Yoni 17

Yesu Tauna fa'ine give'o'ola.

1Tu Yesu ime ana tomuliya agaimeya gilukahihi gihavaina, lobameya gi'itavedadaga givebutu give'o'ola gigayo,

“Kamaku, yaku tova a gilakayemu. Iya O Natu aku egana unakilakahina be Iya O a egana ganakilakahina kaliva matadiya fa'ina. 2#Yo 6:39-40Au abavehimeya kaliva moya'aidi agaidiya uveleku be yaku kaliva O uveleku-ma moya'aidi yawai-vagahidi ganaveledi fa'ina. 3#1Yn 5:20Yawai-vagahidi ana nuwanuwa gavaiya'amine? Badi O Yaubada velemo'ena akaibe'u-mo'a ma hihalamane kadu Iya Yesu Keliso O u'iveniniseku-ma hihalamaneku. Au hidedemi hihalamanema fa'ina, ahe hivebutu himiyamiya-vagata. 4#Yo 4:34Ada ya faisewa uveleku be babiya ganafaisewana-ma au gafaisewa-'owona fa'ina, ya kikaiwabu tomiyababi agaidiya ahe ga'ivemogatalina. 5#Yo 17:24Kamaku, boi tuwai-lokalokana babi aimo keke kadabubuni ana toveya, Iya O'eni buye kamiyami ada Iya wakikaiwabuku. Au tova adamoya O unavehimeya be tuwaina Iya gakaiwabu-mo'a amine, meda adamoya mene umimiyami-ma againe ganakaiwabu-mo'a.

Yesu ana tomuliya fa'idiya give'o'ola.

6Tu badi tomiyababi uvenuwadadanedi be uveleku-ma ya nuwanuwa agaidiya ahe gahawavemogatalena. Nagona badi'iyao O ya kaliva tu Iya agaikuya uhawahegedi, ada O bona ahe hi'abina. 7Ada tova adamoya ahe hihalamanena yaku gahe yaku gugai moya'aina inubana au O againiya. 8#Yo 16:30Vehawala O uveleku-ma kadu badi gavehawaledi ada ase'asedi gi'onana. O againiya gatauya be gahobu'ela ma hihalamane-hagihagiyena, kadu Iya fa'ikuya higahe higayo, Wona velemona Bana Yaubada gi'iveninisena. 9#Yo 6:37Au badi fa'idiya gave'o'ola. Keke tomiyababi moya'aidi fa'idiya gadave'o'ola, au badi gaveyao Iya agaikuya uhawahegedi-ma fa'idiya gave'o'ola, fa'ina badi'iyao ya kalivamomo. 10Gaveyao moya'aidi yaku kalivamomo, medema kadu ya kalivamomo. Meda anafaiweya gaveyao moya'aidi ya kalivamomo, medema kadu badi yaku kalivamomo. Ada badi yaku kaiwabu hi'ivemogatalina. 11#Yo 17:21Ada tova adamoya O againiya ganayewaku. Iya keke babiya ganamiyami tu badi babiya hinamiyami. Ho Kamaku mahamahali, a egana fifiwalana againe unayavayavadi, eganai-nadi uveleku amanadi. Ada egana sa'eyana, kadu yada nuwanuwa au sa'eyana. Badi yada kalivamomo unayavayavadi be ide nuwanuwa sa'eyana againe kamimiyami amine, kadu badi nuwanuwa sa'eyana againe buye hinamiyami. 12#Af 1:18Aimo badi buye amiyami ana toveya, mena a egana fifiwalana uveleku-ma againe gayavadi. Tova moya'aina galugolegoledi ada keke tamo hakwadi gidabwavi tu kaliva sa'eyanaga gibwavi, bana abaga koyona ana kaliva. Bana gibwavi higa vaita O bona eto'etoladina velemo'ena ginalakayemu fa'ina.

13 # Yo 15:11 Tu tova adamoya O againiya ganayewaku, ada aimo babiya gamimiyami tu hidede amine gave'o'ole be higa badi hinavemwamwala-mo'a fa'ina. E, nuwanuwaku Iya gavemwamwala lakahina amine, kadu badi hinavemwamwala. 14#Yo 15:19O bona badi agaidiya gahawavemogatalena, ada medema fa'ina badi tomiyababi O hikilowe-ma hivenibainedi. Iya keke tokilowa amine gadanuwanuwa, kadu anafaiweya yaku kaliva keke tokilowa amine hidanuwanuwa. Keke badi amine yaku kaliva hidanuwanuwa fa'ina, au yaku kaliva agaidiya hivenibaina. 15#2Te 3:3Keke vaita gadave'o'ole be hida babi againe unavaihegedi, keke. Tu au gave'o'ole be kaliva koyona Setani againe unayavadi. 16Iya keke tomiyababi O hikilowe-ma amine gadanuwanuwa, kadu anafaiweya yaku kaliva keke badi tokilowa amine hidanuwanuwa. 17Nuwanuwa velemo'ena ase'asediya unafahana be mahamahalidiyao O fa'iniya unasevehailedi. O bona, medema nuwanuwa velemo'ena. 18#Yo 20:21Tomiyababi agaidiya u'iveniniseku be gahobu'ela amine, meda anafaiweya tomiyababi agaidiya badi gana'iveninisedi be O bona hinalumamalena. 19Ada badi fa'idiya Iya gahawahegeku O againiya be badi O againiya hinahawahegedi velemo'ena fa'ina.

Yesu tovetumagana moya'aidi fa'idiya give'o'ola.

20Tu keke hida yaku kalivagaga fa'idiya gadave'o'ola, au kadu badi aimo yadi laumamala hinanogalina be hinavetumaganeku amanadi fa'idiya gave'o'ola. 21#Ga 3:28Gave'o'ole be nuwanuwa sa'eyana againe hinamiyami. Kamaku, O Tauni nuwahinagekuya umimiyami, kadu Iya Tauku nuwahinageniya gamimiyami. Meda anafaiweya nuwanuwaku badi taudiyao nuwahinagedeya hinamiyami be tomiyababi moya'aidi hinagahe hinagayo, Wona velemona Yaubada gi'iveninisena be gihobu'ela. 22#Af 4:32Ada kikaiwabu uveleku-ma kadu badi gaveledi be ide nuwanuwa sa'eyana againe kamimiyami amine, meda anafaiweya badi nuwanuwa sa'eyana againe hinamiyami fa'ina. 23E, Iya Tauku badi nuwahinagediya gamimiyami kadu O Tauni nuwahinagekuya umimiyami be higa yadi nuwanuwa leleleya-mo'a hinamiyami. Nuwanuwaku nuwanuwa leleleya-mo'a hinamiyami be hida iya'iyaya againe tomiyababi moya'aidi hinahalamanena O u'iveniniseku be gahobu'ela. Kadu hinahalamanena ya nuwanuwa Iya agaikuya usena amine, meda badi agaidiya ya nuwanuwa ahe usena.

24 # Yo 14:3 Kamaku, nuwanuwaku yaku kaliva uveleku-ma Iya ganamiyami againe badi buye anamiyami. E, buye anamiyami be yaku kikaiwabu O uveleku-ma hina'itana fa'ina. Tuwai-lokalokana aimo keke babi kadabubuni ana toveya O nuwanuwa Iya'eku fa'ina, hida kikaiwabu uveleku.

25Ho Kamaku yegayega, tomiyababi keke hidahalamane nonogana Iya gahalamane, kadu hida yaku kaliva O u'iveniniseku ma hihalamanena. 26#Yo 17:6Ada O'eni badi agaidiya gahawavemogatale, kadu tova moya'aina ganahawahawavemogatale be ya nuwanuwa lakahina Iya agaikuya useusena-ma badi taudiyao nuwahinagediya hina'aya'ayaunena, kadu Iya Tauku nuwahinagediya ganamiyami fa'ina.”

Au hidedemi Yesu yana ve'o'ola Tamana againe.

Currently Selected:

Yoni 17: viv

Highlight

Copy