BAAHLODI 7
7
Gideoni o fenya Bamidiani
1Jerubaali, yena Gideoni, a tsoga e sa le bošego, a na le batho bala ka moka, ba bokana sedibeng sa Harodi; mešaša ya Bamidiani e be e le molaleng ka thoko ya Leboa, e kgotla ka mmoto wa More.
2Morena a bolela le Gideoni a re: Batho ba ba nago le wena ke ba bantši. Nka se ke ka gafela Bamidiani diatleng tša bonaba, gore ba se tlo lesa go tumiša nna, ba ikgantšha ba re: Re iphološitše ka maatla a rena. 3Bjale hlaboša lentšu, batho ba le kwišiše, o re: Ba boi le ba ba tšhogilego a ba gome, ba rarele le dithaba tša Gileada. Ke mo go gomilego batho ba dikete tše masome a mabedi le metšo e mebedi. Gwa šala ba dikete tše lesome.
4Morena a laela Gideoni a re: Batho ba e sa le ba bantši. Ba iše nokeng, ke go hlaolele ba ba tlogo sepela le wena. Yo ke tlogo re: So, wa go tlo ya le wena a a ye nago. Bohle ba ke tlogo re: Yo a se ke a ya ba se ke ba ya. 5Ya re ge a ba išitše nokeng, Morena a laela Gideoni a re: Yo a kgapetšago meetse lelemeng bjalo ka mpša ge e hlaputla ka leleme, o mmee thoko; le bao ba go nwa ba khuname, o ba bee thoko. 6Gomme palo ya ba go kgapetša meetse ka diatla melomong, ya ba banna ba makgolo a mararo; ba bangwe ka moka ba nwile meetse ba khuname ka matolo. 7Morena a botša Gideoni a re: Ke tlo le namolela ka banna ba ba makgolo a mararo ba go kgapetša meetse molomong, ya tlo ba go gafela Bamidiani diatleng tša gago. Ba bangwe ka moka a ba boele magaeng. 8Banna bao ka moka ba Baisiraele a ba lesa ba boela magaeng, a šala a na le banna bao ba makgolo a mararo; ba šala le mefago le diphalafala tša bona. Ge e le mešaša ya Bamidiani e be e le kua tlase molaleng.
9Bošego bjoo Morena a rera Gideoni a re: Tsoga o fologele mešašeng; ke e gafetše diatleng tša gago. 10Ge o ka boifa go ya o nnoši, gona tloga le Phura mohlanka wa gago, a fologe a na nago. 11O tlo re go kua tše ba di bolelago, wa tia maatla, wa hlagela mešaša yeo. Gideoni a fologa a na le Phura mohlanka wa gagwe, ba fihla go bahlometši magomong a mešaša. 12Gomme Bamidiani le Baamaleke le Matšwabohlabela ba be ba tletše molala boka tšie, dikamela tša bona e le tše di sa balwego, di kaka lešabašaba lebotong la lewatle.
13Ya re ge Gideoni a fihla moo, a kwa e mongwe a laodišetša wa gabo diloro tše a di lorilego, a re: Anke o kwe se ke se lorilego! Ke lorile kgokolo ya senkgwa e kgokologela fa mešašeng ya Bamidiani, ya fihla ya kgotla mekutwana ya e uša, ya e phekgola ya ema ka hlogo, dihlwa di tsemile fase.
14Wa gabo a fetola a re: Ga se se sengwe ge e se lerumo la Gideoni morwa wa Joase, monna eo wa Moisiraele. Morena o gafetše Bamidiani le mešaša ka moka diatleng tša gagwe.
15Ya re ge Gideoni a kwile tša diloro tšeo le tlhathollo ya tšona, a khunama ka matolo, a boela mešašeng ya Baisiraele, a re: Tsogang! Mešaša ya Bamidiani Morena o e gafetse diatleng tša lena. 16Banna bao ba makgolo a mararo a ba dira dikgao tše tharo; e mongwe le e mongwe a mo nea phalafala a e swara, le pitša e se nago selo; ba uta dirumula mo dipitšeng. 17A ba laya a re: Le lebelele nna; Le dire se nna ke tlogo se dira ge re tla mo mešaša e gomago ntshe. 18Ge nna ke letša phalafala, le lena ba le nago le nna, le letše diphalafala thoko tšohle tša mešaša, le goe le re: Ka Morena le ka Gideoni!
19Gideoni le banna ba lekgolo ba ba bego ba na nae, ba fihla mo go thomago mešaša e le bošego, bahlometši ba sa tšo bewa, ba napa ba letša diphalafala, ba pšhatlaganya dipitša tše ba bego ba di swere. 20Gwa lla diphalafala tša dihlopha tše tharo, gwa pšhatliwa dipitša, ba swara dirumula ka la ntsogošo, le diphalafala ka le legolo go di letša, ba hlaba mokgoši ba re: Ka lerumo la Morena le la Gideoni! 21Ba realo ba eme felo ga bona ba dikaneditše mešaša thoko tšohle. Mešaša ka moka ya ba mafereka, ba tšhaba ba goa. 22Banna bao ba sa letša diphalafala tše makgolo a mararo, ke ge mono mešašeng Morena a ba rarantše, ba bolayana seng sa bona ka marumo mo mešašeng ka moka. Ka moka ba tšhaba ba leba Bethe-Sita le Tserara, go fihla mahwiting a Abele-Mehola go bataganego le Tabathe.
23Bjale banna ba Isiraele, ba Nafutali le ba Asere le ba Manase, ba hlabelwa mokgoši, ba rakediša Bamidiani. 24Gideoni a roma banna ba ya dithabeng ka moka tša Efuraimi ba re: Ologang le yo thibela Bamidiani le ba lalele madibogong go fihla Bethe-Bara le nokeng ya Jorodane. Banna ka moka ba Efuraimi ba phalala, ba thiba difata tša go ya madibogong go fihla Bethe-Bara le nokeng ya Jorodane. 25Ba swara dikgoši tše pedi tša Bamidiani, Orebe le Seebe. Orebe ba mmolaya legageng la magukubu; Seebe ba mmolaya mo lwaleng la diphiri. Ba rakediša Bamidiani; gomme hlogo ya Orebe le ya Seebe ba di tliša go Gideoni a šetše a le mošola wa noka ya Jorodane.
Currently Selected:
BAAHLODI 7: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
