Luka 10

Yesu atuma ensanvu n'Ababiri

1Ebyo olwawa, Musengwa yaalonda nsanvu na babiri, yaabatuma babiri babiri bamwembereremu mu buli kibuga, ni mu buli kifo mwe yali aja okuja. 2Yaabakoba ati: “Eby'okukungula bwenebwene biri kamaala aye abakozi n'abatono kale ni musabe Musengwa mwene bikungulwa asindike abakozi mu bikungulwa.#Mat 9:37-38 3Muje aye mwegendereze, mbatuma nga muli ng'oti n'entaama ento mu misege.#Mat 10:16 4Mutatwalanga nsawo yoonayoona, waire ngaito ate mu ngira timulamusanga muntu yeenayeena.#Mat 10:7-14; Mar 6:8-11; Luk 9:3-5 5Buli ndhu ye mungirangamu musookanga kukoba muti, ‘Endhu eno ebe miraala.’ 6Bwe mulibaamu omwana ow'emiraala, emiraala gyaimwe girigisigalaku. Aye bwe mulibula, gija ku bairira. 7Mu ndhu yeene eyo mwe musulanga, mwalyanga era mwanhwanga bye babagha kuba omukozi agwana okusasulwa enkemba ye. Mutavanga mu ndhu kwira mu yindi.#1 Kor 9:14; 1 Tim 5:18 8Ekibuga kyonakyona kye mungirangamu ni babasangaalira, mulyenga abantu abo kye babagha. 9Muwonie abalwaire abali mu kibuga omwo, mubakobere muti obwakyabazinga bwa Katonda buseese. 10Aye ekibuga kyonakyona kye mungiramu ni batabasangaalira, mujanga mu nguudo dhaakyo mwakoba muti,#Bik 13:51 11‘N'enkungu ey'omu kibuga kyaimwe etugemye ku bigere byaife tugibakunkumuliire aye mumanhe kino muti, Obwakyabazinga bwa Katonda buseese.’ 12Ka mbakobere: Ku lunaku lule, Sodoma kirisaasirwa okusinga ekibuga ekyo.#Mainh 19:24-28; Mat 11:24; 10:15

Okudaazibwadaazibwa okulituuka ku bibuga ebiteenenia

(Mat 11:20-24)

13“Okagwireku Korazini! Okagwireku Bethisaida! Kuba ebyewuunhio ebikolebwa mu imwe nguli byakolebwa mu Tiro ni mu Sidoni, nguli beenenia, baavaala ekutiya, baatyama ni mu ivu.#Isa 23:1-18; Ezek 26:1—28:26; Yoe 3:4-8; Amo 1:9-10; Zek 9:2-4 14Aye ku lunaku olw'okusaliraku omusango, Tiro ni Sidoni birisaasirwa okusinga imwe.

15“Ate iwe Kaperinaumu olisitulibwa okutuuka mu igulu? Busa, oliisibwa mu magombe waazikirira!#Isa 14:13-15

16“Awulira imwe aba awuliire nze; aloba okubawulira aba alobye kuwulira nze; ate aloba okuwulira nze aba alobye kuwulira ole eyantuma.”#Mat 10:40; Mar 9:37; Luk 9:48; Yoa 13:20

Ensanvu n'Ababiri baira

17Agho Ensanvu n'Ababiri (72) baira nga basangaavu, baakoba bati: “Musengwa, mu liina lyo n'emizimu emibi gyona gyatuwuliranga!” 18Yesu yaabakoba ati: “Nabona Sitaani ng'agwa okuva mu igulu oti lukuba. 19Muboine! Nabagha obukumu okuniinirira emisota ni siga, n'okughangula amaani goonagoona ag'omuzigu. Ghazira kintu kyonakyona kiribakola kabi.#Zab 91:13 20Aye mutasangaala olw'okuba emizimu gibawulira, musangaale olw'okuba amaina gaimwe gaaghandiikibwa mu igulu.”

Yesu asagamba

(Mat 11:25-27; 13:16-17)

21Mu kiseera kyene ekyo Yesu yaasagamba mu Mwoyo Mutukuvu, era yaakoba ati: “Lata, nkusaaka, Musengwa ow'eigulu n'ensi, kuba ebintu bino wabigisa ku bagezi n'abamanhi, waabimanhisa abato. N'agh'agho Lata, kuba otyo bwe wasiima.

22“Ebintu byonabyona, Lata wange yabimpa era ghazira aidhi Mwana okutoolaku Lata, ate ghazira aidhi Lata okutoolaku Mwana n'oyo yeenayeena Mwana y'aba asiimye okumumanhisa.”#Yoa 3:35; 10:15 23Agho yaakyuka yaalingirira Abeegeresebwa be yaabakoba nga bali bonka ati: “Ba nkabi ababona bye mubona! 24Kuba ka mbakobere: Abalanzi kamaala ni bakyabazinga beegomba okubona bye mubona, aye tibaabibona, era n'okuwulira bye muwulira aye tibaabiwulira.”

Omusamaria omulungi

25Ghaabaagho Omunamateeka yaasituka yaaleba Yesu ng'akoba ati: “Mwegeresa, nkole ki okufuna obulamu obutawaagho?”#Mat 22:35-40; Mar 12:28-34

26Yesu yaamwiramu ati: “Kyaghandiikibwa kitya mu mateeka. Osoma otya?”

27Yairamu ati: “Ogonzanga Musengwa Katonda wo n'omwoyo gwo gwonagwona, n'amaani go goonagoona, n'okutegeera kwo kwonakwona, era ogonzanga muntu mwino nga iwe mwene bwe weegonza.”#Lev 19:18; Ma 6:5

28Yesu yaamukoba ati: “Oizeemu bukalamu, kola otyo, oidha kuba mulamu.”#Lev 18:5

29Aye ole olw'okwenda okulaga ati ky'abuuziiza kya makulu, yaakoba Yesu ati: “Muntu munange naani?”

30Yesu yaamwiramu ati: “Ghaaligho omuntu eyali aikirira okuva e Yerusalemu okuja e Yeriko yaagwa mu banhazi, baamuleka bwereere, baamukuba era baamuleka ng'aziriike. 31Ghaabaagho kabona eyali aikirira mu ngira eyo, yaamubona, yaabita embali yaaja. 32N'Omulevi yeena atyo, bwe yatuuka mu kifo ekyo n'amubona, yaabita eruuyi yaaja. 33Ghaabaagho Omusamaria eyali mu lugendo lwe, yaamutuukaku era bwe yamubona yaamugemerwa ekisa#2 Byom 28:15 34yaaseeta ghe yali, yaamusiba gha biwundu ng'amaze okubiyughaku omuzigo n'omwenge ogw'emizabbibu. Agho yaamuta ku ndogoyi ye, yaamutwala mu ndhu ey'abageni, yaamugenza. 35Bwe bwakya enkyo yaagha dinari ibiri mwene ndhu eyo, era yaamukoba ati, ‘Kola ng'omugenza, era kyonakyona ky'onaasansaania okusingagho ndikikusasula nga ndhize.’

36“Kale ku abo abasatu naani eyali mwine w'oyo eyagwa mu banhazi?”

37Yaakoba ati: “Ole eyamugemerwa ekisa.”

Yesu yaamukoba ati: “Ja, weena okole otyo.”

Yesu akyalira Maritha ni Maria

38Bwe baali baja, ghaabaagho ekyalo kye yatuukamu ghabaagho omukazi nga bamweta Maritha yaamukyaza.#Yoa 11:1 39Ono yali ni muganda we nga bamweta Maria. Maria oyo yaatyama agho gha bigere bya Musengwa yaawulirisa by'akoba. 40Maritha yali ali kwetawula na mirimo gya kugheereza. Bwe yaidha ye Yesu n'amukoba ati: “Musengwa, toli kubona nga muganda wange andekeire emirimo egy'okugheereza zenka? Mukobeku, aidhe ambeereku.”

41Musengwa yaamwiramu ati: “Maritha, Maritha weeraliikirira era otaghaanizibwa ebintu kamaala 42aye ekyetaagisa kiri kirala, Maria n'alonze ekintu ekirungi, ekitaghanga kumutoolebwaku.”

Currently Selected:

Luka 10: Sog

Highlight

Copy