BAAHLODI 8

Gideoni o raka manaba. Leloko la gagwe

1Banna ba Baefuraimi ba tla ba bolela le Gideoni ba re: O reng o re dira ka mokgwa wo, o sa re bitše mola o tšwela go hlabana le Bamidiani? Ba mo omanya ka kudu.

2Yena a fetola a re: Nna ke dirileng se se kago etša tše lena le di dirilego? Hleng dipudutša tša Efuraimi di fetiša puno yohle ya merara ya ga Abiesere! 3Dikgoši tša Bamidiani, Orebe le Seebe, Morena o di gafetše diatleng tša lena. Nna ke kgonneng se se kago lekana le seo le se dirilego? Ge a bolela mantšu a mabjalo le bona, pefelo ya bona ya kokobela.

4Mola Gideoni a setše noka ya Jorodane a na le banna bala ba makgolo a mararo, ba be ba lapile ka go raka manaba. 5Gideoni a kgopela banna ba Sukothe a re: Batho ba ba ba nago le nna, a nke le ba neeng mefagonyana, ka gobane ba lapile; gomme re sa hlomarela Seba le Tsalamuna dikgoši tša Midiani.

6Ba bagolo ba Sukothe ba re: Afa o šetše o swere matsogo a Seba le Tsalamuna ka diatla tša gago, ge o re re nee dira tša gago magobe?

7Gideoni a re: Ruri, mohla, Morena a gafelago Seba le Tsalamuna diatleng tša ka, ke tlo tlapiriganya mebele ya lena ka meetlwa ya naga le ka mengana. 8A tloga moo a rotogela Penuele; le ba ntshe a ba kgopela ka mokgwa woo; mme batho ba Penuele ba mo fetola ka mokgwa woo wa ba Sukothe. 9Banna ba Penuele Gideoni a ba rera a re: Mohla ke boago ntwa e fedile, ke tlo phušola sebo se.

10Seba le Tsalamuna ke ge ba le Karakoro, ba na le madira a bona, e le banna ba e ka bago dikete tše lesome le metšo e mehlano, e le ba ba šaletšego ba madira a Matšwabohlabela. Ba ba bego ba bolailwe e be e le ba dikete tše lekgolo le le nago le masome a mabedi a dikete, ge go balwa ba ba bego ba swere marumo. 11Gideoni a rotoga ka tsela ya ba mehlape, a rarela Noba le Jokobea ka thoko ya bohlabela, a fenya dira tšeo, ka gobane o ba hweditše ba iketlile. 12Seba le Tsalamuna ba tšhaba, a ba šala morago, a swara dikgoši tšeo tše pedi tša Bamidiani, Seba le Tsalamuna, a šwalalanya madira a bona.

13Gideoni morwa wa Joase ge a boa mo ntweng a fologa ka sefata sa Herese, 14A swara lesogana la ba Sukothe a le botšiša; lona la mo ngwalela maina ka moka a bakgoma ba Sukothe le a ba bagolo ba gona, maina a banna ba masome a šupago le metšo e šupago. 15Ge a tla go banna ba Sukothe, a re: Seba le Tsalamuna šeba! Ke bao le nkwerilego ka baka la bona la re: Afa matsogo a Seba le a Tsalamuna a o šetše o a swere ge o re re nee batho ba ba gago ba ba lapilego magobe? 16A napa a swara ba bagolo bao ba motse, a tšea meetlwa ya naga a ba tlapiriganya, ya ba go lemolla batho ba Sukothe. 17Sebo sa Penuele a se phušola, a bolaya batho ba motse.

18Bjale Gideoni a bolela le Seba le Tsalamuna a re: Banna bala ba le ba bolailego kua Thabora e be e le ba babjang?

Bona ba re: Ba be ba etša wena, e le dinatla wa bana ba kgoši.

19Gideoni a re: Bona bala e be e le bana bešo, bana ba mme. Ka bophelo bja Morena ge le ka be le ba leseditše ba phela, nka be ke sa le bolaye. 20A botša Jethere morwa wa gagwe wa ntlha a re: Tsoga, o ba bolaye. Lesogana leo la se ke la khwamola tšhoša, le boifa ka ge e sa le lesoganyana.

21Seba le Tsalamuna ba re: A go tsoge wena o re bolaye, ka gobane monna o ka maatla a gagwe. Gideoni a tsoga a bolaya Seba le Tsalamuna; a tšea maseka a mo melaleng ya dikamela tša bona.

22Banna ba Isiraele ba tla ba bolela le Gideoni ba re: Baa kgoši ya rena, wena le morwa wa gago, le morwa wa morwa wa gago; ka gobane o re namoletše diatleng tša Bamidiani.

23Gideoni a re: Nna nka se be kgoši ya lena; le morwa wa ka a ka se be kgoši ya lena. Kgoši ya lena ke Morena. 24Gideoni a ba rera a re: Ke na le se ke se kgopelago go lena: E mongwe le e mongwe a a nnee lengina le a le thopilego. Bamidiani ba be ba apara mangina a gauta ka gobane e be e le Baisimaele.

25Ba re: Ona re tla go nea. Ba ala kobo; ka moka ba lahlela mangina a ba a thopilego. 26Gomme theko ya mangina ao a gauta a a a kgopetšego ya ba sekele tše sekete le makgolo a šupago tša gauta, go sa balwe maseka, le difaga, le diaparo tša purapura tše di bego di aparwa ke magoši a Bamidiani, go sa balwe le dingangane tša melala ya dikamela. 27Ka tšona Gideoni a dira kobo ya moperisita, a thoma modiro woo motseng wa Ofura; gomme Baisiraele ka moka ba timela ka go latela ba etla moo; ya ba moreo o tantšego Gideoni le ba leloko la gagwe.

28Bamidiani bona ba loba Baisiraele, ba se sa tsoša melala; gwa fela nywaga e masome a mane go iketlilwe nageng mehleng Gideoni a sa phela.

29Yena Jerubaali morwa wa Joase a ya a itulela motseng wa gagwe. 30Gideoni o be a na le barwa ba masome a šupago ba ba tswetšwego ke yena, gobane o be a na le basadi ba bantši. 31Mosadi e monyenyane wa gagwe, e a bego a dutše motseng wa Sikeme, le yena a mmelegela morwa, a mo rea leina la Abimeleke. 32Gideoni morwa wa Joase o hwile a tšofetše o botse, a bolokwa lebitleng la Joase tatagwe motseng wa Ofura wa ga Abiesere.

33Mehleng ya ge Gideoni a šetše a hwile, Baisiraele ba boela ba fapogela go tša Baali, ba ipeela “Baali wa Kgwerano” ya ba modimo wa bona. 34Ke ka gobane ba be ba lebetše Morena Modimo wa bona, e a ba namoletšego diatleng tša manaba a bona a bego a ba dikologile. 35Le ba leloko la Jerubaali Gideoni ga ba a ka ba ba dira gabotse, ba lebetše tše di botse tše a di diretšego Isiraele.

Currently Selected:

BAAHLODI 8: NSO51

Highlight

Copy