MATEO 8

Wa lephera; tona ya Kaperenaume; mogwegadi wa Petro; ledimo lewatleng; Bagadara

1Ya re ge a fologile thabeng, a latelwa ke mašaba a mantši a batho. 2Gwa napa gwa rotoga motho wa lephera, a tla a mo khunamela a re: Morena, ge o ka rata, o ka kgona go mphodiša!

3Jesu a ntšha seatla, a mo kgwatha, a re: Ke rata fao! Fola! Mme lephera la gagwe la napa la fola. 4Jesu a bolela nae a re: Bona! O se ke wa botša motho. Sepela o yo ipontšha go moperisita, o iše neo e laetšwego ke Moše gore e be bohlatse go bona.

5Eitše ge Jesu a tsena Kaperenaume, gwa tla tona ya lekgolo ya mo kgopela ya re: 6Morena, mohlanka wa ka o letše ka ngwakong; o rephile ditho; di mmolaya ka mokgwa o šoro.

7Jesu a re: Ke tlo tla ka mo fodiša.

8Tona ya fetola ya re: Morena, ga ka swanela ge o ka tsena ka tlase ga tlhaka ya ntlo ya ka; o nko bolele lentšu fela, mohlanka wa ka a fole. 9Hleng le nna, ke le motho a bušwago, ke na le bahlabani ba ke ba bušago, ke roma yo ka re: Sepela, mme a sepela; ke bitša e mongwe ka re: Tlaa, mme a tla; ke laela mohlanka wa ka ka re: Dira se, a dira.

10Jesu ge a ekwa a kgotsa, a bolela le ba mo latelago a re: Ruri, ke a le botša, le go Isiraele ga ke ešo ka hwetša tumelo e kaakaa! 11Mme ke a le botša, bohlabela le bodikela go tlo tšwa ba bantši ba tla ba dula dijong le Aborahama le Isaka le Jakobo mmušong wa magodimong, 12Mme barwa ba mmušo ba tlo ntšhetšwa ntle lefsifsing la ntlentle. Gona moo go tlo ba le dillo le ditsikitlano tša meno. 13Ge e le tona yeo, Jesu a bolela le yona a re: Sepela, o diregelwe ka mo o dumetšego ka gona.

Mme mohlanka wa yona a fola ka yona nako yeo.

14Eitše ge Jesu a tsena ngwakong wa Petro, a hwetša mogwegadi wa Petro a letše a babja ke letadi. 15A mo swara ka seatla, mme letadi la mo tloga, a tsoga a ba apeela.

16Ya re e šetše e le mantšibua, ba tliša ba bantši ba ba nago le meoya e mebe; mme Jesu a leleka meoya yeo e mebe ka go bolela le yona, a fodiša bohle ba ba babjago. 17Ya ba gona go phethega se se boletšwego ke moporofeta Jesaya ge a itše: Ke yena a rwelego malwetši a rena, a ipeleša mahloko a rena.

18Jesu ge a bona a bokanetšwe ke mašaba a mantši, a re: A re seleleng mošola. 19Ke mo e mongwe wa bamangwalo a tlilego go yena a re: Moruti, ke tlo go latela mo gohle mo o yago.

20Jesu a fetola a re: Diphukubje di na le melete, le dinonyana tša sebakeng di na le dihlaga; ge e le Morwamotho ga a na mo a kago samiša hlogo.

21E mongwe wa barutiwa ba gagwe a tla a re: Ntumelele, ke thome go yo boloka tate.

22Jesu a fetola a re: Latela nna, o lese bahu ba boloke bahu ba bona.

23Ya re ge a tsena leselawatleng, a latelwa ke barutiwa ba gagwe. 24Gwa napa gwa tsoga ledimo le letona, leselawatle la ribegelwa ke maphoto, yena a ithobaletše. 25Barutiwa ba batamela ba mo tsoša ba re: Morena, phološa; re a lahlega!

26Yena a re: Le boifang lena bahlayatumelo! A tsoga, a kgalema phefo le lewatle; gwa napa gwa ruthela ruri.

27Batho ba tlabega ba re: Ke mothomang yena e, ge ledimo le lewatle le tšona di mo kwa?

28Ya re ge a fihlile mošola nageng ya Bagadara, a gahlana le banna ba babedi ba meoya a mebe ba etšwa mabitleng, ba galefile ka kudu, go se motho e a kago beta pelo a feta ka tsela yeo. 29Banna bao ba goa ba re: Re na le tabamang le Wena? Wena Jesu Morwa-Modimo! A o tlile mono go re tlaiša e sešo ya ba lebaka?

30Gomme gona moo go be go na le mohlape wa dikolobe tše ntši, o fula ka kgojana. 31Meoya e mebe ya mo kgopela ya re: Ge o re leleka, re rome re yo tsena mohlapeng wa dikolobe.

32Jesu a re: Yang! Gomme ya tšwa ya ya mohlapeng wa dikolobe. Mme mohlape ka moka šoolee, o iphekemetša ka legaga, wa wela lewatleng, wa hwela meetseng.

33Badiši ba tšhaba, ba fihla motseng ba bolela tšohle, le tše di dirilwego bao ba meoya e mebe. 34Bohle ka motse ba tswa ba gahlanetša Jesu; gomme ge ba mmone, ba mo rapela ba re a fete, a tloge mo mellwaneng ya bona.

Currently Selected:

MATEO 8: NSO51

Highlight

Copy