A Mark Sõng 1

A Zã yelle

(Mt 3,1-6; Lk 3,1-6, 15-18)

1A Zezi Krista, Wẽnd Biiga, Koe-nooga sɩngre. 2#Ml 3,1. Yaa woto n be bãngd a Izayi sebrẽ:

«Ade, m tʋmda m no-rɛɛs f taoore

t'a segl f sore.

3 # Iz 40,3. Yẽ Koɛɛg n sãt weoogẽ wã n yetẽ:

‹Maneg-y Soaala sore,

sõng-y t'a so-bugsa lebg tɩrse.› »

4Rao ning sẽn da kõta soobo n boond t'a Zã, ra bee weoogẽ, n moond tɩ yel-wẽna tõe n paama sugri ne tuubgu. 5Zɩɩda tẽns rãmb fãa, n paas Zerizalɛɛm dãmba da zoetame n kẽnd a Zã nengẽ n deegd soobo, Zʋrdẽ kʋɩlga pʋga, la b togsd b yel-wẽna.

6 # 2Dĩm 1,8. A Zã ra pila yʋgʋmd gãongo. Sʋya la weoog sɩɩd n da yaa a rɩɩbo. 7A zãmsga pʋgẽ, a ra yeta nebã: «Ned n be mam poorẽ n watẽ la a soab pãng yɩɩda maam. M pa tog meng n yĩgimd a taoore n lok a neoodr gĩsg ye. 8Mam kõta yãmb soob ne koom la bãmb na n kõo yamb soob ne a Vʋʋsem Sõngo.»

A Zezi soobo

9A Zezi waa n yii Nazarɛt, Galile soolmẽ, n wa reeg soob Zʋrdẽ kʋɩlga, a Zã nengẽ. 10A Zezi sẽn deeg soobã n wẽneg n yit koomẽ, la a Zã sẽn yãend saag sẽn pake t'a Vʋʋsem Sõng sigd b zugu wa walle. 11#Bs 22,2; Yɩ 2,7; Iz 42,1; Mt 3,17; 12,18; Mk 9,7; Lk 3,22. La koɛɛg n zĩnd yĩngr n yeele: «Fo yaa mam Bi-nongre, m yam kẽ-f la zãnga.»

A Zezi kʋɩɩbgo

12A Zezi sẽn deeg soob n sɛ, a Vʋʋsem Sõng kɩtame tɩ b kẽng we-raoogẽ. 13B paa be rasem pisnaase tɩ Sʋtãan kʋɩɩb-ba. B ra bee we-rũms sʋka, la yaa malɛk rãmb n da get b yelle.

A Zezi tʋʋmd sɩngre

14B yõka a Zã n kẽes roogo la wakat kãng la a Zezi wa Galile n sɩng Wẽnd Koe-nooga moonego. B ra yetame: 15#Mt 3,2. «Wakat taame, Wẽnd Rĩunga kolgame, tuub-y y yel-wẽna, tẽ-y Koe-noogã.»

Pipi karen-biisa boolgo

16A Zezi ra yegda Galile mogrã, la b yãee a Simo ne a yao, a Andre tɩ b lobd zulung koomẽ. Bãmb tʋʋmd da yaa zĩm yõgbo. 17A Zezi yeel-b lame: «Bɩ y bas la y wa tũ maam; mam na n kɩtame tɩ y bao neb n kõ-ma.» 18Tao-tao bala, b basa b zulumsi n pʋg a Zezi.

19B sẽn ta taoor bilfu, b yãee a Zebede kamba, a Zak ne a yao, a Zã. Bãmb da manegda b zulumsi koglg pʋga. 20A Zezi boola bãmb me, tao bala bãmb me basa b ba, a Zebede, ne sẽn da sõngd-b bãmbã, la b tũ-la a Zezi.

A Zezi zãmsgo Kafarnaom

21A Zezi ne b karen-biisã kẽe Kafarnaom tẽnga. La vʋʋsg daar sẽn ta, a Zezi kẽe pʋʋsg roogẽ n zãmsd neba. 22#Mt 7,28-29. B zãmsga ra yɩkda neb pɛlense tɩ b ra zãmsda wa ned sẽn tar a toorẽ tõogo, b ra ka zãmsd wa sẽn da karem-ba-n-sika ye.

23Rao a ye la Sʋtãamb ra kẽ yã t'a ra be pʋʋsga roogẽ n moonẽ 24la a yetẽ: «Nazarɛt Zezi, yaa bõe la y rat ne-do? Y wa-la d menesg bɩ? Ad tõnd mi-la y sẽn yaa a soaba: Wẽnd Nedã.» 25A Zezi zaba ne-ba, n yetẽ: «Bas-y bʋʋre la y yi nin-kãnga pʋgẽ.» 26Sʋtãamba kɩtame tɩ raoã yĩng rigimd wʋsgo. La rẽ poore b kelmame n yaool n yi. 27Neba fãa pɛlens yɩkame, al tɩ b sokd taaba: «Woto rat n yeelame tɩ bõe? Yẽ n zãmsd neb zãms paala, la wa nin-naaba; yẽ n le kõt Sʋtãamb noor tɩ b sɩd tũudẽ!» 28La a Zezi yʋʋr yii zĩis fãa, tao-tao bala, Galile tẽns pʋsẽ.

A Simo reem-poak sãoogre

29A Zezi yii pʋʋsga roogẽ n wẽneg n kẽ a Simo la a Andre zakẽ ne a Zak la a Zã. 30Dẽ t'a Simo reem-poaka yĩns da wɩngame t'a gãe roogẽ; tao bala b goma a Zezi bãada yelle. 31A Zezi kolgame n gãd bãada nugu n kɩt t'a yiki. Paga yĩn-wɩngra wẽneg n sɛɛme t'a yik n na n bao rɩɩbo n kõ-ba.

32Zaabre, wĩndga sẽn waa n lʋɩ, b talla bãad dãmb wʋsgo n paas Sʋtãamba sẽn da be b rãmb pʋsẽ n wa a Zezi nengẽ. 33Yaa tẽnga tõr la bala n da tigim zaka noore. 34B sãooga bãad-dãmb sẽn da bẽed bãas buud toor toore la b riga Sʋtãamb wʋsgo. B ra ka basd Sʋtãamba tɩ b gom b yell ye tɩ Sʋtãamba ra mii b sẽn ya-la.

35Tõd-beoog pĩnda, zĩig sẽn waa n ket n ya pʋlum-pʋlum, a Zezi yikame n kẽng weoogẽ la b ra bee be n pʋʋsdẽ. 36A Simo la karen-biis a taaba yikame n babs-ba. 37B yãend-b lame n yeel-ba: «Ad-y neba fãa baooda yãmba.» 38A Zezi leok-b lame: «Bɩ d teem zĩiga, d kẽ tẽn-toosã, tɩ m tõog n zãms be me rãmba, tɩ yaa rẽ yĩng la m yi m sẽn da beẽ wã.» 39#Mt 4,23; 9,35. A Zezi saaga Galile tẽnsa fãa n karemd nebã b pʋʋsg rotẽ la b yiisd Sʋtãamba.

Wãoor a yembr sãoogre

40Wãoor a yembre n waa a Zezi nengẽ n wõgemd b taoore n yetẽ: «Yãmb sã n data y tõe n kõo maam laafi.» 41A Zezi zoela a nimbãanega n tẽeg b nugu n sɩɩs-a n yetẽ: «Mam datame, bɩ f paam laafi!» 42Tao bala a wãooda sãoogame t'a yĩng lebg neer yɩlemde. 43A Zezi tãsa wãoora t'a looge. 44#Man 14,1-32. B ra yet-a lame: «Gũus n da gom ne ned ba a ye f sãoogra yell ye la kẽng n tɩ wilg f meng maan-kʋʋda la f kõ kũn ning a Moyiiz sẽn wilg tɩ b kɩse tɩ rẽ yɩ f laafi wã paoong kaseto.» 45Wãoora sẽn yi bala, a sɩngame n moone n togsd kibarã. Woto a Zezi ra pa le tõe n kẽ tẽng pʋgẽ, n da paad weoogẽ. Neba baas n yi zĩis fãa n babs ba.

Currently Selected:

A Mark Sõng 1: SSDC98

Highlight

Copy