Ioni 18

Iesu A Havia Ipoy'‑avini

(Mateu 26:47‐56; Marika 14:43‐50; Luke 22:47‐53)

1Ka avaha ya viamana nau‑yehai, Iesu tauna a tau vi‑muni‑waiwai nui iopu ine. E taui Awa‑haha Kidironi a daudau kikituna iaubo‑tamani papanina. Ka tanoi wayahina aitam baguna mamaei, e tauna kadu a tau vi‑muni‑waiwai nui bagunana inui. 2Ka Iudasa, tauna vi‑nua‑hauhauei, kadue papani‑nana anamanei. Iuna tuta habuhabuna Iesu neine bagunana wayahina, e tanoi wayahina tauna kadu a tau vi‑muni‑waiwai nui inau‑hohona. 3Wayahina, Iudasa omoi bagunana, ka tauna yoko ananina eta‑naonaoi. Ka yokoia nihenia vivane tau nau‑havia yoko, ka tau mini‑potapota tupwai tau vi‑nomu mata‑genai wayahia, ka kadue tupwai Parisi yai yoko wayahia. Ka taui habuhabui Iudasa ivi‑muniei iomomo bagunana wayahina. Ka taui iomomo yai lampaV wayahia, ka yai odama wayahia, ka kadue havia a gugua wayahia. 4Ka Iesu avaha anamanei dewaia habuhabui ivin'‑omo‑nananena. Wayahina, tauna omo yokoia wayahia, e vi‑tanaiei, ivona, “Koiaka unenene?”

5Ka taui ivona‑nau‑patei, ivona, “Iesu, onoto Nasareta.”

Wayahina, Iesu vonei, ivona, “Yauke Taua Amamaei.” (Ka Iudasa, Iesu a tau vi‑nua‑hauhau, tanoi nui imimini.) 6Ka tutana Iesu vonei, ivona, “Yauke Taua Amamaei,” akaka yoko‑naia ivi‑muni‑uhauha, e ipeu tanopia! 7Wayahina, Iesu taui vi‑tanai‑havinei, ivona, “Koiaka unenene?”

Ka taui ivona, “Iesu, onoto Nasareta.”

8Wayahina, Iesu vona‑havinei, ivona “Avaha avonemi, Yauke Taua Amamaei. Wayahina, aituhu itomi uneneneu, nau‑wawanimi taui taina un'‑awaehei ina‑ne.” 9(Ka Iesu avaha a tau vi‑muni‑waiwai wayahi viama, ka vonana viamana nau‑yehai, ivona, “Taui avaha eveneu, eha aitam koiaka wayahia ata‑ni‑kaiete.”)#Ioni 17:12. 10Kate Simoni Pita tauna ya kwasikwasi wayahina, ka taini, e tau vi‑nomu ananina ya tau paisewa ana wava Malikusi vunui, e tanihana ateina upwa‑yavunei. 11Akaka Iesu Pita veimeyei, ivona, “Yam kwasikwasi a pai vi‑ai nihenina ebou‑havinei! Medeina enuanua? Amau avaha viha ana vei veneu, kadu nau‑wawaniu vei‑nana wayahina animnim, o eha? Nau‑wawaniu paisewana Amau veneu anau‑yehai akanai.”#Mat 26:39.

Iesu Ivi‑tanatanaiei

(Mateu 26:57‐58; Marika 14:53‐54; Luke 22:54)

12Wayahina, tau nau‑havia yoko, kadu taui yai tau eta‑naonao ananina nui, kadu me Iudea yai tau mini‑potapota Iesu ipoy'‑avini, e iyohoni. 13Ka naona taui Kaiapasi nawana wayahina itaini ineiei. Tauna ana wava Anasi. Ponimana tanoi wayahina Kaiapasi vivane tau vi‑nomu ananina. 14Ka nonova Kaiapasi me Iudea vonei, ivona, “Aituhu apaina onoto aitamoata n'‑aniga tomotau habuhabuka wayahika, akanai itoka me Iudea habuhabuka eha kan'‑aniga deina.” Ka naona Anasi Iesu vi‑tanatanaiei.#Ioni 11:49-51.

Pita Iesu Vi‑ebuei Tuta Naona Wayahina

(Mateu 26:69‐70; Marika 14:66‐68; Luke 22:55‐57)

15Ka Simoni Pita ka aitam tau vi‑muni‑waiwai nui, ainuai Iesu ivi‑muniei. Ka tau vi‑muni‑waiwai‑nana tau vi‑nomu ananina anamanei ahiahina.#18:15 Tau vi‑muni‑waiwai taina vivane Ioni, buki taina a tau ginuma. Wayahina, tauna ana pata Iesu nui tau vi‑nomu ananina ya manua inui. 16Kate Pita nau‑wawani tutu‑gana awana vuvunahina mimini potapota. Ka tau vi‑muni‑waiwai‑nana, tauna tau vi‑nomu ananina anamanei, mavina, e ahabana awa a tau dune‑vi‑avina wayahina ipupu, e ahabana Pita awaehei na‑nu nihenina. 17Ka ahabanana, awa a tau dune‑vi‑avina, Pita vi‑tanaiei, ivona, “Kaiwadi, taum kadu onotona a tau vi‑muni‑waiwai aitam, a?”

Akaka Pita vona‑nau‑patei, ivona “Yauke eha.”

18Ka ioyomana kwadudu ananina. Wayahina, kwauto ana ganiana mamaei, ka tau paisewa yoko kadu tau nau‑havia yoko imimini ai wayahina, e ivivi‑vana. Ka Pita kadu nui mimini ka tauna vivi‑vana.

Tau Vi‑nomu Ananina Iesu Vi‑tanatanaiei

(Mateu 26:59‐66; Marika 14:55‐64; Luke 22:66‐71)

19Ka tau vi‑nomu ananina Iesu vi‑tanatanaiei tauna a tau vi‑muni‑waiwai wayahi, kadu vi‑tanatanaiei ya viwavenena wayahina. 20Ka Iesu vona‑nau‑patei, ivona, “Auyewa naona a itoava ataina wayahina, yauke yoko habuhabui mataia anaunau‑wahe. Ka manua tapanono habuhabui nihenia, kadu Manua Vito‑pota nihenina, kadu aveta baina me Iudea inau‑hohona, akanai papani‑naia habuhabui nihenia tomotau aviwavenena. Eha aitam aviani ata‑vona‑hive. 21Wayahina, aviani wayahina wamke taua evi‑tanatanaieu? Nau‑wawanim taui avaha yau viwavenena inononi evi‑tanatanaiei. Iuna aviani aviwavenei, taui avaha ianamane‑vidohei, kadu taui ai pata imataedam tunuhina.”

22Ka tutana Iesu vonana nau‑yehai, tau mini‑potapota aitam Iesu nepena mimini maga‑bawe, piahi, kadu vi‑tanaiei, ivona, “Tauna tau vi‑nomu ananina, kate taum koiaka? Aviani wayahina eipuipupu tau vi‑nomu ananina wayahina deina?”

23Ka Iesu vona‑nau‑patei, ivona, “Aituhu avaha vona goyona avonei, akanai vona goyo‑nana tomotau matakaia esi‑vin'‑omanei. Kate aituhu vona ahiahina avonevonei, aviani wayahina evunu?”

24Ka nonova bagunana nihenina tau nau‑havia Iesu nimana iyohoni. Ka tutana Anasi Iesu vi‑tanatanaiei, Iesu nimana yohoyohonina mamaei deina. Ka tutana Anasi vi‑tunei ine Kaiapasi wayahina, e tauna kadu vi‑tanatanaiei, akanai Iesu nimana yohoyohonina mamaei deina.

Pita Iesu Vi‑ebuei Tuta V'‑inuana Wayahina Kadu Tuta V'‑itonuna Wayahina

(Mateu 26:71‐75; Marika 14:69‐72; Luke 22:58‐62)

25Ka Simoni Pita mimini ka vivi‑vana. Wayahina, taui nui ivi‑tanaiei, ivona, “Wamke kadue aitam a tau vi‑muni‑waiwai wayahia, ika?”

Kate Pita tana‑tavutavuna, e ivona, “Yauke eha.”

26Ka tau vi‑nomu ananina ya tau paisewa aitam mamaei. Ka Pita avaha aitam tau paisewana yana yoko wayahia tanihana upwa‑yavunei. Wayahina, tau paisewana mini, ivona, “Mataua avaha wamke tauna ami inua adueyemi Baguna Olive nihenina, a?”

27Wayahina, Pita tana‑tavutavuna‑havine. Ka visi‑kwayavoni kamkam onotona itou.#Ioni 13:38.

Iesu Pilate Matana Ivi‑au‑mini

(Mateu 27:1‐2, 11‐14; Marika 15:1‐5; Luke 23:1‐5)

28Ka avaha mana navia. Ka me Iudea‑naia Iesu itaini, e Kaiapasi ya manua ini‑tawanei, ka ineiei papani Isiraeli a tau veimea ananina wayahina. Tauna aitam me Rom, ana wava Pilate, ka ya manua ananina (manuana ana wava Paraetorium) mamaei. Kate me Iudea‑naia eha nau‑wawani Pilate ya manua ina‑nu, iuna Pilate eha aitam me Isiraeli. Ka me Isiraeli ai veimea Mosese wayahina mamaei dewana vito‑potei. Aituhu dewana idewe, ivi‑gawama Yaubada matana, ka munia eha ai pata Itouvuha Toneina in'‑am. 29Dewana vito‑pota wayahina, Pilate ni‑ubau iopu taui wayahia, e vi‑tanaiei, ivona, “Avi vita wayahina onoto taina uvitevitei?”

30Ka taui ivona‑nau‑patei, ivona, “Aituhu onoto taina onoto ahiahina, ataina itoai eha ana‑omane taum wayahima.”

31Ka Pilate wayahia ivona, “Itomi ami heta uvituei, ka medeina ami veimea awaehemi, akanai unau‑yanahi deina.”

Kate me Iudea‑naia ivonei, ivona, “Ataina itomi me Rom eha uawaeheai itoai me Iudea ama pata aitam onoto ana‑nau‑vi‑anigi.”#Ioni 19:6-7. 32(Ka yai vonana omo deina, e Iesu ya vonana yan' aniga ana dewa wayahina nau‑yehai.)#Ioni 3:14; 12:33.

33Wayahina, Pilate mavina, manua ananina nihenina inu, ka kadu Iesu honei, e vi‑tanaiei, ivona, “Vona ahiahina, wamke me Iudea yai kiniV?”

34Wayahina, Iesu vona‑nau‑patei, ivona, “Taum am heta wayahima vi‑tanai taina vin'‑omoi, o kadi mani tomotau avaha ihaeyeu wayahima?”

35Ka Pilate vi‑tanaiei, ivona, “Ia! Medeina? Wamke enuanua yauke aitam me Iudea? Eha. Wamke yam tomotau, kadu yami tau vi‑nomu mata‑genai taum iam‑veneneyeu. Aviani yam dewa goyona?”#Ioni 1:11.

36Ka Iesu vonei, ivona, “Yauke yau pai veimea eha baina tanopi taina wayahina. Aituhu yau pai veimea tanopi taina wayahina, vona ahiahina, au tau vi‑muni‑waiwai nau‑wawani au havia ivi‑naue. Ka aituhu deina, eha memeanina me Iudea ipoy'‑aviniu. Kate ataina yau pai veimea eha baina tanopia.”

37Wayahina, Pilate vi‑tanaiei, ivona, “O, wamke vivane aitam kiniV, ika?”

Ka Iesu vona‑havine, ivona, “Ataina wamke evonavona yauke aitam kiniV. Ka vona ahiahina, yauke atupua, kadu yauke aomo tanopia, ka yau paisewa ananina vivane vona tunutunuhina ahaehaeyei. Ka aituhu aviyaivia vona tunutunuhina natunatuna, akanai taui habuhabui yau vona inononi.”

38Ka Pilate vi‑tanaiei, ivona, “Vona tunutunuhina aviani?”

Pilate Iesu Yan' Aniga Awaehei

(Mateu 27:15‐31; Marika 15:6‐20; Luke 23:13‐25)

Akaka Pilate ni‑ubau opu‑havine me Iudea wayahia, e vonei, ivona, “Eha aitam yana dewa goyona ata‑vaniahe. Wayahina, eha nau‑wawaniu adewa‑yaiyaie. 39Kate yami dewa Itouvuha Toneina aitamoata aitamoata wayahina mamaei, vivane aitam tau goyona ana‑ito‑yavuhi wayahimia. Wayahina, medeina yami nuanua? Ataina itomi me Iudea yami kiniV ana‑ito‑yavuhi wayahimia?”

40Kate taui mainini ivi‑hone, “Tauna eha! Itoai yama nuanua Barabasa!” (Ka Barabasa tauna aitam tau vainau.)

Currently Selected:

Ioni 18: MVN

Highlight

Copy