Ppën 13

Bajeen biinţ

1 Yawe Nawat Kabuka aţiini na Moyiŧ aji : 2« Napaţşën napoţ ñiinţ naŧeek ambukiiŋ ţi biki Iŧrayel, awo i naan. Woli ñaaŋ a, awo i naan, woli unŧaam wa, uwo wi naan. »

Ufeŧtu wi ipoom indaţ

3Moyiŧ aji na biki Iŧrayel : « Naleşan unuur wi, unuur wi napënnuŋ du Ejiptu, apën ţi pjuuk pi ulemp ; mnhina mi kañen ki Yawe Nawat Kabuka mampënananaŋ da. Unuur mënţ nin ñaaŋ aankde ipoom innaţiiŋ. 4Nţa ţi pli pi ŋdeey ŋajaaŋ ŋapën, wi wi nakpënuŋ. 5Wal wi Nawat Kabuka akluŋ kaneejanan du uŧaak wi amehniiŋ du bateeman aji awulan wa, nado kaţaş udolade wi ţi pli pi. Uŧaak mënţ unwooŋ wi biki Kanaan, wi bahitit, bahamorit, bahiwit na bayebuŧit bafëţuŋ, uŧaak unŧumi mntow na mnob. » 6Naţo ŋnuur paaj na uloŋ kado kade ipoom indaţ, unuur uţënk paaj na uloŋ naşë nado ufeŧtu pa Nawat Kabuka. 7Ipoom indaţ ikwooŋ pde ţi ŋnuur paaj na uloŋ ŋuŋ, nin kapoom kannaţiiŋ këme bko btaajanaani pşon baankwo ţi itohan, na ţi uŧaak bŧi. 8Unuur mënţ naţupan babukan uko unkayi kë nakdo uko mënţ, najakan na baka : « Uko wi bŧi ddo wa kaleşna unuur wi Nawat Kabuka apënanaanuŋ du Ejiptu » 9Uwoon pa an ji uko unkwooŋ ţi iñen yi nan na ţi ijuk yi nan unkleşananaŋ kë bgah bi Nawat Kabuka bawo i kawo ŋnuur bŧi ţi itum yi nan, ul ampënananaŋ du Ejiptu na mnhina mi kañen ki nul. 10Uko mënţ namëbaan wa, nado kado wa ŋşubal bŧi ţi wal wi.

Kafah ki Naşibaţi

11« Wal wi Yawe Nawat Kabuka akluŋi kaneejanan du uŧaak wi biki Kanaan kabot kawulan wa, jibi amehniiŋ wa başinan na an ţi ŋleefan, 12wulana bapoţ biinţ baŧeek bankpënuŋ ţi kayiŋ ki ñaaţ, ŋbuk ŋkaş ŋŧeek ŋi ŋŧaam ŋi nu ŋawo kak ŋi Nawat Kabuka. 13Woli ubuuru ubuki, naţëţan upoţ na wi unkaneel këme wi upi, uwo kafah ki Nawat Kabuka. Woli naanţëţan wa, nafoman wa bkow. Babukan bajeen, naţëţanaan baka.

14« Woli babukan baluŋ aheparan uko unkayi kë nakdo uko mënţ, naji na baka : “Mnhina mi kañen ki Nawat Kabuka mampënanuŋ un du Ejiptu, apënan un ţi pjuuk pi ulemp. 15Jibi Farawuna adiikuŋ apok pwutan un ŋya, kë Nawat Kabuka aşë fiŋ bapoţ baŧeek du uŧaak na ŋbuk ŋŧeek ŋi ŋnŧaam ţi Ejiptu. Wul ukaaŋ kë ŋji ŋdo bţeŋan kafiŋara ubuk unŧaam ukaş uŧeek, kaşë ţëţan bajeen ñiinţ.” 16Uwoon pa an uko unwooŋ ţi kañen, uko wi naktuuŋ ţi pjuk. Mnhina mi kañen ki Nawat Kabuka mi mi apënanaanuŋ un du Ejiptu. »

Pnaţa pi pntaali pi Iŧrayel

17Wi Farawuna awutanuŋ biki Iŧrayel kë bayaa, Naşibaţi aando baka kë bajej bgah bi uŧaak wi bafiliŧteŋ, te bul badooŋ aŧarna. Ado haŋ ţiki aji : « Woli baya awo i kagutan ŋşal ŋahilan kawugşa na baka, badug umeli bakak Ejiptu. » 18Ado baka kë bafooy ajej bgah bi pndiiş du umbaŋ wi bdëk bjeenkal. Biki Iŧrayel bapën du uŧaak wi Ejiptu awo ji bangoli bankyaaŋ ugut. 19Moyiŧ ajej imoh yi Yoŧef, ţiki uŋ abi do kë biki Iŧrayel bamehna ahoŋa wi ajakuŋ na baka : « Wal wi Naşibaţi akluŋ kabi ţi an, najejan imoh yi naan, napënan ya ţi uŧaak wi. »

20Bapën du Ŧukot aya anaţ du Etam kakab pndiiş. 21Yawe Nawat Kabuka apoş ţi kadun ki baka, na nfa aji wo ţi kanfëluŋ kampënnuŋ du baţi te mboş kayuuj baka bgah ; na uŧejan awo ţi bdoo bweek bampënnuŋ mboş te bko duuţ, kajeehan baka, kë hënk bahil apoş pnak na uŧejan. 22Kanfëluŋ kaweek na nfa këme bdoo bweek na uŧejan iji ibi duka duka ţi kadun ki baka.

Currently Selected:

Ppën 13: knf

Highlight

Copy