Madiu 25

Ulaulatana adiveteni adi gahetalahobuhobu.

1 # Lu 12:35 Tu Yesu yana yewa'ela fa'ina gigahetalahobuhobu gigayo, “Kaliva Yaubada yana itave'avina againe himimiyami be ase'asediya givehivehimeya yadi ihuluhuluva hidede amine. Ulaulatana teni himiyami tu yadi lamufa hivaidi ada hilowoga be hina, tonagi yana kwamayoku tamana yana manuweya ginavega'aulena-ma hinabodabodana. 2Vevine faifi kwavakwavadiyao tu faifi nuwanuwahuyadiyao. 3Badi kwavakwavadiyao yadi lamufa hinauwena tu keke gufa yadi aba'aihiwaga againe hidanauweni. 4Badi nuwanuwahuyadiyao ma yadi lamufa kadu gufa yadi aba'aihiwaga againe hinauwena. 5Tonagi givekwalu lakahina fa'ina vevine edeya hibodaboda tu matadi gineganega ada au hi'enonuwaulu.

6Hidauda tu bogi nafone kaliva agodi hikovadona higayo, Tonagi giyemuyemu. Wa'ela be wamadubodebodeni. 7Au ulaulatana himidi yadi lamufa hikilakahidi.

8Badi kwavakwavadiyao tobohiyadiyao nuwanuwahuyadiyao higahedi higayo, Ali ma'i gufa yama lamufa gikwe'ukwe'u.

9Badi higayo, Keke. Ka'i hima omi'iyao ime'eyao keke adafata. Au wanana sitowa againe yami gufa wanakimonena.

10Badi hinauna yadi gufa hinakimonena tu tonagi a giyemu. Ulaulatana ahe hikidewadewa-ma bana buye hiluku be avemwamwala hina'ana. Ada au wana hifalina.

11 # Lu 13:25-27 Muliya velugadiyao hilakayemu hikova higayo, Kauveya, Kauveya, wanafali uyau ime ayemu.

12Tu bana gigayo, Gagahe velemo'ena keke gadahalamanemi.”

13 # Lu 12:40 Ada au Yesu yana gahe giluyabuna gigayo, “Wanogali! Yaku yewa'ela ana tova o ka'i ana kauwana keke wadahalamaneni fa'ina wanalulauboda.”

Tofaisewa yadi lukimokimone adi gahetalahobuhobu.

Luke 19:11-27

14Kadu Yesu gigahetalahobuhobu gigayo, “Kaliva Yaubada yana itave'avina againe himimiyami be ase'asediya givehivehimeya-ma yadi ihuluhuluva ganalukahihiyena. Kaliva lakahina mali fafali againe ginana fa'ina, yana tofaisewa giyowanidi be yana lokoloko nimadiya gisena higa hina'itave'avina. 15#Lo 12:6Kaliva sa'eyana K5,000 amine givelena, kadu sa'eyana K2,000 amine givelena, kadu sa'eyana K1,000 amine givelena. Gavaimi gavaimi adifaiweya hinafaisewa, medemi giveledi. Gifolaka gilowoga be gina. 16Gina tu tofaisewa K5,000 givelena-ma gififaisewa gififaisewa tu yana ve'atutamo'ai kadu K5,000 ginuhagana. 17Meda anafaiweya tofaisewa anavelu K2,000 givelena-ma yana faisewa againe kadu K2,000 give'atutamo'aina. 18Atu tofaisewa K1,000 givelena-ma gina kahu giyalana be yana taubada yana mani gikumulina.

19Himiyami lauva tunugina tu mena tofaisewai-dina yadi taubada giyewana ada giyowanidi be yadi faisewa fa'ina hinavenuwa'atana. 20Bana kaliva K5,000 givelena-ma kadu yana ve'atutamo'aina buye gi'aliyena K5,000. Gigayo, Kauveya, K5,000 uveleku be ga'itave'avina. U'ita, yaku ve'atutamo'aina kadu K5,000 ganuhagana.

21 # Lu 16:10 Yana kauveya gigayo, O tofaisewa hagihagi, bonaku gavele-ma u'abina. Gaitoma kabikabi'ona ufaisewa-hagihagiyena fa'ina abavehimeya moya'aina nimaniya ganasena. Agaikuya u'ela buye kanavemwamwala.

22Kadu bana kaliva K2,000 givelena-ma gi'ela gigayo, Kauveya, K2,000 uveleku be ga'itave'avina. U'ita, yaku ve'atutamo'aina kadu K2,000 ganuhagana.

23Yana kauveya gigayo, O tofaisewa hagihagi, bonaku gavele-ma u'abina. Gaitoma kabikabi'ona ufaisewa-hagihagiyena fa'ina abavehimeya moya'aina nimaniya ganasena. Agaikuya u'ela buye kanavemwamwala.

24Au bana kaliva K1,000 givelena-ma gi'ela gigayo, Kauveya, a gahalamane. O kaliva nuwa koyona. Keke udafahafaha tu u'i'aiyala-kawowo. Keke udafifaisewa tu uyauyaudi-kawowo. 25Medema fa'ina gamatauta. Gana ya mani kahuya gasevauyena. U'ita, hidei ya lokoloko.

26Au yana taubada gigayo, O tofaisewa koyo, dibu toyogina. O ugahe vaita udahalamaneku. Iya keke gadafahafaha tu ga'i'aiyala-kawowo kadu keke gadafifaisewa tu gayauyaudi-kawowo. 27Hidede amine iya fa'ikuya unuwanuwa fa'ina, vaita udana yaku mani banika againe udaseni be higa iya gayewa'ela againe, yaku mani ana ve'atutamo'aina buye gadavaina. 28Yaku mani K1,000 gavelena-ma wanavaiyewena be kaliva againe K10,000 gidadauda-ma wanavelena.

29 # Mk 4:25 Hai kaliva yana halamana o ka'i yana faisewa Yaubada givelena-ma gi'ita'itave'avina, medema yana halamana o yana abavehimeya ginave'atutamo'aina be ginatubuga-mo'a. Atu hai kaliva yana gava'adi Yaubada givelena-ma keke gida'itave'avini, medema yana halamana kabi'ona Yaubada ginavaihegena be ginamiya-kawowo. 30Ada au wama kaliva koyona keke gidadibudibumuhiga amanadi, melaleya wanahegehobuyena be umalovaneya ginamiyami. Medede againe kaliva hinatagitagi lakahina kumidi hinahobe'uwana nuwadi ginavekubokubo.” Au hidedemi Yesu gigahetalahobuhobu.

Tova mulina Tokaiwabu Yesu ginavedewayaugida.

31 # Md 16:27 Kadu Yesu gigayo, “Aimo tova mulina Iya Tohobu'ela yaku wamahalina ve'akinamanamalina ganayewa'ela. Lobama ana tovenuwa'ata Iya buye ana'ela vedewayauga ana abavetogeya yaku wakikaiwabu ganavetoga. 32Tomiyababi yami yo'o tulina tulina Iya agaikuya wanavaga'auta. Ada yomuyomu adi to'itave'avina yana yomuyomu sifi fafaline kadu manugose fafaline ginasevehailedi amine, meda Iya tomiyababi yo'o luhei amine ganasevehailemi. 33Yaku sifi i'atagikuya ganasedi tu badi manugose ma i'imawakuya ganasedi.

34 # Lu 12:32 Au Iya Tokaiwabu badi i'atagikuya hinamiyami-ma ganagahedi ganagayo, Omi Kamaku ginuwakabubuyemi-ma wa'ela yami abaga kikaiwabuna againe wanaluku be yami wavemwamwala wanamiyami. Boi tuwai-mo'ena aimo babi keke gidabubuni againe, mena abagai-nadi omi fa'imiya gikidewedewena. 35Fa'ina mafu gilauku-yo a'a waveleku, agoku gitaina-yo bwai waveleku, Iya gavekwanahawahawala-yo yami manuweya walukuweku. 36Aku aikeva keke-yo aikeva waveleku, ga'aulolo-yo wa'itave'aviku, deliya gamiyami-yo wa'ela wamadubodaku.

37Hidede amine kaliva yegayegadiyao ganagahedi tu badi hinagayo, Kauveya, gava tova a'ita mafu gilau-yo a'a avele, o ka'i ago gitaina-yo bwai avele? 38Gava tova a'ita O uvekwanahawahawala-yo yama manuweya alukuwe, o ka'i a aikeva keke-yo a aikeva avele? 39Gava tova a'ita u'aulolo-yo a'itave'avi o ka'i deliya umiyami-yo a'ela amaduboda?

40 # Gah 19:17; Hi 6:10 Iya Tokaiwabu ganagayo, Gagahe velemo'ena gavadi gavadi hida kwamana kabi'ona tobohiyakweyao agaidiya wavelugana, medema vaita Iya wadavelugaku.

41 # Ha 12:7, 20:10; Md 7:23 Tu badi i'imawakuya hinamiyami-ma ganagahedi ganagayo, Wana, omi Yaubada gi'alatabutabuyemi amanadi wana. Ai gi'alata-vagata againe wanaluku, Yaubada Setani yana yo'o tomiyalobama buye fa'idiya gikidewedewena amanadi. 42Fa'ina mafu gilauku-yo keke a'a wadaveleku, agoku gitaina-yo keke bwai wadaveleku. 43Kadu Iya gavekwanahawahawala-yo keke yami manuweya wadalukuweku, aku aikeva keke-yo aku aikeva keke wadaveleku, ga'aulolo be deliya gamiyami-yo keke wada'itave'aviku.

44Hidedemi ganagahedi tu kadu badi hinagayo, Kauveya, gava tova a'ita mafu gilau o ago gitaina o uvekwanahawahawala o a aikeva keke o u'aulolo o ka'i deliya umiyami-yo keke adaveluga?

45Ada au Iya ganagahedi ganagayo, Gagahe velemo'ena gavadi gavadi hida kwamana kabi'ona tobohiyakweyao agaidiya keke wadavelugani, medema vaita Iya keke wadavelugaku.

46Au badi hinana matahiwadi ana abageya hinamiyamiya-vagata, tu badi yegayegadiyao hinana yawai-vagata ana abageya hinamiyamiya-vagata.” Hidede amine Yesu gigahe.

Currently Selected:

Madiu 25: viv

Highlight

Copy