Afositolo 12

Yemesa hiluve'alikana tu Fita deliya hisena.

1Himiyami tu kini Helodi givebutu tovetumagana adi yo'o kalivadi tufoidi gikikivekoyodi. 2#Md 4:21Au givehimeya be Yemesa Yoni tobohiyana ilama againe u'una hinikehegena. 3#Yem 23:15Yemesa giluve'alikana fa'ina, badi miYuda yadi tonagona nuwadi gikiveyamumuna. Yadi nuwayamumu gi'ita-yo au givehimeya be Fita hikive'avina. Ada tafalolo ana egana Beledi keke Wa'isina againe hida gaitoma gilakayemu. 4Ada au Fita hikive'avini-yo deliya hiselukuwena, ada Helodi givehimeya be tolugaviya adi bo'u fowa amine hina'ita'itave'avina, kadu kaliva-mo'edi fowa fowa amine. Kadu givevai be tafalolo lakahina Abamaduviviya ana tova ginahavaini-yo kaliva moya'aidi matadiya ginavedewayaugina. 5#Ef 6:18Ada au tolugaviya Fita deliya hi'ita'itave'avina tu badi tovetumagana Yaubada againe bana fa'ine hive'o'ola'ima'ima-mo'a.

Lobama ana tovenuwa'ata Fita deliya giyauna be gihobu.

6Tu bogi gihobu ana uyadeyadeya Helodi kaliva matadiya ginavedewayaugina, bogi-nadi againe Fita ana to'itave'avina adi'iselu hinafadiya gidauda, ada bulava kainumula againe nimana fafalina fafalina tolugaviya adi'iselu agaidiya hiyogovefosena. Kadu tolugaviya deli ana eda'awana hi'ita'itave'avina. 7#Af 5:19, 16:26Fita gidauda tu auhe'ama Kaiwabu yana tovenuwa'ata gilu'afuneunena be mahaline abamiyami gituvemahalina. Au tovenuwa'ata Fita yalona gitafina higa giluvaguna gigayo, “Umadumidi.” Auhe'ama bulava kainumula Fita nimane gi'agologolota tu gimidi.

8Gi'agolohini tu tovenuwa'ata gigahena gigayo, “Beleta usidoneni, ageyafayafa uhifo.” Au Fita gisidoneni gihifo-yo tovenuwa'ata gigayo, “A aikeva u'ose be u'ela kana.” 9Au Fita tovenuwa'ata gimuliyena ada deliya hihobu, tu keke gidahalamaneni ka'i velemo'ena tovenuwa'ata giluvaguna be gihobuyena o ka'i gi'avayauna. 10Au tolugaviya adi yo'o sa'eyana hihegedi kadu anavelu hihegedi, hinauna tu melala ana eda'awana againe hiyemu, eda'awanai-nadi againe wanafali kainumula gidauda. Au wanafali tauna gi'ayauna be melala hinagene hinauna. Eda sa'eyana againe hinauna tu hihegena, au tovenuwa'ata gilu'amuvedamana be ginuyabuyabuna.

11Ginuyabuyabuni tu Fita gavadi bana againe gilakayemu-ma gi'ayaunena gigayo, “Au adamoya ahe gahalamanena, velemo'ena Kaiwabu yana tovenuwa'ata gi'iveninisena be Helodi nimane gilugolegoleku, kadu miYuda agaidiya gilugolegoleku be gavaimi hinuwanuwa iya gananuhagana-ma keke ginalakayemu.”

Fita tovetumagana ve'o'ola fa'ina hivaga'auta-ma

agaidiya giyemu.

12Hidedemi Fita gi'ayauneni-yo Meli yadi manuweya gina, badi Yoni-Maki hinana. Medede againe kaliva moya'aidi ahe hivaga'auta be Fita fa'ine hive'ove'o'ola. 13Au Fita giyemu wanafali gava kwaune gikifisifisi'a ada agetoga kwamayoku sa'eyana, ana egana Loda, gi'ela be wana ginayauna. 14Fita gikovakova ma agona ana nogala gihalamanena, au nuwana gi'ayauyauna lakahina fa'ina wana keke gidayauni, tu gimaduluku vetawaneya givenuwa'atadi gigayo, “Hei! Fita giyemu.”

15Badi higayo, “O kwavakwava.” Tu bana kwamayoku yana gahe giseseve'ave'ahina gigayo, “Au velemona.” Yana gahe giseve'ave'ahina fa'ina, badi higayo, “Mema aluwana.”

16Badi buye hilulukahihi tu Fita aimo gikikifisifisi'a, fa'ina hina wana hidayauna ma hi'ita-yo au nuwadi givegafo'uya'uya. 17#Af 12:7-8Tu bana nimane giluhawatadi tu gavaiya'amine Kaiwabu deliya gisehobuyena ma agaidiya gi'awatalatalainena. Kadu gigahedi gigayo, “Yemesa tobohiyaneyao buye wanavenuwa'atadi.” Gilukahihi gihavaina au gina mali melaleya.

18Tu mala gilauna tolugaviya hi'enoviladi againe, Fita fa'ine yaudi gilowona hive'agahegahe higayo, “Ha! Fita hami gina?” 19Bana Helodi givehimeya be hinalelena tu hilele-wayoga. Au tolugaviya gitoliluveluve-fa'ilidi, ada au givehimeya be hinaluve'alikadi.

Tu muliya Helodi Yudiya ginuyabuyabuna be gina Sisaliya againe gimiyami.

Helodi gi'alika.

20Ada bana Helodi miTaiya miSaidoni givekwavekwageyedi toyogina fa'ina hivaga'auta be hina Helodi hina'itana. Nagona hina kaliva sa'eyana himidivetobohiyanena, ana egana Bilasito, bana kalivai-nadi Helodi yana tofaisewa kikaiwabuna. Hivetobohiyanena be ginana Helodi nuwana ginakiveyamumuna fa'ina. Hivetobohiyaneni-yo au Helodi againe taudiyao hina higayo, “Ime nuwanuwama veyao.” Badi adiga bana yana fafali againe giyemuyemu fa'ina nuwanuwadi hinaveyao. 21Ada Bilasito Helodi againe gigahe-yo au tova gisena, ada kini ana vaigau kikaiwabuna gi'ose-yo yana didiga'u'uya gihiyoto au yo'o agaidiya gilumamala. 22Gilumamala gihavaina badi hikovakova higayo, “Wama keke kaliva agona, au Yaubada ago-mo'ena kanogalina.” 23Badi yo'o hikovakova tu bana keke Yaubada ana egana gidakilakahini fa'ina, auhe'ama Kaiwabu yana tovenuwa'ata aulolo givelena. Au oloto kamona hi'au'ana be gi'alika.

24 # Ais 55:11; Af 19:20 Ada au fafali tulina tulina agaidiya kaliva moya'aidi Yaubada bonana hinogalina be hivetumaganena.

25Tu Banabasi ada Saulo tovetumagana adi tonagona agaidiya mani hinauwena-ma faisewai-nadi hiluyabuna, au Yelusalema hitauya Anidiyoka againe hiyewadi, ada kaliva sa'eyana ana egana Yoni-Maki hivega'aulena be buye hina.

Currently Selected:

Afositolo 12: viv

Highlight

Copy