Ioni 17

Iesu Tauna Ana Heta Wayahina Viama

1Ka Iesu avaha vonana nau‑yehai, e tauna wahuma dune‑vane ka vi‑putu viama, ivona,

“Amau, yauke Natu‑hoim, ka ataina au tuta avaha vin'‑omo. Wayahina, didigau evene‑havineu, e tomotau idudueyei, iawa‑davedaveu. Ka kadu apaiku yauke didigam avo‑vi‑natei, e munia tomotau iawa‑davedavem. 2Aviama deina iuna wamke avaha eawaeheu tomotau habuhabui aveimeyei. Ka aituhu aviyaivia avaha eveneu, akanai yauke nau‑wawaniu taui habuhabui yawai‑vavaha avenei. 3Ka yawai‑vavaha taina deina. Aituhu tomotau in'‑anamanem wamke am heta Yaubada‑hoim, ka kadu aituhu tomotau in'‑anamaneu yauke Iesu Tau Ito‑yavuha, ka kadu aituhu in'‑anamanei, wamke evi‑tuneu aomo baina tanopia.#1Io 5:20. 4Avaha didigam avo‑vi‑natei tanopia, iuna avaha paisewana nonova eveneu anau‑yehai.#Ioni 4:34. 5O Amau, ataina tuta wayahina wamke matama akanai didigau evene‑havineu. Tuta nonova wayahina aka inua didigaka nui kamamaei, e munia tanopi kavevewanei. Ka yau nuanua tuta tepakaia didigau aitamoata deina aka inua kamamaei.#Ioni 1:1.

Iesu Tauna A Tau Vi‑muni‑waiwai Wayahi Viama

6O Amau, nonova au tau vi‑muni‑waiwai habuhabui taina tau ma' tanopi, kate taui yam tomotau. Ka taui eveneu, ka avaha yau dewa asi‑vin'‑omanei idudueyei. Wayahina, taui avaha ianamanem, ka kadu avaha yam vona habuhabuna ivi‑ateteyei. 7Ka ataina avaha ianamanei, dewaia habuhabui eveneu, akanai wayahima ivin'‑omo. 8Iuna viwavenena habuhabuna nonova eveneu, avaha aviwavenei, iawaehei kadue inua‑vi‑avini. Ka taui avaha ianamane‑yehai, yauke taum wayahima avin'‑omo, ka kadu ivitumahanem, wamke evi‑tuneu aomo baina tanopia.

9Amau, ataina au tau vi‑muni‑waiwai taina wayahi aviamem. Eha tau ma' tanopi wayahi aviamem. Kate tomotau taina eveneu, taui wayahi aviamem, iuna taui vivane yam tomotau. 10Yauke yau pai veimea habuhabuna vivane wamke yam pai veimea. Ka aitamoata deina, wamke yam pai veimea habuhabuna avaha eawaeheu vivane yauke yau pai veimea. Ka au tau vi‑muni‑waiwai taina avaha didigau ivo‑vi‑natei taui yai dewa wayahi. 11Kate ataina ani‑tawanei aomomo wayahima. Eha baina amamae, kate taui taina nau‑wawani baina tanopia imamaei. O Amau Ahihimata! Am wava bagibagi‑vainena, kadu wamke am wava‑nana avaha eveneu. Ka ataina ahidahidam, taui edune‑vi‑avini, kadu dewa goyona ebou‑potei wayahia am wava a bagibagi wayahina. Iuna yau nuanua taui ivi‑yoko aitamoata, wamke yauke aitamoata deina. 12Nonova a itoava tuta ataina wayahina, yauke taui nui amamaei, ka am wava a bagibagi wayahina adune‑vi‑avini ahiahina, ka kadu goyona abou‑potei wayahia. Ka eha aitam koiaka wayahia ata‑ni‑kaiete, ana heta tauna dewa goyona natuna.#17:12 Iesu ivona dewa goyona natuna ka vonana vona baimina Iudasa me Kariota wayahina. Nonova Iginuma onotona wayahina apa‑taputapu vivane tauna nau‑wawani inahe kadu dewa‑yaiyai vaniahei.#Ioni 6:39; 13:18.

13Ataina yauke aomomo wayahima, kate yau vonana avonavona tanopia, iuna yau nuanua yau dewa‑haiawa taui au tau vi‑muni‑waiwai nihenia mamaei, kadu yau nuanua idewa‑haiawa‑iaua. 14Avaha taui taina yam vona avenei, ka avaha ivitumahanei. Wayahina, tau ma' tanopi inau‑nikonikoiei, iuna au tau vi‑muni‑waiwai eha tau ma' tanopi yai dewa ita‑vi‑munie, ka kadu yauke eha tau ma' tanopi yai dewa ata‑vi‑munie deina. 15Ka eha aviamem taui baina tanopia en'‑epa‑tawane. Kate aviamem eha Tau Goyogoyona eawaehe taui yawai vi‑goyo.#Mat 6:13; 2Te 3:3. 16Iuna taui eha tau ma' tanopi yai dewa ita‑vi‑munie, yauke kadu eha tau ma' tanopi yai dewa ata‑vi‑munie deina. 17Wayahina, yau nuanua yam vona tunutunuhina wayahina taui evo‑vi‑aiaiei ebou‑keyei, imamaei yoko tunina tau ma' tanopi wayahia. 18O Amau, wamke evi‑tuneu aomo tanopia. Ka kadu yauke avaha au tau vi‑muni‑waiwai taina avi‑tunei iomo tau ma' tanopi wayahia aitamoata deina.#Ioni 20:21. 19Ka yauke yau nuanua apaina taui ivi‑ateteyem ahiahina. Wayahina, ataina taui wayahi yauke abou‑keyeu, iuna yau nuanua ananina pai dune ahiahina avenei idueyei, e apaina taui ibou‑keyei ivi‑ateteyem.

Iesu Tauna A Tau Vitumahana Habuhabui Wayahi Viama

20O Amau, au tau vi‑muni‑waiwai wayahi aviamem, kate eha taui taina ai heta wayahi. Yauke kadu mani tomotau habuhabui wayahi aviamem. Apaina mani tomotau au tau hae taina yai nau‑wahe inononi, ivitumahaneu. Taui habuhabui wayahi kadu aviamem. 21Aviamem habuhabui ivi‑yoko aitamoata. O Amau! Aviamem taui habuhabui aka inua nihenikaia imamaei, wamke niheniua emamaei deina, kadu yauke nihenima amamaei deina. Ka aviamem au tau vi‑muni‑waiwai habuhabui ivi‑yoko aitamoata. Wayahina, tau ma' tanopi au tau vi‑muni‑waiwai yai dewa ahiahina idudueyei, e munia ivitumahanem, taum evi‑tuneu ana‑ito‑yavuhi. 22Nonova didigam eveneu, ka didigam kadu didigau aitamoata, ka aka inua aitamoata kamamaei deina. Ka yauke avaha au tau vi‑muni‑waiwai taina didigaka avenei, e taui ivi‑yoko aitamoata deina.#Dew 4:32. 23Vona ahiahina, wamke niheniua emamaei, ka kadu yauke taui nihenia amamaei aitamoata deina. Yauke aviamem taui evo‑vi‑aiaiei, e munia ivi‑yoko aitamoata. Wayahina, apaina tau ma' tanopi yai dewa ahiahina idudueyei, vivane au tau vi‑muni‑waiwai ivi‑yoko aitamoata, e tau ma' tanopi in'‑anamanei evi‑tuneu, kadu in'‑anamanei taui edune‑nuanuaiei, edune‑nuanuaieu aitamoata deina.

24O Amau! Wamke avaha tau hae taina eveneu. Ka yauke yau nuanua apaina, aveta baina yauke amamaei, akanai taui kadu wayahiua imamaei. Kadu yau nuanua taui didigau idudueyei. Nonova didigauna eveneu, iuna tuta naona wayahina edune‑nuanuaieu. Ika, naona edune‑nuanuaieu, e munia tanopi kavevewanei. 25O Amau, Tunutunuhim! Tau ma' tanopi eha it'‑anamanem, kate yauke anamanem, ka au tau vi‑muni‑waiwai taina kadu avaha ivitumahanem wamke evi‑tuneu. 26Nonova a itoava tuta ataina wayahina, yauke yau paisewa wayahina taum asi‑vin'‑omanem taui wayahia in'‑anamanem. Ka kadu yau paisewa apaiku apaisewei wayahina asi‑vin'‑omanem in'‑anamanem aitamoata deina. Iuna yau nuanua taui yam dune‑nuanuai ananina wayahiu in'‑anamanei, ka yau nuanua dune‑nuanuai‑nana kadu taui nihenia mamaei. Ka kadu yau nuanua yauke taua nihenia amamaei.”

Currently Selected:

Ioni 17: MVN

Highlight

Copy