Ppën 12
12
Ufeŧtu wi Mbuur
1 Yawe Nawat Kabuka aji na Moyiŧ na Aaron du uŧaak wi Ejiptu aji : 2« Pli pi pakwooŋ pandëmnuŋ ţi kli bŧi, pawo pa an pŧeek ţi kli ki uşubal. 3Naţiiniin na bañaaŋ biki Iŧrayel bŧi naji na baka : “Ţi unuur uţënk iñeen ţi pli pi, ajug katoh andoli ajejan unkaneel këme upi unhojuŋ pa bañaaŋ biki nul këme pa katohul. 4Woli banwooŋ ţi katoh batiinkëţ pa pde unŧaam wuŋ banaakiran na bakinţ baka banwooŋ baanŧum kak. Nadatan unkaneel wi nakhilanuŋ kade. 5Unŧaam uwoon ukaş unkaaŋ uşubal, unwooŋ uunţakëm nin ţi dko dloŋ ţi uleef. Nadatan wa ţi ŋkanel këme ŋpi. 6Nabëkaan ŋa te unuur uţënk iñeen na ŋbaakër ŋi pli pi. Unuur mënţ wi unuur ukdooŋ kaya pjot wi wi biki Iŧrayel bŧi bakfiŋuŋ ŋa. 7Najejan pñaak nakër ţi plëman duuţ na ţi ibaŋ yi pa ţi itoh yi nakdeenuŋ unŧaam. 8Uŧejan mënţ nade uyemaţ unŧoowuŋ na ipoom indaţ na itoh ihaay. 9Nakde nin uko uloŋ ţi wa uyiş këme unfatanuŋ, naŧoowan ŧoow wa upëb wul na bkow na ihoţ na ipëş. 10Naankduk nin uko uloŋ pa nfa, uko unkdukiiŋ natëran wa. 11Hënk di di nakdeeŋ wa : natan blaañ ţi blank, kawoh işapaat, kamëban pmul ţi kañen. Nadeen wa naŧaran ŧaran. Uwo Ufeŧtu wi Mbuur wi Nawat Kabuka.
12« “Na uŧejan mënţ dñaay na Ejiptu kafiŋ banwooŋ bajeen ţi uŧaak : dfiŋ bajeen biinţ biki bañaaŋ, kafiŋ ŋbuk ŋkaş ŋŧeek ŋi ŋnŧaam. Dkob ŋnŧoŋ ŋi bañaaŋ biki Ejiptu bŧi bakdëmanuŋ. Nji dwooŋ Nawat Kabuka. 13Pñaak pakyuujuŋ kë nawo ţi itoh mënţ. Woli dwin pa, kaţëp ţëp mënkkoban wi nji kapënuŋ pkob uŧaak wi Ejiptu.
14« “Nadoon kado ufeŧtu ţi unuur mënţ, kaleşna kë dwo Nawat Kabuka, iwuuŋ bŧi inkmbiiŋ idoon kado wa, uwo uko wi nawooŋ kado na ŋwal bŧi.” »
Ufeŧtu wi ipoom indaţ
15 Yawe Nawat Kabuka akak aţiini aji : « Nado ŋnuur paaj na uloŋ kado kade ipoom indaţ. Kapënna unuur uŧeek nawo kapënan bko banjaaŋ bataajan pşon ţi itoh yi nan ţiki kapënna unuur uŧeek te uţënk paaj na uloŋ ankdeeŋ kapoom kanwooŋ na bko mënţ apën ţi pntaali pi Iŧrayel. 16Unuur uŧeek na unuur uţënk paaj na uloŋ nayit kadëmanaan ; ţi ŋnuur mënţ nin ulemp uloŋ uunkdolana dolana, uko uloolan ţañ wi wi nahilanuŋ kado : pjuŋ uko wi nakdeeŋ.
17« Nado kado ufeŧtu mënţ kaleşna unuur wi nji mpënanuŋ mnşini mi nan ţi Ejiptu. Nado kado wa ţi iwuuŋ bŧi, uwo uko wi pdo pa ŋwal bŧi. 18Ţi pli pŧeek, ţi uŧejan wi unuur uţënk iñeen na ŋbaakër nade ipoom mënţ te uŧejan wi unuur uţënk iñeen ŋtëb na uloolan. 19Udo ŋnuur paaj na uloŋ wi nin bko btaajanaani pşon bawooŋ baankwo du itoh yi nan, ţiki ankdeeŋ pşon mënţ apën ţi pntaali pi Iŧrayel, awole wo nayaanţ këme abuk uŧaak. 20Naankdo kade ipoom innaţiiŋ ; dko di nahilanaŋ kawo, nado kade ipoom indaţ. »
Pkeţ pi bapoţ banwooŋ bajeen
21Moyiŧ adu baweek biki Iŧrayel bŧi aşë ji na baka : « Nayaan nalaar itoh yi nan unkaneel umpoţi këme upi umpoţi nafiŋ pa Ufeŧtu wi Mbuur. 22Najejan ujaagal wi bajaaŋ bado hiŧop, nado utan, naŧoop wa ţi pñaak pi nakţuuŋ ţi kako kaloŋ, nakër ţi plëman duuţ na ţi ibaŋ itëb yi pa. Kë an, nin aloŋ awutan kamuur plëman mënţ kapën bdig bë nfa maambani. 23Wal wi Yawe Nawat Kabuka akdooŋ kañaay na Ejiptu pa pkob bañaaŋ biki, awin pñaak ţi ilëman duuţ na ţi ibaŋ, aduk ilëman mënţ kabot kawo aankwut uwanjuŧ wi pkeţ uneej ţi itohan uţijan pkeţ.
24« Uko wi, uwo uko wi pdo pa iwi na babuku te mnţo. 25Wal wi nakluŋ kaneej du mboş mi Nawat Kabuka akwulanaŋ, jibi ahoŋanaŋ, naţaşan uko mënţ. 26Kë wi babukan bakluŋiiŋ kaheparan kaji : “Wel uwooŋ uko wi ?” 27Naŧeeman baka naji : “Uwo bţeŋan bi Nawat Kabuka andukuŋ itoh yi Iŧrayel du Ejiptu, wi akkobuŋ biki Ejiptu, aşë dukun.” » Wal mënţ bañaaŋ biki Iŧrayel baŋup adëman Nawat Kabuka. 28Baya, aya do uko bŧi wi Nawat Kabuka aţuuŋ bi Moyiŧ na Aaron pdo.
29Na uŧejan mnjel, Nawat Kabuka akob bapoţ biinţ bajeen bŧi ţi Ejiptu afiŋ, kajunna du bajeen i Farawuna naşih, te du i nakalabuş antuhiiŋ, afiŋ kak ŋbuk ŋkaş ŋŧeek ŋi ŋnŧaam. 30Farawuna anaţa na uŧejan mënţ ul na bañaaŋ banjaaŋ baţënka pşih bŧi na biki Ejiptu bŧi, kë iwuuh ipel ţi Ejiptu, ţiki nin katoh kaloŋ kaanduka duka ki ñaaŋ aloŋ awooŋ aankeţi.
Ppën ţi Ejiptu
31Farawuna adu Moyiŧ na Aaron na uŧejan mënţ aşë ji na baka : « Nanaţiin napën ţi dko di nun, an na biki Iŧrayel bŧi nayaan nadëman Yawe Nawat Kabuka jibi najakuŋ. 32Najejan ŋnŧaam ŋi nan bŧi ŋmpoţi na ŋweek jibi najakuŋ naya naşë nañehandëraan Nawat Kabuka awulën bnuura. »
33Kë biki Ejiptu başë naţa ado biki Iŧrayel baŧaran bapën ţi uŧaak ţiki baji bakeţ bŧi. 34Kë biki Iŧrayel banaţa na pşon pi baka wi pawooŋ paandobi naţa, atan ibulja na iyeti yi baka alap. 35Bado uko wi Moyiŧ abiiŋ aji na baka : bahepar biki Ejiptu iko yi baka yi unŧaam na yi uwuuru, abot ahepar baka iko iwohara. 36Nawat Kabuka ado kë biki Iŧrayel bawinana bnuura ţi këş ki biki Ejiptu kë bawul baka iko yi baheparuŋ. Hënk di bayeenkuŋ iko yi biki Ejiptu.
37Bapën du Ramŧeŧ aŧool pya Ŧukot. Bawo wal mënţ woli biinţ ţañ bafënaniiŋ iñeen-week iñeen ŋyaaş iñeen-week paaj (600 000). 38Bañaaŋ baŧum kak baya na baka. Itani yi ŋnŧaam ŋmpoţi na ŋnŧaam ŋweek iweek maakan ikak aya na baka. 39Bajuŋ pşon pi baţijnuŋ Ejiptu ado ipoom indaţ, ţiki wi badookuŋ baka, pşon paanţënkbër anaţa, kë baankak ahina pţo kajuŋ uko wi bakyaaŋ kade na bgah.
40Ŋşubal ŋi biki Iŧrayel badoluŋ du Ejiptu ŋawo iñeen-week ŋbaakër na iñeen ŋwajanţ (430). 41Unuur wi ŋşubal mënţ ŋabaaŋ wi wi bañaaŋ biki intaali bŧi yi Nawat Kabuka ipënuŋ ţi uŧaak wi Ejiptu. 42Uŧejan mënţ wi wi Nawat Kabuka awooŋ bnaţ pa ppënan bañaaŋ biki Iŧrayel ţi Ejiptu, uwo kawo pa bukal bŧi, na iwuuŋ inkmbiiŋ, uŧejan wi bakwooŋ bnaţ ţi uko wi pdëman Nawat Kabuka kaleşna kë apënan baka du Ejiptu.
Uko wi pdo pa Ufeŧtu wi Mbuur
43 Yawe Nawat Kabuka aji na bi Moyiŧ na Aaron : « Uko wi pdo pa Ufeŧtu wi Mbuur wii wi : Nin nayaanţ aankde unŧaam unfiŋuŋ pa wa. 44Kë nalemp annuganiiŋ na itaka, woli awala kaŧëmp ahilan kade wa. 45Nayaanţ këme nalemp i naklukuŋ luk baankde wa. 46Nadeena wa ţi katoh ki bafiŋnuŋ wa meeţ, nin padaaş paankpën. Nin pmoh ploŋ paanktib kakit. 47Bañaaŋ biki Iŧrayel bŧi bakdoluŋ ufeŧtu. 48Woli nayaanţ aloŋ anwooŋ ţi an aŋal pdo wa, biinţ biki katohul bŧi bawo biki kawala kaŧëmp, wal mënţ ahilan kado wa, awo wo ji ñaaŋ i uŧaak ; kë anşaaŋ awo aanwala kaŧëmp aankde wa. 49Bgah bawo bloolan pa abuk uŧaak na nayaanţ ambiiŋ ţi an. »
50Biki Iŧrayel bŧi bado uko wi Nawat Kabuka ajakuŋ na Moyiŧ na Aaron. 51Unuur mënţan wi wi Nawat Kabuka apënanuŋ biki Iŧrayel du uŧaak wi Ejiptu, kë bakwoona pşini pşini apoş bnuura ji bangoli.
Currently Selected:
Ppën 12: knf
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Le Groupe CIM-TBM, Senegal
