Ñwaè' Luêk 19

1Jisòs à m niŋ à rla' Jɛ̀rikù a to'ni rla' anà a ce càa. 2Ŋwɛ̀ mò' à m ba à rla' anà a ce too enɛ Sàkiyòs. E m ba tu nè ŋgǎa ŋkùu mbǎa bàrà', a tʉr mbàa foŋ sê. 3E m ce ghèter à ryɛ njɛ̀ɛ ŋwɛ̀ ce Jisòs yu, a yɛ ye ka' njobè' e m ba ŋwɛ̌ nlʉ̀'shi, kʉr bèe a tɛ'shì ye. 4E caŋ a du entombì, a ko' mbe ce Sìkamò enɛ Jisòs e ce càa nà, e bo yɛ. 5Jisòs à ka' vʉ̀ bà' mbe dì' ce ce anà yi m ba, a ke' mbekì, a laa nè ye enɛ̂, “Sàkiyòs, sùu embe ce anà cɛrcɛr, njobè' m be kù nòŋ mbe wɛ̌ ndàp ntìni na.” 6Sàkiyòs à suu embe ce anà cɛrcɛr, a koni ye nè rlu'shì-ŋwɛ̀. 7Bèe wɛɛwɛ a ka' yɛ yuu ce yi m koni na, a kɛ' a ce de'ŋger enɛ, e dù à rnòŋ mbe ndàp ŋwɛ̀ ŋgèe buu bbebep. 8Sàkiyòs à natì mbekì a laa nè Tata enɛ̂, “Tatâ, yɛ̂, m be to'ni yà buu tìtìyɛɛnì, fa mbèp mò' nè ŋgǎa fùp. Ka' ba enɛ mɛ̀ m koo yuu ŋwɛ̀ mò' à ŋger, banɛ m be là' yi yuu ce mɛ̀ m koo anà bkàŋ kyèe.” 9Jisòs à laa nè ye enɛ̂, “Ndap ca à lùŋ ntìni njobè' ŋwɛ̀ ca ye ye yu muu Abràham foŋ. 10Yi yu enɛ Muu Ŋwɛ̀ à m vʉ̀ à rròo bèe ce a m bʉ, tɛ e bo gèe tɛ wowèe a lûŋ.”

11Wowèe a ka' ce yu'shi yuu ce Jisòs à m làa na, Jisòs à ker ma' ŋgàa nè wowèe njobè' e m bà' àtʉtʉ rla' Jɛ̀rusalɛ̀m, wowèe a ce kwà'shi enɛ nfè' be tuuse ka' tɛ kʉʉ Nyʉ̀ yi kɛ'. 12E m làa enɛ̂, “Muu ŋkʉʉ à m dù à to' mo' ànjìsàp sê, enɛ a bo dù ghar ye à ŋkʉʉ tɛ e ka' kʉti. 13E m kɛ' yi ŋgǎa mfà' bèe nrʉ̂ʉ, a fa wowèe ncʉ̀kì mò'sir, mò'sir, a laa enɛ̂, ‘Gèe nè ntaa nè mbàa ca caar tɛ m ke kʉti.’ 14Yì bèe à m bàa ye sê, a tuu bèe a yě mbùu enɛ a du laa nè ŋgǎa ghar kʉʉ enɛ̂, ‘Wèr ce kòŋ enɛ ŋwɛ̀ ca ba yèr ŋkʉʉ ka'.’ 15A m ku ghar ye à ŋkʉʉ. E ka' kʉti a kɛ' ŋgǎa mfà' ce e m fa mbàa nè wowèe nà, tɛ e bo yɛ enɛ wowèe a m di' gee ntaa nè mbàa anà a ye sɛ' à mbàa sɛ' lɛ. 16Ŋwɛ̀ entombì à vʉ̂, a laa enɛ̂, ‘Masà, mɛ̀ gèe ntaa nè ncʉ̀kì ce wɛ̀ m fa nè mɛ̀ nà, a ye sɛ' à ncʉ̀kì rʉ̂ʉ.’ 17E laa nè ye enɛ̂, ‘Yà ŋwɛ̀ rfà' ce mbòŋmboŋ, wɛ̀ gèe yɛɛnì. À ka' ba njobè' wɛ̀ fyɛ' à yuu ce yi yu mʉcàr bòŋboŋ sê, banɛ mɛ̀ fa wɛ̀ ŋger à rsa' mla' rʉ̂ʉ.’ 18Ŋwɛ̀ embenjì mo à vʉ̂, a laa enɛ̂, ‘Masà, mɛ̀ gèe ntaa nè ncʉ̀kì ce wɛ̀ m fa nè mɛ̀ nà, a ye sɛ' à ncʉ̀kì tâ.’ 19E laa nè ye foŋ enɛ̂, ‘Mɛ̀ fa wɛ̀ ŋger à rsa' mla' tâ.’ 20Ŋwɛ̀ rfà' mò' à ka' vʉ̀, a laa yi enɛ̂, ‘Masà, a yo mbàa cà na. Mɛ̀ m ku kur njep kǎa cɛ̀', a kupshi a noŋsî. 21Mɛ̀ m ce wɛp wɛ̀ sê, njobè' à yu ŋwɛ̌ ntatap. Wɛ̌ ke kep yuu ce wɛ̀ m byè ka', kap yuu ce wɛ̀ m ŋwaŋ ka'.’ 22Yì masà à laa nè ye enɛ̂, ‘À yu ŋwɛ̀ rfà' ce mbembep. M be lòr nlàa ce yi fʉʉ ekù wɛ̌ cùu na, sa' wɛ̀ àgho. Wɛ̀ m yi wɛnɛ a mɛ̀ ŋwɛ̌ ntatap ce mɛ ke yɛ yuu ce ŋwɛ̌ jɛɛ à lɛ̀ ku lôr, mɛ̌ yɛ yuu ce ŋwɛ̌ jɛɛ à byè ku kep. 23Wɛ̀ m ka' bà rìŋ wa'a, a ke' dù nè ya mbàa dù lɛ̀ njep bâŋ, mɛ̌ vʉ̀ tɛ m bo koo ya mbàa nè sɛ'-ŋwɛ̀ ka' njokɛ?’ 24E ka' làa wa'a, a laa nè bèe ce a m tɛɛ a yě geŋ enɛ̂, ‘Koo nè ncʉ̀kì anà ese ye, fa nè ŋwɛ̀ ce e tʉr ncʉ̀kì rʉʉ nà.’ 25Wowèe a laa nè ye enɛ̂, ‘Masà, e tʉr ncʉ̀kì rʉʉ wɛɛ.’ 26‘M ce suŋ wèe mɛnɛ ŋwɛ̀ ce e ka' tʉr yuu, banɛ a be kèr fa ye buu mò'. Ŋwɛ̀ ce e ka' tɛ tʉr yuu ka', banɛ a be koo ka' mʉ yì ce e tʉr nà ese ye. 27À ka' ba yi àmbò bèe ce a bàa mɛ̀ nà, ce a m ce kòŋ enɛ m ba yàp ŋkʉʉ ka' nà, vʉ̀ nè nè wowèe mbena, shɛshi a mɛ̌ bsii.’ ”

28Jisòs à ka' làa ca mìsi, a nati a ce dù à rla' Jɛ̀rusalɛ̀m entombì nè wowèe. 29E ka' dù bà' àtʉtʉ rla' Bɛtɛfɛ̀ ba rla' Bɛtanì àgee rtùu Olèf, a tuu ŋgǎa yɛ'ni yì buu bèe à baa, a laa nè wowèe enɛ̂, 30“Dù nè nje rla' rkɛ' enje wěe cùu na. Wèe be bà' tɛ wèe yɛ àmbò a cʉʉ muu jàaki' ce ŋwɛ̀ à m be cu mbo ka'. Wee yɛ, wèe fyɛɛ vʉ àgho mbena. 31Ŋwɛ̀ à ka' bipshi nè wèe enɛ̂, ‘Wèe ce fyɛ̀ɛ jàaki' anà njokɛ?’ wèe suŋ ye enɛ̂, ‘Tata ce tà' gèe yuu àgho ka' kʉsi.” ’ 32Bèe ce e m tuu nà a du a yɛ buu à ku ba àmbò e m suŋ wowèe nà. 33Wowèe a ka' ce fyɛ̀ɛ muu jàaki', ŋgǎa jàaki' a bipshì nè wowèe enɛ̂, “Wèe ce fyɛ̀ɛ muu jàaki' anà njokɛ?” 34Wowèe a beesì enɛ̂, “Tata ce kòŋ à rgèe yuu àgho.” 35Wowèe a du àgho a fa nè Jisòs, a co'ni bcɛ̀' a laashi mbendù mo, a ko'si Jisòs mbo. 36E ka' cu mbo ce dù, bèe à co'nì bcɛ̀' a laashi njep nduunjì. 37E ka' bà' àtʉtʉ rla' Jɛ̀rusalɛ̀m fàdì' ce nduunjì yi sùu embe rtùu Olèf nà, ku' bèe ce a m ba ŋgǎa yɛ'ni yì buu a kɛ' a ce yu' rbòŋ, a ce yɛɛ mbekì sê, a ce nɛ̀si Nyʉ̀ njobè' ku' buu bghagha' ce wowèe a m yɛ. 38Wowèe a m ce yòp enɛ̂, “Nyʉ̀ ghoni ŋkʉʉ ce e ce vʉ̀ à rlii Tatâ, tɛ cumʉnyaŋ ba mbe bùu. Sèe ku'si Nyʉ̀ embe bùu.” 39Bèe Farìsi mo' ce a m ba à mʉ̀ ku' bèe ca, a laa nè Jisòs enɛ̂, “Ŋwɛ̀ ryɛ'nì, lapni ŋgǎa yɛ'ni yò buu ca.” 40Jisòs a beesì enɛ̂, “M ce suŋ wèe mɛnɛ bèe ca a ka' cumʉnyaŋ, blùr ca vi ku yôp.”

41E ka' vʉ̀ bà' àtʉtʉ, yɛ rla' Jɛ̀rusalɛ̀m, a war, 42a laa enɛ̂, “Wee wèe foŋ à ba riŋ yuu ce àde' yi ba gee cumʉnyaŋ ba àgho ntìni na, geewa'a, a sʉ̀ti yi ese wèe. 43Mnòŋ mo' vi be kè ba ce bèe ce a bàa wèe a be kè boo ŋka' sìr wèe àgho kaari tarte, gàŋ wèe fa mbetar, 44koo wèe, ba boo wee ce wèe wowèe yu mbe ŋka', lìpshi à nshè. Wowèe a be mà'shi tɛ lùr mò' cu mbendù mò' ka', njobè' wèe à m rìŋ nfè' ce Nyʉ̀ à m vʉ̀ à rfʉr wèe efa ŋgɛ' nà ka'.”

45E m niŋ mbe Ndàp Nyʉ̀, a kɛ' a ce jùu bèe ce a m ce fyèni buu mbo, 46a laa nè wowèe enɛ̂, “A saŋ mbe Ŋwǎ' Nyʉ̀ enɛ̂, ‘Yà ndap be ba ndap rloo. Ka' yi yu wa'a, wèe à gee yà ndap à kʉtì ba mbʉ̀' byɛ̀ɛ.” ’ 47E m ce yɛ'ni mbe Ndàp Nyʉ̀ à mnòŋ wɛɛwɛ. Běe bgòrgòr efa mʉ̀ ŋgǎa taŋshi taŋshì ba ŋgǎa ryɛ'ni mncir ker ba bèe ce a m ba boo mlii, a m ce ghèter à ryʉ ye. 48Geewa'a, wowèe a m koni nduunjì ka' njobè' bèe wɛɛwɛ a m ku ce yu' ba yuu ce e m ce làa.

Currently Selected:

Ñwaè' Luêk 19: LNT

Highlight

Copy