga lege na akete nyama so ayeke te akobe ti yaka ti ala titene anyama ni abuba akobe ti ala pepe; mbi yeke kanga lege si akeke ti *vinye ti ala so ayeke le pepe so, akiri ale. Tënë so KOTA GBIA so ayeke na ndö ti dunia kue atene laa. 12Fade amara kue ayeke tene na ala: Ti ala nzoni, ngbanga ti so kodro ti ala ayeke ga kodro so aye ti nzoni mingi ayeke daa. Tënë so KOTA GBIA so ayeke na ndö ti dunia kue atene laa.”

Lango ti fango ngbanga ti Nzapa

13Tënë so *KOTA GBIA atene laa: “Ala tene asioni tënë mingi na tere ti mbi si ala hunda ndo, atene: ‘Asioni tënë ti nyen laa e tene na popo ti e na tere ti mo?’ 14Ala tene: ‘E yeke sara kua ti Nzapa gi senge senge. E sara ye alingbi na tënë ti yanga ti lo, e sara mua na dawa ti KOTA GBIA so ayeke na ndö ti dunia kue; nyen laa e wara na peko ni, nyen? 15Ti fadeso, e lingbi ti tene: azo ti baba laa ayeke duti nzoni. Ataa azo ti sioni, aye ti ala ayeke ga nzoni. Tongana ala gi yanga ti Nzapa, ye oko ayeke sara ala pepe!’ ”

16Tongaso azo so ayeke kpe mbeto ti KOTA GBIA atene tënë na popo ti ala. KOTA GBIA adingi mê ti lo si lo ma tënë so ala yeke tene so. Nilaa na dawa ti lo, a su na ya ti mbeni mbeti iri ti azo so ayeke kpe mbeto ti lo si ala yeke voro lo. 17Na pekoni, tënë so KOTA GBIA so ayeke na ndö ti dunia kue atene laa: “Na lango so mbi yeke fa ngangu ti mbi, azo ni ayeke ga azo ti mbi, ala yeke ga ye ti mbi wani. Fade mbi yeke sara nzoni be na ala tongana ti so babâ ayeke sara nzoni be na molenge ti lo ti koli so ayeke sara kua na lo. 18Fade ala yeke kiri ti hinga kangbi so ayeke na popo ti zo ti mbirimbiri na zo ti sioni; kangbi so ayeke na popo ti zo so ayeke sara kua ti Nzapa na zo so ayeke sara kua ti lo pepe. 19 Biani, lango ni ayeke ga so fade ndo ayeke mu wâ tongana wâ ti fur. Na lango ni so, fade azo ti baba kue na azo ti sioni kue ayeke ga tongana holengo pere. A yeke gbi ala kue, mbeni ye ti tere ti ala oko ayeke ngba pepe; tënë so KOTA GBIA so ayeke na ndö ti dunia kue atene laa. 20Me ti ala azo so ayeke voro mbi, fade lâ ti mbirimbiri ayeke sigigi ti su. Zango ti lâ ni ayeke kai kobela na tere ti ala. Fade ala yeke sigigi si ala yeke huru na ngia tongana akete bagara so asigigi na ya ti gbagba. 21Na lango so mbi yeke fa ngangu ti mbi, ala yeke tambula na ndö ti azo ti sioni si azo ti sioni ni ayeke ga tongana mburu ti wâ na gbe ti gere ti ala; tënë so KOTA GBIA so ayeke na ndö ti dunia kue atene laa.”

Fade Élie ayeke kiri ti ga

22“Ala dabe ti ala na *Ndia ti Moïse, zo ti kua ti mbi. Na ndö ti hoto ti Horeb, mbi mu na lo andia na aye so mbi fa ndali ti azo ti Israel kue.

23 “Baa, fade mbi yeke tokua na ala wayanga-Nzapa Élie kozoni si *lango ti KOTA GBIA asi. Lango ni ayeke duti ande kota lango, lango so ayeke zia mbeto na be ti zo. 24 Fade lo yeke leke songo na popo ti ababâ na amolenge ti ala nga na popo ti amolenge na ababâ ti ala. Tongaso, fade mbi yeke ga ti buba kodro ti ala kue pepe.”

Currently Selected:

Malashii 3: MNF2010

Highlight

Copy