Ñwaè' Luêk 20

1À m ba nyʉ̀ mò' Jisòs à ka' ce yɛ'ni bèe mbe Ndàp Nyʉ̀, ce fè'shi Nsuŋ Mbòŋmboŋ, běe bgòrgòr efa mʉ̀ ŋgǎa taŋshi taŋshì, ba ŋgǎa ryɛ'ni mncir a bleebèe wèe a vʉ̂, 2a bipshi nè ye enɛ̂, “Ŋger ce à ce gèe buu ca àgho yi lò efɛ? Ŋwɛ̀ ce e fa wɛ̀ ŋger ca à fa nda?” 3Jisòs à beesì a laa enɛ̂, “M be bipshi yuu mo' nè wèe foŋ. 4Ŋger ce Jǒn à m tʉr à rbàptir bèe nà yi m lò ba ese Nyʉ̀ kɛ̀ ese bèe? Suŋ à nè mɛ̀.” 5Wowèe a du mcʉ̀, a seesi enɛ̂, “Sèe ka' laa seenɛ yi ŋger anà yi m lò ese Nyʉ̀, banɛ e be bipshi nè sèe enɛ̂, ‘Wèe à m ka' ba byemi yuu ce e m làa ka' njokɛ?’ 6Sèe à ka' laa seenɛ ŋger anà yi m lò ese ŋwɛ̀, banɛ bèe wɛɛwɛ a be tʉʉshi sèe nè blùr, njobè' wowèe a byemi enɛ Jǒn à m ba ŋwɛ̀ ncep ntuu Nyʉ.” 7Wowèe a kʉtì a beesi enɛ̂, “Wèr rìŋ ka'.” 8Jisòs à laa nè wowèe enɛ̂, “Banɛ mɛ mɛ̀ foŋ be suŋ wèe ŋwɛ̀ ce e fa mɛ̀ ŋger à rgèe buu ca ka'.”

9E m mà' ŋgàa nè bèe enɛ̂, “Ŋwɛ̀ mò' à m fà' yi nsuu, a bye njɛ̀ɛ msini ce a ke gèe mrù' àgho mbo, a lɛ nè bèe mo' enɛ a di' ce fa' nsuu anà ce fa ye mʉ yuu. E ka' lɛ̀ nè wowèe, a du à mbè, a du a cu tàtà sê. 10Nfè' tee msini à ka' ghɛɛ, e tuu ŋwɛ̀ rfà' enɛ e du yɛ bèe anà, koo msini mi. Bèe anà a koo ŋwɛ̀ anà, a lîp, a kʉsi ye njìnjì, e du mbòmmbo. 11E ker tuu ŋwɛ̀ rfà' mò', wowèe a ker lip ye foŋ, a coosi ye, a koosi ye rìtu, e du mbòmmbo. 12E ka' kèr tuu mò', wowèe a bɛɛsì ye, a fʉr embe mʉ̀ nsuu a ma'. 13Ŋwɛ̀ nsuu à laa sè'ni enɛ̂, ‘M be gèe mɛkɛ? M be tuu muu wà ce mɛ̀ kòŋ se na. Seemò' wowèe a be yu'ni nè ye.’ 14Wowèe a ka' yɛ ye, a laa a wǎp mʉ enɛ̂, ‘A ŋwɛ̀ ce e be ye bti' na. Sèe koo yʉ, tɛ vi bti' bo ba visèe.’ 15Wowèe a koo ye a fʉr embe mʉ̀ nsuu, a yʉ. Banɛ yuu ce àde' ŋwɛ̀ nsuu gee nè wowèe yu ba kɛ? 16E be vʉ̀ yʉshi wowèe, lɛ̀ nsuu anà nè běe jɛɛ.” Bèe a ka' yu' ca, a laa enɛ̂, “Yuu mo' yi fa kè koni wa' ka'.” 17Jisòs à fyɛ' wowèe a laa enɛ̂,

“Banɛ yuu ce a saŋ mbe Ŋwǎ' Nyʉ̀ enɛ̂,

‘Lùr ce ŋgǎa mboo mndap a m mà', à kʉti ba lùr rbuu-ndap’

nà yi yu ba enɛ kɛ? 18Ŋwɛ̀ ce e ka' gwe mbendù lùr anà banɛ ŋgàŋ be ceeŋger à btete à btete. Ŋwɛ̀ ce lùr anà à ka' gwe mbe yě ndù, banɛ e be bʉ'shi ye.”

19Ŋgǎa ryɛ'ni mncir, ba běe bgòrgòr efa mʉ̀ ŋgǎa taŋshi taŋshì, a ce ròo nduunjì à rkoo Jisòs à nfè' anà njobè' wowèe a m rìŋ enɛ e mà' ŋgàa anà ba nè wowèe. Geewa'a, wowèe a m wɛp bèe. 20Wowèe a kɛ' a ce ker ye, a tuu ŋgǎa ŋker enɛ a du bo'shi enɛ a yu ŋgǎa làayɛ. Wowèe a ka' dù a ce kè' enɛ Jisòs laa mʉ yuu mo' bebep, tɛ a bo koo ye fa mbe mmbo govanò. 21Wowèe a m làa nè Jisòs enɛ̂, “Ŋwɛ̀ ryɛ'nì, wèr rìŋ wernɛ à ce làa, ker ce yɛ'ni ba yuu ce yi yu yɛɛnì. Wèr rìŋ wernɛ wɛ̌ ke lòr ŋwɛ̀ mò' jɛɛ ka', a ce yɛ'ni bèe mnduunjì Nyʉ̀ nè mini-ŋwɛ̀. 22Suŋ ka wèr. Ncir yi byemi enɛ sèe ma' mbǎa bàrà' nè ŋkwe Rum kɛ̀ sèe ma' ka' à?” 23Jisòs à yɛ taa ce a m lè' nè ye, a laa nè wowèe enɛ̂, 24“Nàa nè mbʉ̀ mbàa ce a ke mà' mbǎa bàrà' àgho.” Wowèe a vʉ nè mbʉ̀ mbàa a fa nè ye, e laa enɛ̂, “Tu ŋwɛ̀ embo a yǐ nda, rlii ce a saŋ mbo à ba lǐ nda?” Wowèe a beesì enɛ̂, “Tu embo a yi ŋkwe Rûm, rlii embo à ba li foŋ.” 25E laa nè wowèe enɛ̂, “Banɛ wèe fa buu ŋkʉʉ nè ŋkʉʉ, fa vi Nyʉ̀ nè Nyʉ̀.” 26E m làa yuu mo' à mʉ̀ bèe ce àde' wowèe a m ba koo ye àtu mo ka'. Wowèe a m bɛ̀ɛŋger à njɛ̀ɛ njì ce e m bèesi yuu ce wowèe a m bipshi, a baate yap cùu.

27Bèe Sadùsi mo' ce a m kani enɛ àde' ŋwɛ̀ kwe ker fʉʉ efa rkwe ka', a vʉ a yɛ Jisòs tɛ a bo bipshi yuu nè ye. Wowèe a laa nè ye enɛ̂, 28“Ŋwɛ̀ ryɛ'nì, Musìs à m saŋ ncir nè sèe enɛ ŋwɛ̀ à ka' lor ŋgwa, a ye a bi boo ka', ŋgàŋ kwe, banɛ nfʉr yì be laasi ye, tɛ a ye a bi boo nè nfʉr yì ce e kwe anà. 29Bfʉr mo' a m ba bèe nsàambâ. Ŋwɛ̌ nlee à lòr ŋgwa a bi boo a ye ka', a kwe. 30Ŋwɛ̀ embe yě njì à laasì ye, a kwe foŋ. 31Ŋwɛ̀ embenjì ŋwɛ̀ embe yě njì à ker laasi ye, a kwe. Yi m ku koni nè wowèe wɛɛwɛ wa'a, mò' efa wowèe à bi boo a njeŋwɛ̀ anà ka'. 32À ka' ba àlʉ̀simbùu, njeŋwɛ̀ ca à kwe foŋ. 33Banɛ be kè ba à nfè' ce bèe a fʉʉ efa rkwe, tɛ njeŋwɛ̀ ca ba ŋgwa nda, àmbò yi yu enɛ bfʉr bèe nsàamba ca wɛɛwɛ a m ba bduu vi nà?” 34Jisòs à beesì enɛ̂, “Mmbaŋrù enjep ŋgòŋ na a ce lòr bbyèŋge, bbyèŋge a ce dùse bgùu. 35À ka' ba yi àmbò bèe ce a ghɛɛte à bèe ce a be kè fʉʉ efa rkwe, cu à ŋgòŋ ce yi bii ka' ba nà, a be kèr lòr bbyèŋge kɛ̀ guusi boo ka', 36njobè' àde' wowèe a ker kweŋger ka'. Wowèe a be kè ba àmbò bcìndap Nyʉ̀ wa'a. Wowèe a be kè ba boo Nyʉ̀ njobè' wowèe a fʉʉ efa rkwe. 37À ka' ba àmbò rfʉʉ ce bèe ce a kweŋger a be kè fʉʉ efa rkwe, Musìs ye ye à m dùŋshi enɛ ca yi yu wa'a. Mbe dì' ce e m saŋ àmbò ce ce mor yi m ce kɛti mbo nà, e ce too Tata Nyʉ̀ mbo nà enɛ Nyʉ̀ Abràhâm, ba Nyʉ̀ Aisìk ker ba Nyʉ̀ Jakòp. 38E yu Nyʉ̀ bgʉ̌ʉ bèe ka', e yu ba Nyʉ̀ bèe ce a cu btèe. E rìŋ yi enɛ bèe wɛɛwɛ a cu btèe.”

39Bèe mo' efa mʉ̀ ŋgǎa ryɛ'ni mncir a laa enɛ̂, “Ŋwɛ̀ ryɛ'nì, wɛ̀ làa bòŋboŋ.” 40Wowèe a m ker tʉr cùu à rbipshi yuu mo' nè ye ka'.

41Jisòs à laa nè wowèe enɛ̂, “Àde' bèe a laa enɛ Krǎis anà yu muu Dɛvìd à njɛ̌ɛ kɛ, 42ce Dɛvìd ce làa yi mbe Ŋwà' Byɛɛ enɛ̂,

‘Tata Nyʉ̀ à m làa nè Tata yà enɛ̂,

“Cu à la rkoo mà',

43caar tɛ m gee tɛ à tɛr mo mkùu mbendù bèe ce a bàa wɛ̀.”’

44Dɛvìd ce too ye enɛ Tatâ, banɛ àde' e ker ba muu yì à njɛ̌ɛ kɛ?”

45Jisòs à m làa ca nè ŋgǎa yɛ'ni yì buu, bèe wɛɛwɛ a ce yu'. 46E m làa enɛ̂, “Lòr nè nfè' nè ŋgèe ŋgǎa ryɛ'ni mncir. Wowèe a ke kòŋ à ryar mŋgàbʉlà ce kar àgho, koŋ enɛ bèe a ca'ni wowèe à mntaa. Wowèe a niŋ à mndap mloo, ce ba mnta' běe bgòrgòr, a bà' à mŋkà', ce ba mnta' bbòŋboŋ. 47Wowèe a ke bo' byepkʉʉ, ye yàp buu wɛɛwɛ, ce gèe mloo msàsap à rdùŋshi nè bèe enɛ wowèe a rìŋ à rloo sê. Yàp ŋgɛ' be kè ba gòr sê.”

Currently Selected:

Ñwaè' Luêk 20: LNT

Highlight

Copy