ኢዮብ 34
34
1ኤሊሁ በመቀጠል እንዲህ አለ፤
2“እናንት ጠቢባን፣ ቃሌን ስሙ፤
ዐዋቂዎችም አድምጡኝ።
3ምላስ ምግብን አጣጥሞ እንደሚለይ፣
ጆሮም የንግግርን ለዛ ለይቶ ያውቃል።
4የሚበጀንን እንምረጥ፣
መልካሙንም አብረን እንወቅ።
5“ኢዮብ እንዲህ ይላል፤ ‘እኔ ንጹሕ ነኝ፤
እግዚአብሔር ግን ፍትሕ ነሣኝ፤
6እውነተኛ ብሆንም፣
እንደ ውሸታም ተቈጥሬአለሁ፤
በደል ባይኖርብኝም፣
በማይፈወስ ቍስል ተመትቻለሁ።’
7ፌዝን እንደ ውሃ የሚጠጣት፣
እንደ ኢዮብ ያለ ሰው ማን ነው?
8ከክፉ አድራጊዎች ጋር ይተባበራል፤
ከኀጢአተኞችም ጋር ግንባር ይፈጥራል።
9‘እግዚአብሔርን ለማስደሰት መሞከር፣
ለሰው አንዳች አይጠቅምም’ ብሏልና።
10“ስለዚህ፣ እናንተ አስተዋዮች ስሙኝ፤
ክፋትን ማድረግ ከእግዚአብሔር ዘንድ፣
በደልንም መፈጸም ሁሉን ከሚችል አምላክ ይራቅ።
11ለሰው እንደ ሥራው ይመልስለታል፤
እንደ አካሄዱም ይከፍለዋል።
12በእውነት እግዚአብሔር ክፋትን አይሠራም፤
ሁሉን የሚችል አምላክ ፍትሕን አያጣምምም።
13ምድርን እንዲገዛ የሾመው አለን?
የዓለምስ ሁሉ ባለቤት ያደረገው ማን ነው?
14እርሱ መንፈሱን መልሶ ቢወስድ፣
እስትንፋሱንም ወደ ራሱ ቢሰበስብ፣
15ሥጋ ለባሽ ሁሉ በአንድነት በጠፋ፣
ሰውም ወደ ዐፈር በተመለሰ ነበር።
16“ማስተዋል ካለህ ይህን ስማ፤
እኔ የምለውንም አድምጥ።
17ፍትሕን የሚጠላ ሊያስተዳድር ይችላልን?
አንተስ ጻድቁንና ኀያል የሆነውን ትኰንናለህ?
18ነገሥታትን ‘የማትረቡ ናችሁ፣’
መኳንንትንም፣ ‘ክፉዎች ናችሁ’
የሚላቸው እርሱ አይደለምን?
19ሁሉም የእጁ ሥራ ስለሆኑ፣
እርሱ ለገዦች አያደላም፤
ባለጠጋውንም ከድኻው አብልጦ አይመለከትም።
20እነርሱም እኩለ ሌሊት ላይ በድንገት ይሞታሉ፤
ሕዝብ ተንቀጥቅጦ ሕይወቱ ያልፋል፤
ኀያላኑም የሰው እጅ ሳይነካቸው ይወገዳሉ።
21“ዐይኖቹ የሰውን አካሄድ ይመለከታሉ፤
ርምጃውንም ሁሉ ይከታተላሉ።
22ክፉ አድራጊዎች የሚደበቁበት፣
ጨለማ ስፍራ ወይም የሞት ጥላ የለም።
23ሰው ለፍርድ ፊቱ ይቀርብ ዘንድ፣
እግዚአብሔር ቀጠሮ አይዝለትም።
24ያለ ምንም ጥያቄ ኀያላንን ያንኰታኵታል፤
ሌሎችንም በቦታቸው ይሾማል።
25እርሱ ሥራቸውን ሁሉ ስለሚያውቅ፣
በሌሊት ይገለብጣቸዋል፤
እነርሱም ይደቅቃሉ።
26ስለ ክፋታቸውም፣
በሰው ሁሉ ፊት ይቀጣቸዋል፤
27እርሱን ከመከተል ተመልሰዋልና፤
መንገዱንም ችላ ብለዋል።
28የድኾች ልቅሶ ወደ እርሱ እንዲደርስ ሰበብ ሆኑ፤
የመከረኞችን ጩኸት ሰማ።
29እርሱ ዝም ቢል፣ ማን ሊወቅሰው ይችላል?
ፊቱንስ ቢሰውር፣ ማን ሊያየው ይችላል?
እርሱ ከሰውም፣ ከሕዝብም በላይ ነው፤
30ይህም የሆነው ዐመፀኛው ሕዝቡን እንዳይገዛ፣
ወጥመድም በፊታቸው እንዳይዘረጋ ነው።
31“ሰው ለእግዚአብሔር እንዲህ ቢል የተሻለ ነበር፤
‘እኔ በደለኛ ነኝ፤ ከእንግዲህ ግን አልበድልም፤
32ማየት ያልቻልሁትን አስተምረኝ፤
ኀጢአት ሠርቼ እንደ ሆነም፣ ደግሜ አልሠራም።’
33ታዲያ አንተ ለመናዘዝ ፈቃደኛ ሳትሆን፤
እግዚአብሔር እንደ ወደድህ ይከፍልሃልን?
መወሰን ያለብህ አንተ ነህ እንጂ፣ እኔ አይደለሁም፤
እንግዲህ የምታውቀውን ንገረኝ።
34“አስተዋዮች ይናገራሉ፤
የሚሰሙኝም ጠቢባን እንዲህ ይሉኛል፤
35‘ኢዮብ ያለ ዕውቀት ይናገራል፤
ቃሉም ማስተዋል ይጐድለዋል።’
36ምነው ኢዮብ እስከ መጨረሻ በተፈተነ ኖሮ!
እንደ ክፉ ሰው መልሷልና፤
37በኀጢአቱም ላይ ዐመፅን ጨምሯል፤
በመካከላችን ሆኖ በንቀት አጨብጭቧል፤
በእግዚአብሔርም ላይ ብዙ ተናግሯል።”
Currently Selected:
ኢዮብ 34: NASV
Highlight
Share
Copy
Want to have your highlights saved across all your devices? Sign up or sign in
መጽሐፍ ቅዱስ፣ አዲሱ መደበኛ ትርጕም™
የቅጅ መብት © 2001 በ Biblica, Inc.
ፈቃድ የተገኘባቸው ናቸው። መብቱ በመላው ዓለም በሕግ የተጠበቀ።
Holy Bible, New Amharic Standard Version™ (Addisu Medebegna Tirgum™)
Copyright © 2001 by Biblica, Inc.
Used with permission. All rights reserved worldwide.
