Afositolo 11

Fita yo'o tulidiyao yadi vetumagana fa'ina tovetumagana

Yelusalema againe givenuwa'atadi.

Afositolo 10:9-44

1Tu afositolo ada tovetumagana Yudiya againe himiyami-ma yo'o tulidiyao kalivai-dina valeyadi hinogalina, higa Yaubada bonana badi kadu hi'idibumuhigena. 2-3Tu miYuda tovetumagana tufoidi hinuwanuwa vaita yo'o tulidiyao kalivai-dina hinamidivetumagana againe gilubodadi be Yaubada yana iya'iyaya wowodiya hidatomogolohina Yaubada miYuda fa'idiya givehimeya amine. Hidema fa'ina Fita Yelusalema againe gilaka'ela ana toveya badi miYuda tovetumaganai-dina Fita hi'awalavena higayo, “O'eni yo'o tulidiyao kalivai-dina agaidiya una uwakawaka, badi wowodiya iya'iyaya keke hidatomogolohini, kadu taumadi badi buye wa'a.” Hidedemi higahe.

4Au Fita gaitoma moya'aina gilakayemu-ma badi agaidiya gilukahihiye-'owona. 5Inubane givebutu gilukahihi gigayo, “Melala ana egana Yofa againe gamiyami ada gave'ove'o'ola tu ga'eno'ita. Gaitoma sa'eyana vaita lifi lakahina amine ga'itana, ada vaita gaveyao hukuna fowa hida'abi'abini be lobameya hidatunevelowoni-yo iya lilikuya gihobu. 6Au galukenala be gana'ita-hagihagiyena ada kevakeva tulidi tulidi ga'itadi, madumadugidiyao gayagayagidiyao yaveyavegidiyao. 7Ga'ita'ita tu ago'ago sa'eyana ganogalina gigayo, Fita, umidi. Au tamo kevakeva umunu be u'a. 8Tu iya gagayo, Kaiwabu, keke-mo'a! Mema kevakeva koyodiyao, boi keke tamo iya awakuya gadaseni.

9Kadu agona lobameya ganogali-havagilena gigayo, Gavadi moya'aina Yaubada gikiveyamumuyedi-ma o keke unahawavekoyoyeni. 10Ada au hidede amine gigahe tohiye au lifi matatabuna lobameya tamo hakwadi gisilakahina.

11Lobameya lifi gilakalaka tu medema tovai-nadi kaliva adi'itoto iya gamiyami manuwai-nadi againe hiyemu. KwanaSisaliya gi'iveninisedi be iya hinaleleku. 12Tu Alu'aluwa Mahalina gigaheku gigayo, Omi miYuda ami hawata fa'ina keke unanuwanuwa, au badi buye wanana. Hidemi gigahe. Kadu hida tovetumagana adivesikisi buye kamimiyami-ma iya buye ana Sisaliya againe, ada moya'aima Koniliyo yana manuweya aluku. 13Ada bana kahihina ime agaimeya gilukahihiyena, gigahe vaita Yaubada yana tovenuwa'ata sa'eyana gida'ela yana manuweya gidamidi-yo gidagaheni gidagayo, Tamo hakwadi Yofa againe una'iveninisena be kaliva sa'eyana ginayowanina, ana egana Saimoni-Fita. 14#Af 16:31Ada bana venuwa'ata ginalukahihiyena be o'eni ya yo'o buye'i Yaubada yana kibababala wananuhagana fa'ina. Hidedemi givenuwa'ataku.

15 # Af 2:4 Ada iya gavebutu galumamala againe, Alu'aluwa Mahalina boi nagona ide giluvaiyeda amine, kadu badi giluvaiyedi. 16#Af 1:5Au Kaiwabu bonana nuwaku gi'afolena gigayo, Yoni gufa againe gikivebafitaisoyemi tu Yaubada Alu'aluwa Mahalina againe ginakivebafitaisoyemi higa alu'aluwami gina'utuvina. 17Au ide miYuda Kaiwabu Yesu Keliso againe kavetumagana ana toveya, Yaubada Alu'aluwana ide agaideya gihawahegena amine, meda anafaiweya yo'o tulidiyao kalivai-dina agaidiya Alu'aluwa Mahalina gihawahegena. Ada au iya vaita hakwa'adi amine-yo Yaubada gadahawatani be keke badi agaidiya ginahawahegeni?” Au hidedemi Fita gilukahihi.

18 # Af 14:27 Tu badi miYuda tovetumagana Fita yana gahe hinogalini-yo yadi awalava au hi'ilovena, ada Yaubada hihawadavadavana higayo, “Au adamoya ahalamanena Yaubada nuwanuwana kadu yo'o tulidiyao hinanuwavilana be yawaidi ivaguna hinavaina.”

Tovetumagana Anidiyoka melala againe kahihidi.

19Tu Sitiveni miYuda hitutuve'alikana ana toveya, kadu hivebutu tovetumagana moya'aidi hiveve'umagigiyedi ada au fafali tulidi tulidi agaidiya hi'ota. Tufoidi hina ma'i lauveya fafali ana egana Finisiya againe, kadu himula ana egana Saifilasi againe, kadu melala ana egana Anidiyoka againe. Ada Yesu bonana hilumamalena tu miYuda gagana agaidiya hilumamala. 20Tu tovetumagana tufoidi, miSaifilasi kadu miSailini Anidiyoka againe hina be kadu yo'o tulidiyao kalivai-dina agaidiya hilumamala, Venuwa'ata Yamumuna Kaiwabu Yesu fa'ine hilukahihiyena. 21#Af 2:41Ada Kaiwabu yadi laumamala againe gifaiwalaveledi-yo yo'o lakahina Kaiwabu Yesu againe hihagaviladi be hivetumagana.

22 # Af 4:36 Tu tovetumagana adi yo'o Yelusalema againe tovetumagana Anidiyoka againe valeyadi hinogalina, ada adi tonagona sa'eyana Banabasi hi'iveninisena be gavadi Anidiyoka againe gilakayemu-ma ginana gina'itana. 23#Af 14:22Ada bana ahe giyemu be Yaubada yana nuwadoga miAnidiyoka agaidiya givetalaiyena-ma gi'itana againe, au givemwamwala, ada gilu'ageyedi be keke hinanuwayewa, au Kaiwabu againe hinamiyamiyave'avina tova moya'aina. 24Bana Banabasi ma kaliva hagihagina, Alu'aluwa Mahalina ahe giluvaiyena kadu yana vetumagana toyogina. Ada au kaliva keke sa'eyadi hivebutu Kaiwabu againe hivetumagana.

Banabasi Saulo, higa Folo, givega'aulena be

buye hivehavehawala.

25Banabasi gimiyami tu tova sa'eyana gina Tasasi melala againe be Saulo ginavega'aulena fa'ina. 26Ginuhagana againe Anidiyoka melala againe gi'aliyena. Ada badi adi'iselu tovetumagana adi yo'o buye hivagavaga'auta ada kaliva moya'aidi hivehavehawaledi. Hidedemi hinunauwena malamala sa'eyana, ada Anidiyoka againe kaliva-kawowo tovetumagana himidivewagadi Kelisitiyani, badi higa Keliso yana kaliva.

27Tu medema tovai-nadi kaliva gavadi aimo ginayemu-ma ana to'awatalatalaina tufoidi Yelusalema againe hitauya be Anidiyoka againe hiyemu. 28#Af 21:10Kaliva sa'eyana agaidiya, ana egana Agabasi, gitowamidi be Alu'aluwa Mahalina yana hawavemogatala againe loka lakahina fa'ina givenuwa'atadi gigayo, “Aimo loka lakahina fafali moya'aina agaidiya ginalakayemu.” Ada lokai-nadi gilakayemu Loma Tokaiwabu lakahina ana egana Kelodiyo yana toveya. 29#Lo 15:26Au tovetumagana Anidiyoka againe loka valeyana hinogalina fa'ina, hivevai be yadi velekawowo hinasena, ada tobohiyadiyao tovetumagana Yudiya againe himiyami-ma hinavelugadi fa'ina. Kaliva sa'eyana sa'eyana gavadi adifaiweya, medema hinasena. 30Ada au moya'aidi yadi velekawowo hisena, ada Banabasi Saulo mani-nadi Yelusalema againe hinauwena be tovetumagana adi tonagona hiveledi.

Currently Selected:

Afositolo 11: viv

Highlight

Copy