JEREMIA 34
34
Jeremia o bolela le kgoši Tsedekia
1Šele lentšu le le tletšego Jeremia le etšwa go Morena. Ke la mola Nebukadinetsara kgoši ya Babele a elwa le Jerusalema le metsana ya gona yohle, a na le dira tša gagwe ka moka, le mebušo ka moka ya lefase e bego e bušwa ke yena, le ditšhaba ka moka. 2Morena Modimo wa Isiraele o re: Yaa o bolele le Tsedekia kgoši ya Juda o re: Morena o re: Tseba gore motse wo ke tlo o gafela seatleng sa kgoši ya Babele; mme o tlo o tšhuma ka mollo. 3Le wena o ka se ke wa phonyokga; o tlo swarwa wa gafelwa diatleng tša gagwe, wa tlo lebana le kgoši ya Babele ka difahlogo, la fetolana ka melomo; mme wena o tlo ya Babele. 4Kwaa gee lentšu la Morena, wene Tsedekia kgoši ya Juda. Morena o go boletše a re: O ka se hwe ka lerumo. 5O tlo hwa go iketlilwe; ba tlo go tšhumela ditšhumelo tše di bego di tšhumelwa botatago ba dikgoši tša kgale di go etilego pele. Ba tlo go llela ba re: Joo, Mong wa rena, joo! Ke nna ke boletšego tšeo. O realo Morena.
6Moporofeta Jeremia a botša Tsedekia kgoši ya Juda mantšu ao ka moka a le Jerusalema. 7Ke ge dira tša kgoši ya Babele di elwa le motse wa Jerusalema le metse yohle ya Juda ye e bego e šaletše. Ke motse wa Lakisi le motse wa Aseka; ke yona e bego e šaletše mo go metse ya Juda, e le metse ya dibo.
8Šele lentšu le le tletšego Jeremia le etšwa go Morena. Ke la mola kgoši Tsedekia a kwane le batho ka moka ba Jerusalema gore ba goelele khunollo 9ya go re mang le mang a hunolle molata wa gagwe wa Mohebere wa monna le wa mosadi, le go re go se be le Mojuda e a dirago wa gabo molata. 10Gomme ba bagolo le batho ka moka ba ba bego ba kwane gore mang le mang a hunolle molata wa gagwe wa monna le wa mosadi, mme ba se ke ba ba dira balata gape, ba ya ka molao woo; ba ba lesa ba ikela. 11Ka la ka moswana ba šatoga, ba gomiša balata bao ba banna le ba basadi; ba ba bego ba ba hunolotše; mme ba ba gapeletša ya ba balata gape.
12Ke mo lentšu la Morena le tletšego Jeremia le etšwa go Morena, la re: 13Morena Modimo wa Isiraele o re: Nna, mehla yela ke ntšha botataweno Egipita ngwakong wa bohlanka, ke dirile kgwerano le bona ka re: 14Ge go fetile nywaga e šupago, mang le mang a hunolle Mohebere wa gabo e a ithekišitšego a le hlankela nywaga e selelago; le mo leseng a hunologe. Fela, botataweno ga ba ka ba nkwa; ba ganne go theetša. 15Bjale lena, le be le lahlile tsela yeo, la dira tše ke hweditšego e le go loka, la goelela khunologo, la hunolla bana beno; kwano yeo la e dira pele ga ka, le le ngwakong o bitšwago ka leina la ka, 16La napa la šatoga, la goboša ina la ka; ka moka la gomiša balata ba banna le ba basadi ba le bego le ba hunolotše ba ikela, la ba gapeletša go boela bohlankeng. 17Molato ke wona woo ge Morena a re: Lena le ganne go nkwa ge ke re le goelele khunologo ya bohle ba e lego ba geno. Bjale ke nna e! Ke goelela khunollo mo go lena, o realo Morena, e lego khunollo ya lerumo le ya dinkhu le ya tlala; ke le dira setšhošo mo go mebušo yohle ya lefase. 18Mme banna bao ba ba sentšego kgwerano ya ka, ba ba gannego go ya ka lentšu le ba le tlemilego pele ga ka, ke tlo ba dira namane ya sehlabelo ye e fatolwago ka bogare, motho a feta ka gare ga mphapa le mphapa (Gen. 15:17). 19Ge e le bagolo ba Juda, le bagolo ba Jerusalema, le dikala, le baperisita, le batho ka moka ba naga, ba ba fetilego ka gare ga mphapa le mphapa wa namane ya sehlabelo, 20Ke tlo ba gafela diatleng tša manaba a bona, diatleng tša ba ba ratago go ba bolaya; mme ditoto tša bona di tlo lewa ke manong a sebakeng le dibata tša naga. 21Le yena Tsedekia kgoši ya Juda, le bagolo ba gagwe, ke tlo ba gafela matsogong a ba ba ratago go ba bolaya, le matsogong a dira tša kgoši ya Babele, tše di sa tšogo le gomela. 22Morena o re: Ke nna e, ke tlogo ba laela ba boa ba tla motseng wo, ba lwa le wona; ba tlo o thopa ba o tšhuma ka mollo. Le metse ya Juda ke tlo e dira marope a sa dulego motho.
Currently Selected:
JEREMIA 34: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
