A Mark Sõng 8

Bur fɩɩr a to

(Mt 15,32-39; Mk 6,30-34)

1Wakat kãnga neb kʋʋng da leb n tigma taab a Zezi sɛɛgẽ. La b sẽn da ka tar dɩɩb sẽn na n dɩ yĩnga, a Zezi boola b tũud-n-taase, n yeel-ba: 2«Mam zoeta bãndurba nimbãanega. Yãmb ne tɩ yaa rasma a tã rũnna la b be ne maam, la b pa tar dɩɩb n na n dɩ ye. 3Mam sã n kuls-b woto tɩ b pa rɩ, wʋsg na n paa sorẽ. Bãmb kẽer yii al zĩig sẽn zãrẽ.» 4B karen-biisa leokame: «D na n yãee bur yɛ tɩ sek nin-bãmba, we-raoogẽ ka?» 5A Zezi sok-b lame: «Yãmb tara bur dãmb a wãna?» Tɩ b leoke: «Yaa a yopoe.» 6A Zezi kɩtame tɩ neba fãa zĩnd tẽnga; dẽ marsã la b reeg bur a yopoe wã n pʋʋs bark pʋʋsgo n yaool n wes n kɩs b karen-biisã tɩ b pʋɩ nebã, la b maana boto. 7Kʋɩl-zẽ-bõoneg bilf me n da kete. B ninga rẽ me barka n yet tɩ b pʋɩ nebã. 8Neba fãa dɩɩme n tɩge la b sẽn wʋk girsã b pidsa pet a yopoe. 9Neba sõor da taa tus a naase; la a Zezi yaoolame marsã n kuls-ba. 10Dẽ poore, a Zezi ne b karen-biisa le kẽe koglgo n dʋʋg mogrã n kẽng Dalmanuta tẽnga.

Farizẽ rãmb rata bõn-bãn n gese

11 # Mt 12,38; Lk 11,16. Farizẽ rãmb waame n wẽ no-koeemd ne a Zezi, la b da kota bãmba bõn-bãn sẽn yit yĩngri n na n ges b sã n sɩd tõeme. 12#Mt 12,39; Lk 11,29. A Zezi wẽe siri n yetẽ: «Bõe yĩng la nin-bãmba kot wẽnd makre? Sɩd-sɩda m yeta yãmba tɩ m pa na n maan wẽnd makr zamaan kãnga neba yĩng ye.» 13A Zezi yikame n bas-ba la b le kẽe koglg yɛsa, n dig rʋʋnde.

A Erod ne Farizẽ rãmba rabɩlle

14Karen-biisã ra yĩmame n pa zɩ bur ye. Da yaa bur a yembr tãa n da be b nengẽ, koglga pʋga. 15#Lk 12,1. A Zezi yaool n da sagend-b la woto: «Ypk-y y nini la y gũus ne Farizẽ la a Erod kẽedba rabɩlle.» 16Tɩ bãmb na n lɛɛg n leok taaba: «Daare yaa d sẽn ka zɩ burã la b gomd woto.» 17A Zezi bãngame n yeel-ba: «Yaa bõe tɩ yãmb tagsd tɩ m gomda y sẽn pa zɩ burã? Yãmb ket n pa wʋmd laa? Y pa wʋmd m goama võore? Yãmb sũya bee zond pʋgẽ. 18#Zr 5,21; Ez 12,2; Mk 4,12. Yãmb tara nini la y ka ne ye, y tara tʋba la y ka wʋmd ye. Yãmb pa le tẽr laa? 19Mam sẽn wes bur a nu n kõ neb tus a nu wã, y wʋka gɩrsa pet a wãna?» Tɩ b leok tɩ yɩɩ piig la a yiibu. 20«Mam sẽn waa n wes bur a yopoe n kõ tus a naasã, yɩɩ pet a wãna la y wʋk gɩrsã?» Tɩ b leoke: «A yopoe.» 21Tɩ b na n yeel-b marsã: «Y yam ket n nan pa vẽnege?»

Bɛtsayid zoang sãoogre

22A Zezi ne b karen-biisa taa Bɛtsayid. Beene b talla zoang n wa a Zezi nengẽ la b kos-b lame tɩ b sɩɩs-a ne b nugu. 23A Zezi gãda zoanga nugu n tak-a n yi kɛɛnga la b taaga a nina ne kolkoodo. Dẽ poore b tẽega b nus zoanga zugu, n sok-a a sã n nee bũmbu. 24Zoanga sẽn da sɩng yãeeba, yeelame: «Mam nee neba, mam nee sẽn kẽnda, la wẽnda wa tɩɩse.» 25A Zezi le sɩɩsa zoanga nini ne b nusi la rẽ poore, a yãee vẽenega la a sɩngame n paam laafi. A ra yãeta bũmba fãa vẽenega la a ra nee yɩɩg me. 26A Zezi kʋls-a lame n yetẽ: «Da wɩɩg n kẽ tẽnga pʋgẽ meng ye.»

A Piyɛr kaseto

27Dẽ poore a Zezi ne b karen-biisa rɩka Sezare sore, komber a Filip soolmẽ. A Zezi sok-b la sokr kãnga: «Neba yetame tɩ mam yaa ãnna?» 28#Mk 6,14-15; Lk 9,7-8. Karen-biisa leok-b lame: «B yetame tɩ yaa Zã ning sẽn da kõta soobã; kẽer me yetame tɩ yãmb yaa a Eli, kẽer tɩ yãmb yaa bãngdba nin-yende.» 29#Zã 6,68-69. «La yãmba, yãmb yetame tɩ mam yaa ãnna?» A Piyɛr leok-b lame: «Yãmb yaa Krista, Fãagdã.» 30La a Zezi kõ-b la noore tɩ b ra sak n gom ne ned bãmb yell ye.

A Zezi gomda b namsg yelle

31A Zezi sɩnga b karen-biisa zãmsgo n yeel-b tɩ yaa pakre tɩ Ned Biiga nams wʋsgo; tɩ nin-kẽemba, maan-kʋʋdba kãsẽm dãmba la Sɛb-mitba na n yi-la b poorẽ, n bas tɩ b kʋ-ba, la yaa tɩlɛ tɩ b vʋʋg b kũuma rasma tãab raare. 32A Zezi wilga bãmb yell kãnga vẽenega neba fãa sʋka. A Piyɛr boola a Zezi n yi kɛɛnga la a sɩngame n zabd ne-ba, n yet tɩ b ra gom woto ye. 33A Zezi kedgame n ges b karen-biisã la b zaba ne a Piyɛr: «Kẽng n leb poorẽ, Sʋtãana. Fo tagsgo ka Wẽnnaam tagsg ye, fo tagsda wala ninsaal bala.»

A Zezi tũudem yelle

34 # Mt 10,38; Lk 14,27. B kɩtame tɩ zãma wã ne b karen-biisa kolge tɩ b yeele: «Ned ning fãa sẽn dat-a n tũ maam, bɩ a soab sãbs a menga la a rɩk a pika n pʋg maam. 35#Mt 10,39; Lk 17,33; Zã 12,25. Ned ning sẽn dat-a n fãag a yõore, na m menes-a lame, la sẽn na n menes-a a yõore, maam la Koe-nooga nonglem yĩnga, na n fãag-a lame. 36Ba ned sã n da tõeẽ n soog dũni wã gilli, rẽnda nafdẽ-la yẽnda wãn-wãna, a sɩɩga yell sã n sãam? 37Bõe la ned na n dɩk n tek ne a sɩɩgã? 38Ned ning fãa sẽn zoe-a yãnd ne mam tũudem la m zãmsgo, dũni nin-wẽnsa taoore, Ned Biiga me kõn saag n yeel tɩ b mii yẽ soaba, b sã n wa lɛɛg n wa ne b Ba ziiri tɩ b malɛgs sõma yãagd-b.»

Currently Selected:

A Mark Sõng 8: SSDC98

Highlight

Copy