Ñwaè' Matïìyoè 16

1Bèe Farìsi ba bèe Sadùsî, a m dù à rmòoshi Jisòs, a laa nè ye enɛ e duŋshi wowèe ncòo embe bùu. 2E beesì a laa nè wowèe enɛ̂, “Wee ke yɛ àmbò rbuu li bàŋ à mbùuŋkùr, wèe laa weenɛ ŋgòŋ yi be fʉʉ bòŋ, 3e ba à ŋgàptʉ', wèe yɛ àmbò rbuu li ce bàŋ nè mmbà'-ŋwɛ̀, wèe laa weenɛ, ŋgòŋ yi be bep nè fu' ntìni sê. Wèe rìŋ à rfyɛ' rbuu, rìŋ àmbò ŋgòŋ yi be ba. Ka' yi yu wa'a, àde' wèe riŋ yuu ce ncòo yǐ sè'ni na tɛɛ àtu mo ka'. 4Ŋgʉ̀ bèe ce a yu ŋgǎa bsàrbuu, a ba mini nè Nyʉ̀ ka' ce a ker ce ròo enɛ a duŋshi wowèe ncòo. M be dùŋshi wowèe ncòo mò' caa efa ncòo yì Jonà ka'.” Jisòs à ka' laa wa'a, a ma'shì wowèe mbo a dû.

5Ŋgǎa yɛ'ni yì buu a m tuu nèŋguu rò a lese à rlòr brɛ̂d. 6Jisòs à laa nè wowèe enɛ̂, “Lòr nè nfè' nè yis bèe Farìsi ba bèe Sadùsî.” 7Wowèe a kɛ' a ce làa fa wǎp mʉ enɛ̂, “E làa wa'a njobè' sèe à vʉ̀ nè brɛ̌d ka'.” 8Jisòs à riŋ yuu ce wowèe a ce làa, a laa nè wowèe enɛ̂, “Wèe ce le rbyemì li yu mʉcàr, wèe ce làa fa wěe mʉ enɛ wèe tʉr brɛ̌d ka' njokɛ? 9Wèe à be riŋ buu ka' a? Mbò wèe ce kuushi brɛ̌d ta ce a m nyaŋ bèe ncʉ̀kì ta àgho ker ba mŋkàa ce wèe à m baashi bbɛbɛ' àgho nà ka' a? 10Mbò wèe ce kuushi brɛ̌d sàamba ce a m nyaŋ bèe ncʉ̀kì kyèe àgho nà, ker ba mŋkàa ce wèe à m baashi bbɛbɛ' àgho nà ka' a? 11Wèe à ba riŋ weenɛ m ce làa nè wèe ba àmbò brɛ̌d ka' ka' njokɛ? Lòr nè nfè' nè yis bèe Farìsi ba bèe Sadùsî.” 12Ŋgǎa yɛ'ni yì buu a riŋ sè'ni enɛ e ba ce làa nè wowèe ba enɛ wowèe a lor nfè' nè yis brɛ̌d ka', e ba ce làa ba enɛ wowèe a lor nfè' nè ryɛ'nì bèe Farìsi ba bèe Sadùsî.

13Jisòs à m dù, a ka' bà' à mʉ̀ mla' ce mi m ba àgee rla' Sisàriyà Filèpâi, a bipshi nè ŋgǎa yɛ'ni yì buu enɛ̂, “Bèe a ce làa enɛ Muu Ŋwɛ̀ yu ba nda?” 14Wowèe a beesì enɛ̂, “Bèe mo' a ce làa enɛ yu Jǒn ŋwɛ̀ bàptir bèe, bèe mo' a ce làa enɛ yu Àlajà, bèe mo' a ce làa enɛ, ka' tɛ ba Jɛ̀rìmiyà ka' banɛ yu ŋwɛ̀ ncep ntuu Nyʉ̀ mò'.” 15E laa nè wowèe enɛ̂, “Yi yu yi ekɛ àmbò wèe? Wèe ce làa ye weenɛ m yu nda?” 16Saimʉn Pità à beesì enɛ̂, “A wɛ̀ Krǎis anà ce e yu Muu Nyʉ̀ ce e yu ntèe.” 17Jisòs à beesì a laa nè ye enɛ̂, “À yu ŋwɛ̀ rbǒŋtu, Saimʉ̀n, muu Jonà, njobè' à gèe ŋwɛ̀ wɛ̀ ka' riŋ yuu ce wɛ̀ làa na ka', à gèe ba yà Ta ce e yu mbe bùu. 18M ce suŋ wɛ̌ Pità enɛ à yu ryɛɛ. M be bà'ri yà cor mbendù ryɛɛ anà ce àde' ka' rkwe ɛ̀, li gee yuu mo' àgho ka'. 19M be fa wɛ̀ bki embe dǐ' kʉʉ Nyʉ̀ embe bùu. Yuu ce wɛ̀ ka' kur njep ŋgòŋ na, banɛ a be kur yi mbe bùu. Yuu ce wɛ̀ ka' fyɛɛshi njep ŋgòŋ na banɛ a be fyɛ̀ɛshi yi mbe bùu.” 20E m cìisi nè ŋgǎa yɛ'ni yì buu enɛ wowèe a fa suŋ ŋwɛ̀ mò' enɛ e yu Krǎis anà ka'.

21Kɛ' ese à nfè' anà, Jisòs à kɛ' a ce raasi nè ŋgǎa yɛ'ni yì buu enɛ e be kù dù à rla' Jɛ̀rusalɛ̀m, yɛ ŋgɛ' mbà mmbo bleebèe ba běe bgòrgòr efa mʉ̀ ŋgǎa taŋshi taŋshì, ba ŋgǎa ryɛ'ni mncir gòr sê, tɛ a yʉ ye, mnòŋ vi ba btaar e fʉʉ efa rkwe. 22Pità à koo ye, a ye a lɛ'sì nyor, a kɛ' a ce lapni ye a ce làa enɛ̂, “Tatâ, Nyʉ̀ fɛɛsi! Àde' njɛ̀ɛ yuu ca yi ke' koni nè wɛ̀ ka'.” 23E karsì nyor, a laa nè Pità enɛ̂, “Lò efa mɛ̌ geŋ, Satàn! À ce jepsi mɛ̀. Mo mkwà'shì mi yu ba mi ŋwɛ̀, yu mi Nyʉ̀ ka'.” 24E ka' làa nè ye wa' wɛɛ, a laa nè ŋgǎa yɛ'ni yì buu enɛ̂, “Ŋwɛ̀ à ka' ce kòŋ à rvʉ̀ a mɛ̌ mbùu banɛ ŋgàŋ kani yì nyor, byɛ' yi kìntaa vʉ a mɛ̌ mbùu, 25njobè' ŋwɛ̀ ce e ka' ce kòŋ à rboŋshi li ryòŋ banɛ ŋgàŋ be bɛ li. Ŋwɛ̀ ce e ka' tɛ boŋshi li ryòŋ ka', njo' mɛ̀, banɛ ŋgàŋ be koni li. 26Àde' ŋwɛ̀ konì ba njɛ̀ɛ sɛ' kɛ, ce e ka' tʉr buu enjep ŋgòŋ na wɛɛwɛ, lo bɛ li ryòŋ? Yuu ce àde' ŋwɛ̀ fa àtu li ryòŋ a kɛ? 27M ce suŋ wèe buu ca njobè' Muu Ŋwɛ̀ be vʉ̀ nè fòo yì Tâ, a vi bcìndap wèe, là' ŋwɛ̀ wɛɛwɛ à buu ce e m ce gèe. 28M ce suŋ wèe nè mini-ŋwɛ̀ enɛ bèe mo' a yu à mʉ̀ bèe ce a tɛɛte mbena ce rkwe li be jòo wowèe ka', tɛ wowèe a ku cu caar, yɛ Muu Ŋwɛ̀ àmbò e ce vʉ̀ nè yi kʉʉ-ŋwɛ̀.”

Currently Selected:

Ñwaè' Matïìyoè 16: LNT

Highlight

Copy