MATEO 10

Barutiwa ba 12 ba romiwa go Baisiraele

1Ya re ge a biditše barutiwa ba gagwe ba lesome le metšo e mebedi, a ba fa matla a go leleka meoya ya ditšhila, le a go fodiša malwetši ka moka le mefokolo ka moka. 2Ge e le maina a baapostola ba lesome le metšo e mebedi šea: Wa pele ke Simone e a reetšwego la Petro, le Andrea ngwanabo; le Jakobo morwa wa Tsebedeo, le Johane ngwanabo; 3le Filipi le Baratolomeo; le Tomase le Mateo wa lekgetho; le Jakobo morwa wa Alifeo; le Lebeo wa go ekeletšwa ka la Tadeo; 4le Simone wa Kana, le Judase Isikariote wa go mo eka.

5Ke bona ba lesome la metšo e mebedi ba Jesu a ba romilego, a ba laela a re: Le se ke la fapogela tseleng ya go ya go ba ditšhaba; le gona le se ke la tsena motseng wa ba Samaria. 6Le phegelele go ya go dinku tše di timetšego tša moloko wa Isiraele. 7Le sepele le tšame le re: Mmušo wa magodimo o batametse. 8Fodišang balwetši; tsošang bahu; thakgafatšang ba lephera; lelekang meoya e mebe. Le filwe fela; le lena fang fela. 9Le se ke la ipabalela ka gauta le ge e le ka silifera dikgwameng tša lena. 10Le mekotla ya leeto, le ge e le kobo ya bobedi, le ge e le dieta, le ge e le lepara, le se ke la tloga natšo! Gobane mohlanka sa gagwe ke go newa dijo.

11Ge le tsena motseng goba motsaneng, le botšiše ge go ka ba le e a swanetšego go iwa go yena; Le ye le dule ga gagwe, le be le fetele pele. 12E re ge le tsena lapeng, le dumediše ba gona. 13Gomme ge lapa leo le swanetše, gona molao wa lena o tlo le tlela; fela, ge le sa swanela, gona molao wa lena o tlo boela go lena. 14Ge motho a sa le amogele, a gana go kwa le dipolelo tša lena, le tloge lapeng leo, le ge e le motseng woo, le hlohlore le lerole la naong tša lena. 15Ruri, ke a le botša, motse woo ka tšatši la kahlolo, -- naga ya Sodoma le Gomora e tlo bona tše kaone.

16Tsebang, ke le roma boka dinku gare ga diphiri; ke gona le hlalefe wa dinoga, le ila bomenetša bjalo ka maeba. 17Le phafogele batho, gobane ba tlo le sekiša dikgorong, mme ba tlo le otla mo diphuthegong tša bona. 18Ba tlo le bega go babuši le dikgoši ka baka laka, ya tlo ba bohlatse, go bona le go ba ditšhaba. 19Ge ba le iša tshekong, le se ke la phoraphora, la re: Re yo reng? Gobane ka lebaka la gona le tlo newa se le tlo go se bolela; 20gobane ga se lena le bolelago, ke Moya wa Tataweno o bolelago ka lena.

21Gomme ngwanabomotho o tlo bolaiša ngwanabo, mme tatago motho o tlo bolaiša ngwana wa gagwe; mme bana ba tlo tsogela batswadi matla ba ba bolaiša. 22Le tlo ba ba ba hloilwego ke bohle ka baka la leina laka. Gomme a tlo go kgotlelela go iša bofelong, ke yena a tlo go phološwa. 23E re ge ba le tlaiša motseng o mongwe, le tšhabele go o mongwe. Ruri, ke a le botša, Morwamotho o tlo tla le sešo la enetša metse ye Isiraele.

24Morutiwa ga a fete moruti wa gagwe ka bogolo, le mohlanka ga a fete mong wa gagwe. 25Go lekane ge morutiwa a eba bjalo ka moruti wa gagwe, le mohlanka ge a eba bjalo ka mong wa gagwe. Ge Mong wa ngwako ba mmiditše Beletsebulu, ba ngwako wa gagwe a ba ka se ba dire tše di fetišago tšeo?

26Le se ke la boifa gee; gobane ga go thopa ye e sa tlo go bipollwa; ga go sephiri se se sa tlo go tsebja. 27Se ke le botšago sona lefsifsing, se boleleng seetšeng; se le se kwago le sebelwa tsebeng le se goelele le le seokamong. 28Le se boife ba ba bolayago mmele, ba sa kgone go bolaya moya; gagolo le boife Eo a kgonago go senya mmele le moya moleteng wa mollo. 29A dithaga tše pedi ga di rekwe ka peni? Gomme le e tee ya tšona e ka se wele fase ge Tataweno a sa rate. 30Ešita la meriri ya dihlogo tša lena e badilwe ka moka! 31Ke gona, se boifeng; le feta dithaga e le tše ntši.

32Mang le mang e a mpolelago pele ga batho, le nna ke tlo mmolela pele ga Tate wa magodimong. 33Gomme e a ntahlago pele ga batho, le nna ke tlo mo lahla pele ga Tate wa magodimong.

34Le se ke la re ke tlile go bjala khutšo lefaseng; ga ka tla go bjala khutšo, ke tliša lerumo. 35Gobane ke tlile go šitanya motho le tatagwe, ngwanenyana le mmagwe, ngwetši le matswalagwe. 36Mme babo motho e tlo ba manaba agwe.

37Yo e rego ge a rata tatagwe le mmagwe, a fetiša go rata nna, ga a swanelwa ke go ba wa ka; mme ge a rata morwagwe le morwedi wa gagwe, a fetiša go rata nna, ga a swanelwa ke go ba waka. 38Le yo a sa tšeego fapano sa gagwe mme a ntšhala morago, ga a swanelwa ke go ba wa ka. 39E a ikhweletšago bophelo bja gagwe, o tlo bo timetša; e a timelelwago ke bjona ka baka la ka, o tlo bo hwetša.

40E a le amogelago, o amogela nna; gomme e a amogelago nna, o amogela E a nthomilego. 41E a amogelago moporofeta ka ge a na le leina la moporofeta, o tlo fiwa tebogo ya moporofeta. E a amogelago moloki ka ge a na le leina la moloki, o tlo fiwa tebogo ya moloki. 42E a gelago e mongwe wa banyenyane ba sego sa meetse a batago, ka ge a na le leina la morutiwa, ruri ke a le botša, a ka se tingwe moputso wa gagwe.

Currently Selected:

MATEO 10: NSO51

Highlight

Copy