MATEO 12

Bafarisei ba tsoša dikgang. Bana babo Jesu

1Ka mohla o mongwe wa Sabatha Jesu o be a phatša mašemong. Barutiwa ba gagwe ba swerwe ke tlala, ba thoma go kga diako ba di ja. 2Bafarisei ge ba bona fao, ba bolela nae ba re: Bona! Barutiwa ba gago ba dira se se sa swanelago go dirwa ka Sabatha.

3Jesu a fetola a re: A ga la bala se Dafida a kilego a se dira mohla wola a swerwe ke tlala, a na le batho ba gagwe? 4Ka mo a nago a tsena Ngwakong wa Modimo, a ja magobe a go bewa pele ga Morena, a go bego go sa swanela go ka lewa ke yena le batho ba gagwe, ge e se baperisita fela? 5Le gona, a ga la bala Molaong gore ka Sabatha baperisita mo Ntlongkgethwa ba goboša Sabatha, ba se be le molato? 6Gomme nna ke le botša ke re: Yo e lego e mogolo go Ntlokgethwa o fa. 7Gomme ge le ka be le hlatha lentšu le rego: Se nna ke se ratago ke kgaugelo, ga se sedimo, -- le ka be le lesitše go lahla ba ba se nago molato. 8Gobane Morwamotho, le tšatši la Sabatha ke yena Mong wa lona.

9A feta a tla phuthegong ya bona. 10A hwetša go na le motho wa letsogo le le omeletšego. Ba mmotšiša ba re: A go swanetše ge go fodišwa motho ka Sabatha? -- Ba realo e le go nyaka molato go yena.

11Jesu a fetola a re: Motho ke mang mo go lena, yo e rego ge a na le nku e tee, ya wela moleteng ka Sabatha, e a ka se kego a e swara a e ntšha? 12Bjale motho, a ga a fete nku gagologolo? Gona go dumeletšwe go dira botse ka Sabatha. 13Ya ba gona a bolelago le motho eo, a re: Otlolla letsogo la gago!

A le otlolla, la boela le fodile, le etša lela le lengwe. 14Ge e le bafarisei, bona ba tšwa, ba lakana go mmolaya.

15Jesu, ka go ba lemoga, a tloga felo fao, a latelwa ke mašaba a mantši a batho; a fodiša bohle. 16A ba laela a re ba se ke ba mmolela. 17Ke mo go phethegilego se se boletšwego ke Jesaya moporofeta ge a re: 18Mohlanka wa ka šo, yo ke mo hlaotšego, moratwa wa ka e a kgahlago pelo yaka. Ke tlo bea Moya wa ka mo go yena, mme o tlo tsebiša ditšhaba kahlolo. 19A ka se ke a omana, a ka se ke a goa, go ka se ke gwa ba e a kwago lentšu la gagwe mekgotheng. 20Lehlaka le le thinyegilego a ka se ke a le thokgela ruri; mme lebonenyana le le kunyelelago a ka se le timele ruri, a tlo ba a tšweletša phenyo kahlolong. 21Mme ditšhaba di tlo holofela ina lagwe.

22Ka lebaka leo gwa tlišwa motho, e a nago le moya o mobe, e le sefofu le semuma; Jesu a mo fodiša; mme motho eo wa sefofu le semuma a bona, a bolela. 23Mašaba ka moka a tlabega, a re: Afa yo ga se yena Morwa Dafida?

24Ge e le bafarisei, bona ge ba ekwa tšeo, ba re: Motho yo, ge a leleka meoya e mebe, o dira ka Beletsebulu kgoši ya meoya e mebe; ga se tše dingwe.

25Gomme Jesu ka ge a tseba kgopolo tša bona, a re: Mmušo ofe le ofe, ge o ikgaoganya, o a šwalalana; le ngwako ge o ikgaoganya, ga o eme. 26Bjale ge Sathane a ka leleka Sathane, ge a ikgaoganya, mmušo wa gagwe o tlo ema bjang? 27Ge le re nna ke leleka meoya e mebe ka Beletsebulu, ge e le barwa ba lena ba e leleka ka mang? Ke gona, baahlodi ba lena e tlo ba bona. 28Nna bjale ge ke leleka meoya e mebe ka Moya wa Modimo, ke gona ge mmušo wa Modimo o tlile go lena.

29Ka gobane ngwakong wa mogale motho a ka tsena bjang a thopa dilo tša gagwe, ge a sešo a tlema mogale eo, a kgona a thopa ngwako wa gagwe?

30E a sa emego le nna, o lwa le nna; le e a sa kgobelego le nna, o a gašanya. 31Ke ka baka leo ke rego: Batho ba tlo lebalelwa sebe mang le mang, le yona thogako; fela, go rogaka Moya, batho ba ka se ke ba go lebalelwa. 32Le gona, e a boletšego lentšu a ganetša Morwamotho, o tlo lebalelwa; fela e a ganetšago Moyamokgethwa, a ka se ke a ba a lebalelwa lebakeng leno le lebakeng le le tlo go tla.

33Sehlare, le re ke se se botse, ge dienywa tša sona e le tše botse. Sehlare, le re ga se tsebalege, ge se enywa tše di sa tsebalegego. Sehlare se tsebja ka kenyo. 34Lena matswinyana a dinoga, le ka kgona bjang go bolela tše di botse mola le le ba babe? Gobane molomo o bolela tše pelo e di falatšago. 35Motho yo botse o ntšha tše botse lehumong le le botse la pelo; motho e mobe o ntšha tše mpe lehumong le lebe.

36Mme ke a le botša, ka tšatši la kahlolo batho ba tlo sekišwa mantšu ohle a lefela a ba a boletšego. 37Ke mantšu a gago a tlo go go emela; mme ke mantšu a gago a tlo go go bea molato.

38Ke mo ba bangwe ba bamangwalo le ba bafarisei ba boletšego le yena ba re: Moruti, re rata go bona ge o dira mohlolo.

39Jesu a fetola a re: Moloko o mobe wo wa bahladi o nyaka mohlolo; mme o ka se ke wa fiwa mohlolo o mongwe, ge e se mohlolo wa Jona moporofeta. 40Gobane boka Jona ge a fetša matšatši a mararo le mašego a mararo a le mpeng ya hlapikgolo, le Morwamotho o tlo fetša matšatši a mararo le mašego a mararo a le pelong ya lefase. 41Banna ba Ninife mohla wa kahlolo ba tlo tsoga ba lebana le moloko wo ba o tšwa; gobane bona ba sokologile ka mokgoši wa Jona. Gomme tsebang, yo e lego e mogolo go Jona o fa. 42Mohumagadi wa borwa mohla wa kahlolo o tlo tsoga a lebana le moloko wo a o tšwa; gobane yena o tlile a etšwa pheletšong ya lefase, a kwa bohlale bja Salomo. Gomme tsebang, yo e lego e mogolo go Salomo o fa.

43Mohla moya wa ditšhila o tšwago go motho, o a putlaputle dinaga tša lesehla; o nyaka bokhutšo a se bo hwetše. 44Ke mo a rego: Ke tlo boela ngwakong waka wo ke tšwilego go wona! Gomme ge a fihla gona, o o hwetša o le fela, o fsietšwe o hlophilwe. 45Bjale o a ye a boe le e mengwe meoya e šupago, e o fetišago ka bobe, mme o tsene o dule gona; mme tša mafelo a motho eo e be tše mpe, tše di fetišago tša pele. Moloko o mobe wo o tlo tlelwa ke tše bjalo.

46A re a bolela le batho, gwa rotoga mmagwe le bana babo; ba ema ntle, ba nyaka go bolela le yena. 47Motho e mongwe a mmotša a re: Mmago šoo, le bana beno; ba eme fao ntle; ba nyaka go bolela nago?

48Jesu a fetola a bolela le monna eo a re: Mmane ke mang? Le bana bešo ke bomang? 49A emiša letsogo a šupa barutiwa ba gagwe, a re: Mmane šo, le bana bešo! 50Gobane mang le mang e a dirago thato ya Tate wa magodimong ke ngwanešo, ke kgaetšedi ya ka le mmane.

Currently Selected:

MATEO 12: NSO51

Highlight

Copy