Luka 9
9
Yesu atuma Eikumi n'Ababiri
(Mat 10:5-15; Mar 6:7-13)
1Yesu bwe yamala okweta aghalala Eikumi n'Ababiri, yaabagha amaani n'obukumu ku mizimu emibi gyonagyona, n'okuwonianga endwaire. 2Yaabatuma okulangirira Obwakyabazinga bwa Katonda n'okuwonia abalwaire. 3Era yaabakoba ati: “Bwe muja, timutwala kantu koonakoona, waire omwigo, waire ensawo, waire omugaati, waire empiiya, waire omuntu okuba n'ebivaalo ebibiri.#Luk 10:4-11; Bik 13:51 4Endhu yoonayoona mwe mwingiranga musulanga omwo, era mwe muviiranga okweyongerayo. 5Ate yoonayoona ye batabasangaaliranga, bwe mubanga nga muva mu kibuga ekyo, mukunkumulanga enkungu mu bigere byaimwe nga n'obudhulizi.” 6Agho baasimbuka baabitabita mu buli kyalo nga bakobera abantu Amawulire Amalungi woonawoona, era nga bawonia abalwaire.
Ekyawubania Herode
(Mat 14:1-12; Mar 6:14-29)
7Agho Herode ow'eisaza yaawulira byonabyona ebyaligho era byamuwubania, kuba eriyo abaali bakoba bati Yoanne azuukire mu bafu,#Mat 16:14; Mar 8:28; Luk 9:19 8abandi bati Eliya n'aboneike, ate abandi bati mulala ku balanzi ab'eira n'azuukiire. 9Aye Herode yaakoba ati: “Yoanne nze namutemaku omutwe, ate naani ono ye mpuliraku ebyaga agho?” Yaayenda okumubona.
Yesu aliisa abantu enkumi eitaanu
(Mat 14:13-21; Mar 6:30-44; Yoa 6:1-14)
10Abatume bwe baira baalomboodhera Yesu bye baakola. Yaabagemaku yaaja nabo bonka mu kibuga ekyetebwa Bethisaida. 11#Mat 14:13-21; Mar 6:32-44; Yoa 6:1-14; Mar 8:4-10 Abantu kamaala baategeera era baamunonereza yaabasangaalira, yaabakobera ku Bwakyabazinga bwa Katonda era yaawonia abaali benda okuwonezebwa.
12Obwire bwe bwatoolera okuziba, Eikumi n'Ababiri baaseeta, baamukoba bati: “Siibula abantu baje mu bibuga ni mu byalo ebyetooloire ghano bafune agh'okusula ni bye benda, kuba ghano tuli mu irungu.” 13Aye Yesu yaabakoba ati: “Imwe mubaghe eky'okulya.”
Baakoba bati: “Memale ife tuligho n'emigaati etaanu n'ebyenhandha bibiri, koodhi nga tuja twagula emere ey'abantu bano boonaboona?” 14Ghaaligho abasaadha ng'oti nkumi itaanu (5,000).
Yesu yaakoba Abeegeresebwa be ati: “Mubatyamye mu bikunsu bya bantu ng'amakumi ataanu ataanu.”
15Baakola batyo, baabatyamya boonaboona. 16Yaatoola emigaati etaanu n'ebyenhandha ebibiri yalinga ghaigulu mu igulu, yaabigha enkabi yeeyanza, yaabimegulamu yaagha Abeegeresebwa bagabule abantu. 17Boonaboona baalya baiguta, era baasoloza ebiibo ikumi na bibiri eby'ebitundu ebyafiikagho.
Petero ayatula ati Yesu ni Kurisito
(Mat 16:13-19; Mar 8:27-29)
18Agho olwatuuka, Yesu yali ali kusaba yenka aye nga Abeegeresebwa be bali naye, yaababuuza ati: “Abantu bandheta batya?”
19Baamwiramu bati: “Yoanne Omubatiza, aye abandi bati Eliya, ate abandi bati mulala ku balanzi ab'eira n'azuukiire.”#Mat 14:1-2; Mar 6:14-15; Luk 9:7-8
20Yaabakoba ati: “Ate imwe mundheta ani?”#Yoa 6:68-69
Petero yaamwiramu ati: “Niiwe Kurisito wa Katonda.”
Yesu ayogera ku kufa kwe n'okuzuukira kwe
(Mat 16:20-28; Mar 8:30—9:1)
21Aye yaabasikirira ekyo balobe kukikoberaku muntu yeenayeena. 22Era yaabakobera ati: “Omwana w'Omuntu taliroba kudaazibwadaazibwa inho. Abakulu ab'ebika, Bakabona Abakulu, n'Abanamateeka, balimwegaana era aliitibwa, ate ku lunaku olwokusatu alizuukira.”
23Agho ni yaabakoba boonaboona ati: “Oba nga ghaligho ayenda okuba Omwegeresebwa wange, alobe kwefaaku naire, abbeede omusalaba gwe buli lunaku annonereze#Mat 10:38; Luk 14:27 24kuba buli ayenda okuwonia obulamu bwe, oyo abuza bubuze aye abuza obulamu bwe ku lwange, oyo abuzaawula.#Mat 10:39; Luk 17:33; Yoa 12:25 25Kigasa ki omuntu okufuna ensi yoonayoona aye yaazaagha oba yaazikirira? 26Era buli ye ngemya ensoni, n'ebibono byange ye bigemya ensoni, oyo yeena aligemya Omwana w'Omuntu ensoni lw'aliidha mu kitiisa kye, n'ekya Ise, n'ekya bamalaika abatukuvu.
27“Aye bwenebwene, ka mbakobere: Ghaligho abandi ku bemereire ghano abatalirega ku kufa okutuusa nga baboine Obwakyabazinga bwa Katonda.”
Okufuuka obundi okwa Yesu
(Mat 17:1-8; Mar 9:2-8)
28Agho olwatuuka, nga ghabiseegho enaku oti munaana ng'amaze okwogera ebibono ebyo, yaatwala Petero ni Yoanne ni Yakobo, baaniina ku lusozi okusaba.#2 Pet 1:17-18 29Bwe yali asaba, emboneka ye mu maiso yaafuuka bundi n'ebivaalo bye byafuuka byeru, byamesunkana. 30Okuja okubona nga ghaligho abasaadha babiri Musa ni Eliya, be yali ali kwogera nabo. 31Baabonekera mu kitiisa baayogera ku kuja kwe, kwe yali aja okumalira mu Yerusalemu. 32Petero ni be yali nabo baali batenduka, aye bwe baazuuka baabona ekitiisa kya Yesu, n'abasaadha ababiri nga bemereire naye. 33Agho abasaadha bwe baava aghali Yesu, Petero yaamukoba ati: “Musengwa, tulongoire twaba ghano, era ka tuseemente entindi isatu: eyiyo, eya Musa, n'eya Eliya.” Yali taidhi ky'ali kukoba.
34Yali akaayogera ekire kyaidha kyabakingiriza era baawulira okutya bwe baali bali kwingira mu kire. 35Agho eiroboozi lyava mu kire nga likoba liti: “Ono ni Mutabane wange, omulonde, mumuwulirenga!”#Isa 42:1; Mat 3:17; 12:18; Mar 1:11; Luk 3:22 36Eiroboozi bwe lyasirika, baabona Yesu ng'ali yenka. Baasirika, ghaabulagho ye bakoberaku mu nnaku edho, ekintu kyonakyona ku bye baabona.
Yesu awonia eyaliku omuzimu omubi
(Mat 17:14-18; Mar 9:14-27)
37Olunaku olwairirira, bwe baikirira okuva ku lusozi, baayagaanana n'eikuukuubira ery'abantu. 38Ghaabaagho omusaadha mu ikuukuubira yaayetera ghaigulu ati: “Mwegeresa, nkweghembye bona omwana wange. Ono n'omwana ye ndi naye yenka, 39aye bona omuzimu gumugema, talwa ng'ayasiikana, era nga gumutandigira, ng'afuukeera. Era tigumuvaaku nga tigumumenhiemenhie. 40Neeghembye Abeegeresebwa bo bagumubingeku, aye tibaghanze.”
41Yesu yaamwiramu ati: “Yii, oluse luno olw'abantu abazira kwikiriza era abadankaanu! Ndituusa gha okuba n'imwe n'okubaguminkiriza? Leeta ghano mutabane wo.”
42Bwe yali aseeta, omuzimu gwamusuula ghansi era gwamusikasika inho. Aye Yesu yaakaabukira omuzimu omubi, yaawonia omulenzi era yaamugemya lata we. 43Boonaboona baayasaamirira olw'obukumu bwa Katonda.
Yesu airamu okwogera ku kufa kwe
(Mat 17:22-23; Mar 9:30-32)
Boonaboona baali bakeewuunhia bye yakola, Yesu yaakoba Abeegeresebwa be ati: 44“Muwulirise bukalamu bino bye nja okubakoba: Omwana w'Omuntu aja kugheebwayo mu mikono egy'abantu.” 45Aye kino tibaakitegeera kuba kyabakwekebwa baaloba kukimanha, ate baatya okumubuuza ku kibono ekyo.
Naani asinga obubbede
(Mat 18:1-5; Mar 9:33-37)
46Agho baatoolera okutakana beene na beene nga beebuuzagania naani mu beene asinga obubbede.#Luk 22:24 47Yesu yaategeera ebidhuubo eby'omu myoyo gyaibwe, yaatoola omwana yaamwemereza agho okuliiraana ghe yali, 48era yaabakoba ati: “Buli asangaalira omwana ono mu liina lyange aba asangaaliire nze; asangaalira nze aba asangaaliire oyo eyantuma; kuba asembayo mu imwe mwenamwena, oyo n'omubbede.”#Mat 10:40; Luk 10:16; Yoa 13:20
Omuntu atabatakania aba munaimwe
(Mar 9:38-40)
49Agho Yoanne yaamwiramu ati: “Mwegeresa, twabona omuntu ng'ali kubinga emizimu emibi mu liina lyo era twamulobera, kuba ti mwegeresebwa wo ng'oti niife.”
50Yesu yaamukoba ati: “Mutamuloberanga, kuba oyo atabatakania aba munaimwe.”
Ekyalo eky'Abasamaria kiroba okusangaalira Yesu
51Agho enaku dha Yesu edh'okutwalibwa mu igulu bwe dhaatuuka, Yesu yaamalirira okuja e Yerusalemu. 52Yaatuma abakwenda bamwesookengayo. Era bwe baaja bangira mu kyalo eky'Abasamaria basobole okumwetegekera, 53aye tibaamusangaalira kuba yabonekera irala ng'aja Yerusalemu. 54Abeegeresebwa be, Yakobo ni Yoanne bwe baabona ekyo, baakoba bati: “Musengwa, wandyenze tulagire omuliro guve mu igulu gubazikirize?”#2 Bakyab 1:9-16
55Aye Yesu yaabakyukira yaabanenia. 56Era baavaagho baaja mu kyalo ekindi.
Abaayenda okuba Abeegeresebwa ba Yesu
(Mat 8:19-22)
57Agho bwe baali batambula mu ngira ghaabaagho eyamukoba ati: “Ndidha kukunonerezanga buli gh'onaajanga.”
58Yesu yaamukoba ati: “Ebibe biri n'ebiina, n'enhonhi edh'omu ibbanga dhiri n'ebisu, aye Omwana w'Omuntu azira gh'aisa mutwe.”
59Yesu yaakoba owundi ati: “Nnonereza.”
Aye ole yaakoba ati: “Musengwa, nganha nsooke nje nziike lata wange.”
60Agho yaamukoba ati: “Leka abafu baziike abafu baibwe, aye iwe ja olangirire Obwakyabazinga bwa Katonda.”
61Kabiri owundi yaamukoba ati: “Musengwa, nze ndidha kukunonereza, aye nganha nsooke nje nsiibule ab'eka.”#1 Bakyab 19:20
62Oyo Yesu yaamukoba ati: “Ezira agema mbago kulima ate n'alingirira ebimuli einhuma, oyo tawoomera mu Bwakyabazinga bwa Katonda.”
Currently Selected:
Luka 9: Sog
Highlight
Share
Copy
Want to have your highlights saved across all your devices? Sign up or sign in
Baibuli Ekibono kya Katonda © The Bible Society of Uganda, 2014
