Madiu 27

Yudasi tauna givenuwahegena.

Afositolo 1:18-19

1Tu mala gilauna abaveyao ana tofaisewa kikaiwabudiyao kadu kaliva lakahidiyao moya'aidi hivaga'auta buye hilulukahihi be higa Yesu alika againe hinahegena. 2Ada au hiyogona be hinauwena tovehimeya kwanaLoma ana egana Failato againe hihege'aliyena.

3 # Md 26:14-15 Tu Yudasi Yesu ana tohawavemogatala Yesu alikeya hidahegena ma gi'ita-yo au nuwana gi'avilana be kabala siliva teti abaveyao ana tofaisewa kikaiwabudiyao kadu kaliva lakahidiyao agaidiya gi'aliyena higa gidaveleyewedi.

4Gigahedi gigayo, “Iya gakoyo, fa'ina kaliva hagihagina ana vita keke ma nimamiya gahawavemogatalena be gina'alika.” Badi higayo, “Gavadi-yo ime agaimeya u'ela? Tauni a vita unawahina.” Hidedemi higahe.

5Au kabala siliva manuwa-tafalolo againe gihegelukuweni tu gilowoga be gina tauna odona bulava againe gi'i'ina be gisibahina. 6Tu abaveyao ana tofaisewa kikaiwabudiyao hina siliva hivaina higayo, “Hida dayaga ana mani fa'ina ka'i velekawowo ana abasewadi manuwa-tafalolo againe kanadodona, medema keke gidalubodani.” 7Ada mena mani-nadi fa'ina buye hilukahihi ada yadi nuwanuwa againe hina avaeka ana to'aibubuna yana babi hikimonena be higa hawahawala adi didikula fa'ina. 8Mena babi-nadi dayaga ana mani againe hikimonena fa'ina, tuwaina kadu adamoya hivewagana Dayaga ana Babi. 9-10#Sak 11:12-13Medema tovai-nadi gavaimi tuwai-mo'ena Yaubada bonana ana to'awatalatalaina ana egana Yelemaiya gigaheye-vagahina, medemi gilakayemu velemo'ena gigayo,

MiIsileli kaliva fatana hisena kabala siliva teti. Ada mena silivai-nadi hivaina be hina avaeka ana to'aibubuna yana babi hikimonena, boi Yaubada givehimeyeku amine.

Hidedemi Yelemaiya gigahe.

Failato Yesu givedewayaugina.

Maki 15:1-5; Luke 23:1-5; Yoni 18:28-38

11Tu Yesu hinauwena tovehimeya kwanaLoma matane gimidimidi ada tovehimeya gitoliluveluvena gigayo, “Ka'i O'eni miYuda yadi tokaiwabu?” Yesu gigayo, “Au ugahe amine Iya'eku.”

12 # Md 26:63; Ais 53:7 Ada abaveyao ana tofaisewa kikaiwabudiyao kadu kaliva lakahidiyao hihawavekoyoyena tu keke tamo bonalaufata Yesu gidagaheye. 13Au Yesu give'amata fa'ina Failato gigahena gigayo, “Yadi hawavekoyo gavadawana O againiya, ka'i keke udanogalini?” 14Atu yadi hawavekoyo fa'ina keke tamo bonalaufata kadu gidagaheye. Hidema fa'ina tovehimeya nuwana givegafo'uya'uya lakahina.

Failato Yesu alika againe gihawahegena.

Maki 15:6-15; Luke 23:13-25; Yoni 18:39–19:16

15Tu tafalolo ana egana lobama ana tovenuwa'ata yana Abamaduviviya ana toveya tovehimeya kwanaLoma yana dewa ma yogoyogonina sa'eyana, ka'i hakwadi yo'o hive'ove'o'olena, medema tovehimeya giyauyauna. 16Ada medema tovai-nadi yogoyogonina sa'eyana moya'aidi hihalamanena-ma deliya gimiyami, ana egana Balaba. 17Au yo'o ahe hivaga'auta-yo Failato gigahedi gigayo, “Ka'i hakwadi nuwanuwami ganayauni, ka'i Balaba o ka'i Yesu Bana hivewagana Keliso Yaubada yana Tovegida?” 18#Yo 11:47-48, 12:19Fa'ina gihalamanena badi yadi ga'uma'uma fa'ina bana againe hihege'aliyena.

19Tu Failato vedewayauga ana abavetoga againe gimiyami tu vavinena venuwa'ata hi'iveninisena higayo, “Bogi againe wadema kalivai-nadi a'avayaunena be avedivediwe lakahina. Bana kaliva tunutunugina ana vita keke, fa'ina keke tamo gavadi Bana fa'ine unavehimeye.”

20Tu abaveyao ana tofaisewa kikaiwabudiyao kadu kaliva lakahidiyao yo'o hivagadonedi be Failato hinave'o'olena higa Balaba ginayauna tu Yesu alika againe ginahegena.

21 # Af 3:14 Bana tovehimeya gigahe gigayo, “Hadema kaliva nuwanuwami ganayauni?” Badi higayo, “Nuwanuwama Balaba.”

22Failato gigayo, “Au Yesu againe gavaimi ganaga, Bana hivewagana Yaubada yana Tovegida?” Moya'aidi higayo, “Kelose againe gida'alika.”

23Bana gigayo, “A! Gavadi yana koyona?” Tu badi kadu agodi gilakata-mo'a hikovakovadona higayo, “Kelose againe gida'alika.”

24Tu Failato gigahe-wayoga ada kaliva hivebutu hive'atalalakalaka ma gi'itana againe, gufa givaina digo yo'o matadiya nimana gikolana gigayo, “Hidema kalivai-nadi ana luve'alika ana vita iya keke ganawahini, au omi taumiyao mena vitai-nadi wanawahina.”

25Ada kaliva moya'aidi higayo, “Ana luve'alika ana vita au ime anawahina kadu natumeyao hinawahina.”

26Hidedemi higahe-yo Balaba giyauna be badi agaidiya gihawahegena. Tu givehimeya be tolugaviya bulava hakahakaluluna againe Yesu hinalaulauna. Hilauna gihavaina, givehimeyedi be kelose againe hinatutuvefosena.

Tolugaviya Yesu hihawavelaigena.

Maki 15:16-20; Yoni 19:1-3

27Ada tolugaviya Yesu hinauwena tovehimeya yana manuwa lakahina ana eda'awaneya hilukuwena, ada yadi yo'o moya'aidi hikovavaga'auhidi be Yesu himidififina. 28Ada ana kaleko hivehalilina be aikeva yabeyabelina tovehimeya adi vaigau amine hive'osena. 29Ada badau bulava hakahakaluluna againe hi'etowaliwalina be u'une hisena, kadu aiwala nimana i'atagine hive'abina vaita Bana tovehimeya amine. Au Bana magigine tugadi hiveve'etodonena be hihawahawavelaigena higayo, “Hoiyoi, siule siule miYuda yadi tokaiwabu!” 30#Ais 50:6Au hikiwakiwalitagona, yana aiwala hivaina be u'una hilaulauna. 31Hihawavelaigena gihavaina, ana aikeva yabeyabelina hivehalilini tu Tauna ana aikeva hive'osena, ada hinauwena be kelose againe hinatutuvefosena.

Yesu kelose againe hitutuvefosena.

Maki 15:21-32; Luke 23:26-43; Yoni 19:17-24

32Hinauna tu kaliva sa'eyana kwanaSailini himaduhagana, ana egana Saimoni. Au bana hikive'avina be higa Yesu ana kelose gina'avalana. 33Ada abaga ana egana Goligota againe hi'ela. Goligota ana kaivila bonadeya ma utouto. 34#Sam 69:21Hiyemu tu oine be gufa golagola-mo'ena hivila'atutamo'aina-ma hitunena be ginayuni-yo yana aulolo ma'i gina'atagona. Atu Yesu giyuluvaluvani-yo gikilowena. 35#Sam 22:18Ada kelose againe hitutuvefosena gihavaina, kabala hihegelakahina be iya'iyaya higaheyena higa hakwadi hakwadi ana kaleko hinavaini ma hinahalamanena. Au hidede amine ana kaleko taudiyao agaidiya hifolakena. 36Hifolakena gihavaina hihiyoto be himiyamiyatagona. 37Tu ana hawavekoyo fefe againe hi'etoladina be u'una getane hisena. Etoladi gigayo, “Hidevama Yesu miYuda yadi tokaiwabu.” 38#Ais 53:12Kadu tomunugakai'afu luhei adi kelose againe hitutuvefosedi, sa'eyana Yesu i'atagine kadu sa'eyana i'imawane.

39-40 # Sam 22:7; Yo 2:19 Tu kaliva kelose againe hinauna-ma u'udi hilewalewana hihawaluvetonovena higayo, “O ugahe vaita manuwa-tafalolo udayawelina be aiyeta tohiye againe kadu udakivemididina. Au Tauni udakibababale. Ka'i O'eni Yaubada Natuna, kelose againe uda'etoyau.”

41-42Meda anafaiweya abaveyao ana tofaisewa kikaiwabudiyao kadu Mosese yana vehimeya ana tovehawala kadu kaliva lakahidiyao buye hihawavelaigena higayo, “Mali kaliva gikibababaledi tu Tauna keke anafaiweya ginakibababaleni. Vaita Bana'e miIsileli yada tokaiwabu. Ka'i adamoya kelose againe auhe'ama ginahobu digo, ime anadavana. 43#Sam 22:8; Yo 5:18Yaubada givetuvetumaganena. Ka'i Yaubada nuwanuwana Bana'e, auhe'ama gidakibababalena fa'ina Bana gigayo, Iya Yaubada Natuna.” 44Meda anafaiweya tomunugakai'afu Bana buye kelose againe hitutuvefosedi-ma hivebutu hihawaluvetonovena.

Yesu gi'alika.

Maki 15:33-41; Luke 23:44-49; Yoni 19:28-30

45Tu umalovana babi matatabuna gi'uyuyubodena, uyadayada givebutuna be ginunauwena mala gilavina againe. 46#Sam 22:1Au mala gilavina Yesu gikova'awafatafata gigayo, “Elai Elai lama sabakitani?” “Ho yaku Yaubada yaku Yaubada, gavana fa'ina unuyabuyabuku?” Bonana ana kaivila au hidede amine.

47Ada tolauboda tufoidi hinogalini-yo higayo, “Yaubada bonana ana to'awatalatalaina Elaiya fa'ine gikovakova.” 48Auhe'ama kaliva sa'eyana gimadu balou givaina digo oine golagolana againe gi'utuvina ai againe gi'etokwanena gitunena be higa ginayuna. 49Tu tufoidi higayo, “Au gimiya. Kanaboda be kana'itana, ka'i Elaiya gina'ela be ginakibababalena o ka'i keke.”

50Yesu kadu gikova'awafatafata-yo alu'aluwana gihawahegehegena.

51-52 # Yem 26:31-33; Hi 10:19-20 Gi'alika-yo manuwa-tafalolo vetawana tabu ana abaseboda kaleko gi'ahailugana be vaita abaluku Yaubada againe gi'ayauna, kadu babi gili'uli'una kuga gi'adobona tomohuyahuya gi'ayauna be Yaubada yana kaliva tufoidi moya'aidi tuwaina hi'alika-ma himididi-havagi. 53Au tomohuyahuya hihege tu Yesu ahe gimididi-havagi yo Yelusalema againe hina moya'aidi hiyemaunidi.

54Tu bana tolugaviya adi togiyomatana be badi Yesu buye hi'ita'itave'avina-ma li'uli'u kadu gaitoma moya'aina gilakayemu-ma hi'itana againe, himatautave'ine higayo, “Wona velemo'ena Bana hidevama Yaubada Natuna.”

55 # Lu 8:2-3 Kadu vevine moya'aidi himidilauva be hilulauboda, badi Galili againe hitauya Yesu hibwa'ulina be tova moya'aina hi'ita'itave'avina. 56Badi vevine agaidiya sa'eyana Meli vineMagidala, sa'eyadi Meli Yemesa Yosefa hinadi, kadu sa'eyadi Sebedi natuneyao hinadi.

Yesu tomohuyehuyeya hihuyana.

Maki 15:42-47; Luke 23:50-56; Yoni 19:38-42

57Tu mala a gibogi kaliva wavaikuwana gi'ela, kwanaAlimadiya ana egana Yosefa, bana kadu Yesu ana tomuliya. 58#2Veh 21:22-23Bana Failato againe gina Yesu wowona give'o'olena. Au Failato givehimeya be Yesu wowona Yosefa hinavelena. 59-60#Ais 53:9Ada wowona givaina digo kaleko kwayakwayana ivaguna againe gifafana be tauna yana tomohuyahuya ivaguna kuga hinagene giyalana-ma againe giselukuwena, ada kabala lakahina againe tomohuyahuya ana eda'awana give'enobodani-yo gilowoga be gina. 61Meli vineMagidala kadu wagakoyona buye hihiyoto tomohuyahuya magigine hivehagadi.

Tolugaviya Yesu ana tomohuyahuya hi'itave'avina.

62-63 # Md 16:21; Yo 2:19-21 Bogi hida mala gilauna higa Abamaduviviya ana kidewadewa ana tova a hihegena againe, abaveyao ana tofaisewa kikaiwabudiyao kadu Falisi Failato againe hivaga'auta higayo, “Kauveya, Bana wama tove'alololo yana gahe nuwama ginunauyena higa aimo yawayawana gimiyami tu gigayo, Aiyeta tohiye ginahavaina au ganamididi-havagi. 64Kadu gigahe vaita Bana Tauna Keliso Yaubada yana Tovegida, ada mena yana fwaya koyona. Atu ka'i tova adamoya ana tomuliya hina'ela wowona hinaki'afuna be hinanauweni tu yo'o hinagahedi vaita Yesu gidamididi-havagi digo, mena fwaya wai ginamulina-ma au koyo-mo'ena. Hidema fa'ina udavehimeya be ya kalivamomo ana tomohuyahuya aiyeta tohiye hina'itave'avi-hagihagiyena be ana tomuliya keke adifaiweya wowona hinaki'afuni.”

65Failato gigahedi gigayo, “Tolugaviya gahawahegedi. Au wananauwedi ada gavaimi be tomohuyahuya wana'itave'avi-hagihagiyeni, mededemi wanadewadewa. Ana itave'avina aimo taumiyao.” 66Au hilowoga tomohuyahuya ana seboda kabala hisedonena bulava againe hisive'ave'avina, ada tolugaviya higahedi be higa hina'itave'avi-hagihagiyena.

Currently Selected:

Madiu 27: viv

Highlight

Copy