Madiu 26

Kaliva lakahidiyao hivevai be Yesu hinaluve'alikana.

Maki 14:1-2; Luke 22:1-2; Yoni 11:45-54

1-2 # Yem 12:1-27; Md 20:18 Tu Yesu hida gaitoma moya'aina givehawala gihavaina, ana tomuliya agaidiya gigahe gigayo, “Aiyeta luhei kanahegedi-yo tafalolo ana egana lobama ana tovenuwa'ata yana Abamaduviviya ginayemu ma wahalamanena, ada kaliva Iya Tohobu'ela hinahegenauweku be kelose againe hinatutuvefoseku.”

3Tu abaveyao ana tofaisewa kikaiwabudiyao kadu kaliva lakahidiyao bana abaveyao ana tofaisewa adi tokaiwabu yana manuwa againe hivaga'auta. Tokaiwabu ana egana Kaiyafasi. 4Hivaga'auta buye hivevai be higa Yesu hinakive'avikauyena be hinaluve'alikana. 5Higayo, “Ka'i yo'o hinave'atalalakalaka fa'ina, keke tafalolo lakahina ana toveya kanakive'avini.”

Kwamayoku sa'eyana Yesu Bedani againe gibunamina.

Maki 14:3-9; Yoni 12:1-8

6Tu Yesu Bedani melaleya gina Saimoni againe giwakawaka. Bana boi givedawodawowo fa'ina hivewagana tovedawodawowo. 7Saimoni yana manuweya himiyami tu kwamayoku sa'eyana Yesu liline gi'ela bunama yamumu-mo'ena fatana lakahina gi'aliyena. Mena bunamai-nadi aba'aihiwaga kugakugana againe gidauda, kuga ana egana alabasita. Ada Yesu gi'enolukekela gi'au'a tu u'una gibunamina.

8Tu ana tomuliya hi'ita-yo hinuwakoyo higayo, “Gavadi-yo hidede amine gihiwa-kawowoni? 9Ka'i hida bunama gidakimonevedamanena o mani lakahina gidavaina be koyokoyo gidaveledi.”

10Tu Yesu yadi nuwanuwa gihalamanena fa'ina gigahedi gigayo, “Gavadi-yo hida kwamayoku wa'ivewowomumuni? Ginuwakabubuyeku fa'ina yana gugai kanahawaveyamumuyena. 11Tova moya'aina koyokoyo hinafamiya himimiyami tu Iya keke aimo omi buye tova moya'aina kanamiyami. 12#Yo 19:40Tova kabisona gana'alika fa'ina hida bunamai-nadi wowokuya gihiwana be aku aihuya fa'ina gikidewedewe-vagahiku. 13Gagahe velemo'ena fafali ha'amine ha'amine kibababala ana Venuwa'ata Yamumuna hinalulumamalena, meda yana huluva hagihagina Iya agaikuya ma hinalukahihiyena be ana abanuwa'udu'udu fa'ina.”

Yudasi Yesu nibaineyao agaidiya ginahawavemogatalena.

Maki 14:10-11; Luke 22:3-6

14-15Yesu gigahe-yo kaliva sa'eyana yo'o tuwelo agaidiya, ana egana Yudasi-Isikaliyota, gina abaveyao ana tofaisewa kikaiwabudiyao agaidiya gigahe gigayo, “Ka'i Yesu omi agaimiya ganahege'aliyena o mani gavaiyehi wadaveleku?” Au kabala siliva teti (30) hivelena. 16Medema tovai-nadi Yudasi givebutu tova yamumuna gilelele be Yesu nibaineyao agaidiya ginahawavemogatalena.

Yesu ana tomuliya buye Abamaduviviya a'ana hi'ana.

Maki 14:22-26; Luke 22:7-13

17 # Yem 12:14-20 Tu tafalolo ana egana Beledi keke Wa'isina giyemu, ada ana aiyeta nagona againe tomuliya Yesu againe hi'ela higayo, “Yada tafalolo ana egana Abamaduviviya giluveda'ufo. Ha'againe nuwanuwa ime Abamaduviviya a'ana anakidewedeweni-yo kana'a?”

18 # Yo 17:1 Gigayo, “Wanana Yelusalema ana melaleya kaliva sa'eyana againe wanagahe wanagayo, Tovehawala gigahe gigayo, Yaku tova a giluveda'ufo. Iya'eku aku tomuliya buye ana'ela be Abamaduviviya a'ana ya manuweya ana'ana.” 19Au tomuliya Yesu givehimeyedi amine hina be Abamaduviviya a'ana hikidewedewena.

20Mala gibogi Yesu ana tomuliya buye hi'enolukekela be hina'a. 21Ada hi'au'a tu Bana gigayo, “Gagahe velemo'ena kaliva sa'eyana agaimiya nibaikweyao agaidiya ginahawavemogataleku.”

22Au hi'ase'u'aulolo hivebutu sa'eyana sa'eyana hitoliluveluvena higayo, “Kauveya, iya'eku ma ka'i keke?” Hidedemi higahe.

23 # Sam 41:9 Yesu gigayo, “Bana a'a nau'a againe Iya buye ana'utuvina-ma kalivai-nadi nibaikweyao agaidiya ginahawavemogataleku. 24Iya Tohobu'ela gana'alika Yaubada bonana eto'etoladina gigaheyena amine. Tu hoiyoi kaliva Iya Tohobu'ela nibaikweyao agaidiya ginahawavemogataleku amanadi! Bana vita lakahina ginanuhagana. Ka'i bana kalivai-nadi keke gidatubuga, medema gidalubodana fa'ina keke vita gidawahini.”

25Au bana tohawavemogatala Yudasi gigayo, “Tovehawala, iya'eku ma ka'i keke?” Yesu gigayo, “Au ugahe amine o'eni.”

Yesu sakalameni ana dewa giseyemaunena.

Maki 14:22-26; Luke 22:14-20; 1 Kolinita 11:23-25

26 # Yo 6:54-56 Tu au ana toveya Yesu a'a givaina digo Yaubada againe givesiule gikihinena au ana tomuliya giveledi gigayo, “Hida wowoku, wavaini be wa'a.”

27-28 # Yem 24:8; 1Ko 10:16 Ada gowa givaina digo givesiule giveledi gigayo, “Moya'aimi wayuyeni. Hida dayagiku gimadumadu-ma moya'aidi fa'idiya be yadi koyona Yaubada ginayawelina fa'ina, higa Yaubada yana veyao omi agaimiya gisena-ma ana iya'iyaya. 29Gagahemi hida babi ana oine tova adamoya buye kayuyuna-ma aimo keke ganayu-havagileni tu tova mulina Kamaku yana avemwamwala ginasena ana toveya, oine ivaguna Iya omi buye kanayuna. Mena avemwamwalai-nadi badi yana itave'avina againe himimiyami-ma fa'idiya ginasena.” Hidedemi Yesu givenuwa'atadi.

30Ada au kwelidavadava hikweliyena. Hikweliyena gihavaina, hina oya Olive againe hilaka.

Yesu Fita yana vekeke fa'ina gigaheye-vagahina.

Maki 14:27-31; Luke 22:31-34; Yoni 13:36-38

31 # Yo 16:32; Sak 13:7 Tu Yesu gigahedi gigayo, “Bogi hidevama moya'aimi Iya fa'ikuya wanamatauta be wana'otayabuyabuku, fa'ina tuwai-mo'ena Yaubada bonana eto'etoladina gigahe gigayo,

Sifi adi to'itave'avina ganamununa

ada sifi adi yo'o hina'abinauna.

32 # Md 28:7 Tu Yaubada ahe ginasivemididiku-yo Galili againe wai gananagona.”

33Au Fita gigahena gigayo, “Ka'i badi moya'aidi hina'otayabuyabu digo, iya keke gana'otayabuyabu, keke-mo'a.”

34 # Md 26:69-75 Yesu gigayo, “Gagahe velemo'ena againiya, hidema bogi-nadi kamukamu keke ginakwage tu nagona o tauni unamidivekekeyeku tohiye.”

35Fita gigayo, “Ka'i nuwanuwadi iya O buye hinaluve'alikada, au keke-mo'a ganavekekeye.” Ada tomuliya moya'aidi kadu hidede amine higahe.

Yesu Gedasemani againe yana watagiya give'o'ola.

Maki 14:32-42; Luke 22:39-46

36Tu Yesu ana tomuliya buye hina abaga sa'eyana ana egana Gedasemani againe himiyami tu gigahedi gigayo, “Hidedei wanahiyoto tu yuwa ganana ganave'o'ola.” 37Ada Fita kadu Sebedi natuneyao luhei buye ginauwedi be hinavebwa'uliyena, au givebutu gi'ase'u'aulolo be givedivediwe. 38#Yo 12:27Gigahedi gigayo, “Ga'ase'u'aulolo lakahina vaita yawaiku gida'alagolohini. Hidedei wanamiyami Iya fa'ikuya wanavanevanenega.”

39 # Hi 5:7-8 Au gina matalaviseya babiya gi'oduve'uve'umagigi, givebutu give'o'ola gigayo, “Ho Kamaku, ka'i ya nuwanuwa amine hida aulolo ana gowa udavaihegena tu keke yaku nuwanuwa au O'eni ya nuwanuwa amine unahuluva.” 40Ada giyewana ana tomuliya adi'itoto hidauda-ma gihagadi, ada Fita againe gigahe gigayo, “A! Bai sa'eyanaga ka'i keke afaiweya Iya fa'ikuya unavanevanenega? 41Au wanavanevanenega wanave'ove'o'ola be keke aladibidibi againe wanaluku. Ase'asemi gihawahegena tu wowomi gifwalele.” Hidedemi Yesu gigahe.

42 # Hi 4:15 Kadu tova anavelu gina give'o'ola-havagi gigayo, “Ho Kamaku, ka'i hida aulolo ana gowa keke afaiweya unamaduvaihegeni tu nagona ganayuyena, au ya nuwanuwa amine unahuluva.” 43Give'o'ola gihavaina, kadu giyewana badi matadi gineganega-mo'a fa'ina hidauda-ma gihagadi. 44Au kadu ginuyabuyabu-havagiledi gina give'o'ola tova anaveto ahe give'o'ola amine.

45Kadu ana tomuliya agaidiya giyewana gigahedi gigayo, “Ka'i aimo wadadauda waveyaveyawai? Wa'ita, tova ahe gilakayemu be Iya Tohobu'ela tokoyona nimadiya kaliva sa'eyana ginahawavemogataleku. 46Wamidi be kana. Ake! Wa'ita, kaliva nibaikweyao agaidiya ginahawavemogataleku-ma a giyemu.”

Yesu nibaineyao hikive'avina.

Maki 14:43-50; Luke 22:47-53; Yoni 18:3-11

47Ada aimo gigahegaheni Yudasi giyemu, bana Yesu yana yo'o tuwelo kalivana, kadu yo'o lakahina yadi wafeto yadi wafuluma buye'i, badi abaveyao ana tofaisewa kikaiwabudiyao kadu kaliva lakahidiyao hi'iveninisedi be hi'ela. 48Tu tohawavemogatala aituha yo'o boi giveledi gigayo, “Kaliva veyauga againe ganalusiuleyena-ma bana kalivai-nadi wanakive'avina.” 49Ada auhe'ama Yesu liline gimaduna gigayo, “Aku Tovehawala siule!” Gigahe-yo giveyaugina.

50Yesu gigahena gigayo, “Kusebo, ya nuwanuwa unamadugana.” Gigahe-yo yo'o hi'ela Yesu hikive'avina. 51#Yo 18:26Au kaliva sa'eyana Yesu buye himiyami-ma nimana gitunena, yana feto gisiwakana digo abaveyao ana tofaisewa adi tokaiwabu ana agetoga gilauna be tagana giluyo'ena.

52Tu Yesu gigahena gigayo, “Ya feto uvaiyeweni ana foseya useni. Gaveyao moya'aidi feto againe atagidi hiludakana, medema feto againe hina'alika. 53Ka'i inubaku aimo keke wadahalamaneni? Ka'i nuwanuwaku digo, akufaiweya Kamaku againe ganave'o'ola be auhe'ama lobama ana tovenuwa'ata tausani a gavaiyehi gina'iveninisedi be hinalugolegoleku. 54Tu ka'i meda anafaiweya lugolagola fa'ina gadave'o'ola digo, gavaiya'amine-yo Veyao Tuwaina ana buki yaku alika fa'ina gigaheye-vagahina ma gidalakayemu?”

55Ada medema tovai-nadi Yesu yo'oyo'o agaidiya gigahe gigayo, “Vaita Iya tomunugakai'afu amine yo aku munuga fa'ina wa'ela wafetomiyao wafulumamiyao. Tova tova manuwa-tafalolo lakahina againe gahiyoto gavehavehawala tu keke wadakive'aviku. 56#Md 26:31; Yo 16:32Atu hida gaitoma moya'aina giyemu be gavaimi tuwai-mo'ena Yaubada bonana ana to'awatalatalaina Veyao Tuwaina ana buki againe hi'etoladi, medemi ginalakayemu velemo'ena.” Hidedemi gigahe-yo tomuliya moya'aidi hi'otayabuyabuna.

Yesu miYuda yadi Koniselo agaidiya hinauwena.

Maki 14:53-65; Luke 22:54-55,63-71; Yoni 18:12-14,19-24

57Tu badi kaliva Yesu hikive'avina-ma abaveyao ana tofaisewa adi tokaiwabu againe hinauwena, tokaiwabu ana egana Kaiyafasi. Bana againe buki-vehimeya ana tovehawala kadu kaliva lakahidiyao ahe hivaga'auta. 58Bana Fita wai gimulina lauveya au tokaiwabu yana eda'awaneya gi'ela be giluku, tuilala buye hivetoga be gavadi Yesu againe hinagana, medema gina'itana.

59Tu abaveyao ana tofaisewa kikaiwabudiyao kadu miYuda yadi Koniselo moya'aidi togahe-kawowo hileledi be higa Yesu hinahawavekoyoyena. Au yadi fwaya againe vaita adifaiweya alikeya hinahegena.

60-61 # Yo 2:19-21 Togahe-kawowo moya'aidi hihawavekoyoyena tu keke tamo hakwadi to'ita velemo'ena hidahagani. Hinauwena hinauwena kaliva adi'iselu hitowamidi higayo, “Bana hima hida kaliva gigahe gigayo, Yaubada yana manuwa akufaiweya ganayawelina be aiyeta tohiye againe kadu ganakivemididina.”

62Au abaveyao ana tofaisewa adi tokaiwabu gitowamidi Yesu againe gigahe gigayo, “Ka'i bonalaufata keke afaiweya? Gavadi-yo hida kaliva yadi hawavekoyo keke udafatani?”

63 # Ais 53:7 Tu Yesu give'amata. Ada bana tokaiwabu gigahena gigayo, “Gavehimeye be Yaubada Tomiya-vagata ana egana unayakahini-yo ime agaimeya unahawavemogatala. Ka'i velemo'ena O Keliso Yaubada Natuna, Bana'e Yaubada givegidena be yada yo'o ginanagoyeda amanadi o ka'i keke?”

64 # Dan 7:13; Md 24:30 Yesu gigayo, “Au ugahe amine Iya'eku. Atu moya'aimi gagahemi tova gi'ela'ela be Iya Tohobu'ela abavetoga kikaiwabuna Tofaiwala-mo'a i'atagine ganahiyoto ma wana'itaku. E, buhibuhi tabone lobameya gana'ela'ela ma wana'itaku.”

65-66 # Yo 10:33, 19:7; 1Veh 24:16 Yesu hidede amine gigahe-yo abaveyao ana tofaisewa adi tokaiwabu ginuwakoyo, tauna ana vaigau gikaninina gigayo, “A! Yaubada gihawatagona. Kaliva kadu velugadiyao yana dewa hinalukahihiyena-ma aimo keke kanaleledi. Yana hawatagona a wanogalina. Gavaimi wanavehimeya?” Higayo, “Yaubada gihawatagona fa'ina gida'alika.”

67-68 # Ais 53:5 Au Yesu magigine hikiwakiwala hitutu'atugena, ada tufoidi hitafitafini tu hihawavelaigena higayo, “Yoi, wa'ita! O Yaubada yana Tovegida. Hakwadi gimunumunu-ma mene u'ayauneni?”

Fita Yesu givekekeyena.

Maki 14:66-72; Luke 22:54-62; Yoni 18:15-18,25-27

69Tu Fita melaleya gihiyoto tu agetoga kwamayoku bana againe gi'ela gigayo, “Kadu o'eni Yesu kwanaGalili buye wamiyami.”

70Atu moya'aidi matadiya givekeke gigayo, “Keke gadahalamane gavaimi ugahegahe.”

71Au gina abaluku againe tu agetoga kwamayoku velugana gi'itana be tolauboda agaidiya gigayo, “Hidema kaliva Yesu kwanaNasaledi buye himiyami.”

72Kadu givekeke-havagi gigayo, “Yaubada! Kaliva iya keke gadahalamaneni.”

73Himiya kabisona tu tolauboda Fita againe hi'ela higayo, “Au makewa o sa'eya agaidiya. Meya ana nogala againe ahalamane.”

74Au Fita gigayo, “Ka'i keke gadagahe velemo'ena digo, Yaubada gidahawave'aviku. Bana kalivai-nadi keke gadahalamaneni.” Gigahe-yo auhe'ama kamukamu gikwage. 75#Md 26:34Ada Fita Yesu yana gahe nuwana gi'afolena gigayo, “Kamukamu keke ginakwage tu nagona unamidivekekeyeku tohiye.” Au gina yuwa kabu'avane gitagitagi agona lakahina.

Currently Selected:

Madiu 26: viv

Highlight

Copy