Marika 14

Tomotau Yai Vi‑nua‑hauhau Iesu Wayahina

(Mateu 26:1‐5; Luke 22:1‐2; Ioni 11:45‐53)

1Mana navia me Iudea yai auyewa ananina aitam, vivane aitam tonei ana wava Itouvuha Toneina, ka taui yai dewa palauata iamam, eha a pai nata nihenina. Ka tau vi‑nomu mata‑genai ka tau ginuma matataui inaunau‑nene medeina Iesu ipoy'‑avini, iuna yai nuanua ina‑nau‑vi‑anigi. 2Ka ivona deina, “Itouvuha Toneina ana tuta eha tuta ahiahina yaka vi‑nua‑hauhau wayahina. Iuna apaina, avi tuta tomotau avaha yaka dewa ianamanei, akanai, inua‑goyoeka kadu ivitana‑wahewahe ananina. Ka aituhu tomotau yai dewa deina, apaina me Rom ai tau veimea baina vunuka akanai.”

Vavine Iesu Iwa‑tunutunui Yan' Aniga Wayahina

(Mateu 26:6‐13; Ioni 12:1‐8)

3Ka Iesu meagai Betani mamaei, ka omo Simoni Lepero ya manua, ka manuena, e amam. Ka vavine aitam omo Iesu wayahina ka aitam gam omanei. Ka gam‑nana inau‑vevewanei aitam hanu ana wava alabasiteraV wayahina, ka nihenina daudau na manina ani‑vainena ana wava naridaV, vivane naridataV. Daudau‑nana patana ani‑vainena. Ka vavine‑nana gam‑nana otona dobwei, e Iesu unununa wayahina ito‑iwahi.#Luk 7:37-38.

4Ka tupwai imamaei, avaha dewana idueyei, magai bawe, ka matataui ivonavona, “Ia! Aviani wayahina daudau‑nana dewa‑kavokavovoei deina? 5Daudau‑nana patana ani‑vainena! Onoto a nau‑pata ponimana aitamoata nihenina vivane eha ana pata. Memeanina kaimwaneyei, e patana tau payapayaya kavene kaivaite deina.” Ka vavine‑nana inau‑vonuvonuei deina.

6Kate Iesu ivona, “Itomi ugenuana! Aviani iuna uvona‑yaiyaiei? Vavine taina avaha dewa ahiahina wayahiua dewei. Nau‑wawanika kapa‑vidovidohei wayahina. 7Iuna tuta tuta tau payapayaya nui umamaei. Ka avi tuta yami nuanua una‑ivaitei, ami pata udedewei deina. Kate itomi eha yauke nui kama'‑vavaha.#V.V 15:11. 8Aviani ananina vavine‑nana wayahina, tauna avaha awaehei, e wayahiua dewei deina, vivane ininiu ma'‑iwa‑tunutunui au itavuna wayahina.#Ioni 19:40. 9Memeanina nuami vi‑tupatupa, kate avonemi, papani aitamoata aitamoata wayahina, tanopi taina wayahina, aveta tomotau Vaneana Ahiahina inaunau‑waheyei, tomotau vavine‑nana ya dewana inononi, e vavine‑nana inuanuani.”

Iudasa Iesu Vauyei

(Mateu 26:14‐16; Luke 22:3‐6)

10Ka Iesu a tau hae anani ai yau 12 wayahia, aitam ana wava Iudasa me Kariota. Tauna omo tau vi‑nomu mata‑genai wayahia, vivane Iesu na‑vauyei wayahia. 11Ka taui, avaha ya vonana inononi, idewa‑haiawa, ka ivona‑dabadaba Iudasa wayahina kina ivenei. Ka tauna awaehei naunau‑nene medeina kadi memeanina na‑vauyei.

Ivo‑vi‑aiai Itouvuha Toneina Wayahina

(Mateu 26:17‐25; Luke 22:7‐14, 21‐23; Ioni 13:21‐30)

12Ka palaua eha a pai nata toneina an' auyewa naona wayahina, me Iudea yai dewa Itouvuha Toneina a vahitau sipiV ivunui, ivi‑nomui. Ka Iesu a tau vi‑muni‑waiwai iomo tauna wayahina, e ivi‑tanaiei, ivona, “Aveta yam nuanua ana‑ne, e Itouvuha Toneina avo‑vi‑aiai en'‑am?”#NiT 12:6.

13Wayahina, Iesu tauna a tau vi‑muni‑waiwai ainua ai veimea venei, ivona, “Ierusalem una‑nei, ka tenoke aitam onoto pai goi na daudauna avavanei na‑vaniahami. Nau‑wawanimi uvi‑muniei. 14Ka avi manua tauna inui, tau vi‑manua‑nana uvonei, ‘Tau Viwavenena ivona, “Yau tutu‑honota bwanibwani aveta? Iuna au tau vi‑muni‑waiwai nui Itouvuha Toneina an'‑am?” ’ 15Ka tauna aitam tutu‑honota ananina hetana na‑viwavenemi, ka avaha itauni‑yehai, tenoke nau‑wawanimi aka ma' uvo‑vi‑aiaia, uboui.” Ka ya vonana iakwa, tauna ainua vi‑tunei ine Ierusalem wayahina.

16Ka tau vi‑muni‑waiwai‑naia ine, ka Ierusalem inui, ka dewa habuhabui ivaniahei Iesu ya vonana aitamoata deina. Ka Itouvuha Toneina amna iboui, e munia in'‑am.

Itouvuha Toneina Iamam

17Ka avaha vinanavi, e tauna a tau hae anani ai yau 12 nui iomo manua‑nana wayahina. 18Ka me Iudea yai dewa deina, iam‑daudauva. Ka Iesu ivona, “Memeanina nuami vi‑tupatupa, kate avonemi, aitam wayahimia na‑vauyeu. Ika, tauna nui kamam.”#Sam 41:9.

19Ka a tau hae nuai ivita, ka aitamoata aitamoata wayahia ivi‑tanatanaiei, ivona, “Kaiwadi, yauke, o kadu aitam?”

20Ka tauna vonei, ivona, “Itomi ami yau 12. Ka au tau vauya vivane aitam wayahimia. Ika, tauna ama inua ama palaua nau‑kaia asi‑utuvi. 21Vona ahiahina, yauke, Tauna Vi‑tomotau, nau‑wawaniu an'‑aniga Iginuma ana vona wayahiu deina, kate aioi tauna au tau vauya wayahina! Aituhu tauna eha ta‑tupua, tauna vidoha deina.”

Awaeha Vovouna

(Mateu 26:26‐30; Luke 22:14‐20; 1 Korinita 11:23‐25)

22Ka habuhabui iamam, ka tauna palaua eha a pai nata epei ka ya viama wayahina Yaubada nau‑kaiwei. Iakwa, palauana pakeui, e vo‑patai, ka ivona, “Un'‑epei, ininiu taina.”

23E vei na wainaV epei, Yaubada nau‑kaiwei, e venei, e habuhabui inimi.

24E vonei, ivona “Dayahiu taina. Yaubada tauna yan' awaeha vovouna vona‑dabedabei, ka dayahiu aito‑iwahi awaehana ana pata vi‑putu.#NiT 24:8; Sek 9:11; Ier 31:31-34; 1Ko 10:16; Ebe 9:20. 25Memeanina nuami vi‑tupatupa, kate avonemi, eha kadu aitam tuta tanopia wainaV ana‑nim. Apaina, tuta tepakaia wayahina, wainaV ana‑nim‑havinei Yaubada ya pai veimea nihenina.”

26Ka taui Yaubada inau‑kaiwei yai nau‑senasena wayahina, e ini‑ubau iopu, ivane Oya Olive wayahina.

Iesu Pita Ya Vi‑ebua Apa‑taputapuei

(Mateu 26:31‐35; Luke 22:31‐34; Ioni 13:36‐38)

27Ka Iesu vonei, ivona, “Apaiku habuhabumi unovo‑tawaneu. Yaubada Iginuma nihenina avaha ivona deina, ivona,

‘SipiV A Tau Dune‑vi‑avina avunui,

ka sipiV habuhabui iyavuta.’#Sek 13:7.

28Ka apaina, yau mini‑havine munia, papani Galili nihenina apotapotami.”#Mat 28:16; Mar 16:7.

29Ka Pita vonei, ivona, “Aituhu habuhabui inovo‑tawanem, yauke eha.”

30Kate Iesu vonei, ivona, “Memeanina nuam vi‑tupatupa, kate avonem, ioyoma taina wamke etana‑tavuneu tuta v'‑itonuna wayahina, ka munia, kamkam onotona yana tou v'‑inuana kanononi.”

31Ka Pita vona panina wayahina vona‑vanevane, ivona, “Aituhu tomotau inau‑vi‑anigika, eha avi‑ebuem, akanai nui kan'‑aniga.” Ka tau hae anani habuhabui ivonavona aitamoata deina.#Ioni 11:16.

Iesu Viama Baguna Gedisemane Nihenina

(Mateu 26:36‐46; Luke 22:39‐46)

32Ka iomo baguna ana wava Gedisemane wayahina, e tauna a tau vi‑muni‑waiwai vonei, ivona, “Baina itomi umanuena upotapotau, ka aviama.”#Ioni 18:1. 33Ka tauna Pita, ka Iamesa, ka Ioni hone‑hohoni‑neiei, e na nau‑punina inei enoma. Ka nua‑vita ani‑vainena Iesu nuana epei, ka vitana wayahina tauna nuanua ananina. 34Ka tauna vonei, ivona, “Aioi! Nuau ivita ani‑vainena, eha ani‑hoina vita‑nana wayahina an'‑aniga. Baina umamaei, ka uduedue aka havia wayahia.”#Ioni 12:27.

35Ka Iesu ana heta ine enoma, e tanopia ipeu, ka viama, ivona, “Amau, aituhu ana pata, hidahida ana tuta taina ebou‑potei wayahiu.” 36E ivona, “AbaV (a vo‑vina ‘Amau’), dewa habuhabuna memeanina wayahima. Ka aituhu ana pata, dewa hidahida ana vei taina wayahiua en'‑epei. Kate aituhu yam nuanua ana‑nim, akanai, yau nuanua deina.”#Mar 10:38; Ioni 6:38.

37Ya viamana iakwa, e mini, mavina aitonu wayahia, ka dueyei taui iaino‑ainei. Wayahina, tauna Pita vonei, ivona, “Simoni, eino‑ainem! Babau aitamoata wayahina aviamem, kate wamke eha am pata, a? 38Ami itonu nau‑wawanimi udune‑vivinimi ka uviama nau‑dadana taina eha vane‑tawanemi. Nuaka nihenina yaka nuanua Yaubada kavi‑ateteyei, kate ininika ihanua.”

39Ka tauna ni‑tawanei, ine enoma, e viama‑havine. Ka ya viama v'‑inuana a venavenau ya viama naona a venavenau aitamoata deina. 40Iakwa, e mavi‑havine, ka aitonu dueyei taui iaino‑aine‑havinei, iuna matai huna‑dududuna ka eha ai pata ita‑dunedune. Ka avaha imimini, taui eha it'‑anamane medeina ya vonana inau‑pate.

41-42Ka tauna ine, e ya viama v'‑itonuna boui. Iakwa, mavi‑havine, ka vonei, ivona, “Ia! Itomi medeina? Udaudauva, uvi‑yawai, uaino‑ainemi, a? Goyona a babau avaha vin'‑omo. Umini! Udueyei! Yauke, Tauna Vi‑tomotau, au tau vauya tomotau goyogoyoi nui iomomo wayahiu.”

Iesu Ipoy'‑avini

(Mateu 26:47‐56; Luke 22:47‐53; Ioni 18:3‐12)

43Ka Iesu ipuipupu, ka tuta aitamoata wayahina Iudasa vin'‑omo. Tauna tau hae anani ai yau 12 wayahia aitam. Ka tauna nui tupwai tomotau iomo. Ka tau vi‑nomu mata‑genai, ka tau ginuma, ka ononotoi anani tomotau‑naia ivi‑nua‑dadanei, ka na inamai kadu na punumai ivi‑tunei Iesu ipoy'‑avini.

44Iudasa, a tau vauya, tomotaui iaiaya mai‑venei, ivona, “Tauna amaoi, tauna upoy'‑avini ka utaini uneiei ononotoi anani wayahia.” 45Ka tutana vin'‑omo Iesu wayahina ivona, “Tau Viwavenena,” ka maoi. 46Wayahina, taui Iesu ipoy'‑avini ivo‑vi‑anai. 47Ka Iesu a tau hae imimini nepena, ka wayahia aitam yana inama si‑waia ka tau vi‑nomu ananina ya tau paisewa tanihana upwa‑yavunei.

48Ka Iesu tomotaui vonei, ivona, “Kaiwadi, itomi nau‑wawanimi uvin'‑omo na inamami ka na punumaimi, e yauke tau vainau deina upoy'‑aviniu, a? 49Auyewa habuhabui nihenia Manua Vito‑pota nihenina nui kamamaei, ka tenoke aviwavenena, kate eha uta‑poy'‑aviniu. Kate yami dewa taina ivin'‑omo, e apa‑taputapu tupwai Iginuma nihenina inau‑yehai.”#Luk 19:47; 21:37; Ioni 18:20.

50Ka Iesu a tau hae anani habuhabui inovo‑tawanei.#Sam 31:11.

51Ka aitam tupunata Iesu vi‑muniei, ka tauna ana kwama eha, kate pai bwa' lineniV ana heta. Ka tomotau‑naia yai nuanua kadu tauna ipoy'‑avini, 52kate tauna a pai bwaena lineniV venau‑tawanei, ka nagonegonena novo‑tawanei.

Ononotoi Anani Iesu Ya Vitana Matana Iveimeyei

(Mateu 26:57‐68; Luke 22:54‐55, 63‐71; Ioni 18:13‐14, 19‐24)

53Ka Iesu itaini ineiei tau vi‑nomu ananina ya manua wayahina, ka tenoke tau vi‑nomu mata‑genai habuhabui, ka ononotoi anani, ka tau ginuma inau‑hohoni. 54Ka Pita enoma vi‑muniei, e manua‑nana a tutu‑gana awana wayahina inu, e omo atubou wayahina. Ka tau nau‑havia tupwai imamaei, ka ai yabeyabena wayahina ivivi‑vana. Wayahina, Pita omo, manuena, e vivi‑vana.

55Ka manua nihenina tau vi‑nomu mata‑genai, ka tau nau‑hohona habuhabui yai vitana‑dibidibi inene‑dadani. Ka me Iudea yai dewa aituhu tau ipupu ainua yai vona aitamoata, ana pata Iesu ina‑nau‑vi‑anigi. Kate eha aitam aviani goyona ita‑vaniahe. 56Iuna tau ipupu habuhabui ivitupu tauna wayahina, kate taui yai vitupu tunina tunina. Wayahina, eha it'‑awaeha aitamoata.

57Tupwai imini ka ivitupu deina, ivona, 58“Ya vonana anononi, tauna ivona, ‘Manua Vito‑pota taina tomotau nimaia iyonei avita‑vovoni, ka auyewa aitonu nihenia au pata kadu aitam manua ayonei, ka manua‑nana eha tomotau nimaia ita‑yone.’”#Ioni 2:19-21. 59Kate taui yai vitupu eha it'‑awaeha aitamoata.

60Wayahina, tau vi‑nomu ananina yoko niwania mini, e tauna Iesu vi‑tanaiei, ivona, “Medeina? Am pata tomotau taina movi enau‑patai, o eha? Ivitevitem ananina. Enononi, o eha?” 61Kate Iesu genuana, eha ta‑ipupu.

Ka tau vi‑nomu ananina vi‑tanai‑havinei, ivona, “Kaiwadi, wamke Tau Ito‑yavuha‑nana, Tau Nau‑iaiava‑vavaha Natuna, o eha?”

62Ka Iesu ivona, “Ika, yauke. Ka apaina itomi habuhabumi yauke, Tauna Vi‑tomotau, ududueyeu Tau Bagibagi‑vavaha ateina amanuena, ka you nihenina amavi‑havine.”

63Ka avaha tau vi‑nomu ananina vonaia nononi, tauna, ya maga‑bawe ananina nui, ana kwama si‑yehia, ka ivona, “Ana pata deina! Eha nau‑wawanika kadu aitam tau hae kanononi. 64Itomi avaha tauna movina unononi. Tauna Yaubada apa‑goyogoyoei. Medeina yami vi‑nua‑dadana?”

Ka habuhabui iawaehei aitamoata tauna nau‑wawani n'‑aniga.#Lev 24:16; Ioni 19:7. 65Ka tupwai wayahia iomo, e iaiwaiwani, ka tauna matana ivo‑potepotei, e ipwaipwaikia, ka ivonevonei, ivona, “O, tau apa‑taputapu! Koiaka vunum? Evoneai!” Ka tau nau‑havia itaini ineiei, e ivunuvunui.

Pita Iesu Vi‑ebuei

(Mateu 26:69‐75; Luke 22:56‐62; Ioni 18:15‐18, 25‐27)

66Ka Pita manua‑nana upuna mamaei, manua a tutu‑gana nihenina, kate eha manua an' awa‑pota nihenina. Ka ahabana aitam, tau vi‑nomu ananina yan' ahahaba wayahia, omo. 67Ka avaha Pita vivi‑vana dueyei, dune‑vi‑anai, e ivona, “Taum Iesu onoto Nasareta nui umamaei.”

68Kate Pita tana‑tavuna, ivona, “Eha at'‑anamane aviani wayahina eipuipupu.” Ka tauna mini, e tutu‑gana awana wayahina ine. Ka kamkam onotona itou.

69Ka ahabanana dune‑havinei, e taui imimini nepena wayahia ivona, “Tauna aitam wayahia.” 70Ka Pita tana‑tavuna‑havine.

Ka tuta eha ani‑hoina iakwa, ka taui tauna nepena imimini ivona‑havinei, “Vona ahiahina, anamanem wamke aitam wayahia. Iuna wamke me Galili aitam!”

71Ka Pita vona‑dabadaba wayahia ivona, “Onoto taina wayahina uaipuipupu eha at'‑anamane!” Kadu tauna a bwanata bou hetana, ivona, “Aituhu ataina avitupu, yau nuanua Yaubada dewa‑yaiyaieu!”

72Ka tuta‑nana wayahina kamkam onotona yana tou v'‑inuei. Ka Pita Iesu yan' apa‑taputapu nuani, ivona “Etana‑tavuneu tuta v'‑itonuna wayahina, ka munia, kamkam onotona yana tou v'‑inuana kanononi.” E Pita nuana am‑haui, ka nua‑vita ananina, e vi‑putu toutou, ka vi‑mohai.

Currently Selected:

Marika 14: MVN

Highlight

Copy