MATEO 14

Johane Mokolobetši o a bolawa. Jesu o horiša ba 5 000, o sepela godimo ga meetse

1Mehleng yeo Herode Teterareka a kwa ba bolela Jesu. 2A re a bolela le bahlanka ba gagwe a re: Motho eo ke Johane Mokolobetši; o tsogile bahung; ke gona go tšwago maatla ao a dirago ka ona.

3Ka gobane Herode o be a swere Johane a mo tlema, a mo iša kgolegong ka baka la Herodia mosadi wa Filipi ngwanabo. 4Ka gobane Johane o be a mo sotše a re: Ga go a go lokela ge o na nae. 5Bjale, le ge a ratile go bolaya Johane, a lesa ka go boifa setšhaba, ka gobane ba be ba re ke moporofeta.

6Fela, mohla go binwa monyanya wa matswalo a Herode, morwedi wa Herodia a tla a bina ba bokane, mme Herode a mo thabela, 7A ba a mo enela a re o tlo mo fa se a kago se kgopela.

8Ngwanenyana eo a bolela se mmagwe a mo rutilego sona, a re: Mphe hlogo ya Johane Mokolobetši, e tlišwe fa ka mogopo.

9Kgoši ya nyama; fela ka baka la keno, le ka baka la ba ba dutšego dijong le yena a laela a re a e newe. 10A roma bahlanka ba ya ba kgaola Johane hlogo mo ngwakong wa kgolego. 11Hlogo ya Johane ya tlišwa ka mogopo, ba e neela ngwanenyana eo; yena a e iša go mmagwe. 12Gwa tla barutiwa ba Johane ba rwala setopo sa gagwe, ba ya ba se fihla; ba tloga ba yo botša Jesu.

13Jesu ge a kwile tšeo, a tloga felo fao ka leselawatle, a ya felo ga lešokeng mo go sego batho. Batho, bona ba re go di kwa, ba mo latela ka dinao ba etšwa metseng. 14Jesu ge a tšwelela, a bona lešaba le lentši la batho, a ba šokelwa, a fodiša balwetši ba bona.

15E šetše e le mantšibua, barutiwa ba gagwe ba tla go yena ba re: Felo fa ke lešokeng, mme e šetše e le mantšibua. Gomiša mašaba a a batho, ba ye metseng ba ithekele dijo.

16Jesu a fetola a re: Ba tlogelang? A ba fiwe dijo ke bolena.

17Barutiwa ba re: Ga re na selo mo, ge e se dinkgwa tše tlhano le hlapi tše pedi.

18Jesu a re: Di tlišeng fa go nna! 19A laela a re batho ba dule fase mabjanyeng, a tšea dinkgwa tšeo tše tlhano le hlapi tše pedi, a lelalela legodimong a leboga, a ngwatha a nea barutiwa dinkgwa tšeo, bona ba nea batho. 20Bohle ba ja ba hora, ba kgobela marathana a tlala diroto tše lesome le metšo e mebedi. 21Gomme ba ba llego e be e ka ba banna ba dikete tše tlhano, go sa balwa basadi le bana.

22Bjale Jesu a gapeletša barutiwa ba gagwe, a re ba namele leselawatle, ba mo etepele ba selele mošola, yena a sa laelana le mašaba. 23Ya re a laelane le ona, a rotogela thabeng mo go sego batho, a rapela, la ba la dikela a le moo a nnoši. 24Mme leselawatle le be le šetše le le gare ga lewatle le akgaakgwa ke mafula, le bušetšwa nthago ke phefo.

25Ka lebaka la tišo ya bone ya bošego Jesu a tla go bona a sepela godimo ga bodiba. 26Barutiwa ge ba mmona ge a sepela godimo ga bodiba, ba hlaba mokgoši ba boifa.

27Jesu a akgofa a bolela le bona a re: Beang dipelo; ke nna; se boifeng!

28Petro a fetola a re: Morena, ge e le wena, mpotše ke tle moo go wena ke sepele godimo ga meetse!

29Jesu a re: Tlaa! Petro a tšwa leselawatleng a sepela godimo ga meetse, a ya go Jesu. 30Fela, ge a bona ledimo, a boifa, a thoma go teka; a goa a re: Morena, mphološe!

31Jesu a akgofa a iša seatla a mo swara, a re: O reng o belaela wena mohlayatumelo!

32Ya re ge ba namela leselawatle, phefo ya okobala. 33Ba mo leselawatle ba tla ba mo khunamela ba re: Ka kgonthe, o Morwa wa Modimo!

34Ba sela, ba fologa ba fihlile nageng ya Genetsareta. 35Banna ba felo fao ge ba mmona, ba roma batho, ba ya mathokong ka moka a naga yeo, ba tliša bohle ba ba nago le mahloko, ba tla go Jesu. 36Ba mo kgopela go ka fo kgwatha morumo wa kobo ya gagwe; bohle ba kgwatha ba folela ruri.

Currently Selected:

MATEO 14: NSO51

Highlight

Copy