A Mark Sõng 2
2
Põor sãoogre
(Mt 9,1-9; Lk 5,17-26)
1A Zezi waa n leba Kafarnaom. Pa yãee n kaoos tɩ neba bãng tɩ b lɛɛg n waa b yiri ye. 2Neba sũume n wa, tɩ vɩʋʋg ra ka le be ba bilf ye. Dignoora fãa ra pida ne neba, tɩ b kõt-b Koe-noogã. 3Neb a naas põka põor a ye n wa. 4La neba sẽn da ya wʋsgo, t'a Zezi kolgr ya toogo, b kɩbga võor doga zugu n tũnug be n sik põora ne a gãagã a Zezi taoore. 5A Zezi sẽn yãe neba tẽebã, b yeela bãadã: «M biiga, f yel-wẽna paama sugri.» 6Mik Mitb kẽer n da be neba sʋka la bãmb ra sokda b mense: 7«Yaa bõe tɩ nin-kãnga gomd woto? A mamsa a meng ne Wẽnde! Sã n pa Wẽnnaam bala, ãnda n tõe n kõ yel-wẽnd sugri?» 8A Zezi bãnga b sẽn da tagsd bũmb ninga b yamẽ la b sok-b lame: «Yaa bõe la yãmb tagsd woto y sũurẽ? 9Yelsem bʋg la naana n yɩɩda, m sẽn na n yeel põorã: f paama f yel-wẽna sugri bɩ mam sẽn na n yeele: yik n dɩk f gãag n kuli? 10Ade, sẽn na n yɩlẽ tɩ y bãng marsã tɩ Ned Biiga tara tõogo, tẽng zugu, n kõ yel-wẽna sugri, 11põore, m kõt f la noore: yik n dɩk f gãaga n kul f yiri.» 12Põora wẽneg n yikame n dɩk a gãag n tũud neba fãa taoore n yita. Neba fãa pɛlens yikame tɩ b ra pẽgd Wẽnd la b yetẽ: «Tõnd nan ka yãend yell kãnga to ye.»
A Levi boolgo
13A Zezi yiime yɛsa n le kẽng mogra noore; neba kaoogame n wa b nengẽ tɩ b zãmsd-b. 14B waa n loodame n yãend ned a ye, a Alfe biiga, sẽn boond t'a Levi. A Levi da zĩi yaood deesg zĩigẽ la a Zezi yeel-a lame: «Yik n wa tũ maam!» T'a Levi sɩd yik n na n pʋg a Zezi.
15A Zezi ne b karen-biisã la Farizẽ rãmb wʋsg da naaga taaba, a Levi zakẽ, n dɩtẽ. Yaa zãma kãseng n da pʋgd a Zezi. 16Mitba la Farizẽ rãmba sẽn yãe t'a Zezi rɩta ne yel-wẽn-maandba la fadga rɛɛsdba, b yeela a Zezi tũud-n-taasã: «Bõe la woto? Bõe tɩ yãmb zu-soaba naagd yel-wẽn-maandb la sẽn deesd-b fadgã n dɩtẽ?» 17A Zezi wʋma b goama n leok ba: «Ka sẽn be-b laafi n tar tɩɩm soab tʋʋmd ye, yaa sẽn bẽed-ba. M pa wa tẽng zug nin-sõma boolg yĩng ye, m waame n na n bool yel-wẽn-maandba.»
No-loeer poorẽ no-koeemde
18A Zã tũud-n-taasa la Farizẽ rãmba ra loeta b noore; rẽ la b sok a Zezi: «Yaa bõe yĩng la a Zã tũud-n-taasa la Farizẽ rãmb loet b noor tɩ yãmb tũud-n-taasa yaool n pa loetẽ?» 19A Zezi leok-b lame: «Pʋg-sɩda tũud-n-taas tõeeme, n loe b noor tɩ pʋg-sɩda ket n be b sʋk bɩ? Pʋg-sɩda sã n ket b sʋka, b ka tõe n loe b noor ye. 20B sẽn wat n bak pʋg-sɩda ne bãmb daare, la b na n loe b noore. 21Ned pa rɩkd peen-paalga sẽn ka wẽ koasla n sũk fu-kʋdg ye. Peend paalga na n yõbame n tak kʋdgã t'a pãrg n paase. 22Ned pa suiid rã-paalg wao-kʋdg pʋg ye, rãama na n pusga waoogã tɩ lebg bõne. Woto yĩnga rã-paalg suiida wao-paalsẽ.»
Sibr daar no-koeemde
23 #
Yao 23,26. Daar a yembre a Zezi ra tũuda pʋt sʋk n looda. B karen-biisa kẽndame la b foosd ka-zutã n na n bas sore. 24Farizẽ rãmba sẽn yãend rẽnna b yeela a Zezi: «Gese, bõe yĩng tɩ b maand bũmb sẽn kis, vʋʋsg daare?» 25A Zezi leok-b lame: «Yãmb nan pa karem sebr sõng pʋgẽ a Daviid ne a tũud-n-taas sẽn maam bũmb ninga, yella sẽn waa n pak ba tɩ koma tar-b bɩ? 26#Man 24,9; 1S 21,2-7. A pa kẽ wẽnd doogẽ, maan-kʋʋd, a Abiatar, wẽnnẽ, n dɩk wẽnd dooga bur n wãb bɩ? A ra yaool n miime tɩ yaa maan-kʋʋdba bala n da tõe n wãb bur kãense. A pa saag n kõ a tũud-n-taasa tɩ b rɩ bɩ?»
27B ra yet-b lame: «Wẽnnaam naana sibr daar ninsaalb yĩnga. B pa naan ninsaal sibr daar yĩng ye. 28Ned Biiga soo ra kãng me.»
Currently Selected:
A Mark Sõng 2: SSDC98
Highlight
Share
Copy
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.
