Gũcookerithia Maathani 23

Kũingatwo kuuma kĩũnganoinĩ kĩa andũ a MWATHANI

1“Na rĩĩrĩ, mũndũ mũrũme mũhakũre kana agatinio kĩĩga gĩake kĩa ũciari, ndakaaneetĩkĩrio atoonye kĩũnganoinĩ kĩa andũ a MWATHANI.

2“Mũndũ ũciarĩĩtwo nĩ andũ matahikanĩĩtie, o na mũndũ o wothe wa rũciaro rwake, o na angĩkorwo nĩ wa rũciaro rwa ikũmi, ndakaaneetĩkĩrio atoonye kĩũnganoinĩ kĩa andũ a MWATHANI.

3 # Neh 13.1-2 “Mũamoni kana Mũmoabi, kana mũndũ o wothe wa rũciaro rwao, o na angĩkorwo nĩ wa rũciaro rwa ikũmi, ndakaaneetĩkĩrio atoonye kĩũnganoinĩ kĩa andũ a MWATHANI. 4#Nda 22.1-6 Acio-rĩ, nĩmaagire kũmũtuga na irio na maaĩ rĩrĩa mũoimaga Misiri. Ningĩ nĩmaakomborire Balaamu mũrũ wa Beori wa kuuma itũũra rĩa Pethoru bũrũriinĩ wa Mesopotamia, nĩguo amũrume. 5#Nda 23.7–24.9 No rĩĩrĩ, MWATHANI Ngai wanyu ndaigana kũigua Balaamu; handũ ha ũguo, MWATHANI aagarũrire kĩrumi kĩu gĩgĩtuĩka kĩraathimo, tondũ nĩamwendeete. 6Matukũ moothe ma muoyo wanyu mũtikaanateithĩrĩrie andũ a ndũũrĩrĩ icio o na kana mũtũme matonge.

7“Mũtikaanathũũre Aedomu, nĩ ũndũ nĩ andũ aanyu. Ningĩ mũtikaanathũũre Amisiri, nĩ ũndũ kwĩ mahinda mwatũũraga bũrũri wao. 8Na rĩĩrĩ, ciana ciao cia kuuma rũciaro rwa gatatũ gũthiĩ na mbere no mũciĩtĩkagĩrie gũtoonya kĩũnganoinĩ kĩa andũ a MWATHANI.

Gũikaria kambĩ ya thigari ĩ theru

9“Hĩndĩ ciothe, mwĩ kambĩinĩ mahinda ma mbaara, menyereraai mũno mũtikaanahuutanie na kĩndũ o gĩothe gĩ thaahu. 10Mũndũ mũrũme angĩgeethaahia na hinya wake na ũndũ wa kũroota ũtukũ-rĩ, akoima athiĩ na nja ya kambĩ ĩyo aikare kuo. 11Namo mahinda ma hwaĩinĩ makinya mũndũ ũcio ethambe, na riũa rĩgĩthũa acooke kambĩinĩ.

12“Ningĩ nĩmwagĩrĩirwo nĩkũgĩaga na handũ nja ya kambĩ ha gũthiagwo bata. 13O mũndũ wanyu nĩekuuagĩre kĩndũ angĩenja irima nakĩo nĩ geetha hĩndĩ ĩrĩa ekwenda gwĩteithia akeenja irima, na arĩĩkia gwĩteithia agacooka agathika irima rĩu. 14Nĩmwagĩrĩirwo nĩgũikaragia kambĩ yanyu ĩ theru, nĩ ũndũ MWATHANI Ngai wanyu arĩ hamwe na inyuĩ nĩguo amũgitĩre o na atũme mũhoote thũ cianyu. Nĩ ũndũ ũcio mũtikaaneeke ũndũ o wothe ũtaagĩrĩire ũngĩtũma MWATHANI amũtiganĩrie.

Mawatho mwanya mwanya

15“Na rĩĩrĩ, ngombo ĩngĩkoora yume kũrĩ mwene yo yũke kwanyu nĩguo ĩĩhonokie, mũtikaanamĩcookie kũrĩ mwene yo. 16Ngombo ĩyo yahota gũtũũra o harĩa hoothe ingĩenda matũũrainĩ maanyu, na mũtikaanamĩhinyĩrĩrie.

17 # Alaw 19.29 “Gũtirĩ Mũisiraeli o na ũmwe, arĩ mũndũ mũrũme kana mũndũ wa nja, wagĩrĩirwo nĩgũtuĩka mũmaraaya wa hekaarũ. 18Ningĩ mbeeca cioneetwo na ũmaraaya itikaanatwarwo nyũmbainĩ ya MWATHANI Ngai wanyu nĩ geetha ihingie mwĩhĩtwa. MWATHANI nĩathũire maraaya ma hekaarũ.

19 # Tha 22.25; Alaw 25.36-37; Gũco 15.7-11 “Ũngĩgaakombithia Mũisiraeli o wothe mbeeca, irio, kana kĩndũ o gĩothe, ndũkaanamwĩtie uumithio. 20Ũngĩgaakombithia mũrũũrĩrĩ o wothe, wahota kũmwĩtia uumithio, no ũngĩgaakombithia Mũisiraeli, ndũkaanamwĩtie uumithio. Athĩkagĩra watho ũcio, nĩguo MWATHANI Ngai waku akũraathimage maũndũinĩ moothe marĩa ũrĩĩkaga wĩ bũrũriinĩ ũrĩa ũgũthiĩ kwĩgwatĩra ũtuĩke waku.

21 # Nda 30.1-16; Mat 5.33 “Hĩndĩ ĩrĩa wehĩta mwĩhĩtwa mbere ya MWATHANI Ngai waku, no mũhaka ũhingagie mwĩhĩtwa ũcio. MWATHANI ndarĩ hingo atagakũũria mwĩhĩtwa ũcio, na nĩ mahĩtia kwaga kũũhingia. 22Ũngĩaga kwĩhĩta-rĩ, ũcio ti wĩhia. 23No ũngĩĩhĩta na kwĩyendera, no mũhaka ũhingie mwĩhĩtwa ũcio.

24“Ũngĩtuĩkania mũgũnda wa mĩthabibũ wa mũndũ, wahota kũrĩa thabibũ o iria ũngĩenda, no rĩĩrĩ, ndũgaatuĩre imwe kĩondoinĩ nĩguo ũinũkie mũciĩ. 25Ningĩ ũngĩtuĩkanĩria mũgũnda wa ngano wa mũndũ, wahota kũrigitha ngano ĩrĩa ũkwenda na mooko, no rĩĩrĩ, ndũkaanamĩgethe na rũhiũ.

Currently Selected:

Gũcookerithia Maathani 23: GKN

Highlight

Copy