MATEO 9
9
Morephaditho; Mateo; Jairo; difofu; semuma; Puno ya Jesu
1Jesu a tsena leselawatleng, a sela a tsena motseng wa gagwe. 2Gwa napa gwa tla batho, ba tliša motho e a rephilego ditho, a letše malaong. Jesu ge a bona tumelo ya bona, a bolela le motho eo a rephilego ditho a re: Beta pelo, ngwanaka! O lebaletšwe dibe tša gago.
3Ge a realo ba bangwe ba bamangwalo ka mo dipelong tša bona ba re: Motho e o goboša Modimo!
4Jesu ge a bona megopolo ya bona, a re: Le reng le eleletša tše mpe dipelong tša lena? 5Se se bolelo ke sefe? A ke ge motho a re: O lebaletšwe dibe tša gago! Goba ge a ka re: Tsoga, o sepele! 6Fela, le tlo lemoga gobane Morwamotho o na le maatla a go lebalela batho dibe! -- Ya ba gona a bolelago le yo a rephilego ditho a re: Tsoga! Rwala malao a gago, o ye ngwakong wa gago.
7Monna eo a tsoga, a ya ngwakong wa gagwe. 8Mašaba a batho ge a bona tšeo, ba tlabega, ba tumiša Modimo e a filego motho maatla a makaakaa.
9Ge Jesu a tloga moo, a bona motho e a bitšwago Mateo, a dutše ngwakong wa lekgetho; a mmitša a re: Ntatele!
Mateo a tsoga a mo latela.
10Ya re ge Jesu a dutše dijong ngwakong wa Mateo, gwa tla ba lekgetho ba bantši le badiradibe, ba dula dijong le Jesu le barutiwa ba gagwe. 11Bafarisei ge ba bona fao, ba botšiša barutiwa ba gagwe ba re: Moruti wa lena o jelang le ba lekgetho le badiradibe?
12Jesu a ba kwa, mme a re: Ballangaka ga se ba ba thabilego, ke ba balwetši. 13Yang le ithute se se bolelwago ke Lentšu le le rego: Se nna ke se ratago ke kgaugelo, ga se didimo. Gobane ga ka tlela go bitša ba ba lokilego gore ba sokolege, ba ke tlilego go ba bitša ke badiradibe.
14Gwa tla barutiwa ba Johane ba re: Ke go reng rena le bafarisei re ikona gantši, mola barutiwa ba gago ba sa ikone?
15Jesu a fetola a re: Afa bagwera ba monyadi ba ka kgona go hlokofala ge monyadi a sa na le bona? Matšatši a monyadi a sa na le bona? Matšatši a monyadi a tlo go tlošwa go bona a setla; ke mo ba tlo go ikona.
16Ga go motho e a kago bea setsiba sa lešela le lefsa seaparong se se tala; setsiba seo sa go thiba se ka gagola seaparo, sa godiša lešoba. 17Le gona morara o mofsa ga o photlelwe mo nkgong e onetšego; nkgo e ka palega, morara wa falala, le yona nkgo ya senyega. Morara o mofsa o tšhelwa mo nkgong e mpsha, tša kgona di bolokana ka dipedi.
18A re a sa ba botša tšeo, gwa ba go tlile e mongwe wa bagolo, a mo khunamela a re: Ngwananyana waka o sa tso felela gonabjale. Fela, ge o ka tla wa mmea seatla, o tlo phela.
19Jesu a tsoga a mo latela, a na le barutiwa ba gagwe.
20Gwa napa gwa tla mosadi, e a feditšego nywaga e lesome le metšo e mebedi a babja ke ngope; a batamela ka morago a swara morumo wa kobo ya Jesu. 21Gobane mo pelong ya gagwe o be a re: Ge nka fo swara kobo ya gagwe, ke tlo phološwa!
22Jesu a retologa a mmona, a re: Beta pelo, ngwanaka! Tumelo ya gago e go phološitše! Mme mosadi eo a phološwa ka yona nako yeo.
23Bjale Jesu ge a fihla ngwakong wa mogolo, a hwetša go na le baletši le lešaba le le tlatšago lešata. 24A re: Sirogang! Ngwananyana e ga a ka a hwa; o robetše! Mme ba mo sega. 25Gomme ge lešaba le leleketšwe ntle, yena a tsena; a swara ngwananyana ka seatla, mme ngwananyana a tsoga. 26Tumo yeo gomme ya tšwela nageng yeo ka moka.
27Jesu ge a tloga moo, a latelwa ke difofu tše pedi; tša goa tša re: Morwa-Dafida, re šokelwe!
28Jesu a tsena ngwakong, mme difofu tšeo tša tla go yena; a di botšiša a re: A le dumela gore ke na le maatla a go dira seo?
Tšona tša re: E, Morena!
29Ke mo a kgwathilego mahlo a bona, a re: A nke le dirwe ka mo le dumetšego. 30Mahlo a bona a buduloga; mme Jesu a ba laela a re: Le bone gore go se ke gwa tseba motho.
31Fela bona ge ba etšwa moo, ba kwatša tumo ya gagwe nageng yeo ka moka.
32Ba re ba sa tloga, batho ba ba ba tlišitše motho wa semuma, e a nago le moya o mobe. 33Ya re moya o mobe o lelekilwe, semuma sa bolela. Mašaba a batho a tlabega a re: Tše bjalo ga di ešo tša bonwa go Isiraele.
34Ge e le bafarisei, bona ba re: O leleka meoya e mebe ka kgoši ya yona meoya e mebe.
35Gomme Jesu a hlomaganya metse ka moka le metsana, a fela a ruta diphuthegong tša gona, a goelela Ebangedi ya mmušo wa magodimo, a fodiša malwetši ka moka le mefokolo ka moka mo bathong. 36Ge a bona mašaba a batho a ba šokelwa; ka gobane ba be ba lapile, ba lahlegile wa dinku tše di se nago modiši. 37A bolela le barutiwa ba gagwe a re: Puno ke e ntši; mme badiri ga ba nene. 38Ke gona kgopelang Mong wa puno a romele badiri punong ya gagwe.
Currently Selected:
MATEO 9: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
