Afositolo 13

Alu'aluwa Mahalina Banabasi ada Saulo higa Folo givegidedi

be Yesu bonana hinawahidadanena.

1Tu Anidiyoka againe tovetumagana adi yo'o agaidiya Yaubada bonana ana tolaumamala kadu ana tovehawala himiyami, adi egana Banabasi, Simiyoni kadu ana egana velugana Kwaukwauha, Lusiyo kwanaSailini, Maneyeni bana Helodi Galili ana tovehimeya buye hive'alakalakata, kadu Saulo. 2#Af 9:15Tova sa'eyana Kaiwabu hihawahawadavadavana kadu hilabelabewaviyo tu Alu'aluwa Mahalina gigahedi gigayo, “Faisewa sa'eyana fa'ina Banabasi ada Saulo gavegidedi. Au Iya agaikuya adi'iselu wanasevehailedi.” 3#Af 6:6Ada au hilabewaviyo hive'o'ola gihavaina, nimadi badi agaidiya hisena be hi'atuhegedi.

Banabasi ada Saulo Saifilasi againe hilumamala.

4Tu Alu'aluwa Mahalina Banabasi ada Saulo gi'iveninisedi be hilowoga, taliya ana melala againe hihobu ana egana Selusiya, ada wakeya hiyage hina himula sa'eyana ana egana Saifilasi againe. 5#Af 12:12Ada melala sa'eyana againe hiyemu, ana egana Salamisi. Mededei miYuda yadi manuwa-abavehawala sinagogi agaidiya Yaubada bonana hilumamalena. Yoni-Maki bana buye hi'ela adi toveluga fa'ina.

6Au himula inubane hilowoga hina tabone hiluyabuni-yo Fafosi melala againe hiyemu. Medede againe tokwelikweli sa'eyana hinuhagana, ana egana Ba-Yesu kwanaYuda, ada bana gigahe vaita tauna Yaubada bonana ana to'awatalatalaina tu give'alololo. 7Bana himula ana kabemani buye himiyami, tovehimeyai-nadi ana egana Sediyo-Folo, bana kaliva halamanina. Ada tovehimeya Banabasi be Saulo giyowanidi be bana againe hina'ela, fa'ina nuwanuwana Yaubada bonana ginanogalina. 8Tu tokwelikweli, ana egana velugana bona Gilika againe ma Elimasi, badi Banabasi be Saulo bonadi gihawatagona, fa'ina keke nuwanuwana tovehimeya Yesu ginavetumaganeni. 9-10#Af 4:8; Yo 8:44Hidedemi gihuluva fa'ina Saulo, kadu ana egana velugana Folo, Alu'aluwa Mahalina bana giluvaiyeni-yo tokwelikweli againe gi'itadonadona gigayo, “O'eni ma Setani natuna. Gaitoma moya'aina hagihagina udibutoyoge-'owona. O tove'alololo kadu kaliva koyo, koyo-mo'e. Tova moya'aina Kaiwabu yana eda tunutunugina ukikivebavebalana. 11Au unogali! Adamoya Kaiwabu nimane ginamunu, ada mata ginakoyo be kauwana yana mahalina keke una'itani, unanunauwena ana tova Yaubada ginavehimeya.” Gigahe be awana gi'agolohina, auhe'ama Elimasi matana giluhowahowa be gi'uyuyuna, ada au gikifihafihaga be tamo hakwadi nimane gina'abina be ginanunudadana. 12Ada tovehimeya gavadi gilakayemu-ma gi'ita-yo givetumagana, yadi vehawala Kaiwabu fa'ina ginogalini-yo nuwana givegafo'uya'uya.

Banabasi ada Folo Anidiyoka fafali ana egana Fisidiya

againe hilumamala. Nagona miIsileli kahihidi hiyakahina.

13Tu Folo tobohiyaneyao buye wakeya hiyage, Fafosi hinuyabuyabuni tu lehageya hinauna hinauna ma'i lauva tunugina-yo fafali ana egana Famifiliya againe hidamana'ela, au hilaka melala ana egana Fega againe. Hiyemu tu Yoni-Maki ginuyabuyabudi be giyewana Yelusalema againe. 14Au Fega hihege tu Anidiyoka againe hiyemu, melalai-nadi Fisidiya againe. Ada au sabati againe manuwa-abavehawala sinagogi againe hiluku hihiyoto. 15Ada tamo hakwadi Yaubada bonana gihawa, Mosese yana buki-vehimeya againe kadu Yaubada bonana ana to'awatalatalaina yadi etoladi againe. Gihawa gihavaina sinagogi ana tonagona venuwa'ata hi'iveninisena higayo, “Tobohiyameyao, ka'i nuwanuwa sa'eyana ase'asemiya gidadauda-ma yo'o wanalu'ageyedi, au wanalumamala.”

16Au Folo gitowamidi nimane giluhawatadi digo givebutu gilumamala gigayo, “Tobohiyakweyao, ide omi miIsileli kadu omi kaliva tulimiyao tu Yaubada wahawadavadavana amanadi, yaku hifufu wananogalina. 17#Yem 6:6, 12:51Ime miIsileli yama Yaubada bwanenemeyao giluwafadi. Boi tuwai-mo'ena aimo Idifita againe hawahawala amine himiyami ana toveya, Yaubada gifaiwalaveledi be adi yo'o himoya'ai. Muliya Yaubada yana faiwala lakahina gi'iveyemaunina be givega'auledi ada Idifita hinuyabuyabuna. 18#Yem 16:35Ada au babigaga againe himiyami ana toveya, yadi ga'ila'ila'a malamala foti (40) agaidiya tu au Yaubada gi'atuvefa'iledi. 19#Ail 7:1Ada Kenani againe hilakayemu tu Yaubada gifaiwalaveledi be yo'o lakahidi seveni medede againe hiluyaweyawelidi, tu yadi babi ma yana yo'o giveledi be taudiyao yadi babi fa'ina. 20Ada hida gaitoma galukahihiyena-ma ime miIsileli bwanenemeyao hinunauwena malamala fowa hanaledi fifiti (450) agaidiya. Muliya Yaubada yadi tonagona gisedi be hinunauwena Samuwela yana toveya, bana Yaubada bonana ana to'awatalatalaina. 21#1Sam 8:5,19Au medema tovai-nadi kini fa'ina Samuwela againe hive'o'ola, ada Yaubada Saulo gisena yadi kini fa'ina. Bana Saulo Kisi natuna, Beniyamina yana yo'o kalivana. Ada au malamala foti agaidiya bana givehivehimeyedi. 22#1Sam 13:14, 16:13Malamala foti gihavaina, Yaubada Saulo yana abavehimeya gidabana, ada Devida gisena yadi kini fa'ina. Ada bana fa'ine tuwai-mo'ena Yaubada Veyao Tuwaina ana bukiya gigahe gigayo,

Devida Yese natuna yana huluva yaku nuwanuwa amine fa'ina au nuwaku gi'abina. Gavadi Iya nuwanuwaku ginafaisewa, au ginafaisewa.

Au hidede amine Yaubada gigahe.

23 # Ais 11:1 Ada tuwai-mo'ena Yaubada giwonadabadaba miIsileli bwanenemeyao agaidiya amine, au gihuluva. Devida bwanenena sa'eyana, bana Yesu, ime miIsileli givelema ama Tokibababala fa'ina. 24#Md 3:1-2Ada Yesu aimo yana faisewa keke gidavebutu againe, Yoni miIsileli moya'aidi agaidiya gimidilumamala, higa vaita yadi dewa koyona againe hidavenikohi be hidabafitaiso. 25#Yo 1:20,27Ada Yoni yana faisewa gidaluyabuna ma kaliva gigahedi gigayo, Omi wanuwanuwa iya vaita hakwa'adi. Iya keke Bana'e wabodabodana amanadi, tu wanogali! Iya wai ganagona tu Bana mulikuya gina'ela-ma keke akufaiweya ana ageyafayafa ganayauni, fa'ina Bana kikaiwabu-mo'ena tu iya kwamana kabisoku.

MiYelusalema Yesu hifaniyena be alikeya hihegenauwena.

26Tobohiyakweyao, omi Abelahamo bwaneneneyao kadu kaliva tulimiyao tu Yaubada wahawadavadavana amanadi, au ide agaideya hida venuwa'ata Yaubada yana kibababala fa'ina gi'iveninisena. 27#Yo 16:3Tu miYelusalema adi tonagona buye Yesu hifaniyena, keke hidahalamaneni Bana'e adi Tokibababala, kadu Yaubada bonana ana to'awatalatalaina yadi gahe hifaniyena, gahe-nadi sabati moya'aina agaidiya kaliva hihawahawana. Tu Yesu alikeya hihegenauwena fa'ina, to'awatalatalaina tuwai-mo'ena yadi gahe badi yadi huluva fa'ina velemo'ena gilakayemu. 28#Md 27:22-23Ada keke tamo gavadi koyona Bana againe hidanuhagani-yo alika againe hidahegenauweni, tu au ai'adi Failato againe hive'o'ola higa ginavehimeya be hinaluve'alikana. 29#Md 27:59-60Ada Yaubada bonana tuwai-mo'ena Bana fa'ine Veyao Tuwaina ana bukiya hi'etoladina amine, badi miYelusalema hifaisewa-'owoni yo au ana tomuliya wowona kelose againe hikakina be tomohuyehuyeya hihuyana. 30-31#Af 2:24, 1:3,8Tu Yaubada alikeya gisivemididina, ada badi hibwa'ulina Galili againe hitauya be hinauna Yelusalema yo'oi-dina agaidiya Tauna gi'i'ivemogatalina aiyeta moya'aina, ada au adamoya miIsileli agaimeya Bana fa'ine hi'awa'awatalatalaina.

Yesu yana mididi-havagi againe Yaubada yana wonadabadaba a gilakayemu.

32-33 # Sam 2:7 Tu ime hidedei a'ela be omi agaimiya Venuwa'ata Yamumuna anahawavemogatalena. Boi tuwai-mo'ena Yaubada gavaimi ime miIsileli bwanenemeyao agaidiya giwonadabadaba amine, au adamoya velemo'ena gilakayemu be ide ka'ita-mo'ena. E, ime badi miIsileli bwanenediyao fa'imeya kadu omi kaliva tulimiyao moya'aimi fa'imiya, ide moya'aida fa'ideya Yaubada Yesu alikeya gisivemididina ada hidede amine yana wonadabadaba velemo'ena a gilakayemu. Kadu anafaiweya Yaubada bonana Same 2 againe tamo hakwadi gi'etoladina gigayo,

O'eni Natuku, adamoya gahawavenatune.

34 # Ais 55:3 Yaubada bonana kadu buki sa'eyana againe gigahe gigayo,

Iya Devida againe gawonadabadaba be higa gananuwakabubuyena amine, au gananuwakabubuye-mo'emi,

mahalina ana gaitoma ganavelemi.

Au hida hifufu againe Yaubada givenuwa'atada Yesu alikeya ginasivemididina be keke gina'alika-havagi yo wowona gina'alilini.

35 # Sam 16:10 E, kadu'e Devida Same velugana againe gilukahihi vaita Yaubada againe gidagahe gidagayo,

Iya gahalamanena keke ya kaliva alikeya unahawahegeku be wowoku gina'alilini,

iya'eku ya kaliva mahamahaliku.

36 # Af 2:29 Au Devida babiya gimiyami ana toveya, gavaimi Yaubada givehimeya amine, au gifaisewana ada muliya gi'alika, au tamaneyao lilidiya hitauna be wowona gi'alilina. 37Tu Bana kaliva Yaubada alikeya gisivemididina amanadi keke gida'alika-havagi yo wowona gida'alilini.

Yesu ana vetumagana againe koyona ana aiyawela kananuhagana.

38 # Af 10:43 Tobohiyakweyao, nuwanuwaku wanahalamane-hagihagiyena Bana Yesu yana alika fa'ina yami koyona ana aiyawela amifaiweya wanavaina. Au hidedemi avenuwa'atami. 39#Lo 10:4Kadu wanahalamanena ka'i Mosese yana vehimeya wanavetumaganena o, keke amifaiweya yami yegayega Yaubada matane wanavaini, tu ka'i gaveyao moya'aimi Yesu wanavetumaganena, au Yaubada yami koyona matatabuna ginavenuwauluyena be yami yegayegana wanavaina. 40Au wana'itave'avimi be gava vita Yaubada bonana ana to'awatalatalaina tuwai-mo'ena higaheyena-ma keke omi agaimiya ginalakayemu. 41#Hab 1:5Badi higayo,

Omi to'ihawadamana wanogali! Wanayaulowoga be wanakwaha, fa'ina babiya wamimiyami ana toveya gugai sa'eyana ganafaisewana. Ka'i tamo hakwadi gugai-nadi omi agaimiya gina'awatalatalainena, au keke-mo'a wanavetumaganeni.”

Au hidedemi Yaubada Veyao Tuwaina ana bukiya tuwai-mo'ena gigahe ada Folo yana laumamala againe gahe-nadi giyakahina.

Kaliva tufoidi Folo yana laumamala hidibumuhigena

tu tufoidi hidibutoyogena.

42Tu Folo gilumamala gihavaina, sinagogi againe Banabasi buye hidahobu ma kaliva hive'o'oledi be yuwa ana sabati againe kadu hinayewadi, nuwanuwa hilukahihiyena-ma kadu hinalumamalena. 43Ada moya'aidi sinagogi againe hihobu-'owoga yo, au miYuda tufoidi moya'aidi Folo Banabasi agaidiya hivaga'auta. Kadu yo'o tulidiyao kalivai-dina miYuda yadi yo'o agaidiya hiluku be hivemiYuda-ma badi buye hivaga'auta. Au Folo Banabasi buye hilukahihi ada badi afositolo-dina higaheya'aya'alidi be Yaubada againe hinamiyamiyave'avina yana nuwadoga hinavetuvetumaganena.

44Wiki sa'eyana hihege tu sabati againe kaliva medema melala againe himiyami-ma moya'ai-mo'edi hivaga'auta be Kaiwabu bonana hinanogalina. 45#Af 17:5Tu miYuda yo'o lakahina hi'ita-yo higa'uma'uma-mo'a, au Folo hi'ihawadamanena kadu yana gahe himadubodana.

46 # Af 18:6 Badi hi'ihawadamana tu Folo Banabasi ase'asedi bouna higahedi higayo, “Yaubada givehimeyema fa'ina, gilubodama be Bana bonana omi miYuda agaimiya adamidilumamalena, tu omi bonai-nadi wakilowena kadu omi wahuluva vaita keke nuwanuwami yawai-vagahimi wanavaini fa'ina, ananuyabuyabumi be anana yo'o tulidiyao agaidiya analumamala. 47#Ais 49:6Au Kaiwabu hida vehimeya givelema, gahe-nadi Veyao Tuwaina ana bukiya gidadauda gigayo,

O'eni gavegide be yo'o tulidiyao agaidiya mahalina

unanauwena, kadu tomiyababi fafali tulina tulina agaidiya yaku kibababala fa'ina unakivetuvetunudi.

Au hidede amine Kaiwabu givehimeyema.”

48Tu yo'o tulidiyao kalivai-dina yadi gahe hinogalini-yo hivemwamwala higayo, “Kaiwabu bonana au yamumuna, yamumu-mo'ena.” Ada gaveyao Yaubada givegidedi be yawai-vagahidi hinavaina, medema hivebutu hivetuvetumagana. 49Ada au medema fafali againe kaliva moya'aidi Kaiwabu bonana hinogalina, valeyana give'aliyahega. 50Tu miYuda badi Anidiyoka melala ana kaliva lakahidiyao kadu vevine tohawadavadava wakwamayokudiyao nuwadi hisigadagadalina be Folo Banabasi hivekwageyedi, ada yadi fafali againe hiwavidi. 51Au hilowoga fwayafwaya agediya hivagahegehegena higa Yaubada yana matahiwadi ana iya'iyaya fa'ina, ada hina Aikoniumi againe. 52Tu tovetumagana Anidiyoka againe ma hivemwamwala-mo'a ada Alu'aluwa Mahalina givemagadi.

Currently Selected:

Afositolo 13: viv

Highlight

Copy