Ñwaè' Matïìyoè 15

1Mʉ nfè' mò' à ka' tuuse, bèe mo' efa mʉ̀ bèe Farìsi ba ŋgǎa ryɛ'ni mncir a lǒ à rla' Jɛ̀rusalɛ̀m, a vʉ a yɛ Jisòs, a bipshi nè ye enɛ̂, 2“Ŋgǎa yɛ'ni yò buu a fʉʉ enjep ndèe ce visèe bta a m yɛ'ni sèe njokɛ? Wowèe a ke sù'si mmbo à njǐ yɛɛnì ka' ye byee ka'.” 3Jisòs à beesì enɛ̂, “Wee wèe e ke fʉʉ enjep mncir Nyʉ̀ njo' ndèe wêe bta njokɛ? 4Nyʉ̀ a m làa enɛ̂, ‘Yu'ni nè yò ta ba yò mâ.’ A ker laa enɛ̂, ‘Ŋwɛ̀ ce e ka' cɛp yì tâ, kɛ̀ yì ma ɛ̀, banɛ a be yʉ ŋgàŋ.’ 5Wèe ce làa ye weenɛ, ŋwɛ̀ à ka' lor yuu ce yi ba jà' yì ma kɛ̀ yì ta àgho, laa enɛ̂, ‘Mɛ̀ fa nè Nyʉ̀’, 6banɛ ŋgàŋ be kèr jà' yì ta ba yì ma àgho ka'. Banɛ wèe à lòr ndèe wêe bta a siŋsi mncir Nyʉ̀ àgho. 7Wèe ce wèe yu ŋgǎa mbo'ni. Àsayà ŋwɛ̀ ncep ntuu Nyʉ̀ à m làa yuu mini se a kuu wèe à nfè' ce e m ce cep ntuu Nyʉ̀, 8a laa enɛ̂,

‘Bèe ca a ku ce yu'ni nè mɛ̀ ba nè cùu,

yap ntee yi ba ànjìsàp ese mɛ̀.

9Wowèe a ce gèe rloo nè mɛ̀ ba à cicì,

njobè' a ce yɛ'ni bèe mncir ce à lɛ̀ bèe, àmbò a lɛ mncir Nyʉ̀ wa'a.’ ”

10E kɛ' bèe ce a m ba àfo, a laa nè wowèe enɛ̂, “Yu'shi nè bòŋboŋ. 11Yuu ce ŋwɛ̀ e ke ye, a yuu yi ke gèe ŋwɛ̀ e bep à bsii Nyʉ̀ ka'. Yuu ce yi ke gèe ŋwɛ̀ e ba jàpri e ke ba yuu ce yi ke fʉʉ ekù cǔu ŋwɛ̀.” 12Ŋgǎa yɛ'ni yì buu a vʉ a yɛ ye, a laa enɛ̂, “Wà' à rìŋ wɛnɛ bèe Farìsi a ba yu' yuu ce wɛ̀ ba laa nà, ntee yi bep wowèe se a?” 13E beesì a laa enɛ̂, “Yuu wɛɛwɛ ce à byè ba yà Ta embe bùu ka', a be kèe co'. 14Mà'shi nè wowèe. Wowèe a yu mnfèp. Nfèp ka' ce dùŋshi nfèp mò' nduunjì, banɛ wowèe a be gwèŋger njep bè'tè bsìp.” 15Pità à laa nè ye enɛ̂, “Sàr mbùu efa ŋgàa ca nè wèr.” 16Jisòs à laa enɛ̂, “Wee wèe à be riŋ buu foŋ ka' a? 17Mbò wèe rìŋ weenɛ yuu wɛɛwɛ ce ŋwɛ̀ e ke ye yi ke dù njep rbʉ̀, lo fʉʉ a? 18Yuu ce yi ke fʉʉ ekù cùu, yi ke lò ba enjep ntee. A njɛ̀ɛ yuu ce yi ke gèe ŋwɛ̀ e ba jàpri à bsii Nyʉ̀. 19Buu bbebep àmbò à ryʉ ŋwɛ̀, koo ŋgwa ŋwɛ̀ mò' kɛ̀ nduu ŋwɛ̀ mò', bsàkì, byɛ̀ɛ, tɛɛ njìnsa' mnàŋ, laa yuu bebep kuu ŋwɛ̀ mò', yu buu ce bèe a ke kwà'shi à rgèe ba enjep ntee. 20Buu ca a buu ce vi ke gèe ŋwɛ̀, e ba jàpri. À rye yuu ke' su'si mmbo ka', a yuu ce àde' yi gee ŋwɛ̀ e ba jàpri ka'.”

21Jisòs à m lǒ àfo a du à ŋgǒŋ Tayà ba Sidòn. 22Ka' cu, njeŋwɛ̀ mǒ' à ŋgòŋ anà ce à m ku ba njeŋwɛ̀ efa mʉ̀ bèe Kɛnàn à vʉ̂, a waa, a laa enɛ̂, “Tatâ, Muu Dɛvìd, koosimnse nè mɛ̀! Yʉ' nyʉ̀rkà' yi m niŋ njep muu wà, e ce yu' ryaŋ sê.” 23Jisòs à laa yuu ka'. Ŋgǎa yɛ'ni yì buu a ko'shì a yě geŋ, a laa nè ye enɛ̂, “Làa tɛ e dû, njobè' e ce war a sěe mbùu.” 24E beesì enɛ̂, “A m tuu mɛ̀ enɛ m vʉ yɛ ba njèe embe ndʉ̀' Isrɛ̀l ce yi m bʉ.” 25Njeŋwɛ̀ anà à vʉ a gʉ'shi njep yě tìi, a laa enɛ̂. “Tatâ, jà' mɛ̀.” 26E beesì enɛ̂, “Yi bòŋ enɛ a lor byee boo ma' nè ŋgwe ka'.” 27Njeŋwɛ̀ anà à laa enɛ̂, “Yi yu mini wa'a, Tatâ, to ŋgwe yi ke kù ce ye mkʉ̀' baa ce mi gwèŋger embe tɛbùr yàp ta foŋ.” 28E ka' làa wa'a, Jisòs à beesì a laa nè ye enɛ̂, “Haba! Njeŋwɛ̀ câ, lo rbyemì li tap sê. Tɛ yi ba nè wɛ̀ àmbò à ce kòŋ na.” Muu yì à ku ke'se à nfè' anà.

29Jisòs à lǒ àfo, a caa àwǎa rǒ à ŋgòŋ Galèlê, a ko' mbe rtùu, a cu à nshè. 30Ku' bèe a vʉ̂, a yɛ ye mbo. Wowèe a m vʉ̀ nè bèe ce a m ba mntɛ̀ŋ, ba bèe ce a m kepŋger, ba mnfèp, ba blʉr, ker ba bèe magòr ce a m ce yaŋ, a lɛ njep yě tìi, e gee wowèe a ke'sè. 31Bèe a ka' yɛ àmbò blʉr a ce làa, bèe ce a m kepŋger a ce jɛ̀r, mntɛ̀ŋ a ce jɛ̀r bòŋboŋ, mnfèp a ce yɛ buu, a bɛɛŋgèr sê, a ku'si Nyʉ̀ bèe Isrɛ̀l.

32Jisòs à kɛ' ŋgǎa yɛ'ni yì buu, a laa nè wowèe enɛ̂, “M ce koosimnse nè bèe ca sê. Wèr wowèe à cu à mnǒŋ btaar, wowèe a ke' koni yuu ye ka'. M ce kòŋ à rlàa tɛ wowèe a du nè njè ka' fà dì' wowèe a du gwè njè à nduunjì ka'.” 33Ŋgǎa yɛ'ni yì buu a laa nè ye enɛ̂, “Àde' wèr konì brɛ̌d ba efɛ ka' nyaŋ ku' bèe ca àgho, ce àfa ku ba rìŋ na?” 34Jisòs à laa nè wowèe enɛ̂, “Wèe tʉr brɛ̌d sɛ'?” Wowèe a beesì enɛ̂, “Wèr tʉr brɛ̌d sàambâ, ba mʉ nca mo'.” 35E laa nè bèe cà enɛ wowèe a cute à nshè. 36A ka' cute, e lor brɛ̌d sàambâ ba nca cà, a yoŋshi Nyʉ̀, a bɛ'shi a fa nè ŋgǎa yɛ'ni yì buu, wowèe a gapshì nè bèe anà. 37Bèe wɛɛwɛ a ye, a yu'. Ŋgǎa yɛ'ni yì buu a baashì bbɛbɛ' ce vi m bɛti, vi ruu à mŋkàa sàambâ. 38Mmbaŋrù wɛɛwɛ ce a m ye, a m ba ncʉ̀kì kyèe, ka' lor bbyèŋge ba bghàrbèe. 39Jisòs à laasì bèe, a niŋ mbe keŋ a du à ŋgǒŋ Magadàn.

Currently Selected:

Ñwaè' Matïìyoè 15: LNT

Highlight

Copy