Mariko 10
10
Jesũ kũrutana ũhoro wa gũtigana kwa mũthuuri na mũtumia
(Mat 19.1-12; Luk 16.18)
1Thuutha ũcio Jesũ akiuma Kaperinaumu agĩthiĩ mwena wa Judea, mũrĩmo ũũrĩa ũngĩ wa Rũũĩ rwa Jorodani. Nao andũ aingĩ makĩmũthiũrũrũkĩria rĩngĩ, naake akĩmaruta o ta ũrĩa aamenyereete.
2Nao Afarisai amwe magĩũka kũrĩ we makĩenda kũmũgeria makĩmũũria atĩrĩ, “Watho witũ nĩwĩtĩkĩrĩĩtie mũndũ mũrũme atigane na mũtumia wake?”
3Naake Jesũ akĩmooria atĩrĩ, “Musa aamwathire atĩa?”
4 #
Gũco 24.1-4; Mat 5.31 Nao makĩmũcookeria makĩmwĩra atĩrĩ, “Musa nĩaheanire rũũtha mũndũ aandĩkĩre mũtumia wake marũa ma kũmũtiga, agĩtigane naake.”
5Naake Jesũ akĩmeera atĩrĩ, “Musa aamũheire Watho ũcio nĩ ũndũ wanyu kũũmia ngoro. 6#Kĩa 1.27; 5.2 Ĩndĩ o ta ũrĩa maandĩko moigĩĩte, kuuma o kĩambĩrĩria, ‘Ngai oombire mũndũ mũrũme na mũndũ mũka, 7#Kĩa 2.24 na nĩ ũndũ wa gĩtũmi kĩu mũndũ mũrũme nĩarĩtigaga ithe na nyina akanyiitithanio na mũtumia wake#10.7 Akanyiitithanio na mũtumia wake: Maandĩko mamwe matirĩ “akanyiitithanio na mũtumia wake.”, 8nao eerĩ magatuĩka mwĩrĩ ũmwe.’ Matingĩgĩcooka gũtuĩka eerĩ nĩ ũndũ nĩ mwĩrĩ ũmwe. 9Nĩ ũndũ ũcio mũndũ ndakaanatigithanie arĩa Ngai anyiitithanĩĩtie.”
10Na rĩrĩa maingĩrire nyũmba, arutwo makĩũria Jesũ ũhoro ũcio o rĩngĩ. 11#Mat 5.32; 1Akor 7.10-11 Naake akĩmacookeria atĩrĩ, “Mũndũ mũrũme angĩtiga mũtumia wake ahikie mũtumia ũngĩ nĩatharĩĩtie. 12O na mũtumia angĩtiga mũthuuriwe, ahikĩre mũndũ ũngĩ o naake nĩatharĩĩtie.”
Jesũ kũraathima ciana
(Mat 19.13-15; Luk 18.15-17)
13Nao andũ makĩreehere Jesũ ciana atĩ nĩ geetha aciigĩrĩre mooko, no arutwo aake makĩmagiria. 14Rĩrĩa Jesũ oonire ũguo akĩraakara, akĩĩra arutwo atĩrĩ, “Rekeei ciana ciũke kũrĩ niĩ, tigaai gũcigiria, tondũ Ũthamaki wa Ngai nĩ wa arĩa mahaana ta cio. 15#Mat 18.3 Ngũmwĩra na ma atĩ, mũndũ o wothe ũtaamũkagĩra Ũthamaki wa Ngai ta kaana ndakaũtoonya.” 16Agĩcooka akĩhĩmbĩria ciana icio, agĩciigĩrĩra mooko, agĩciraathima.
Mũndũ gĩtonga
(Mat 19.16-30; Luk 18.18-30)
17Na rĩĩrĩ, hĩndĩ ĩrĩa Jesũ aambĩrĩirie gũthiĩ, mũndũ ũmwe agĩteng'era harĩ we akĩmũturĩria ndu akĩmũũria atĩrĩ, “Mũrutani mwega, nĩ atĩa ingĩĩka nĩ geetha ngaagaya muoyo wa tene na tene?”
18Naake Jesũ akĩmũũria atĩrĩ, “Ũkũnjĩta mwega nĩkĩ? Gũtirĩ mũndũ mwega tiga o Ngai wiki. 19#Tha 20.12-16; Gũco 5.16-20 Wee nĩũũĩ maathani: ‘Ndũkaanooragane; ndũkaanatharanie; ndũkaanaiye; ndũkaanaigĩrĩre mũndũ kĩgeenyo; ndũkaanaheenanie, na tĩĩa thooguo na maitũguo.’ ”
20Naake mũndũ ũcio akĩĩra Jesũ atĩrĩ, “Mũrutani, maathani macio moothe ndũire ndĩmarũmagĩrĩra kuuma ndĩ o mũnyiinyi.”
21Naake Jesũ aamũrora akĩmwenda, akĩmwĩra atĩrĩ, “Nĩharĩ ũndũ ũmwe ũtigĩĩtie. Thiĩ wendie indo ciaku ciothe ũhe athĩĩni mbeeca icio, na nĩũkũgĩa na mũthiithũ mũnene igũrũ; weka ũguo ũcooke ũũke ũũnũmĩrĩre.” 22Rĩrĩa mũndũ ũcio aiguire ũguo agĩtuka gĩthiithi, agĩthiĩ e na kĩeha amu aarĩ mũtongu mũno.
23Naake Jesũ akĩĩhũgũra na kũrĩ arutwo aake akiuga atĩrĩ, “Kaĩ nĩ hinya andũ arĩa atongu gũtoonya Ũthamakiinĩ wa Ngai-ĩ!”
24Nao arutwo makĩgega nĩ ũndũ wa ciugo icio ciake. No Jesũ agĩthiĩ na mbere kwaria akiuga atĩrĩ, “Ciana ciakwa, kaĩ nĩ ũndũ wĩ hinya#10.24 Nĩ ũndũ wĩ hinya: Maandĩko mangĩ nĩmoongagĩrĩra; arĩa mehokeete ũtonga. gũtoonya Ũthamakiinĩ wa Ngai-ĩ! 25Nĩ ũhũthũ ngamĩĩra gũtoonyera irimainĩ rĩa cindano gũkĩra mũndũ mũtongu gũtoonya Ũthamakiinĩ wa Ngai.”
26Oiga ũguo arutwo makĩmaka mũno, makĩũrania atĩrĩ, “Nũũ ũngĩhota kũhonokio?”
27Naake Jesũ akĩmakũũrĩra maitho akĩmacookeria atĩrĩ, “Ũndũ ũyũ ndũngĩhoteka nĩ andũ tiga o Ngai, tondũ maũndũ moothe nĩmahotekaga nĩ Ngai.”
28Naake Petero akĩmwĩra atĩrĩ, “Mwathani, ithuĩ tũtigĩĩte indo ciothe tũgakũrũmĩrĩra.”
29Naake Jesũ akĩmeera atĩrĩ, “Gũtirĩ mũndũ ũtigĩĩte nyũmba yake kana aariũ, kana aarĩ a nyina, kana ithe, kana nyina, kana ciana, kana mĩgũnda nĩ ũndũ wakwa na nĩ ũndũ wa Ũhoro ũrĩa Mwega, 30ũtakaaheeo ũtonga mũingĩ matukũ maya tũrĩ, na aheeo maita igana ma nyũmba, na ma aariũ na aarĩ a nyina, na maanyina, na ciana, na mĩgũnda, o hamwe na mĩnyamaaro, na thuutha wa ũtũũro ũyũ aheeo muoyo wa tene na tene. 31#Mat 20.16; Luk 13.30 No rĩĩrĩ, andũ aingĩ arĩa marĩ a mbere rĩu, magaatuĩka a thuutha, nao arĩa me thuutha matuĩke a mbere.”
Jesũ kwaria rĩa gatatũ ũhoro wa gũkua gwake
(Mat 20.17-19; Luk 18.31-34)
32Na rĩĩrĩ, marĩ njĩrainĩ meerekeire Jerusalemu Jesũ amatongoreetie, arutwo aake makĩiyũrwo nĩ kĩmako, nao andũ arĩa maamarũmĩrĩire nĩmeetigagĩra. O hĩndĩ ĩyo Jesũ agĩcookia arutwo arĩa ikũmi na eerĩ ndundu akĩmeera o rĩngĩ maũndũ marĩa maakirie kũmũkora. 33Agĩkĩmeera atĩrĩ, “Twerekeire kwambata Jerusalemu kũrĩa Mũrũ wa Mũndũ arĩneanwo kũrĩ athĩnjĩri Ngai arĩa anene na arutani a Watho. Nao nĩmarĩmũtuĩra kũũragwo, na mamũneane kũrĩ andũ a Ndũũrĩrĩ 34nao mamũnyũrũrie, mamũtuĩre mata, mamũhũũre na kĩboko, na mamũũrage. No rĩĩrĩ, thuutha wa mĩthenya ĩtatũ nĩakaariũka.”
Ihooya rĩa Jakubu na Johana
(Mat 20.20-28)
35Nao Jakubu na Johana, aariũ a Zebedi magĩũka kwĩ Jesũ makĩmwĩra atĩrĩ, “Mũrutani, nĩharĩ ũndũ tũkwenda ũtwĩkĩre.”
36Naake Jesũ akĩmooria atĩrĩ, “Nĩ atĩa mũkwenda?”
37Nao makĩmwĩra atĩrĩ, “Rĩrĩa ũgaikarĩra gĩtĩ kĩa ũnene Ũthamakiinĩ waku ũrĩa wĩ riiri-rĩ, ũgaatwĩtĩkĩria ũmwe aikare mwena waku wa ũrĩo, na ũrĩa ũngĩ wa ũmotho.”
38 #
Luk 12.50
Naake Jesũ akĩmeera atĩrĩ, “Inyuĩ mũtiũĩ kĩrĩa mũrahooya. Mwahota kũnyuĩra gĩkombe kĩa mĩnyamaaro kĩrĩa ngũnyuĩra? Mwahota kũbatithio kĩbatithio kĩrĩa ngũbatithio nakĩo?”
39Nao makĩmũcookeria atĩrĩ, “Ĩĩ no tũhote.” Naake Jesũ akĩmeera atĩrĩ, “Nĩguo nĩmũkũnyuĩra gĩkombe kĩrĩa ngũnyuĩra, o na mũbatithio na kĩbatithio kĩrĩa ngũbatithio nakĩo. 40Ĩndĩ niĩ ndirĩ na kĩhooto gĩa gũtua nũũ ũgaikara mwena wakwa wa ũrĩo kana wa ũmotho. Ngai we mwene nĩ we ũkaaheana itĩ icio kũrĩ arĩa acithondekeire.”
41Na rĩĩrĩ, rĩrĩa arutwo arĩa angĩ ikũmi maamenyire ũhoro ũcio, makĩiguĩra Jakubu na Johana ũũru. 42#Luk 22.25-26 Naake Jesũ akĩmeeta oothe hamwe akĩmeera atĩrĩ, “Nĩmũũĩ atĩ atongoria a ndũũrĩrĩ nĩmakoragwo na ũhoti mũnene igũrũ rĩacio na nĩmaciathaga. 43#Mat 23.11; Mar 9.35; Luk 22.26 No ũndũ ũcio ndũkaanooneeke gatagatĩinĩ kaanyu. Ũrĩa ũkwenda gũtuĩka mũnene gatagatĩinĩ kaanyu nĩatuĩke ndungata ya arĩa angĩ. 44Na ũrĩa wothe ũkwenda gũtuĩka wa mbere nĩatuĩke ngombo ya arĩa angĩ oothe. 45Amu o naake Mũrũ wa Mũndũ ndookire gũtungatĩrwo, ookire gũtungata na kũheana muoyo wake ũtuĩke wa gũkũũra andũ aingĩ.”
Jesũ kũhonia mũtumuumu wetagwo Baritimayo
(Mat 20.29-34; Luk 18.35-43)
46Nao magĩgĩkinya Jeriko, na rĩrĩa Jesũ oimaga kuo arĩ na arutwo aake o hamwe na andũ aingĩ, Baritimayo mũrũ wa Timayo agĩkorwo aikaire mũkĩrainĩ wa njĩra. Baritimayo aarĩ mũtumuumu watũire ahooyaga ũteithio. 47Naake aigua atĩ nĩ Jesũ wa Nazarethi, akĩambĩrĩria kwanĩrĩra na mũgambo mũnene akiuga atĩrĩ, “Jesũ Mũrũ wa Daudi! Njiguĩra tha!”
48Nao andũ aingĩ maamũigua makĩmũkũũma, makĩmwĩra akire. Nowe agĩkĩrĩrĩria kwanĩrĩra, “Mũrũ wa Daudi! Njiguĩra tha!”
49Naake Jesũ akĩrũũgama akĩĩra andũ mamwĩte.
Nao makĩmwĩta makĩmwĩra atĩrĩ, “Ũmĩrĩria na ũũkĩre nĩaragwĩta.”
50Naake agĩteania nguo yake ya igũrũ agĩteng'era harĩ Jesũ.
51Naake Jesũ akĩmũũria atĩrĩ, “Ũkwenda ngwĩkĩre atĩa?”
Naake akĩmwĩra atĩrĩ, “Mũrutani, ngwenda o njooke kuona.”
52Naake Jesũ akĩmwĩra atĩrĩ, “Wĩthiĩre, gwĩtĩkia gwaku nĩkuo gwatũma ũhone.”
Ihinda o rĩu akĩambĩrĩria kuona, akĩrũmĩrĩra Jesũ.
Currently Selected:
Mariko 10: GKN
Highlight
Share
Copy
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.
