JEREMIA 33
33
Ba tlo boa bothopša. Go tlo tla Lehlogedi la Dafida
1Mme lentšu la Morena la buša la tlela Jeremia a sa tswaleletšwe mo lapeng la kgolego, la re: 2Morena, yena modiri wa tšona, o di bopetše go di phetha, yena Morena mong wa ina. O realo Morena. 3O re: Mpitše, ke go arabe, ke go botše taba tše dikgolo tša dithopa, tše o sešogo wa di tseba. 4Gobane Morena Modimo wa Isiraele o bolela nywako ya motse wo, le nywako ya dikgoši tša Juda, ye e rutlwago ya aga merako, ya ba ya tlhabano. 5O re: Ba ba tlilego go lwa le Bakaladea ba e tladitše ka ditoto tša batho ba ke ba bolayago ke befetšwe, ke galefile, ba ke gerulago motse wo ka baka la bona ka moka. 6Ke nna e! Ke tlo tlemelela ka alafa ka fodiša, ka ba utollela humo la molao le therešo. 7Mathopša a Juda, le mathopša a Isiraele, ke tlo a buša ka a agiša wa mohlamonene. 8Ke tlo ba hlatswa bobe bjohle bjo ba nthumotšego ka bjona. Ke tlo ba lebalela mabobe a bona ohle, a ba ntshentšego ka ona, ba ntlhala ka ona. 9Ke mo Jerusalema e tlogo ba ina le le nthabišago, la go tlotlwa le go retwa ditšhabeng ka moka tša lefase, ge di botšwa tše dibotse tšohle tše ba di direlwago ke nna. Di tlo tlabja, di tlo tšhoga, ge di bona tše botse ka moka le tetlego, tše ke tlogo di direla motse wono.
10Morena o re: Felo fa le rego go senyetše ka go hloka batho le dikgomo, le metseng ya Juda, le mo mekgobeng ya Jerusalema e senyegilego ka go hloka batho le baagi le dikgomo, 11go sa tlo kwala lentšu la tlhalalo, lentšu la monyadi le lentšu la monyalwa, le lentšu la ba rego: Lebogang Morena, gobane ke yo bolo, mme botho bja gagwe ke bja neng le neng! Ba realo ba tliša dileboga mo ntlong ya Morena. Gobane ba ba thopilwego nageng ye, ke tlo ba buša, gwa tlo etša mehla yela ya bogologolo. O realo Morena.
12Morena wa mašaba o re: Felo fa go senyegago ka go hloka batho le dikgomo, le dinakaneng tša gona, go sa tlo ba le meraka le badiši ba ba hutamišago mehlape. 13Metsaneng ya dithabeng, le metsaneng ya melaleng, le metsaneng ya thoko ya borwa, nageng ya Benyamini le tikologong ya Jerusalema, le metsaneng ya Juda, go sa tlo ba le mehlape ye e balwago ke badiši. O realo Morena.
14Morena o re: Tsebang! Go tlo tla matšatši a go tšweletša tše di botse tše ke di boletšego ke era moloko wa Isiraele le wa Juda. 15Mehleng yeo le ka mabaka ao ke tlo hlogišetša Dafida lehlogedi la makgonthe; o tlo tšweletša molao le toko nageng. 16Mehleng yeo Juda o tlo phološwa; Jerusalema go tlo dulwa go iketlilwe; mme leina le ba tlogo mmitša ka lona šele: Morena toko ya rena. 17Gobane Morena o itše: Dafida a ka se ke a hloka monna wa go dula sedulong sa bogoši bja moloko wa Isiraele. 18Le baperisita le Balefi ba ka se ke ba hloka monna wa go ema pele gaka, wa go tliša dihlabelo le wa go tšhuma dibego, wa go tliša didimo tša ka mehla.
19Lentšu la Morena le tletše Jeremia la re: 20Morena o re: Le ka se ke la kgona go ka senya kgwerano ya ka le letšatši, le kgwerano ya ka le bošego, gore mosegare le bošego di se be gona ka lebaka la tšona. 21Le kgwerano ya ka le Dafida mohlanka wa ka e ka se kgone go fedišwa; a ka se ke a hloka morwa wa go bewa kgoši sedulong sa gagwe, le Balefi ba go ntirela. 22Makoko a legodimong a ka se ke a ba a balwa; lešabašaba la lewatle le ka se ke la ba la elwa. Le ba peu ya Dafida mohlanka wa ka ke tlo ba atiša gakaakao, le Balefi ba go ntirela.
23Lentšu la Morena le tletše Jeremia la re: 24A ga o ešo wa hlatha ka mo setšhaba se se botšanago ka gona sa re: Meloko e mebedi ye, ye Morena a ikgethetšego yona, o e lahlile! Ba nyatša tšhaba sa ka; ba bona go se sa ne batho. 25Morena yena o re: Bjalo ka ge go tiile kgwerano ya ka le mosegare le bošego, bjalo ka ge ke tiišitše melao ya legodimo le lefase, 26Go tiile le la go re: Peu ya Jakobo le ya Dafida nka se ke ka e lahla. Ke tlo tšea wa peu ya gago ka mmea a buša peu ya Aborahama le Isaka le Jakobo; gobane mathopša a bona ke tlo a buša; ke tlo a gaogela.
Currently Selected:
JEREMIA 33: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
