Ñwaè' Mfaè' Ñgaâa Ntuu Jisoès 23

1Pol à fyɛ' ŋgǎa kansùr enɛ ntuŋ-ŋ-ŋ, a laa enɛ̂, “Yà bèe, mɛ̀ cu la rcu vʉ ba' ntìni na nè ntee rara-ŋwɛ̀ à bsii Nyʉ̀.” 2Tu ŋgǎa taŋshi taŋshì ce a n ce too enɛ Ànàniyàs à laa nè bèe ce a m tɛɛ àgee Pol enɛ wowèe a lip ye à cùu. 3Pol à laa nè ye enɛ̂, “Nyʉ̀ be lìp wɛ̀, wɛ̀ ce à yu àmbò ŋgʉ̀' ndap mbʉʉ. Wɛ̀ lòr mncir a ce sa' mɛ̀ àgho, a ker ce bʉ' mncir anà njobè' wɛ̀ làa enɛ a lip mɛ̀.” 4Bèe ce a m tɛɛ àgee Pol, a laa nè ye enɛ̂, “À ce cɛp tu ŋgǎa taŋshi taŋshì yǐ Nyʉ̀ a?” 5Pol à beesì enɛ̂, “Bfʉr wâ, mɛ̀ ba riŋ enɛ a tu ŋgǎa taŋshi taŋshì ka'. A saŋ mbe Ŋwǎ' Nyʉ̀ enɛ̂, ‘Fa làa yuu bebep kùu ŋwɛ̀ ce e ce sa' yò bèe ka'.’ ”

6Pol à m rìŋ enɛ bèe mo' embe kansùr a yu Sadùsî, bèe mo' a ba Farìsî, a laa nè ŋgǎa kansùr enɛ̂, “Yà bèe, m yu ŋwɛ̀ Farìsî, a ba muu ŋwɛ̀ Farìsî. M tɛɛ mbe kansùr na à mnsa' njo' m ce kè' enɛ bèe ce a kweŋger a be kè fʉʉ efa rkwe.” 7E ka' làa wa'a, bèe Farìsi ba bèe Sadùsï a kɛ' a ce lapni, a fʉʉ nto' baa. 8Bèe Sadùsi a kani enɛ nfʉʉ-efa-rkwe yu àgho ka', a ker kani enɛ bcìndap Nyʉ̀ ker ba byʉ' vi yu àgho ka'. Bèe Farìsi a byemì enɛ buu ca wɛɛwɛ yu àgho. 9Bèe a misì a ghaa gòr sê, bèe mo' efa ŋgǎa ryɛ'ni mncir ce a m ba yap bèe Farìsî, a natì mbekì a laa tatap sê, enɛ̂, Wèr a yɛ fàa mò' nè ŋwɛ̀ ca ka'! Sèe rìŋ nè kɛ àmbò à làa ba yʉ' mo' kɛ̀ ncìndap Nyʉ̀ nè ye. 10Bèe a lapnì gòr sê, tu yǐ gòr yi wɛp enɛ a be koo Pol sàsi. E laa nè bsoogɛ̀ enɛ wowèe a du koo ye à ŋger niŋ àgho mbe barakì.

11Tʉ̀' à ka' sii, Tata Jisòs à vʉ a tɛɛ àgee Pôl, a laa nè ye enɛ̂, “Tɛɛ tatap, fa wɛp ka'! Wɛ̀ suŋ bèe àmbò mɛ̀ à rla' Jɛ̀rusalɛ̀m, à be dù suŋ bèe àmbò mɛ̀ foŋ à rla' Rûm.”

12Tʉ̀' à ka' raa, Jus mo' a cutè a ye lè' enɛ wowèe a ka' tɛ yʉ Pol ka' wowèe a ye yuu ka', ker no yuu ka'. 13Bèe ce a m ye lè' ca a m càa bèe mkyèe. 14Wowèe a du a yɛ běe bgòrgòr efa mʉ̀ ŋgǎa taŋshi taŋshì ba bleebèe, a laa nè wowèe enɛ̂, “Wèr à ye lè' tatap sê, enɛ wèr à ka' tɛ yʉ Pol ka' wèr joo yuu kù cùu ka'. 15Banɛ wèe kansùr wèe à ba cep ntuu nè tu yǐ gòr enɛ e vʉ nè Pol fa nè wèe, àmbò wèe ce lɛ kòŋ à rfyɛ' njep mʉ̀ vi mnsa' bòŋboŋ wa'a. Wèr à tami nyor à ryʉ ye tɛ e ka' vʉ̀ bà'.”

16Muu njar Pol à yu' mncʉ̀ ce wowèe a m cʉ̀ na, a du a niŋ mbe barakì a suŋ Pôl. 17Pol à kɛ' tu mo', a laa nè ye enɛ̂, “Lòr muu nsùnsù ca du fa nè tu yǐ gòr, e ròo suŋ ye yuu mo'.” 18E lor ye a du àgho a fa nè tu yǐ gòr, a laa nè ye enɛ̂, “Pol ce e yu ŋwɛ̀ shaŋ nà à kɛ' mɛ̀, a laa nè mɛ̀ enɛ m vʉ nè muu nsùnsù ca fa nè wɛ̀ njobè' e ròo suŋ wɛ̀ yuu mo'.” 19Tu yǐ gòr yi koo ye à rkoo, a ye a lɛ'sì nyor, e bipshì nè ye enɛ̂, “Yuu ce wɛ̌ ròo suŋ mɛ̀ yu kɛ?” 20E laa enɛ̂, “Jus a cu a fa ntaŋ enɛ a be làa nè wɛ̀ enɛ à vʉ nè Pol mbe kansùr àyàŋsè àmbò wowèe a ce lɛ kòŋ à rniŋ njep mʉ̀ mnsa' ca bòŋboŋ wa'a. 21Fa byemi ka' njobè' bèe ce a càa bèe mkyèe a be tɛ' ye à nduunjì. Wowèe a ye lè' enɛ a ka' tɛ yʉ Pol ka', a ye yuu ka', ker no yuu ka'. Wowèe a tami nyor sè'ni a ce kè' enɛ à byemi gee yuu ce wowèe a be làa.” 22Tu yǐ gòr yi laa nè ye enɛ e dû. E dù e fa suŋ ŋwɛ̀ mò' yuu ce e suŋ ye nà ka'.

23E m kɛ' btu mo' a baa ce a m ce fà' njep yě tìi, a laa nè wowèe enɛ̂, “Lòr nè bsoogɛ̀ mjěe mmbaa, ba ŋgǎa mnyàabàrà' msàambâ, ba ŋgǎa mkòŋ mjěe mmbaa tɛ wèe wowèe lo nètʉ' na à nyʉ̀ bʉ̀'ʉ̂, dù à rla' Sisàriyà. 24Fyɛ' nè mnyàabàrà' mo' tɛ Pol cu mbo tɛ wèe lor ye dù àgho bòŋboŋ dù fa nè Fɛlìs ce e yu govanò.” 25Tu yǐ gòr yi saŋ ŋwà' foŋ enɛ̂, 26“Ŋwà' ca à saŋ mɛ̌ Klǎdìyòs Lesà nè wɛ̌ màsà Fɛlìs ce à yu govanò. Mɛ̀ cà'ni wɛ̀. 27Jus a m koo ŋwɛ̀ ca a sɛni yʉ. Mɛ̀ ka' yu' mɛnɛ e yu ŋwɛ̀ enjeptii ŋkʉʉ à to' Rûm, mɛ̀ lor wa bsoogɛ̀ a du àgho a fap ye ese wowèe. 28Mɛ̀ koŋ à rrìŋ yuu ce a m làa enɛ e gèe, a lor ye a du àgho mbe yàp kansùr. 29Mɛ̀ ka' dù nè ye mbo, a yɛ mɛnɛ e m gèe yuu mo' ce àde' a m ba yʉ ye kɛ̀ fa ye mbe shaŋ ka'. Yuu ce a m ce làa àmbò ye à m ba ba buu ce a m ce bipshi nè ye kuu yap ncir. 30Ŋwɛ̀ à suŋ mɛ̀ enɛ Jus a cu mncʉ̀ enɛ a bo tɛ' ye, koo yʉ, mɛ̀ laa mɛnɛ a lor ye du àgho cɛrcɛr fa nè wɛ̀. Mɛ̀ ker laa foŋ nè bèe ce a m ce kòŋ à rsa' mnsa' a Pol nà enɛ wowèe a vʉ njep wɛ̌ tìi, suŋ yuu ce e gèe.”

31Bsoogɛ̀ a m ku gee àmbò a m làa nè wowèe, a lor Pol nètʉ', a du àgho a ba' à rla' Àntipàtidà. 32Tʉ̀' à ka' raa, wowèe a kʉtì yap mbe barakì, ŋgǎa mnyàabàrà' a du a Pol wèe. 33Wowèe a ka' dù bà' à rla' Sisàriyà, fa ŋwà' nè govanò wɛɛ, a fa Pol nè ye foŋ. 34Govanò à ka' bè' ŋwà' anà, a bipshi nè Pol enɛ a ye ŋwɛ̌ à ŋgòŋ efɛ lɛ? E ka' yu' enɛ e yu ŋwɛ̌ à ŋgǒŋ Sìlesìyà, 35a laa enɛ̂, “M be yu'shi wo mnsa' à nfè' ce bèe ce wèe wowèe à m ce sa' mnsa' mbe kansùr nà a vʉ̀ foŋ.” E m làa enɛ a lor Pol du àgho mbe nto' Hɛròd ce ke'nî.

Currently Selected:

Ñwaè' Mfaè' Ñgaâa Ntuu Jisoès 23: LNT

Highlight

Copy