مرقوس 10
10
بوشانماق حاقّیندا
(متّا 19:1-12، لوقا 16:18)
1عئسا اورادان چیخیب یهودئیه بؤلگه‌سئنه، اوردون چایینین او تایینا گلدی. جاماعات گئنه اونون یانینا ییغیلدی و او، نجه کی، عادتی ائدی، گئنه اونلارا تعلئم وردی. 2فرئسئلر عئسایا یاخینلاشیب، اونو ائمتاحان اتمک اوچون سوروشدولار: «آیا کئشئیه ائجازه ورئلئب کی، آروادینی بوشاسین؟»
3عئسا جاواب ورئب اونلارا ددی: «موسا سئزه نه امر ادئب؟» 4ددئلر: «کئشئیه ائجازه ورئب کی، بوشانما کاغیذی یازیب آروادینی بوشاسین.»
5عئسا اونلارا ددی: «داش اورَکلی اولدوغونوز اوچون موسا بله بئر امری سئزه یازدی. 6لاکئن خئلقتئن باشلانیشیندان تاری اونلاری کئشی و آرواد یاراتدی.#10:6 یارادیلیش ۱:۲۷ 7بو سببدن کئشی آتا-آناسیندان آیریلاجاق و آروادینا یاپیشاجاق 8و ائکئسی بئر بدن اولاجاقلار، اله کی، آرتیق ائکی بدن یوخ، بئر بدن اولاجاقلار. #10:8 یارادیلیش ۲:۲۴ 9اونون اوچون تارینین بئرلشدئردئیئنی ائنسان آییرماسین.»
10اِوده گئنه شاگئردلر بو باره‌ده اوندان سوآل سوروشدولار. 11عئسا اونلارا ددی: «هر کس آروادینی بوشاییب اؤزگه بئر آروادلا اِولَنسه، آروادینین حاقّیندا زئنا ادئر. 12آرواد دا اگر اَرئندن بوشانیب اؤزگه بئر کئشی‌ائله اِولَنسه، زئنا ادئر.»
کئچئک اوشاقلار و عئسا
(متّا 19:13-15، لوقا 18:15-17)
13و کئچئک اوشاقلاری عئسانین یانینا گتئردئلر کی، اونلاری مَسح اتسئن. لاکئن شاگئردلر اونلارا آجیقلاندیلار. 14عئسا بونو گؤرنده قضبله‌نئب، اونلارا ددی: «قویون اوشاقلار یانیما گلسئنلر. اونلارا مانع اولمایین. چونکی تارینین پادشاهلیغی بونلار کئمئلرئندئر. 15دوغروسونو سئزه دیئرم، تارینین پادشاهلیغینی بئر اوشاق کئمی قبول اتمه‌ین اونا گئره بئلمز.» 16و اوشاقلاری قوجاغینا آلیب، اللرئنی اونلارین اوستونه قویدو و اونلارا برکت وردی.
وارلی جاوان
(متّا 19:16-30، لوقا 18:18-30)
17یولا چیخاندا بئری قاچا-قاچا عئسانین یانینا گلدی و اونون قاباغیندا دئز چؤکوب سوروشدو: «یاخشی اوستاد، ابدی حیاتی مئراث آلماق اوچون نه اتمه‌لی‌یَم؟»
18عئسا اونا ددی: «نه اوچون منه یاخشی دیئرسن؟ تاریدان باشقا هچ کس یاخشی دیئل. 19احکامی بئلئرسن: قتل اتمه، زئنا اتمه، اوغورلاما، یالانچی شاهئدلئک اتمه، هچ کئمی آلداتما، آتا و آنانا حؤرمت ات.»#10:19 چیخیش ۲۰:۱۲-۱۶ و تثنئیه ۵:۱۶-۲۰
20او آدام عئسایا ددی: «اوستاد، بونلارین هامیسینی اوشاقلیغیمدان رئعایت اتمئشم.»
21عئسا اونا باخیب اونو سِودی و اونا ددی: «سنئن بئر شیئن اَسکئکدئر. گت نه‌یئن وارسا، سات، مؤحتاج آداملارا پایلا، گؤیده ثروتئن اولاجاق. سونرا گل منه پِیرَو اول.»
22آمّا او آدام بو سؤزو اشئدن واخت پرئشان اولدو و قمگئن گتدی، چونکی چوخ مال-دؤولتی وار ائدی. 23عئسا اطرافینا باخیب شاگئردلرئنه ددی: «تارینین پادشاهلیغینا گئرمک وارلی آداملار اوچون نه قدر چتئندئر!»
24شاگئردلر اونون سؤزوندن حیران قالدیلار. آمّا عئسا اونلارا گئنه جاواب ورئب ددی: «اوشاقلار، تارینین پادشاهلیغینا گئرمک نه قدر چتئندئر! 25دَوه‌نئن ائینه دشئیئندن کچمه‌سی، وارلی بئر آدامین تارینین پادشاهلیغینا گئرمه‌سئندن داها آساندیر.»
26اونلار داها چوخ تعجّوب اتدئلر و اونا ددئلر: «بس کئم نئجات تاپا بئلر؟»
27عئسا اونلارا باخیب ددی: «ائنسانلار اوچون بو قیری‌‌مومکوندور، لاکئن تاری اوچون یوخ. تاری اوچون هر شی مومکوندور.»
28پطروس اونا ددی: «بئز هر شیی آتیب، سنه پِیرَو اولدوق.»
29عئسا ددی: «دوغروسونو سئزه دیئرم، اله بئر آدام یوخدور کی، منئم اوچون و ائنجئلئن خاطئری اوچون اِوئنی، قارداشلارینی، باجیلارینی، آناسینی، آتاسینی، اوشاقلارینی، یا دا زمئلرئنی آتمیش اولسون 30و ائندی، بو زاماندا، اذئیّتلرله یوز قات اِولر، قارداشلار، باجیلار، آنالار و آتالار، اوشاقلار و زمئلر، گله‌جک زاماندا دا ابدی حیات آلماسین. 31لاکئن بئرئنجئلرئن چوخلاری آخیرینجی، و آخیرینجی‌لارین چوخلاری بئرئنجی اولاجاقلار.»
عئسا اؤلوب دئرئله‌جه‌یئنی گئنه خبر ورئر
(متّا 20:17-19، لوقا 18:31-34)
32اونلار اورشلئمه گدن یولدا ائره‌لی گدئردئلر و عئسا اونلارین قاباغیندا گدئردی. شاگئردلر حیران قالمیشدیلار و اونون آرخاسیندان گدنلره قورخو دوشموشدو. عئسا گئنه او اون‌ائکی نفری یانینا چاغیریب باشینا نه گله‌جه‌یی باره‌ده دانیشماغا باشلادی:
33«باخین، اورشلئمه گدئرئک و ائنسان اوغلو باش کاهئنلر و دئن عالئملری الئنه ورئله‌جک. اونلار اونو اؤلومه محکوم ادئب قیری‌یهودئلره تسلئم اده‌جکلر. 34و اونلار اونا ائستهزا ادئب، توپوره‌جکلر و اونا شالّاق ووروب اؤلدوره‌جکلر. و او، اوچ گون سونرا دئرئله‌جک.»
35زِبِدِی اوغوللاری یعقوب و یوحنّا عئسایا یاخینلاشیب، اونا ددئلر: «اوستاد، ائسته‌یئرئک سندن نه خاهئش اتدئیئمئزی، سن بئزئم اوچون اده‌سن.»
36عئسا اونلارا ددی: «سئزئن اوچون نه ائسته‌یئرسئنئز ادئم؟»
37اونلار عئسایا ددئلر: «ائجازه ور سنئن جلالیندا بئرئمئز صاغیندا، بئرئمئز ده سولوندا اوتوراق.»
38عئسا اونلارا ددی: «نه ائسته‌دئیئنئزی بئلمئرسئنئز. منئم ائچه‌جه‌یئم پئیالا‌دن آیا سئز ائچه‌بئلرسئنئز؟ و یا منئم تعمئد آلدیغیم تعمئدده آیا سئز ده تعمئد آلا بئلرسئنئز؟»
39ددئلر: «اده بئلرئک.»
عئسا اونلارا ددی: «ائچه‌جه‌یئم پئیالا‌دن ائچه‌جکسئنئز و آلدیغیم تعمئدده سئز ده تعمئد آلاجاقسینیز، 40لاکئن صاغیمدا یا دا سولومدا اوتورماغا ائجازه ورمک منئم الئمده دیئل. بو یرلر او آداملار اوچوندور کی، اونلار اوچون حاضیرلانیب.»
41بونو اشئدن او اون‌شاگئرد یعقوب و یوحنّایا قضبلندئلر. 42عئسا اونلاری یانینا چاغیریب ددی: «بئلئرسئنئز کی، قیری‌یهودئلر آراسیندا حاکئم ساییلانلار، اونلارا حؤکمرانلیق ادرلر و اونلارین ریئسلری اونلارا آغالیق سوررلر. 43آمّا سئزئن آرانیزدا بله اولمامالی‌دیر. آرانیزدا بؤیوک اولماق ائسته‌ین، گرک او بئرئلرئنه خئدمت اتسئن 44و آرانیزدا بئرئنجی اولماق ائسته‌ین، گرک هامینین نؤکری اولسون. 45چونکی حتّا ائنسان اوغلو دا، اونا خئدمت اولونماق اوچون گلمه‌دی. او گلدی کی، خئدمت اتسئن و جانینی چوخ آداملارین یولوندا فئدئیه ورسئن.»
کور بارتئماوس
(متّا 20:29-34، لوقا 18:35-43)
46اونلار اَرئحایا گلدئلر. عئسا شاگئردلری و اونلارلا بؤیوک بئر جاماعاتلا اَرئحادان چیخاندا، تئماوس اوغلو بارتئماوس آدیندا کور بئر یولچو یولون قیراغیندا اوتورموشدو. 47بارتئماوس اونون ناصئره‌لی عئسا اولدوغونو اشئدن واخت قیشقیریب ددی: «داوود اوغلو عئسا، منه رحمئن گلسئن.» 48چوخ آداملار اونا آجیقلاندیلار و ساکئت اولماغینی ائسته‌دئلر. آمّا او، داها چوخ باغیریب ددی: «داوود اوغلو عئسا، منه رحمئن گلسئن.»
49عئسا دایانیب ددی: «اونو چاغیرین.»
اونلار کور آدامی چاغیریب ددئلر: «اوزولمه قالخ، سنی چاغیریر.»
50بارتئماوس عباسینی اوستوندن آتدی و یردن سیچراییب عئسانین یانینا گلدی. 51عئسا اوندان سوروشدو: «نه ائسته‌یئرسن کی، سنه ادئم؟»
کور آدام اونا ددی: «اوستاد، گؤزلرئم گئنه گؤرسون.»
52عئسا اونا ددی: «گت، ائمانین سنه شفا وردی.»
او آندا کور آدامین گؤزلری گؤرمه‌یه باشلادی و یولا دوشوب عئسانین دالینجا گتدی.
Currently Selected:
مرقوس 10: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.
