Ñwaè' Ruêm 16

1M ce kòŋ mɛnɛ wèe riŋ Febè ce e yu njar yìsèe, ce e yu dikòn embe cor à rla' Keŋkɛ̀rà. 2E ka' vʉ̂, wèe koni ye àmbò bèe Tata Nyʉ̀ a ba koni ŋwɛ̀ rbyemì. Fa nè ye yuu ce e ka' buu, njobè' e jà' bèe magòr sê, a ja' mɛ̀ foŋ.

3Cà'ni nè Prǐskà ba Àkwilà ce wèr wowèe à m fà' àbee nè Jisos Krǎis nà nè mɛ̀. 4Wowèe a m tami nyor à rkwe njo' mɛ̀. À ku yoŋshi ba mɛ̀ wowèe cà'cà' ka', bcor wɛɛwɛ ce ŋgǎa rbyemì embo yu bèe enje jɛɛ, a yòŋshi wowèe foŋ.

5Cà'ni nè ŋgǎa rbyemì ce a ke niŋ cor mbe wǎp ndàp. Cà'ni nè Ɛ̀pɛ̀nitòs ce e yu ŋkarà ce wa mntee nà. E m ba ŋwɛ̀ entombì à rbyemi nè Krǎis à ŋgǒŋ Ɛshà. 6Cà'ni nè Mɛ̀ɛri ce e m fà' nè wèe tatap se nà. 7Cà'ni nè Àndrònikòs ba Jùnayàs ce wèr wowèe yu Jûs, wowèe foŋ a yɛ ŋgɛ' mbe shaŋ àmbò mɛ̀. Wowèe a yu boo mlii à mʉ̀ ŋgǎa ntuu Jisos Krâis. Wowèe a m ba ŋgǎa rbyemì entombì nè mɛ̀. 8Cà'ni nè Àmplatòs ce e yu ŋkarà ce wa mntee, ce wèr ye yu àbee wèr Tata wèe nà. 9Cà'ni nè Òbanùs ce e ce fà' nè Jisos Krǎis àmbò wèr ce fà' foŋ nà, ba Sìtakìs ce e yu ŋkarà se nà. 10Cà'ni nè Àpɛlɛ̀s ce e ku tɛɛ tatap, a duŋshi nè mini-ŋwɛ̀ enɛ e yu ŋwɛ̀ Krâis. Cà'ni nè bèe wɛɛwɛ embe ndàp Àrìstobulùs. 11Cà'ni nè Hɛ̀rodìyòn ce e yu ŋwɛ̀ Jus àmbò mɛ̀ foŋ nà. Cà'ni nè bèe embe ndàp Nàkisòs ce yu bèe Tatâ. 12Cà'ni nè Tìrfɛnà ba Tìrfosà ce yu bbyèŋge ce a ce fà' nè Tata nà. Cà'ni nè Pɛsìs ce e yu ŋkarà a ba foŋ njeŋwɛ̀ mò' ce e fà' nè Tata tatap se nà. 13Cà'ni nè Rufòs ce e yu muu rlii efa mʉ̀ bèe Tata nà, ker ba yì ma ce e m gɛ' nè mɛ̀ àmbò muu yì wa'a nà. 14Cà'ni nè Àsinkiritòs ba Fìlɛgòn ba Hɛmìs ba Pàtòropàs ba Hɛmàs, ker ba bfʉr ce a yu a wowèe wɛɛwɛ. 15Cà'ni nè Fìlologìs ba Jùliyà, ba Nɛrìyòs a njar yì, ba Òlipàs ba bèe Nyʉ̀ wɛɛwɛ ce a yu a wowèe. 16Cà'ni nè bfʉr wee, baa wowèe nje nyòr à rlii Jisòs. Bcor wɛɛwɛ vi cà'ni wèe.

17Bfʉr wâ, m ce bu' mmbo nè wèe enɛ wèe lor nfè' nè bèe ce a ce vʉ̀ nè ŋgàpni a ker ce dà'si bèe foŋ nà. Wowèe a ce gèe jɛɛ efa yuu ce a yɛ'ni wèe. Sìr nè njì nè wowèe. 18Gèe nè wa'a njobè' njɛ̀ɛ bèe ca a ce fà' ba nè Krǎis ce e yu Tata nè sèe ka', wowèe a ce gèe ba yuu ce yi bòŋ wowèe. Wowèe a ce bu' cùu nè blàa ce vi bòŋ a ce foo sê, a ce bo' bèe ce a mɛŋni buu. 19À ka' ba àmbò wèe, bèe wɛɛwɛ a rìŋ enɛ wèe yu bèe ce wèe ce yu'ni nè Tatâ. M ce lu'shi nè wèe sê. Ka' yi yu wa'a, m ce kòŋ mɛnɛ wèe riŋ yuu bòŋboŋ, mɛŋni yuu bebep. 20Nfè' bɛti gòr ka', tɛ Nyʉ̀ ce e ke fa bèe cumʉnyaŋ so Satàn, mà' njep wěe tìi tɛ wèe tɛr mkùu mbe yě ndù. M ce loo mɛnɛ tɛ yìsèe Tata Jisos Krǎis tʉr wèe à ntee bòŋboŋ.

21Timotì ce wèr ye ce fà' àbee, à cà'ni wèe. Lushòs ba Jasìn, ba Sòsipatà ce wèr wowèe yu Jus nà, a cà'ni wèe foŋ. 22Mɛ̌ Tɛshòs ce mɛ̀ saŋ ŋwà' ca ce cà'ni wèe foŋ à rlii yìsèe Tatâ. 23Gayòs, ce m ce cu mbe yě ndàp, ŋgǎa rbyemì a ce niŋ cor mbo foŋ nà à cà'ni wèe. Ɛ̀rastòs ce e ce lɛ̀ mbàa to' nà ba Kwatòs a cà'ni wèe. 24[M ce loo mɛnɛ tɛ yìsèe Tata Jisos Krǎis tʉr wèe wɛɛwɛ à ntee bòŋboŋ. Yi yu wa'a.]

25Sèe ku'si Nyʉ̀! E tʉr ŋger à rgèe tɛ wèe tɛɛ tatap, àmbò Nsuŋ Mbòŋmboŋ ce làa nà. Nsuŋ ca a nsuŋ ce m ce suŋ àmbò Jisos Krâis, a ba nsuŋ àmbò buu ce vi m ba à bsʉ̀ti kɛ' elǔuŋgòŋ, 26a yɛɛti àwaŋ sè'ni na. Buu ce ŋgǎa ncep ntuu Nyʉ̀ a m saŋ vi gèe buu ca à yɛɛti àwaŋ nè bèe enje jɛɛ. Nyʉ̀ ce e ce cu nfesè à m làa enɛ buu ca yɛɛti nè bèe enje jɛɛ wa'a, tɛ bto' wɛɛwɛ vi bo byemi, yu'ni nè ye. 27Ku ba ye Nyʉ̀ ce e tʉr bfee. Sèe ku'si ye à nfè' sìp njo' yuu ce Jisos Krǎis à m gèe! Yi yu wa'a.

Currently Selected:

Ñwaè' Ruêm 16: LNT

Highlight

Copy