Rwĩmbo rwa Solomoni 1
1
1 #
1Atha 4.32
Rũũrũ nĩruo rwĩmbo rwega gũkĩra nyĩmbo ciothe rũrĩa Solomoni ainire.
Irebeta rĩa mbere
Mũndũ wa nja
2Taamumunya na kanua gaaku;
wendo waku-rĩ, nĩ mwega gũkĩra ndibei.
3Maguta macio wĩhakĩĩte me na mũtararĩko mwega;
rĩĩtwa rĩaku no ta maguta macio.
Hatirĩ mũirĩĩtu o na ũmwe ũtakwendeete.
4Njoya ũũre na niĩ;
gĩtuĩke mũthamaki wakwa na ũndoonyie o nyũmba thĩinĩ.
Kũu nĩkuo tũgũthiĩ gwĩkeneria,
tũkĩrikĩrie wendo hatarĩ na itherũ.
Hatirĩ na nganja andũ a nja oothe nĩmakwendeete!
5Atĩrĩĩrĩ, andũ aya a nja a Jerusalemu!
ndĩ mũirũ, no ndĩ o mũthaka,
njirĩĩte o ta hema cia Kedari
no ngathakara o ta mbathiya ĩrĩ mũciĩ gwa Solomoni.
6Mũtikaamenere ũirũ wakwa,
atĩ nĩ ũndũ nĩnjinĩĩtwo nĩ riũa.
Nĩ aariũ a maitũ mandaakarĩire,
magĩkĩndutithia wĩra mũgũndainĩ wa mĩthabibũ,
ngĩkĩaga mahinda ma gwĩthakaria.
7Tanjĩĩra atĩrĩ wee mwendwa wakwa,
ũrĩrĩithia ũhiũ waku kũ?
Ningĩ-rĩ, ũrĩarahia rũũru rwaku ha?
Nĩ kĩĩ gĩgũtũma njikare njagaagĩĩte
ngĩgũcaria gatagatĩinĩ ka ndũũru cia arĩithi angĩ?
Mũndũ mũrũme
8Kaĩ ũtooĩ handũ hau nĩ ha,
o wee ũthakarĩĩte kũrĩ andũ a nja oothe?
Kiumagare ũrũmĩrĩre rũũru;
ũkarĩiithie mbũri ciaku hakuhĩ na hema cia arĩithi.
9Atĩrĩĩrĩ we mwendwa wakwa, ũtũmaga arũme mahĩahĩe
o ta ũrĩa mbarathi ya mũgoma
ĩtũmaga mbarathi cia njamba cia kũguucia ngaari cia mũthamaki wa Misiri ihĩahĩe.
10Njuĩrĩ ciaku nĩ thaka mũno igwĩrĩire makai maaku
na ikaagĩria ngingo yaku ta mĩgathĩ.
11No ithuĩ na ithuĩ nĩtũgũgũthondekera
mĩgathĩ ya thahabu ĩgemeetio na tũbungo twa betha.
Mũndũ wa nja
12Mũthamaki wakwa nĩgũkoma arakomeete gĩtandainĩ gĩake.
Namo maraaci maakwa maragĩkĩĩyũria
kũu arakomeete mũtararĩko mwega.
13Mwendwa wakwa e na mũtararĩko ta wa manemane,
akomeire nyondo ciakwa.
14Mwendwa wakwa atariĩ o ta mahũa ma gĩthaka
macanũkĩĩte mĩgũndainĩ ya mĩthabibũ kũu Enigedi.
Mũndũ mũrũme
15Mwendwa wakwa, ĩ ndũkĩrĩ mũthaka!
Maitho maaku maiyũire wendo!
Mũndũ wa nja
16Ĩ ndũkĩrĩ mũthaka mũraata wakwa;
nĩũngenagia mũno!
Nyeki nduru nĩ yo ĩgũtuĩka ũrĩrĩ witũ,
17mĩtarakwa ĩtuĩke mĩratho ya nyũmba iitũ,
nayo mĩkarakaba ĩtuĩke mĩitĩrĩro.
Currently Selected:
Rwĩmbo rwa Solomoni 1: GKN
Highlight
Share
Copy
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.
