Yoni 18

Yesu miYuda hikive'avina.

Madiu 26:47-56; Maki 14:43-52; Luke 22:47-53

1 # Md 26:36 Yesu give'o'ola gihavaina, ime ana tomuliya buye ahobu gufa ana egana Kidiloni againe adamana. Yuwadede againe ai moya'aina faha againe gikabu, ada Yesu ime buye aluku.

2Tu bana Yudasi Yesu gihawavemogatalena-ma, abagai-nadi gihalamanena, fa'ina medede againe tova moya'aina Yesu ime ana tomuliya buye avagavaga'auta. 3Au abaveyao ana tofaisewa kikaiwabudiyao be tonagona tafatafalolodiyao adi egana Falisi, badi tolugaviya adi yo'o sa'eyana kadu tuilala tufoidi hi'iveninisedi be walamufadiyao wadakidiyao wagiyodiyao Yudasi gi'aliyedi ime Yesu buye amiyami-ma abagai-nadi againe.

4-5Hiyemu tu Yudasi Yesu ana tohawavemogatala badi buye himidimidi. Au Yesu gaitoma moya'aina Bana againe ginalakayemu-ma gihalamanena fa'ina givaga'ela badi agaidiya gigahe gigayo, “Hakwadi waleleleni?”

Badi higayo, “Yesu kwanaNasaledi.”

Bana Yesu gigayo, “Au Iya Kaliva-mo'eku.” 6Ada Yesu Tauna gigahe Iya Kaliva-mo'eku againe, au hinuvagatugu yadi wamatauta babiya hibe'u.

7Kadu gitoliluveluvedi gigayo, “Hakwadi waleleleni?”

Kadu badi higayo, “Yesu kwanaNasaledi.”

8Yesu gigayo, “Ahe gagahemi Iya Kaliva-mo'eku. Ka'i Iya waleleleku digo, hida yaku kalivamomo ma waki'ilovedi be hinana.” 9#Yo 17:12Hidedemi gigahe be bonana yana ve'o'ola Tamana againe ahe gigaheyena-ma velemo'ena gidalakayemu. Boi hidemi gigahe, “Uveleku kalivai-dina ma keke tamo gadanuhegeni-yo gidabwavi.”

10Tu Saimoni-Fita yana feto giwahina-ma gisiwakana digo kaliva sa'eyana gilauna be tagana wa'i'atagine giluyo'ena. Bana kalivai-nadi abaveyao ana tofaisewa adi tokaiwabu ana agetoga, ana egana Maleko. 11#Md 26:39Fita bana tagana giluyo'eni-yo Yesu gigahena gigayo, “Ya feto ana foseya useni. Makewa'e aulolo ana gowa Kamaku giveleku-ma ganayuyena, keke ganakiloweni.”

Anasi againe Yesu hivekotuna.

12-13Tu Yesu gigahe-yo badi tolugaviya adi tonagona buye, kadu miYuda yadi tuilala au Yesu hikive'avina be hiyogo-yo Anasi againe himidinauwena, bana Kaiyafasi lawana ada medema malamalai-nadi againe bana Kaiyafasi abaveyao ana tofaisewa adi tokaiwabu. 14#Yo 11:49-51Kadu Kaiyafasi ma boi miYuda givehimeyedi gigayo, “Gilubodana be kaliva sa'eyanaga miYuda moya'aida fa'ideya gida'alika.”

Fita Yesu fa'ine givekeke.

Madiu 26:69-70; Maki 14:66-68; Luke 22:54-57

15-16Tu Saimoni-Fita Yesu gibwa'ulina kadu iya'eku buye, iya kadu Yesu ana tomuliya. Abaveyao ana tofaisewa adi tokaiwabu gihalamane-hagihagiyeku, fa'ina yana manuwa ana eda'awaneya iya Yesu buye aluku tu bana Fita kabu'avane wana liline gimidimidi. Au iya gahobu agetoga kwamayoku wana gi'ita'itave'avina-ma againe gagahe ada wana giyauna be Fita giluku.

17 # Yo 13:38 Bana kwamayoku-nadi Fita againe gigahe gigayo, “Kadu o kalivai-nina wadema kalivai-nadi ana tomuliya agaidiya, au ayoma?” Fita gigayo, “Iya keke.”

18Tu tokaiwabu ana agetoga be badi tuilala ai hikulina kwadudu fa'ina, ada himidimidi tu ai hivevevala. Ma kadu bana Fita badi agaidiya gina gimidimidi tu ai givevevala.

Abaveyao ana tofaisewa adi tokaiwabu

Yesu givedewayaugina.

Madiu 26:57-68; Maki 14:53-65; Luke 22:66-71

19Tu bana abaveyao ana tofaisewa adi tokaiwabu Yesu gitoliluveluvena. Ime ana tomuliya fa'imeya kadu yana vehawala fa'ina gitoliluvaluva. 20#Md 26:55; Yo 7:26Bana Yesu gigayo, “Tova moya'aina kaliva moya'aidi matadiya gagahegahe. E, manuwa-abavehawala agaidiya be manuwa-tafalolo lakahina againe miYuda moya'aida kavagavaga'auta-ma, gavehavehawala tova moya'aina. Keke tamo gavadi gadagahekauyeni. 21Tu gavana fa'ina-yo Iya utoliluveluveku? Badi bonaku ahe hinogalina-ma unatoliluveluvedi. Gavaimi gagahegaheye ma hihalamanena.”

22Hidemi gigahe tu tuilala sa'eyana liline gimidimidi-ma Yesu gilu'atugena gigayo, “Gavadi-yo tokaiwabu lakahina u'ihawadamane?”

23Yesu gigayo, “Ka'i gagahe koyona digo, gavadi yaku koyona au unahawavemogatala kaliva matadiya. Tu ka'i gagahe yamumuna amine, gavadi-yo ulu'atugeku?”

24Au Anasi Bana Yesu nimana aimo yogoyogonina Kaiyafasi againe gi'iveninisena, bana abaveyao ana tofaisewa adi tokaiwabu.

Fita Yesu fa'ine givekeke-havagi.

Madiu 26:71-75; Maki 14:69-72; Luke 22:58-62

25Tu Saimoni-Fita gimidimidi tu ai givevevala. Badi kaliva buye himidimidi-ma higahena higayo, “O'eni kadu sa'eya ana tomuliya agaidiya, ka'i ayoma?” Tu kadu givekeke gigayo, “Iya keke.”

26 # Yo 18:1,10 Abaveyao ana tofaisewa adi tokaiwabu ana agetoga sa'eyana, bana kaliva tagana Fita giluyo'ena-ma tobohiyana gigayo, “Ka'i o'eni ma ga'ita, boi faha againe bana buye wamiyami, ka'i ayoma?” 27#Yo 13:38Kadu Fita givekeke-havagi. Tu auhe'ama kamukamu gikwage.

Failato againe Yesu hivekotuna.

Madiu 27:11-14; Maki 15:1-14; Luke 23:1-5

28Tu miYuda Kaiyafasi yana manuweya hihobu be Yesu hinauwena kwanaLoma yama tovehimeya yana manuwa lakahina againe. Bana tovehimeya ana egana Failato. Aimo mala gilaulauna. MiYuda taudiyao manuwa lakahina againe keke hidaluku. Ka'i hidaluku digo, adi hawata hidayawelina vaita ase'asedi hidakivebwanenena. Ka'i hidayawelina digo, tafalolo lakahina a'ana keke adifaiweya hina'ani, tafalolo ana egana lobama ana tovenuwa'ata yana Abamaduviviya. Hidede amine yadi vehimeya gisena. 29MiYuda adi hawata fa'ina Failato gihobu kabu'avane badi agaidiya be gigayo, “Hida kaliva gavaimi wahawavekoyoyeni?”

30Badi higayo, “Ka'i hida kalivai-nadi keke tokoyona, kadu keke ada'aliye o againiya.”

31 # Yo 19:6-7 Failato gigahedi gigayo, “Au omi wananauwena be taumiyao yami vehimeya amine wanavedewayaugina.”

Tu miYuda higayo, “Omi miLoma wahawatama fa'ina, keke amafaiweya anavehimeya be kaliva alika againe anahegeni tu nuwanuwama omi wanakivekelosena.” 32#Yo 12:32-33Hidede amine hihuluva be gavaimi Yesu yana alika keloseya fa'ina boi gigaheyena, medema velemo'ena gidalakayemu.

33Tu miYuda higahe-yo Failato giluku-havagi manuweya ada Yesu giyowanina be gigahena gigayo, “Ka'i velemo'ena O'eni miYuda adi tokaiwabu?”

34Yesu gigayo, “Ka'i tauni ya nuwanuwa againe hidemi ugahe, o ka'i mali kaliva Iya fa'ikuya o againiya higahe ma unogalina fa'ina ugahe?”

35Failato gigayo, “Ka'i o uvaita iya kwanamiYuda? Iya hima tuliku. O Tauni ya yo'o be kadu yami abaveyao ana tofaisewa kikaiwabudiyao iya agaikuya hi'aliye. Gavadi tamo koyona ufaisewani-yo?”

36Yesu gigayo, “Iya'eku tokaiwabu tu keke hida babi againe gadavehimeya. Ka'i hida babi againe gadavehimeya digo, yaku yo'o boiyesedi hidalugaviya be keke miYuda hidakive'aviku fa'ina. Tu yaku abavehimeya inubana tulina.”

37 # 1Ti 6:13 Au Failato gitoliluveluvena gigayo, “Velemo'ena O'eni tokaiwabu?”

Yesu gigayo, “Ika, ugahe amine tokaiwabu Iya'eku. Nuwanuwa velemo'ena fa'ina kaliva agaidiya ga'awatalatalaina. Hidema fa'ina Iya gatubuga kadu hidema fa'ina gahobu'ela babiya. Gaveyao nuwanuwa velemo'ena ana kaliva, medema bonaku hivenogalena.”

38Failato gigayo, “Nuwanuwa velemo'ena gava'adi?” Gigahe-yo gihobu-havagi kabu'avane miYuda agaidiya, ada gigahedi gigayo, “Keke tamo gavadi koyona Bana againe gadanuhagani. 39Tu tafalolo lakahina ana egana Abamaduviviya ana toveya yami dewa sa'eyana amine ganahuluva. Kaliva sa'eyana yogoyogonina ganayauna be ginahobu. Ka'i nuwanuwami hida kaliva miYuda ami tokaiwabu ganayauna?”

40Au badi miYuda hikovadona higayo, “Keke Bana'e. Ime nuwanuwama Balaba.” Tu Balaba bana tomunugakai'afu.

Currently Selected:

Yoni 18: viv

Highlight

Copy