MATEO 13

Diswantšho tša Mmušo wa magodimo. Go se dumele ga Banatsaretha

1Ka lona tšatši leo Jesu a tšwa gae, a yo dula lewatleng. 2A phuthegelwa ke mašaba a mantši a batho a ba a namela leselawatle a dula, mašaba a ema a šikile le leboto la lewatle. 3Jesu a ba botša ditaba tše ntši ka diswantšho, a re:

Bonang, go tšwile mobjadi a bjala. 4Ge a bjala, tše dingwe tša wela tseleng, mme dinonyana tša tla tša di ja. 5Tše dingwe tša wela lekgwareng, mo go se nago mobu o montši; tša akgofa tša mela ka ge mobu o sa iše fase. 6Ya re tšatši le hlabile, tša pona tša omelela ka go hloka medu. 7Tše dingwe tša wela metlweng; mme metlwa ya mela ya di bipa. 8Tše dingwe tša wela mobung o botse, tša enywa dienywa; tše dingwe tša tšwa lekgolo, tše dingwe tša tšwa masome a selelago, tše dingwe tša tšwa masome a mararo.

9E a nago le ditsebe tša go kwa a a kwe.

10Barutiwa ba batamela ba mmotšiša ba re: Ke ka baka lang ge o bolela nabo ka diswantšho?

11Yena a fetola a re: Lena le neilwe go hlatha thopa tša mmušo wa magodimo; bona ga ba ka ba newa. 12Gobane e a nago natšo, o tlo newa wa go humišwa; gomme e a se nago natšo, o tlo amogwa le tše a nago natšo. 13Ke ka baka leo ke bolelago nabo ka diswantšho, gobane le ge ba bona ga ba bone, le ge ba ekwa ga ba kwe ba hlaloganya. 14Go bona go phethega porofeta ya Jesaya ye e rego: Go kwa le tlo kwa, mme le ka se hlaloganye; go bona le tlo bona, gomme le ka se lemoge. 15Gobane pelo tša setšhaba se di retetše; tsebe tša bona di thibetše; ba foufetše mahlo. Ba ka se hlwe ba bona ka mahlo, ba ka se hlwe ba ekwa ka ditsebe, ba ka se hlaloganye ka dipelo, ba ka se ke ba sokologa ka ba phološa.

16A lena mahlo ke a lehlogonolo, gobane a a bona; le ditsebe tša lena, gobane di a kwa. 17Ruri ke a le botša, baporofeta ba bantši le baloki ba bantši ba be ba hlologetšwe go bona tše le di bonago, mme ga ba ka ba di bona, le go kwa tše le di kwago, mme ga ba ka ba di kwa.

18Lena bjale kwang seswantšho sa mobjadi. 19Motho e a kwago Lentšu la mmušo wa magodimo a sa le kwišiše, yo Mobe o a tle a ubule tše di bjetšwego pelong ya gagwe. Ke yena mobjalwatseleng. 20Mobjalwalekgwareng ke eo, e rego ge a ekwa Lentšu, a akgofa a le amogela ka thabo. 21Fela, ga a na medu mo pelong ya gagwe, ke wa lebakanyana fela. Mohla go tsoga tlhokofatšo le tlaišo ka baka la lona Lentšu, o tloga a ngala. 22Mobjalwametlweng ke e a kwago Lentšu, mme la bipja ke dipelaelo tša bophelo bjono le bofora bja lehumo, yena a opafala. 23Mobjalwammung o botse ke e a kwago Lentšu a kwešeša, a kgona a enywa dienywa; e mongwe a tšwa lekgolo, e mongwe masome a selelago, e mongwe masome a mararo.

24A ba anegela se sengwe seswantšho, a re: Mmušo wa magodimo o swana le motho e a bjetšego peu e botse mo tšhemong ya gagwe. 25Ya re ge batho ba robetše, lenaba la gagwe la tla la bjala mefoka gare ga mabele, mme la tloga. 26Ya re lekgaba ge le gola le tswala, mefoka le yona ya bonala. 27Bahlanka ba tla go mong wa bona, ba mmotšiša ba re: Morena a ga wa ka wa bjala peu e botse tšhemong ya gago? Bjale mefoka e e tšere kae? 28A fetola a re: Tšeo di dirilwe ke lenaba! Bahlanka ba re: Bjale a o rata ge re ka ya ra e kgobela? 29Yena a re: Aowa! Le ka tlo re le kgobela mefoka, la tomola le mabele. 30Lesang di gole ga mmogo, go be go tle puno. Ka lebaka la go buna ke tlo bolela le babuni ka re: Thomang ka go kgobela mefoka, le e tleme dingata e yo fišwa; ge e le mabele le a kgobele sešegong sa ka.

31A ba anegela se sengwe seswantšho, a re: Mmušo wa magodimo o swana le thorwana ya lehloko, ye motho a e tšerego a e bjale tšhemong ya gagwe. 32E lego yona e nyenyane go dipeu ka moka; fela, ge e medile e tšwa wona morogo o mogolo; e ba sehlare se dinonyana tša sebakeng di tlo go tla tša aga dihlaga makaleng a sona.

33A ba anegela se sengwe seswantšho, a re: Mmušo wa magodimo o swana le komelo, ye mosadi a e tšerego a e tswakanya le bupi bja ntlatla tše tharo, komelo ya bo omela bjohle.

34Tše ka moka Jesu o di boletše ka diswantšho a bolela le mašaba a batho; mme ga a ka a bolela nabo ge e se ka diswantšho. 35Ya ba gona go phethega se se boletšwego ke moporofeta e a itšego: Ke tlo ahlama ka hlaba seema, ka bola thopa tša bogologolo.

36Bjale Jesu a laelana le mašaba a batho, a ya gae. Barutiwa ba gagwe ba tla go yena ba re: Re hlathollele seswantšho sa mefoka tšhemong.

37Jesu a fetola a re: Mobjadi wa peu ke Morwamotho. 38Tšhemo ke lefase. Peu e botse ke bana ba mmušo wa magodimo; mme mefoka ke bana ba bobe. 39Lenaba le le bjalago mefoka ke Diabolo; puno ke bofelo bja lebaka leno; babuni ke barongwa. 40Bjalo ka mefoka ge e kgobelwa ya fišwa ka mollo, le bofelong bya lebaka leno go tlo ba bjalo. 41Morwamotho o tlo roma barongwa ba gagwe, ba yo hlaola dikgopišo ka moka ba di ntšha mmušong wa gagwe, ba hlaola badirabokgopo. 42Mme ba tlo ba lahlela sebešong sa mollo, mo go tlo go ba le dillo le ditsikitlano tša meeno. 43Ke moo ba ba lokilego ba tlo go taga bjalo ka letšatši ba le mmušong wa Tatabo. -- E a nago le ditsebe tša go kwa a a kwe.

44Mmušo wa magodimong o swana le lehumo le le fihlilwego tšhemong, le motho e rego ge a le bone a le uta; mme ka go le thabela a ya a rekiša thoto ya gagwe ka moka, a reka tšhemo yeo.

45Le gona mmušo wa magodimo o swana le mmapatši e a tsomago dipheta tše botse. 46Yo e itšego ge a hweditše pheta ya theko e kgolo, a tloga a yo rekiša thoto ya gagwe ka moka, a reka yona pheta yeo.

47Le gona mmušo wa magodimo o swana le lokwa le le reilwego lewatleng, la phuthela hlapi tša mehuta yohle. 48Le e itšego ge le tletše, ba le gogela lešing, ba dula ba hlaola tše botse ba di hlophela dibjeng, tše mpe ba di lahla. 49Go tlo ba bjalo bofelong bja lebaka leno. Barongwa ba tlo tšwa ba hlaola ba babe mo gare ga ba ba lokilego. 50Mme ba tlo ba lahlela sebešong sa mollo, mo go tlo go ba le dillo le ditsikitlano tša meno.

51Jesu a ba botšiša a re: A ditaba tše ka moka le di kwišitše?

Bona ba re: Ee, Morena!

52Yena a re: Ke gona motho wa mangwalo, mang le mang e a rutegetšego mmušo wa magodimo o swana le mong wa lapa, e a ntšhago tše mphsa le tša kgale lehumong la gagwe.

53Jesu ge a feditše go bolela ka diswantšho tšeo, a tloga felo fao. 54A tla motseng wa gabo, a ba ruta phuthegong ya bona ka mokgwa wa go ba tlaba, ba ba ba re: Bohlale bjo le maatla a di mo tšwela kae? 55A ga se yena morwa wa mmetli yola? A mmagwe ga ba re ke Maria? A bana babo ga se Jakobo le Jose le Simone le Juda? 56Le dikgaetšedi tša gagwe, a ga di mo go rena ka moka? 57Ba re: O a re gakiša.

Jesu a re: Moporofeta ga a ke a nyatšega ge a se motseng wa gabo le lapeng la gabo. 58Gomme felo fao ga a ka a dira mehlolo e mentši, ka gobane ba be ba sa dumele.

Currently Selected:

MATEO 13: NSO51

Highlight

Copy