Ñwaè' Mfaè' Ñgaâa Ntuu Jisoès 22

1“Yà bèe, bfʉr wâ, ba yà ta wèe, yu' nè yuu ce e m be làa.” 2Wowèe a ka' yu' àmbò e làa nè wowèe ba à li Hibrù, wowèe a misì a cu nyòŋ. Pol à laa enɛ̂, 3“M yu ŋwɛ̀ Jus ce a m bi ba à rla' Tasòs à ŋgǒŋ Sìlesìyà. Geewa'a, mɛ̀ m kù' à rlǎ' àfa na. Mɛ̀ m cu njeptii Gàmalìyàl, e yɛ'nì mɛ̀ mncir visèe btarkʉ bòŋboŋ sê, ya ntee yi ce lùu mɛ̀ à rdù àmbùu Nyʉ̀ àmbò ye foŋ yi ce lùu ntìni na.” 4Mɛ̀ m fa ŋgɛ' nè bèe enjep nduunjì Jisòs ca, bèe mo' efa wowèe a kweŋgèr. Mɛ̀ m koo mmbaŋrù ba bbyèŋge a fa mbe shaŋ. 5Àde' tu nè ŋgǎa taŋshi taŋshì, ker ba ŋgǎa kansùr wɛɛwɛ a ku suŋ wèe enɛ m ce nya' ba mnde' ka'. Wowèe a rìŋ enɛ mɛ̀ m koo mŋwà' ce wowèe a m saŋ nè bfʉr wap ce à rla' Dàmaskòs a du àfo tɛ m bo dù koo bèe enjep nduunjì Krâis, kur vʉ̀ àgho à rla' Jɛ̀rusalɛ̀m tɛ a fa wowèe ŋgɛ'.

6“Mɛ̀ ka' dù bà' àtʉtʉ àmbò à nfè' ce nyʉ̀ e ke kùu ŋgòŋ nà, rraa li ku lo a raa embe bùu enɛ ŋwǎŋ mbe mɛ̌ ndù. 7Mɛ̀ gwe à nshè, a yu' àmbò njèndoŋ ce làa nè mɛ̀ enɛ̂, ‘Sôl, Sôl, À ce fa ŋgɛ' nè mɛ̀ njokɛ?’ 8Mɛ̀ beesì enɛ̂, ‘Tatâ, a wɛ̀ nda?’ E laa nè mɛ̀ enɛ̂, ‘A mɛ̀ Jisǒs à rla' Nasarɛ̀t ce a ce jar àgho nà.’ 9Bèe ce wèr wowèe à m ba a m yɛ rraa anà a ke' yu' njèndoŋ ŋwɛ̀ ce e m ce làa nè mɛ̀ na ka'. 10Mɛ̀ laa mɛnɛ̂, ‘M be gèe mɛ kɛ Tatâ?’ Tata à beesì enɛ̂, ‘Nàti mbekì du à rla' Dàmaskòs. À be bà' àfo tɛ a suŋ wɛ̀ buu wɛɛwɛ ce Tàr à ce enɛ à gêe.’ 11Rraa ce li m raa nà li m niŋ mɛ̀ njep mmìr, mɛ̀ fêp, bèe ce wèr wowèe à m ba a koo mɛ̀ à bò a du àgho à rla' Dàmaskòs.

12“Ŋwɛ̀ mò' ce a m ce too enɛ Ànàniyàs à m ba à rla' anà, à ba ŋwɛ̀ ce e m ce lɛ̀ mncir yɛɛnì sê. Jus àfo wɛɛwɛ a m ce làa bòŋboŋ àmbò ye sê. 13E m vʉ̀ a yɛ mɛ̀, a tɛɛ a mɛ̌ geŋ a laa enɛ̂, ‘Nfʉrǎ Sôl, yɛ buu.’ Mɛ̀ yɛ buu à nfè' anà, a yɛ ye àmbò e tɛɛ. 14E laa enɛ̂, ‘Nyʉ̀ yì visèe btarkʉ à ce wɛ̀ tɛ à bo rìŋ yuu ce e ce kòŋ enɛ à gêe, kèr yɛ yì Ŋwɛ̀ Rfǎ' Nyɛɛnì, yu' àmbò e ce làa, 15njobè' à be ba yì ŋwɛ̀ ce à be suŋ bèe wɛɛwɛ buu ce wɛ̀ yɛ a ker yu'. 16À ker ce kè' ba kɛ sè'ni? Nàti mbekì, kɛ' li rlii, tɛ a baptir wɛ̀, sù'si yò buu bebep.’

17“Mɛ̀ ka' kʉti à rla' Jɛ̀rusalɛ̀m ce gèe rloo mbe Ndàp Nyʉ̀, a yɛ njɛ̀ɛ rlo mo'. 18Mɛ̀ m yɛ àmbò Tata ce làa nè mɛ̀ enɛ̂, ‘Nàti cɛrcɛr fʉʉ efa rla' Jɛ̀rusalɛ̀m njobè' běe àfo a be yu' yuu ce à ce suŋ wowèe àmbò mɛ̀ ka'.’ 19Mɛ̀ laa mɛnɛ̂, ‘Tatâ, bèe ca a rìŋ enɛ mɛ̀ m ce dù à mndap mloo a ce koo bèe ce a byemi nè wɛ̀ a ce fa à bshaŋ, a ce lìp bèe mo' efa wowèe. 20À ka' ba à nfè' ce a m ce yʉ Stɛfàn ce e m ce suŋ bèe àmbò wɛ̀, mɛ mɛ̀ à tɛɛ àfo a ce yu' rbòŋ, a ce kè'ni bcɛ̌' bèe ce a m ce yʉ ye.’ 21E laa nè mɛ̀ enɛ̂, ‘Kù du njobè' m be tuu wɛ̀ tɛ à du ànjìsàp sê, dù yɛ bèe enje jɛɛ.’ ”

22Pol à m ce làa bèe a ku ce yu'shi, e ka' ce làa àmbò bèe enje jɛɛ, wowèe a ghâa, a laa enɛ̂, “Wèe fa mà'shi ye ka', yʉ nè ye.” 23Wowèe a ce ghaa, a co'ni wap bcɛ̀' a ce mà'ri, ce dʉ'si nfʉ̀nfʉ mbekì. 24Ŋwɛ̀ ce e m ba tu nà à laa enɛ a lor Pol niŋ àgho mbe barakì, lip ye, bipshi buu nè ye tɛ a bo rìŋ mbùu ce Jus a m ce ghaa ye à njɛ̌ɛ wa'a. 25Wowèe a kur ye tɛ a bo lìp, e laa nè ŋwɛ̀ ce e m ba tu nè bsoogɛ̀ rjèe enɛ̂, “Wà' ncir yi byemi enɛ a lip ŋwɛ̀ Rum ce a be sa' yì nsa' ka' a?” 26Ŋwɛ̀ ce e m ba tu nè bsoogɛ̀ rjèe nà à ka' yu' ca, a du a suŋ nè tu yǐ gòr. E m làa nè ye enɛ̂, “À be gèe wɛkɛ sè'ni à? Ŋwɛ̀ ca yu ŋwɛ̀ Rûm.” 27Tu yǐ gòr yi du a yɛ Pôl, a bipshi nè ye enɛ̂, “Suŋ ka mɛ̀ lɛ̂, à yu ŋwɛ̀ Rum a?” E beesì enɛ ɛ̀no. 28Tu ca yi laa nè ye enɛ̂, “Mɛ̀ m là' ku' mbàa gòr sê, ka' ba ŋwɛ̀ Rûm.” Pol à laa enɛ̂, “A m bi yi mɛ̀ à ŋwɛ̀ Rûm.” 29Bèe ce a m ba enɛ a be bipshi buu nè ye nà, a natì a tɛɛ encàŋ. Tu yǐ gòr foŋ yi m lò a wɛp à nfè' ce e m rìŋ enɛ e koo Pol ce yu ŋwɛ̀ Rûm, a kur.

30Tu yǐ gòr yi m ce kòŋ à rrìŋ rara enɛ Jus ca a m ce làa enɛ Pol à gèe ba kɛ lɛ. Tʉ̀' à ka' raa, e ba'shì ye efa bshaŋ, a laa běe bgòrgòr efa mʉ̀ ŋgǎa taŋshi taŋshì ba ŋgǎa kansùr wɛɛwɛ a vʉsè. E vʉ nè Pol a tɛr mbe kansùr.

Currently Selected:

Ñwaè' Mfaè' Ñgaâa Ntuu Jisoès 22: LNT

Highlight

Copy