Marika 13

- Iesu Tuta Pai Nau‑yehata A Iaiaya Apa‑taputapuei

- Apaina Manua Vito‑pota Ivita‑vovoni

(Mateu 24:1‐2; Luke 21:5‐6)

1Tutana Manua Vito‑pota wayahina opu‑me, a tau vi‑muni‑waiwai aitam ivona, “Tau Viwavenena, edu! Hanu pai yona taina yai nata ani‑vainei, kadu manua taina habuhabui ai dune ahihi‑vainei!”

2Ka Iesu nau‑patei, ivona, “Manua taina anani habuhabui edudueyei, a? Ataina hanu habuhabui ivi‑popoi deina, kate apaina eha aitam popona na‑mae. Iuna aitamoata aitamoata wayahia itutu‑guaguani ipeupeu iopuopu.”#Luk 19:44.

Dewa Vitana Ka Dewa‑yaiyai

(Mateu 24:3‐14; Luke 21:7‐19)

3Ka Iesu ivane Oya Olive, e manuena Manua Vito‑pota mahi‑naona, ka Pita, ka Iamesa, ka Ioni ka Aniduru iomo wayahina, ka matataui iviamei, ivona, 4“Ehaeyeai avi tuta dewaia ivi‑putu. Kadu yama nuanua emai‑voneai avi iaiaya adueyei an'‑anamanei tuta eha ani‑hoina na‑iakwa wayahina dewaia ivi‑putu.”

5Ka Iesu ya vo‑vi‑maheta mamanaina vi‑putui aitam vona panina wayahina, ivona,

“Udune‑vivinimi! Eha nau‑wawanimi aitam koiaka un'‑awaehe na‑nonomi. 6Iuna apaina tomotau habuhabui au wava ivainaui, ka ivonevonemi, ina‑vona, ‘Yauke au heta‑ohota Tau Ito‑yavuha‑nana!’ Ka taui ai pata tomotau habuhabui inonoi.

7Ka avi tuta havia vaneai unononi, o aituhu tomotau inuanua apaina havia ivi‑putu, eha nau‑wawanimi umatamatauta vaneai wayahia. Iuna Yaubada dewaia n'‑awaehei ivin'‑omo, ka tuta pai nau‑yehata wayahina dewaia munia na‑omo. 8Vona ahiahina, mani papani mani papani wayahia ivi‑naua, kadu mani pai veimea mani pai veimea wayahia ivi‑naua. Ka yoyoyo isi‑putuputu papani tunina tunina nihenia, kadu am navovo papani tunina tunina nihenia ivin'‑omo. Dewaia habuhabui viha tutana vaivine ivi‑putu ivi‑natuna deina.

9-11Udune‑vivinimi dewa aitamoata aitamoata wayahia. Tomotau ina‑mana‑giboemi iuna uvitumahaneu. Ka in'‑am‑veneneyemi meagai ai tau veimea gabemaniV nimaia, ka manua tapanono nihenia imoamoanimi. Ka tomotaui ivihahaieu itainimi umimini papani ai tau veimea mataia, kadu kiniV mataia. Ka taui wayahia uhaehaeyeu. Kate avi tuta in'‑epami in'‑am‑veneneyemi, eha umai‑nuanua toyoina medeina una‑ipupu. Iuna avi tuta nau‑wawanimi uhae wayahiu, babau‑nana nihenina Nuana Ahihinata yami vona na‑venemi, e vonaia una‑ipupu. Ana pata deina, iuna vonaia eha itomi wayahimia ivin'‑omo, kate vonaia ivin'‑omo Nuana Ahihinata ana heta wayahina. Ka tau veimea‑naia ka kini‑naiaV Vaneana Ahiahina unau‑waheyei. Vona ahiahina, yoko habuhabui nau‑wawani naona Vaneana Ahiahina inononi. Ka munia, tuta na‑iakwa.#Mat 10:17-20.

12Ka vavanei taui vavanei in'‑am‑veneneyei aniga wayahina, ka amamai taui natunatui in'‑am‑veneneyei aniga wayahina, kadu yaheyahe ai veimea amamai ka ayoyoi wayahia ivihahaiei, ka in'‑am‑veneneyei aniga wayahina.#Mat 10:21. 13Ka tomotau habuhabui inua‑goyo‑vainemi iuna yauke au wava usi‑nai. Kate aituhu aviyaivia itoha‑vi‑anai a itoava tuta pai nau‑yehata wayahina, taui ana‑ito‑yavuhi.#Mat 10:22; Ioni 15:21.

Gugua Gaugaunununa Ka Dewa Vi‑aioi

(Mateu 24:15‐21; Luke 21:20‐24)

14Apaina tomotau aitam amane goyogoyona ivi‑au‑mini papani vito‑potana nihenina. Ka Yaubada amane‑nana nau‑nikonikoiei, ka Ierusalem a nau‑kinakinago vin'‑omo amane‑nana wayahina. Ka dewana munia aioi habuhabui in'‑omo. (Aituhu aviyaivia vona taina iaiaiavi, yau nuanua nuai n'‑am‑haui.) Ka avi tuta me Iudea amane‑nana idudueyei papani vito‑pota‑vainena nihenina, taui nau‑wawani ina‑novo atu‑oyaoyana wayahia.#Dan 9:27; 11:31; 12:11. 15Ka tuta‑nana wayahina, aituhu aviyaivia mataeta imamaei, eha ana pata ina‑nui yai manua, e yai gugua in'‑epei, kate taui nau‑wawani ini‑ubau ina‑novo.#Luk 17:31. 16Ka tuta‑nana wayahina, aituhu aviyaivia yai baguna nihenina imamaei, eha ana pata imavi‑havine yai megeia, e ai kwama in'‑epei, kate taui nau‑wawani ini‑ubau ina‑novo. 17Aioi! tau amwanainahe wayahia kadu tau vi‑nunu wayahia tuta tanoi wayahina!#Luk 23:29. 18Nau‑wawanimi uviama dewaia ai vin'‑omana eha kwadudu ana tuta nihenina ivin'‑omo. 19Iuna auyewaia vivane vita ana tuta. Nonova, tutana Yaubada tanopi vevewanei a itoava tuta ataina wayahina, eha kadu aitam tuta vitana deina ta‑vin'‑omo. Ka munia, avi vita ivin'‑omo tuta tepakaia, eha vita‑naia ivane‑tawane.#Dan 12:1; SiV 7:14. 20Ka Yaubada ya vi‑nua‑hauhau vivane auyewai vo‑vi‑kutei. Aituhu tauna eha ta‑vo‑vi‑kute deina, eha aitam koiaka ana pata vitai itupwa. Ka Yaubada tomotau vi‑nua‑dadanei ito‑yavuha ivaniahei. Wayahina, tauna auyewai vo‑vi‑kutei tomotaui wayahi.

21Ka auyewaia nihenina, aituhu aitam koiaka vonemi, ‘Udueyei, yaka Tau Ito‑yavuha baina’, o aituhu aitam vonemi, ‘Udu! Tanoi mamaei’, eha yai vona uvitumahane. 22Iuna tau ito‑yavuha vitupu kadu tau apa‑taputapu vitupu ivin'‑omo‑nananena. Ka taui iaiaya kadu dewa‑bagibagi habuhabui ivevewanei, iuna yai nuanua Yaubada ya tomotau inonoi. Kate taui eha ai pata tomotau‑naia avaha Yaubada vi‑nua‑dadanei inono.#SiV 13:13. 23Kate itomi nau‑wawanimi udune‑vivinimi! Akanai, yauke avaha dewai habuhabui iomomo apa‑taputapu‑yehai wayahimia.

Tauna Vi‑tomotau Ya Mavi‑havine

(Mateu 24:29‐31; Luke 21:25‐28)

24Ka vita‑naia munia

‘babau ya maheta na‑weu,

ka wahava ya maheta eha.

25Ka wadima wahuma imemeavuna,

ka aviani wahuma ivenavenau ivenau‑tupatupa.’#Isa 13:10; Ioe 2:10, 31; 3:15; SiV 6:12-13.

26Tuta‑nana wayahina yauke, Tauna Vi‑tomotau, wahuma aopu‑me you nihenina, ka tomotau yauke yau bagibagi ani‑vainena kadu didigau nui idudueyeu.#SiV 1:7. 27Ka yauke yau anelose avi‑tunei ine papani aitamoata aitamoata wayahia, ka papani‑naia wayahia taui Yaubada vi‑nua‑dadanei inau‑hohoni iomanei wayahiua.

Viwavenena Ai Madaiba Wayahina

(Mateu 24:32‐35; Luke 21:29‐33)

28Aitam pai dune ai madaiba wayahina atana‑minikunemi. Avaha madaiba yawaina itabotabo, avaha uanamanei nau‑sisi ana tuta omomo. 29-31Wayahina, avi tuta dewa‑naia habuhabui iomomo ududueyei, un'‑anamanei dewa‑naia vivane tuta pai nau‑yehata a iaiaya. Wayahina, un'‑anamanei tuta eha ani‑hoina na‑iakwa wayahina, e amavi‑havine tanopia. Memeanina nuami vi‑tupatupa, kate avonemi taina deina. Apaina wahuma ka tanopi ina‑iakwa, kate yauke yau vona eha ina‑iakwa. Kadu tau ma' tanopi imamaei a itoava dewaia habuhabui ina‑nau‑yehai wayahina.

Eha Aitam Koiaka Auyewana T'‑anamane

(Mateu 24:36‐44)

32Ka yauke yau mavi‑havine an' auyewa eha aitam koiaka t'‑anamane. Eha aitam anelose t'‑anamane, kadu yauke taua eha at'‑anamane! Akanai Amaka ana heta auyewana anamanei. 33-34Nau‑wawanimi udune‑vivinimi, kadu nau‑wawanimi umini‑potepotemi. Iuna auyewana eha ut'‑anamane. Aitam pai dune avenemi. Aitam tau veimea ya nuanua yana nae. Wayahina, tauna ya tau paisewa habuhabui hone‑hohoni‑neiei, e aitamoata aitamoata wayahia ai veimea venei, vivane medeina ipaipaisewa a itoava tauna ya mavi‑havine an' auyewa wayahina. Kadu tauna ya manua awana a tau dune‑vi‑avina haeyei, ivona, ‘Nau‑wawanim edune‑vi‑avini ahiahina!’ Ya vo‑vi‑aiai habuhabui iakwa, e ya meagai ni‑tawanei ine mani papani wayahina.

35Ka itomi nau‑wawanimi udune‑vivinimi aitamoata deina. Iuna eha ut'‑anamane avi tuta yauke, manua a tau veimea, amavi‑havine. Kaiwadi, vinanavi, o kadi ioyoma pouna, o kadi kamkam yana tou wayahina, o kadi mana‑putua.#Luk 12:38. 36Kaiwadi, aituhu yauke amavi‑havine‑kwayavoni, itomi nau‑wawanimi umimini udunedune, iuna aituhu amavi‑havine, ka aituhu itomi uaino‑ainemi, apaina ini‑yauyau uvaniahei deina. Wayahina, avona‑havinemi, udune‑vivinimi! 37Yau mataedana itomi wayahimia. Kate tomotau habuhabui anau‑vi‑avini aitamoata deina. Taui kadu nau‑wawani yawai idune‑vi‑avini!”

Currently Selected:

Marika 13: MVN

Highlight

Copy