Ñwaè' Matïìyoè 19

1Jisòs à ka' làa buu ca mìsi, a lǒ à ŋgǒŋ Galèlê, a du à mbèp ŋgǒŋ Jùdiyà ce e yu nèŋguu rdip Jodàn. 2Ku' bèe a du a yě mbùu, a ka' bà' àfo, e gee ŋgǎa byaŋ a ke'sè. 3Bèe Farìsi mo' a vʉ a mooshi ye, a bipshi nè ye enɛ̂, “Ncir yi byemi enɛ ŋwɛ̀ juu ŋgwa yì ka' àtu kɛ a?” 4E beesì a laa enɛ̂, “Mbò wèe à bè' Ŋwǎ' Nyʉ̀ a yɛ weenɛ ŋwɛ̀ ce e m boo bèe efa rkɛ̀', e m boo mbaŋrùŋwɛ̀ ba njeŋwɛ̀ a? 5E m làa enɛ̂, ‘À ka' ba njobè' mɛ̀ m boo mbaŋrùŋwɛ̀ ba njeŋwɛ̀, mbaŋrùŋwɛ̀ be mà'shi yì ta ba yì mâ, cu a ŋgwa yì, tɛ a ye a ba ŋwɛ̀ mò'sir.’ 6Banɛ wowèe a ker ba a baa ka'. A yu ba ŋwɛ̀ mò'sir. Banɛ yuu ce Nyʉ̀ à tarshi, ŋwɛ̀ mò' fa gàpse ka'.” 7Wowèe a laa nè ye enɛ̂, “Musìs à m ka' ba laa enɛ mbaŋrùŋwɛ̀ fa ŋwà' nè njeŋwɛ̀ à rdùŋshi enɛ e sà'si gùu, ka' juu ye njokɛ?” 8E laa nè wowèe enɛ̂, “Musìs à m mà'shi enɛ wèe juu wee bbyèŋge njobè' wèe tèe btu sê. Yi m ba wa'a efa rkɛ̀' ka'. 9M ce suŋ wèe mɛnɛ ŋwɛ̀ ka' juu ŋgwa yì, ke' ba njobè' enɛ ŋgwa yì à nòŋ a mbaŋrùŋwɛ̀ mò' ka', ker lor ŋgwa mò', banɛ ŋgàŋ à koo njeŋwɛ̀ ce yu ŋgwa yì ka'.” 10Ŋgǎa yɛ'ni yì buu a laa nè ye enɛ̂, “Yi ka' ba wa'a nè mbaŋrùŋwɛ̀ ba ŋgwa yì, banɛ yi bòŋ enɛ ŋwɛ̀ lor ŋgwa ka'.” 11E laa nè wowèe enɛ̂, “Àde' ŋwɛ̀ wɛɛwɛ byemì yuu ca ka'. Bèe ce àde' a byemì ku ba bèe ce Nyʉ̀ à gèe enɛ wowèe a byemi. 12Bèe mo' a yu bkar njobè' a m bi wowèe a ku ba bkar, bèe mo' a ba bkar njobè' bèe a gèe wowèe a ba bkar. Bèe mo' a yu bkar njobè' à gèe wowèe a gee wap mnyor à bkar njo' kʉʉ Nyʉ̀. Ŋwɛ̀ ce àde' e byemì yuu mɛ̀ làa na, ŋgàŋ byemi yi.”

13Bèe mo' a m vʉ̀ nè bghàrbèe enɛ Jisòs bo la' mmbo mbe wǎp ndù, loo nè wowèe. Ŋgǎa yɛ'ni yì buu a lapnì bèe anà. 14Jisòs à ka' yɛ wa'a, a laa enɛ̂, “Mà'shi nè tɛ bghàrbèe anà a vʉ yɛ mɛ̀. Wèe fa jepsi wowèe ka', njobè' kʉʉ Nyʉ̀ yi yu nè bèe ce a yu àmbò bghàrbèe ca.” 15E la' mi mmbo mbe wǎp ndù, a loo, a nati a dû.

16Ŋwɛ̀ mò' à m vʉ̀ a yɛ Jisòs, a bipshi nè ye enɛ̂. “Ŋwɛ̀ ryɛ'nì, yuu bòŋboŋ ce àde' m gee ka' koni ryòŋ ce nfesè yu ba kɛ?” 17E laa nè ye enɛ̂, “Wɛ̀ bipshi nè mɛ̀ àmbò yuu bòŋboŋ njokɛ? Ku ba ŋwɛ̀ mò'sir ce e yu ŋwɛ̌ mbòŋmboŋ. Wɛ̀ ka' ce kòŋ à rkoni ryòŋ ce nfesè, à lɛ mncir.” 18E laa enɛ̂, “Mncir vǐ fɛ?” Jisòs à beesì enɛ̂, “Fa yʉ ka', fa koo ŋgwa ŋwɛ̀ mò' kɛ̀ nduu ŋwɛ̀ mò' ka', fa yɛ̀ɛ ka', fa tɛɛ njìnsa' mnàŋ ka', 19yu'ni nè yò ta ba yò mâ, ker ce koŋ nfʉrò àmbò à kòŋ yò nyor.” 20Muu nsùnsù ca à laa nè ye enɛ̂, “Mɛ̀ lɛ̀ mncir ca wɛɛwɛ, banɛ yuu ce àde' m ker gee yu ba kɛ?” 21Jisòs à beesì enɛ̂, “Wɛ̀ ka' ce kòŋ à rba yɛɛnì se à bsii Nyʉ̀, à du fyeni yò buu wɛɛwɛ, lor mbàa efa gho, gapshi nè ŋgǎa fùp, tɛ à bo tʉr bkù' mbe bùu. Wɛ̌ gèe wa' wɛɛ, vʉ a mɛ̌ mbùu.” 22Muu nsùnsù ca à ka' yu' wa'a, a sɛ sê, a nati a du njobè' e m tʉr ku' buu sê. 23Jisòs à laa nè ŋgǎa yɛ'ni yì buu enɛ̂, “M ce suŋ wèe nè mini-ŋwɛ̀ enɛ yi yu tatap nè ŋwɛ̀ mbàa à rniŋ mbe dǐ' kʉʉ Nyʉ̀. 24M ker ce suŋ wèe mɛnɛ yi yu àtɛ̀r nè kàmɛl à rtose njep rlir nsàrà' nè ŋwɛ̀ mbàa à rniŋ mbe dǐ' kʉʉ Nyʉ̀.” 25Ŋgǎa yɛ'ni yì buu a ka' yu' wa'a, a bɛɛŋger sê, a laa enɛ̂, “Banɛ ŋwɛ̀ ce àde' e lûŋ, yu ba nda?” 26Jisòs à fyɛ' wowèe, a laa enɛ̂, “Ca yi yu tatap se nè bèe, à ka' ba yi nè Nyʉ̀, buu wɛɛwɛ yu àtɛ̀r.” 27Pità à beesì a laa enɛ̂, “Yɛ̂, wèr à mà'shi yèr buu wɛɛwɛ a vʉ a wɛ̌ mbùu. Banɛ yuu ce wèr be koni yu ba kɛ?” 28Jisòs à laa nè wowèe enɛ̂, “M ce suŋ wèe nè mini-ŋwɛ̀ enɛ be kèe ba à nfè' ce a gèe buu wɛɛwɛ vi kʉtì bfi, a nfè' ce Muu Ŋwɛ̀ be kèe cu mbe kàbàrà' nè yi fòo embe bùu-ŋwɛ̀ nà, tɛ wèe ce wèe à vʉ̀ a mɛ̌ mbùu na, cu mbe bkàbàrà' ncòp-baa-à-rrʉ̀ʉ, ce sa' mntɛ̀' Isrɛ̀l ce ncòp-baa-à-rrʉ̀ʉ. 29Ŋwɛ̀ wɛɛwɛ ce e ka' ma'shi vi mndap, kɛ̀ bfʉr vi, kɛ̀ bjar vi, kɛ̀ yì tâ, kɛ̀ yì mâ, kɛ̀ boo vi, kɛ̀ yi ŋgòŋ ce e tʉr ɛ̀, njo' mɛ̀, e be koni ku' buu sê, càa àmbò e m tʉr nà kàŋ rjèe, kèr koni ryòŋ ce nfesè foŋ. 30Bèe magòr ce a yu entombì sè'ni na, a be kèe ba elʉ̀simbùu, tɛ bèe magòr ce a yu elʉ̀simbùu sè'ni na, a ba entombì.

Currently Selected:

Ñwaè' Matïìyoè 19: LNT

Highlight

Copy