Bgah 15

Pţop pi ñiinţ

1 Yawe Nawat Kabuka aţiini na Moyiŧ na Aaron aji : 2Naţiiniin na babuk Iŧrayel naji na baka : « Woli ñiinţ awin kë amaak bduun kë bakyiih na a, uko unkpënuŋ ţi bduun mënţ uji uţopana ţi kadun ki nji Nawat Kabuka. 3Uko mënţ woli upën ţi bduun këme atuh ba, uji uţopan ñiinţ mënţ. 4Dko di apiinţaaŋ keeri këme aţo dakak dţop. 5-6Woli ñaaŋ aban kalişa mënţ këme aţo ţi pţij pi aţooŋ awo kanaj imişa yi nul kabot kañowa, aji wo naţop te utaakal. 7Woli ñaaŋ aban ñiinţ mënţ i bduun bakyiihuŋ, awo kanaj imişa yi nul, kabot kañowa, aji wo naţop te utaakal. 8Woli ñiinţ mënţ atëfjër ñaaŋ anwooŋ najinţ, uŋ mënţan awo kanaj imişa yi nul kabot kañowa, aji wo naţop te utaakal. 9Woli ñiinţ mënţ aya bayaaş, pţij pi aţooŋ wi akyaaŋ bayaaş paji pakak kaţop. 10Woli ñaaŋ aloŋ aban uko uloŋ wi ñiinţ mënţ aţoornuŋ aji wo naţop te utaakal. Woli ñaaŋ ajij uko mënţ, awo kanaj imişa kabot kañowa, aji wo naţop te utaakal. 11Woli ñiinţ mënţ aban ñaaŋ aloŋ bë aandunna añow iñen, ñaaŋ i abanuŋ mënţ awo kanaj imişa yi nul kabot kañowa, aji wo naţop te utaakal. 12Woli ñiinţ mënţ i bduun bakyiihuŋ aban pţukar pi babomanaanuŋ na ufuuş, pawo kafom. Woli imul yi yi babomanaanuŋ pa, bawo kanaj pa na meel.

13« Woli ñiinţ i bduun bakyiihuŋ ajebi, kë baankak ayiih, awo kayoonk ŋnuur paaj na uloŋ kabaa kakak kajinţ. Anaj imişa yi nul kabot kañowa na meel mi ukumpëş. Wi wi aşaaŋ awo najinţ. 14Ţi unuur uţënk bakreŋ, ajej ŋbalab ŋtëb këme ŋrikaţe ŋtëb kaya kawul naţeŋan du kadun ki Nawat Kabuka du ukëbi wi kaloona ki bayiti. 15Naţeŋan ajej uloŋ ţi ŋkaŧ ŋuŋ, kado bţeŋan bi ppënan ipekadu kaşë katërad bŧi undukiiŋ Nawat Kabuka. Wi abaaŋ wi wi ajaaŋ ado ţi ambiiŋ pdolan bañow uko wi bajaaŋ bado ñaaŋ kakakna najinţ ţi kadun ki Nawat Kabuka.

16« Woli ñiinţ atoon katoon ki piinţ, awo kañow uleef bŧi aji wo naţop te utaakal. 17Kamişa këme kanjan ki itoon mënţ ibanuŋ iwo yi kanaj, iji iwo iţop te utaakal.

18« Woli ñiinţ na ñaaţ bapiinţi, bawo kañowa, baji bawo baţop te utaakal. »

Pţop pi ñaaţ

19« Woli ñaaţ awo ţi kañowa, aji wo naţop ţi kadun ki nji Yawe Nawat Kabuka te ŋnuur paaj na uloŋ. Ñaaŋ ambanuluŋ aji wo naţop te utaakal. 20Kalişa ki apiinţaaŋ na dko di aţoohaŋ wal wi akñowiiŋ daji dakak dţop. 21-22Woli ñaaŋ aban kalişa mënţ këme kako kaloŋ ki aţoornuŋ, awo kanaj imişa yi nul kabot kañowa, aji wo naţop te utaakal. 23Woli ñaaŋ aban uko unwohaŋ ţi kalişa ki ñaaţ mënţ apiinţuŋ, këme ţi uko wi aţooŋ, aji wo naţop te utaakal.

24« Woli ñiinţ apiinţ na ñaaţ ankñowiiŋ, kë pñaak pabana, aji wo naţop ŋnuur paaj na uloŋ, kalişa ki apiinţaaŋ kaji kawo kaţop.

25« Woli ñaaţ aloŋ atula pñaak ŋnuur ŋŧum ţi ŋanwooŋ ŋaanwo ţi wal wi akñowiiŋ këme woli pñaak patula aţëp ŋnuur ŋi kañowa ki nul, aji wo naţop wal bŧi wi pñaak paktuliiŋ hënk, jibi ajaaŋ awo naţop ţi wal wi akñowiiŋ. 26Kalişa ki ñaaţ mënţ apiinţaaŋ kaji kawo kaţop jibi kajaaŋ kawo kaţop ţi wal wi akñowiiŋ. 27Woli ñaaŋ aban ya, aji wo naţop, awo kañowa, aji wo naţop te utaakal. 28Woli pñaak paţañan ptula, ñaaţ mënţ awo kayoonk ŋnuur paaj na uloŋ kabaa kakak najinţ. 29Ţi unuur uţënk bakreŋ, ajej ŋbalab ŋtëb këme ŋrikaţe ŋtëb kaya kawul naţeŋan du ukëbi wi kaloona ki bayiti. 30Naţeŋan ajej uloŋ ţi ŋa kawul pa bţeŋan bi ppënan ipekadu kaşë katërad undukiiŋ bŧi Nawat Kabuka. Hënk, ado ţi ñaaţ ambiiŋ pdolan bañow uko wi bajaaŋ bado ñaaŋ kakakna najinţ ţi kadun ki Nawat Kabuka. »

31Nawat Kabuka akak aji na bi Moyiŧ na Aaron : « Najakan na bañaaŋ biki Iŧrayel woli baţopi badoki balow bañaaŋ kaţi bakeţ wi bakţopanuŋ dko dyimanaan di nji nfëţuŋ danwooŋ ţi pŧoof pi baka. »

32Uko waŋ wi wi bgah bajakuŋ ţi ñiinţ ammaakuŋ bduun kë bakyiih na antoonuŋ katoon ki kabuk kë kaţopana. 33Hënk di bajakuŋ kak ţi ñaaţ anwooŋ ţi kañowa, ñiinţ këme ñaaţ antoonuŋ, këme ñiinţ ampiinţuŋ na ñaaţ anţopuŋ.

Currently Selected:

Bgah 15: knf

Highlight

Copy